Bliull er a Kldung er a Ulserchakl el Reng

Sera May 2021, er a losarch er a ureor lomekbeches er a Salt Lake Templo, e a President Russell M. Nelson a mlo mechas a rengul er a blakerreng er a ruchelel a ikelesia el tir, a dimlak a kmal klekedekellir me a diak el mesim el klaumerang, a milkedecherur tial chedaol okedecheraol, el meringelchad e cheledaol a belkul el ngii a mle mesisiich a delecherul el melai a rak. Engdi, ngii a dirrek el miles a mla mengas, ra omerolel a taem eng mla morngii a metetoech er a delongelel ra di mla uchetemel bad me a sementel el dikeal mesisiich, el olechotel a kmo ngousbech a omelisiich er a ikal klekedekellel.

A betik er a rengud el profet er seikid el taem eng ulsisecheklid el kmo meng uaisei mlo kired el oltaut a meklou el ureor el mo melisiich er a uchetemel a templo me bol sebechel dechor lomtok a kereor, me kid meng kired el mo kot el mesisiich—el locha dirkak a tang mebo de uaisei—el mo olsiich a chedaol uchetemed er a Jesus Kristo. A klemechel el diak ke dobes er ngii, el ngii a mileskid a erul dmolech el ker el kirel a ultebenged el di kired: “Ng ua ngera klisichel a uchetemem? E ua ngera lomelisiich er a klaumerang me a klemedengei er kau er a ebangkelio a omousbech?”

A ebangkelio er a Jesus Kristo a omeskid a chedaol ulekrael me a bedochel omeruul el mo torbengii a ngesul chedaol klengar er kid, e mesisiich lolsiich er a uchetemed e ngosukid el mo diak a chemersel a klaumerang me a kal bo lolemesim a klaumerang me a klemedengei er kid er a ikel chedaol klemerang er a ebangkelio. A tal chemolt el suobel mo kudmeklii tial tekoi a ngara section 12 er a Doctrine and Covenants, tia ocholt el ngiluu a Prophet Joseph Smith el mora Joseph Knight, el melemalt el chad e meral ngara rengul el osiik elmo ungil medengelii a soal a Rubak, el diak el dil bora ngedechel a bedengel ng bai mo dechor e diak lolmesim el chedal—el mesisiich el di ua tang er a babeluades. A Rubak a millekoi el kmo:

Mora rokui el tir a sorir el mo oltobed e meleketek er tial ureor;

“Ng diak a sebechel molengeseu er tial ureor ngdi kirel loba klengariou el reng, mui er a beltik el reng, oba klaumerang, ongiil, ma dmolech el beltikerreng ma ulserechakl reng er a rokui el tekoi, ma ngii dil ngerang el modars el mor ngii el kirel lomekerreu.”

Tial omekrael el ngara Osobel, a llechukl ngara ikal chedaol ocholt, a omeklatk er kid el kmo a ulserchakl reng a usbechall el olisiich meng mo medecherecher a dodai el ngara Jesus Kristo. Ng bedengel a kldung el kired lobang, ng diak el dil bora re mlokedong el mo mesiou ng dirrek el bai mora rokui el tir a riruul a chedaol telbiil lobengkel a Rubak e kongei el mo oltirakl er Ngii el blak a rengrir. A ulserchakl reng a oldekdak el moungil e smisiich a bebil er a blekerdelel a Kristo el mildung el ngar tial ocholt: ngariou el reng, klaumerang, ongiil, dmolech el beltikerreng, me a mechellins el beltikerreng el ngii a omaoch loak Ngii. A lmuut el tang, a okedbechel a ulserechakl reng a klou a rolel lomekerreu er kid er a kekerei eng di blechoel ngarngii el ngesul chedaol klengar el mokdubech lokiu ongetikaik er a beluulechad el ngii a choitechetur a uchetemed er a Jesus Kristo.

Ngara ikel blekeradel el bliull er ngii a re meral chedal a Kristo, ea ulserechakl el reng a kltukl el olechotel Ngii el Osobel, el mekreos el redechel a Reng, el medechel mora rokui el tir a nglai a chesmerir el kirel a chedaol ongetikaik. Tiang a kldung el rulii a rengud meng mo tabesul, e merech a soad me a ikel domelchesiu loba llomes ma kellechakl reng. Ngara chedaol llechukl, ea ulserechakl reng a mocholt el tara klou a ultutelel tebedechel a bekesed el moungil er a chedaol lomeroled, el ngoikid elmo bedul a kllouerreng, tetelel a kledios, me a klechubchub el omiich el moungil a domelchesiu, tekinged, ma omerelled.

A rechedal a Kristo el melasem lomekdubech er tiaikid el Di Uai a Omerellel a Kristo a dimerael el mo ngariou a rengrir e mui er a beltikerreng. A klou el budech a mo rengii ra rengrir, me tir a mengai el mo meduch el sebechir losarch a ngasechereng, melisiich a kllouerreng, e meruul el mora rebebil loba kelou reng, melengmes, e mengull, molmuut ra lolokou eltel a mesisiich el cherarou. Te melasem el diak el dil keberuul el meruul a tekoi e bai melilt el mo meruul lolab a chedaol llomes, el mukrael lokiu a delmedemek el reng me a chelellakl el ongetikaik er a Chedaol Reng. Tiaikid el teletael, e tir a modiak el mechitechut el mora ngesul a chedaol klengar e leng, uai ke losisecheklel a Apostol Paulus, te medengei el kmo tir a sebecherir el meruul a rokui el tekoi lokiu a Kristo, el ngii a melisiich er tir ngii mesel chelbangel ongarm el ngii a sebechel sirars a klaumerang er tir er Ngii.

