Ti Apo Papardasenna ti Aramidna

Nalatak ti panangirugi ni Charles Dickens iti klasiko a nobelana a The Tale of Two Cities babaen ti panangpatalgedna a “dayta idi ti kasasayaatan a tiempo; dayta idi ti kadadaksan a tiempo.” No ar-arigen pudno daytoy iti aldawtayo.

Agbibiagtayo iti panawen a ti “intero a daga [ket] nariribuk.” Ti balakad ni Presidente Russell M. Nelson nga agbalin a mamagkappia, kas pasurot ni Jesucristo, ket nagpintas a naipaganetget itay bigat babaen ken ni Elder Gary E. Stevenson. Daytoy ket maysa a nasken a paset ti panangpatanor iti panagkaykaysa, talna, ken panangagas para iti “kadaksan a panawen.”

Agbibiagtayo met iti “kasasayaatan a tiempo,” nga isunto ti ipaganetgetko. Ti Apo, iti pakauna ti Doktrina ken Katulagan, benneg 1, indeklarana ti kinaan-anay ti Ebanghelio ket “maiwaragawagto … agingga kadagiti ungto ti lubong.” Talaga a padarasen ti Apo ti aramidna iti panawentayo. Nasken a pagyamanantayo unay ti pannakapadaras, a napasamak ken mapaspasamak iti laksid dagitoy narigat a tiempo. Agbibiagtayon iti aldaw nga addaan dagiti pasurot ti Apo iti pribilehio a dumngeg iti timekna ken sumungbat nga addaan iti silulukat a puso ken panunot. Dagiti miembro ti Ti Simbaan ni Jesucristo dagiti Santo iti Ud-udina nga Aldaw, a naikumit iti Mangisalakan ken dagiti bilinna, agsapsapulda iti panggep ken nauneg a bukod a talna.

Iti nadumaduma a tiempo iti pakasaritaan ti Simbaan, adda dakkel a yaadu dagidiay simrek iti dana ti katulagan. Maysa ti kasta a panawen ti napasamak iti nagbaetan ti 1837 ken 1850. Sumagmamano kadagiti immuna nga Apostol iti naisubli a Simbaan ti Apo ti nagserbi kadagiti mision idiay United Kingdom. Dagitoy a mision ket nagresulta iti rinibu a kimmappeng iti Simbaan, ket idi 1850 ad-adu ti kameng ti Simbaan nga agnanaed iti United Kingdom ngem iti Estados Unidos. Iti dayta a panawen, inturong ti Apo dagitoy a Santo nga aguummong idiay Utah. Napasamak ti adu nga iyaakar, nasuportaran dagiti dadduma babaen ti panagpautang nga impaay ti Perpetual Emigrating Fund.

Magustuak ti salaysay ti isasangpet iti Salt Lake Valley ti adu a bilang dagiti kumbert manipud iti Inglatera ken Wales idi 1852. Sinabat ti Umuna a Panguluen ti grupo iti ngiwat ti Emigration Canyon a kinuyog ti Captain Pitt’s Band. Inladawan ida ti Deseret News kas “maysa a banda dagiti peregrino [agraman] dagiti kabsat a babbai ken ubbing, a magmagna, nasukog iti init, ken naparmek iti paniempo, ngem saanda a nabaybay-an; nalag-an ken tumpaw dagiti pusoda, a nalawag a naiparangarang gapu iti naragsak ken narag-o a rupada.”

Bayat a “lumabasda iti Temple Block, … rinibu a lallaki, babbai, ken ubbing, ti naguummong, manipud iti nadumaduma a paset ti siudad, tapno agkaykaysada iti nadayag ken naragsak a pannakapasangbay.” Nagsao kadakuada ni Presidente Brigham Young: “Bendisionannakayo koma ti Apo a Dios ti Israel. … Kanayon nga inkararagandakayo; rinibu a kararag ti naidaton para kadakayo, inaldaw, Kenkuana a nangbilin kadakami a mangummong iti Israel, isalakan dagiti annak ti tattao babaen ti panangikasaba iti ebanghelio, ken isagana ida iti yaay ti Mesias.”

