Telungalk: Chais el mora Beluulechad—Tekingel a Dios

Tial klou el longdibel er a Ongeteruich el buil 2025 a oterkeklii a mong meng Okedei el kelsel sel sbedel a “Telungalk: Chais el mora Beluulechad.” Ngokiu ra chedaol kdmeklel, e tial chais, lobengkel a mlocholt el tekoi, a milketmokl el mo “omtebechel e melisiich a telungalk el ngii a ultebechel el uchetemel a bua.”

A re bek el chad a tilobed er a telungalk, a blem chedil, chedam, ngalk el redil, ngalk el sechal, ngelekel a ngelekel, chedam me a chedil, ochedal a demal, okedmelel, odam, odos, malechub a re ngelekir a ruchad. Sel lorechudel,e kid el rokui, el uai sel lulterkeklii tial chais, “a betik er a rengrir el reng el sechal malechub eng redil el ngelekir a roungalk el ngara babeluades … [loba] chedaol teletelir me a osiolir.”

Sera ak kot el mokedong ek mechedaol el mo apostol ra 2015, e ak mluklatk, “Tial chais er chelechang a ngar kau. A ngklem [melutk el mora ikel tekoi ‘Chelechad er a re Teruich ma terung el Apostol’ el telechull er ngii] a ngar tiang. Molchesuar e molisechakl er ngii el ua le kloklem.”

Ng betik a renguk er sel chisel a telungalk. Ak mla meliuekl er a beluulechad er a Africa el mora Australia ma bek el basio louchais er a ngerchelel a telungalk er sel luldesuel a Dios el kirel el diak a ulebengelel. Sel chais el mora beluulechad a ngarngii a chedaol luchelel, meng kired el mengetmokl er ngii loba omengull lokiu a tekingel a Dios.

Molbedebek, e rodam ma rodos, el ua ikel kullekoi ra tara klou longdibel el dilechor er tiang e kmo a, “Tekoi a meklou a belkul.”4}

Mei mek beskemiu a bebil ra tekoi el kirel sel chais el ual techel tial klumech er a ikel doumerang.

Sera 1994, tal rak ruchei er sel chais el mora beluulechad ra le mocholt, ea Chelechad er a re Teruich ma terung el Apostol a mle chadecheduch el kirel a beluu ma kaberment el mla mo chacheroid er a llechul a Dios el kirel a telungalk, chebechiil, me a blekerdelel a chad. “Eng di ngii a dimlak el ulebengelel a ikel ki miles,” a President Russell M. Nelson a uriul eng silodii. “Aki mes aikel lureor er a bek el beluu el mengeroid a ikel meral lutebechelel me a olitechel a tekingel a delbois lomeruul. Aki miles aikel rau el reng er a blekerdelir a re sechal me a redil. Aki mesang el rokir el merael mei.”

A Reteruich me a terung a mle blak a rengrir el mengedmokl er tial babier, el tuobed el chais el kirel a ledechor ngii a Ikelesia el kirel a telugnalek. Seikid el rak, tirkal Apostol, re omes a ues el mlo kedong er a Dios, a kiltmeklii a subed el kirel a telungalk. A President Dallin H. Oaks a liletkii er a loluluuch e lobult el mora Rubak el kirel a “ngera [te] mo melekoi e mekerang [sel] bo losaod er ngii.” Te uldersii el mora Kot Presidency el mle—President Howard W. Hunter, Gordon B. Hinckley, ma Thomas S. Monson— me bo lomes er ngii.

Sesei el buil ruriul er a mle Ongedei el buil 1995, ea President Hunter a mlo smecher, me a President Hinckley a mlo Ongeteruich ma eim el President er a Ikelesia. Sel chais el mora beluulechad er chelechang a ngara chimal. Oingerang sel moungil taem el modars tial klumech el mora Ikelesia? Sel taem a mlei ra uriul ra elolem el buil.

Telkib el taem ruchei ra Ongetiu el buil 23 el kebesengil er sel klou el miting ra redil el mle uchei ra klou longdibel, ea President Hinckley me a re counselors er ngii a mlo kebtech el kldibel lobengkel sel Relief Society General Presidency. Tirkel rodos, eldi ua re Apostol, a mle ngarngii a mengesang a uldesuir el kirel a redil me a telungalk. Te mle kltmokl el kirel a merael mei el miting el kirel a re telungalk.

A President Hinckley a mle temel el mo mengedecheduch er tirkal redi er sel ongdibel. Ngii a milebedebek er a mo teletelel a cheldechedechal. A omerolel a cheldecheduch er a lorael mong, eng nguldersii a ngakl el morsel beches el kltmokl eng di dirkak el tobed er a buai el “Telungalk: Chais el mora Beluulechad.” Tial miting er a redil eng mle ungil techall el ktmeklii tial luldasu el mesubed el kirel a telungalk?

