Pakauna

Patpatgek a kakabsatko, agtataripnongtayo bayat ti panagladingittayo iti ipupusay ti patpatgentayo a ni Presidente Russell M. Nelson. Agsaritaak kadakayo kas Presidente ti Korum dagiti Sangapulo-ket-dua, a kadayta a posision a nakanunonganak iti tunggal ward, stake, ken sapasap a komperensiatayo iti napalabas a pito ket kagudua a tawen.

Itultuloytayo daytoy a semiannual a sapasap a komperensia, a maaramid a kas naplano nga addaan kadagiti agsarita ken musika nga intuding ni Presidente Nelson kalpasan ti mano a bulan a panagsagana. Dagiti laeng nainayon ket daytoy, ti pannangipakaammo a panangilawlawagko, ken ti panagsaritak a kasukat ni Presidente Nelson iti panggibus a sesion iti malem ti Domingo.

Daytoy ti umuna a gundaway iti agarup 75 a tawen a pimmusay ti maysa a Presidente ti Simbaan sumagmamano nga aldaw sakbay ti sapasap a komperensia. Dayta ti nangtignay kadakami a mangplano no kasano a maangaymi dagiti napateg a miting ti panangidaulo mainaig iti sapasap a komperensia kasta met kadagiti sapasap a session ti komperensia, ken ti panangiyeskediul iti pumponna iti kabiitan a panawen. Naawatan ni Presidente Nelson ti pateg ti sapasap a komperensia tapno mangipaay iti direksion kadagiti Santo kadagiti sumarsaruno a bulan. Padayawantayo isuna babaen ti panangsurot iti naplano nga iskediul ti komperensia nga inaprobaranna.

Iti daytoy a panawen ti panagladingit, nakapagmitingkamin tapno mangipaay iti pammadayaw ken ni Presidente Russell M. Nelson sakbay dagiti mitingtayo iti sapasap a komperensia ket kalpasanna nayiskediul ti pumponna iti kabiitan a panawen kalpasan ti komperensia. Naaramid amin dagitoy nga addaan iti pananganamong ti pamilia ni Presidente Nelson ken ti Korum dagiti Sangapulo-ket-dua.

Gapu ta natudingankami amin nga agsarita iti sapasap a komperensia kayatmi nga usaren ti naituding nga orasmi a mangipaay iti personal a pammadayaw ken ni Presidente Nelson, ngarud kiniddawmi kadagiti agsarita iti komperensia a mangisarita laeng iti ababa a pammadayaw, a maipaayto dagiti naidetalye a pammadayaw para iti pumpon, nga inrugimin nga iplano.

Ti bukodko nga ababa a pammadayaw—a maitutop iti daytoy a komperensia ken kadagiti pammadayaw nga impaaymi idin—ket daytoy: Ay-ayatek ni Russel M. Nelson ken ad-adda ti pannakasursurok iti ebanghelio ken panangidaulo ti ebanghelio manipud iti nabayagen a pannakigayyemko ken pannakikaduak kenkuana ngem iti asinoman a lider a personal a naam-ammok. Isu ti pagwadantayo kas maysa a katulongan ken pasurot ni Apo Jesucristo. Paneknekak dagitoy a banag iti nagan ni Jesucristo, amen.