Iti espiritu dayta a naragsak nga okasion, bay-andak manen a mangpasigurado kadagiti baro a kumbert ken agsubsubli iti Simbaan ti Apo: Ay-ayatendakayo; kasapulandakayo; kasapulannakayo ti Apo. Saandakayo man a mapasangbay kadagiti marching band, ngem ikararagmi a dagiti bendision ti langit ket umay iti panagreggetyo a rumang-ay iti dana ti katulagan nga agturong iti Dios Ama ken Jesucristo iti celestial a pagarian.

Adda nalawag nga ebidensia nga umad-adu ti mamati ken Jesucristo iti aldawtayo. Iti Ti Simbaan ni Jesucristo dagiti Santo iti Ud-udina nga Aldaw, adda nakaskasdaaw a yaadu dagiti kumbert. Iti napalabas a 36 a bulan, dumani 900,000 a kumbert ti kimmappeng iti Simbaan. Dagitoy a kumbert ti mangbukel iti agarup 5 a porsiento iti dagup ti miembro ti Simbaan. Naragsak a pasangbayenmi dagiti baro a miembro iti silulukat a takiag ken nalaus a panagyaman iti dana a piniliyo.

Dagitoy 900,000 a kumbert iti napalabas a 36 a bulan ti ad-adu ngem ti dagup a miembro ti Simbaan iti maika-110 nga anibersariona idi 1940, nga agdagup laeng iti nasurok a 860,000 a miembro. Daytoy ti tawen a nayanak ni Elder Jeffrey R. Holland, ni Elder Dieter F. Uchtdorf, ken siak.

Naggapu dagitoy nakasaysayaat a baro a kumbert iti tunggal paset ti lubong. Iti umuna nga innem a bulan daytoy a tawen, immadu iti nasurok a 20 a porsiento dagiti kumbert iti napalabas a tawen idiay Europa, Africa, Asia, ti Pacifico, ken Latin America. Iti North America nakitatayo ti 17 a porsiento nga immaduanna. Ti aramid ti Apo ket agtultuloy a dumur-as kadagiti nabileg a wagas. Dagitoy nga umad-adu a bilang ket nalawag a saksi a ti ebanghelio ket mangsagid iti puspuso ken mangbalbaliw iti biag iti sadinoman.

Iti aldawtayo, saanen nga agtataripnong iti maysa a lugar dagitoy napateg a kumbert. Gapu iti pammati ken pannakaikonsagrar dagiti miembro ti Simbaan, adda dagiti resources a maipaay a mangsuporta kadagiti kongregasion, a pakaibangonanda kadagiti kapilia ken templo, iti intero a lubong. Babaen kadagiti kasapulan a tulbek ti priesthood ken dagiti naited a resources, dagiti pangisalakan nga ordinansa ket magun-od itan iti kaaduan a paset ti lubong.

Sadino man ti pagnaedantayo, nasken dagiti agdama a miembro a pasangbayenda ti ginasut a ribu a baro a miembro kas iti inaramidtayo kadagiti Santo iti Inglatera ken Wales nga inladawak manipud iti nasapa a pakasaritaantayo. Magustuak ti sarita ni Elder Gerrit W. Gong iti daytoy a sesion a nangisuro kadatayo nga awan ti rumbeng nga agtugaw nga agmaymaysa iti emosion wenno naespirituan.

Sagrado a rebbengentayo ti mangawat ken mangpasangbay kadagiti baro ken agsubsubli a miembro. Bayat ti panangpadaras ti Apo iti aramidna, nasken nga ayaten, aywanan, ken pagserbiantayo dagidiay mangawat iti ebangheliona. Matulongantayo a mangbangon iti tattao ti Sion, a sadiay maymaysatayo a puso ken panunot, ken [agnanaed] iti kinalinteg.” Tapno maymaysatayo iti Apo, masapul a maymaysatayo iti imatang ti Apo. Amin a miembro aniaman ti petsa ti pannakabuniagda ket karaman iti pagrebbengan a mangpasangbay iti dadduma.