A General Relief Society President el Elaine Jack a silodii ruriul: “Ng dimlak ki modengei el kmo ngera tial Chais el kirel a Telungalk er sel taem. … A [ki] sebecham el mesa er sel dai er ngii, aki omelchesiu el kirel a telungalk … a mo ungil teletael. … Ak milchesuar el kmal mle ungil el mla er ngii a rechedal a Chelchad er a re Teruich ma terung el melai a ocholt.”

Sel miting ra Relief Society er sel Sabadong a reksii. A President Hinckley a ultebedii tial chisel a telungalek lolab a ikal meklou a belkul el tekoi “Meng kmal betekngang a chelbirukel el bleiull ra lekong meral tekoi el modars el lekong klemerang, el betok el cheleblad el kirel a blekeradel me a meral tekoi, el kmal betok el lolechau e olengibes me bol loltekau a ikal lomekidokel tekingel a beluulechad, maki melchesuar e mellach e omeklatk … ra ultebechel, llach, ma omeruul el melutk el kirel a telungalk el re profet, romes a ues, me a ocholt er tial Ikelesia a blechoel lomeklatk er a reksii el rokir.”

Ngii a mocha oiuii sel chais el mora beluulechad el rokir. Di ua Rubak ra le dul kmo, “A letobed er a ngerek me a letobed er a ngerir a re mesiungek, me ng diosisiu.”

Sel chais el mora beluulechad a kmul kmo, “A telungalk a cheledaol er a Dios.” Ng soak tial bleketakl el tekoi. Sel chais a okedong el kired el mo kiei er tial klengar e blechoel el medengelii sel chedaol ngar kid mesel diak a ulebengelel ngar medad A President Nelson a ulisechakl: “Kau a meral ngelekel a Dios er a reng. … Lak bol rrau a rengmiu el kirel: A techelem a chedaol. Me kau el blak a rengum losiik, a Dios a mo meskau a telkib er ngkel kau a sebechem el mo uai ngii.”

Sera ltobed, tial chais el mora beluulechad eng dimlak lungil ra uldesuir a rubdois el ngara beluulechad. Dimlak er sel taem. El diak er chelechang. Ngarngii er tirkel chad loutitekangel er tial subed el kirel a telungalk, chebechiil, me a re blekerdelir a rsechal ma redil. A re bebil a melekoi ma Ikelesia bol ngebetii, ngedechii, lmuut el rulii, malechub e bai le nguu tial chais locheueklii.

Tial chais el mora beluulechad a, uai a ikel dilung a President Hinckley, nge llach, e rodam ma rodos. A ikel osisechakl a diak el cheluid ngdi kmal lungil selmechokl lokiu a rolel a Rubak mesel rolel a Telbilel. A ikel osisechakl er tial chais a mlocholt el mlara Rubak el Jesus Kristo el mora re Apostol er Ngii er sel taem me chelechang. Tiang a Ikelesia er Ngii; Ngii a kiltmokl a ikel klemerang el kid a kiei loltirakl.

Bebil er kemiu a mo melbedebek el kirel sel chais e melekoi, “Tiang a diak lungil el kirek.” “Ng kora diak dolchesuar.” “A telungalk er ngak a diak el uai sei.” “Ng diak el kirek.”

Mo er tirkel metacherbesul ra rengrir, bo modengei el kmo kau a ngelekir a re ngara babeluades, tebedechel a telungalk er a Demam ra Babeluades. Ngdiak a ungil medengelkau malechub el lulis el kerkikl er kau elmo uai Ngii. Mobult e lmo re Ngii; mocholt a rokui el ngara rengum el mo er Ngii; moumerang er Ngii me a ikel Telbilel. Kau a ngarngii a telungalk er kau el ngara Osobel, Jesus Kristo, el betik a rengul er kau. Ngii a mlei er a beluulechad el mo melngakireng el kirel a kengtid e mo oltekau a berredel a telmelled ma ikel mekngit el sils er kid. Ngii a medengei a ikel mchelbangel e omelchesiu. Mobult elmo re Ngii; moumerang er Ngii el mo odureklii a Chedaol Reng el mo obengkem; tikuaou, e omtebechel er kau. Mo melchesiu ra beltikelreng er Tir el “lomerek er ngii el meliuekl el mora rengrir a rengelekel a chad; … el ngii a kot el kesiokel er a rokui el tekoi … e kot el ngaruchei el deuil a reng.”