Ibalakadko kadagiti miembro ti Simbaan nga arakupentayo dagitoy napateg a napili a tattao a nangawat iti ebanghelio ni Jesucristo.

Insuro kadatayo ni Presidente Gordon B. Hinckley a ti baro a kumbert ket kasapulanna ti “maysa a gayyem, maysa a responsabilidad, ken panangtaraken iti ‘nasayaat a sao ti Dios’(6: 4).” Mabalin nga agbalintayo a maysa kadagiti gagayyem a mangipasigurado kadagitoy a kabbaro a nakumbert a pasetda ti kongregasion ken saanda laeng a sangaili. Matulongantayo ida a maawatan nga isuda dagiti disipulo ni Jesucristo a makapagserbi iti sabali ken mangawat kadagiti calling tapno agserbi. Dagiti agtutubo a kumbert ket rumbeng nga ibilangda ti panagserbi iti full-time a mision. Masapul a determinado ti amin a mangikagumaan nga agbiag a kas ken Cristo.

Adu ti kumappeng iti Simbaan babaen ti dakkel a bukod a sakripisio ken agkasapulan iti ayat ken suporta dagiti padada a Santo.

Kadakayo a baro wenno agsubsubli iti pammati, mabalin a maipasangokayo kadagiti karit. Agan-anuskayo. Sinuruandakayo dagiti misionario iti napateg a doktrina ken inlawlawagda dagiti katulagan ken ordinansa ti pagarian, a nailanad kadagiti nasantuan a kasuratan ken iti Preach My Gospel

Napateg ti panangawat kadagiti ordinansa ken katulagan ken panagtungpal kadagiti bilin. Ipamaysayo dagiti katulagan a kasapulan iti pannakaitan-ok. Ti ebanghelio ti mangaramid a posible ti pannakaitan-ok, a kasapulan ti panagaramid ken panangtungpal kadagiti sagrado a katulagan iti Dios. Malaksid iti panagbuniag, kumpirmasion, ken ti panangipaay iti Melchizedek Priesthood para kadagiti lallaki, dagiti katulagan a serkantayo ket maaramid iti templo. Kadagiti natay, tunggal maysa kadagitoy nga ordinansa ti pannakaisalakan ket maaramid laeng iti templo. Maitunos iti daytoy, ti panangisagana iti bagiyo para iti templo ket rumbeng a madagdagus a gandat.

No dadduma, mariknayo a saan nga umdas ti ammoyo. Ti pannakaammo iti ebanghelio ket maysa a dakkel a bendision nga in-inut a magun-od iti panaglabas ti panawen ngem saan a pangisalakan nga ordinansa. Ti ebanghelio ket saan a pangsubok iti pannakaammo. Inkari ni Presidente Russell M. Nelson: “No nainkararagan nga agadalkayo iti Libro ni Mormon iti inaldaw, makaaramidkayto iti nasaysayaat a desision iti —inaldaw. … Bayat nga utobenyo no ania ti adalenyo, maluktanto dagiti tawa ti langit, ket maawatyonto dagiti sungbat iti bukodyo a saludsod ken direksion iti biagyo.”

Mainayon pay, tunggal tawen kas panagsisinnublat ti kurikulum kadagiti miting iti Domingo sakupenna ti Daan a Tulag, Baro a Tulag, Libro ni Mormon, ken ti Doktrina ken Katulagan. Iti agangay mariknayo a nataltalekkayo bayat ti panagdur-as ti pannakaammoyo iti ebanghelio. Ti masansan a panagadal kadagiti nasantuan a kasuratan ket bendisionannanto ken pabaknangenna ti biagmo babaen ti panangpaunegna iti kumbersionmo iti ebanghelio ni Jesucristo.

Ti panangsursuro iti natarnaw a doktrina ni Jesucristo ket maysa a tungpal biag a pananggun-od, agpadpada iti pannakaawat iti doktrina ken panagbiag a kas iti biag ni Cristo. Dagiti napateg a katulagan ket mangipaay ti maysa a pagbatayan nga iladawantayo a kas dana ti katulagan. Dagitoy a pagbatayan ket sibibileg nga insuro ni Presidente Nelson. Amin a miembro, nangnangruna dagiti baro ken agsubsubli, ket mabendisionan babaen ti panangadal ken panangusar kadagiti naimpadtuan a mensahena maipapan kadagiti katulagan ken ti dana ti katulagan.

No mangikeddengkayo iti maysa a gandat a maikari a maawat ti tunggal katulagan a kasapulan para iti pannakaitan-ok, addakanto iti dana nga agturong iti celestial a pagarian. Ti templo ken dagiti ordinansa ti templo ti masapul nga ipamaysatayo. Ti kaaduan a tulag ket mabalin a magun-odan ti tunggal indibidual. Ti maysa a katulagan, ti agnanayon a kallaysa, ramanenna ti panagkaykaysa ti reggetyo iti maysa a kadua. Nasken a panggepyo a tun-oyen ti agsapul iti dayta agnanayon a kadua.

Nupay kasta, dikay maupay no saan a posible ti agnanayon a kallaysa itoy a panawen. Insuro dagiti propeta nga awan ti bendision a maipaidam kadagiti matalek a miembro a mangtungpal kadagiti bilin. Maysa a propeta iti Libro ni Mormon, ni Ari Benjamin, ti nagsayaat a nangibaga iti dayta: “Dagidiay mangtungpal kadagiti bilin ti Dios … mabendisionan iti amin a banag, … ket no … napudno[da] agingga iti panungpalan … mabalinda ti makipagnaed iti Dios iti kasasaad ti di agpatingga a kinaragsak.”

No saanmo pay a naammuan, maammuamto a saan a perpekto dagiti miembro. Ti naipalgak a doktrina ilawlawagna a bayat ti panagnaedtayo ditoy daga, agbidduttayo. Agbibiagtayo iti di perpekto ken managbasol a lubong, saan a celestial a lubong. Daytoy a biag ket tiempo ti pannakasubok, a kanayon nga adda gundawaytayo nga agbabawi ken mangpaneknek iti bagitayo.

Mariknatayo amin a ditayo maikari bayat nga ikagumaantayo ti agbalin a kas ken Jesucristo. Ipalubos ti Pannubbotna nga inaldaw nga agbabawitayo no agbidduttayo. Kas iti kinuna ni Nephi, sabali pay a propeta iti Libro ni Mormon: “Masapul nga agtultuloykayo a sitatalingenngen ken ni Cristo, nga addaan iti naan-anay a kinalawag ti namnama, ken ayat ti Dios ken iti amin a tao. Gapuna, no agtultuloykayo, nga agpennek iti balikas ni Cristo, ken agibtur agingga iti panungpalan, adtoy, kuna ti Ama: maaddaankayto iti biag nga agnanayon.”

No utobentayo dagiti karit iti aldawtayo, masapul a laglagipentayo a ti Mangisalakan, bayat ti naindagaan a panagserbina, nagbiag met kadagiti nariribuk ken naranggas a panawen. Saan a dagiti karit iti politika ti aldaw ti pokusna; maipapan daytoy iti kinaperpekto dagiti Santo.

Saan a pulos a nalaka ti panangsurot iti Mangisalakan ken iti doktrina ken pannursurona iti lubong a kanayon a nariribuk. Saan a nalaka para iti Mangisalakan ti agbaliwbaliw a lubong kabayatan ti panagbiagna kas tao, ket saan met a nalaka para kadatayo. Imbag laengen ta adda propetatayo, tapno maipaayna kadatayo ti panangiwanwan iti inaldaw. Agtultuloyto ni Presidente Dallin H. Oaks iti dayta a nabileg a naespirituan a tawid.

Paneknekak a ti doktrina ti Ti Simbaan ni Jesucristo dagiti Santo iti Ud-udina nga Aldaw ket agnanayon ken pudno. Paneknekak nga awan duadua a sibibiag ni Jesucristo, ket gapu iti Pannubbotna, mabalintayo ti agmaymaysa Kenkuana. Iti sagrado a nagan ni Jesucristo, amen.