Tirkel rokui el Apostol er a Rubak a kmal betik a rengrir er kau. Aki meluluuch el kiriu e osiik a ulekrael ra Rubak el kiriu. Kiei lobengkemam. Kau a ngar ra chetiteuokel el taem sel sekum ma cherarou osiik el rulau el mo chederdelel. Lak ke bo mecheuid. E alsekum meke milcheuid, e mluut el mei. A chimomam a blerk el kirem, me tirkel rebebil el betik a rengrir er kau.

Sel chais a dmu el kmo“A chedam me a chedil a ngar ngii a chedaol ngerchelir el mo omekeroul er a rengelkir loba beltik el reng me a llemalt.” A Babier ra Mormon a meskid a ongerung el sioning el kirel tial klemerang. Ngarsel kot el bades er a kot el bliongel, e kede menguiu, “Ngak, el Nephi, el mlo ngelekel a kedung el chad me a bechil.” Te telang er kid a mla muchel er a Babier ra Mormon—e mla lmuut lomelekl e omelek—e okiu er sel lomeruul a mla otirakl a ikel tekoi el dobedebek? Mosiseb el mora rengmiu.

A kot el tara soak el tekoi el ngar tial chais a tiakid: “A deureng er a chelsel a telungalek a sebechel mo er ngii alsekum eng ultuil er a osischeklel a … Jesus Kristo.”

Ng techa diak el soal el mo ungil a rengul?

E ngera ikel losisecheklel a Jesus Kristo? Lmuut el ngara chelsel tial chais: “Klaumerang, nglunguuch, ouchel reng, klausubes, omenguul, beltikelreng, klubechub, ureor, me a ungil ra bedenged el klekool.”

Ng techa diak el bo lungil a klengar er ngii a oltaut a ikal klemerang el osisechakl? Ng diak a ta er kid el mo ungil klebechel; ngdi kid a sebeched el otirakl a ikel lomekelomes el tekingel a President Hinckley: “Bo er sel ktul rebab el sebechem.”

Kede menguiu er sel chais, “A re chedam a omtebechel … lokiu ra beltikelreng ma llemalt,” ea re “chedil sel kmal ngerchelir a omekeroul er a rengelekir.” Omtebechela diak el belkul a kmo ke mengederedel, ea omekeroul a diak el belkul a kmo kedi olengeseu. A Dios a mla mesterir a re sechal ma redil a kakerous ngdi ngosisiu e meklou el ngerachel el ketkakl lerung.

Mei me kuchais er a tekoi el kirek.

A bechik me ngak a mlo medengei lungil a kim dak loureor ruriul er a tara klebesei el ngak a tilbir el kutmeklii a tekoi el dimlak kuchais er ngii. Ng mlo rrau a rengul er a blekerdelek, ng kilbetiekl, el ngara uai sei el chetiteuokel el tekoi. Nguriul, eng ngilai chimal locha er a ongelngelek e melekoi, “Ron, kulengit, meng diak ke mluut el rulii tilchal tekoi el me rengak.” Seikid el me re chelechang eng ungil merael a rokui el tekoi ra delongelam.

Ke de metik el ngara chisel a telungalek: “A rechedam me a rechedil a kirir el kaukledem e kaingeseu el tabesul a ngerchelir.”

Osisiu a tekoi el ngarngii a ututelel. A ikal betok el rak, ea Sister Rasband me ngak a mla oureor el dmak er sel chais el mora beluulechad louchais er ngii el “chedaol ngerchelam,” aki mla mebii a osisiu e selmosem el chebechiil. Me a derta er tirkal ngelekam a mla mo bechiil, ea Sister Rasband me ngak a melmolm el omeklatk er tir me a re becherir el mekerang a le dak el kaukledem.

Sel de kiei lomes eldi tang osenged el bedul a klebkelel a Dios, e kede mo kakull e kaingeseu er a delongeled. A ikel chedaol lolchotel a llemalt a mekrolid el mo ultebechel er a chelsel a klengar rekid, telungalk er kid, me a chelsel a buai.

A Demad er a Babeluades a mla meskid sel chais el mora beluulechad el kirel a telungalk el ngosukid el mo remei el mo re Ngii, el mo ngosukid el mesuub e mo mui er a beltikelreng, klisiich, moktek, me a diak a ulebengelel klaudengei. Meng renguk el rokir, ea kulengit er kemiu me mkiei er bita re Ngii ma Betik er a Rengul Ngelekel. Ak yaksok sel bom uai sei, ea Reng a mo meklemesau e mekrolau e ngosukau el melchesuar ra chelsel a rengum a ikel telbiil ra budech el mlar Tir el yaksok er a budech el ngii a “chengelakl ra rokui el modengei.” Loba ngklel a Jesus Kristo, amen.