Ngar sel babilengel mora Titus, e a Paulus a ouchais a chedaol osisechakl el ngii a ulsbechall er tirkel chad el sorir el mo omtechei er a Osobel e meruul a Soal loba klaumerang me a blakerreng. Ng dilu el kmo tir a kirir lungil mora rechad, diak el chetelaol, melemalt e chedaol—ng blekeradel el ngii a bleketakl el olechotel a klisichel a ulserechakl reng.

Engdi, a Paulus a omeklatk el kmo ng kirir el mo “diak lou merredel er tir, diak el bekosengasch a rengum, … [e] diak el sekodechelakl.” A uai kang el blekeradel a omtok er sel uldesuel a Osobel e tomelii a meral ulekerulel a chedaol klengar. Omesodel er a chedaol llechukl e a, “diak loumerredel er ngii” a chad el ngii a diak el kengei el mo meruul a tekoi loba klimang me a keldidai el reng; “diak el bekosengasech a rengul” a chad el diak el dil ngera e bol kedeb el checherd a rengul ; ea “diak sekodechelakl” a mora chad el ngii a oldngakl a klautok, delcherechel reng, uldechelakl el ngara omelekoi, bedenged, ma lechub a rengul a chad. Mesel dolasem el melodech a blekerdeled loba klaumerang me a klengariou el reng, e kid a sebeched el mesisiich el delalem er sel lultebechel el bad er a krasia er Ngii e merael el mo mechellins e kldmokl el dongu er a chedaol el Chimal.

Sera kumdasu el kirel ousbech el omekdubech er a kldung er a ulserechakl reng, e ak molotkii a tekingel a Hannah, el delal a profet Samuel—el redil el mesisiich loba klaumerang, ngii me sera uriul er a klou el ringel, a uldersii a chelitakl er a omereng el saul el mora Rubak. Ng dilu el kmo “Lak monglou a ngeriu eldi kemiu el chemat er kemiu; le kom mekedidai a omelekingiu: e le Rubak a Dios eldi medengei, meng oukerrekeriil a ikel rokui el loruul a rechad.” A cheliteklel a diak el dil nglunguuch el merkong—tiang a olechotel-el ngii a olengit el mo meruul loba klengarioul reng, ulserechakl reng, el tabesul. A Hannah omeklatk er kid er sel meral chedaol klisiich a diak doltobed lokiu a mereched lomeruul malechub a mekngit el tekoi e bai okiu a ulserechakl reng, ungil blekeradel el lomdid er a llemesel a Rubak.

Ngou mesind ra taem, ea beluulechad oldanges a blekeradel el mengai er a delcherecher, klimang, kedeb el reng, me a uldirekork, e blechoel mesebechakl a ikal blekeradel lokiu a berredel a klengar er a bek el sils me a odubech el lomeklemalt e omeksemeriar ra rechad. Sel dochib a medad er a kldung er a ulserechakl reng e orrenges mengoit er a delmedemek e melmedm el odbechel a Chedaol Reng er a teleteled a doruul a tekoi me a dongedecheduch, eng mo beot er kid el ruebet er a chelsel a bedeklel a cherarou, el ngii a rullid el kmu tekoi e ngmai a blekeradel el kid a mo imis el ouchel kirel, a le obengterir a rechad, telungalek, malechub a deleuill er kid er a ikelesia. A ebangkelio er a Jesus Kristo oleker er kid el mo ouedikel kirel tial kldung tokuni sel temel ongarm, e le a ikakid el taem a sel mera el teletelel a chad a mo chemolt. A Martin Luther King Jr. a mle ta el du el kmo, “Sel ngii a meral teletelel a chad a diak el sel delcherul er sel taem el mechelaod e ungil besul, ng bai sel delcherul er sel taem el ngara ongarm me a klautok.”

Sel de chad er a telbiil, e kid a mokedong el mo kiei lolab a rengud el mesisiich el delalem er a chedaol yaksok el kid a mla remuul el mora Rubak, e blak a rengud el oltirakl er sel teletael el Ngii a mla muchelii lokiu a cherrungel Okesiul. Esel de nguu er ngii, Ngii a yaksok “Ng klemerang, ng klemerang, me ak melekoi er kemiu el kmo, tiaikid osisecheklek, me ngikei el mo omekedechor er bebul tiang, omekedechor ra bebul a beduk, me a rengedel a beluu ra ngau a diak el sebechel mo omtok er tir.”

A osisecheklel Osobel er a beluulechad a mle tengetangel lokiu a kldung er a ulserechakl reng er a rokui el Blekerdelel. Ngokiu a cherrungel el Okesiul, e Ngii a ulsisecheklid el “bo le klou a rengum er a chelsel a ringel, lak moutoketok er a routoketok er kau.” Sera lolisechakl el diak el kirel mo kesib a rengud lokiu a klautitekangel me a klautok, e Ngii a dilu el kmo, “Ng kirem el mouchel a rengum, e di mo uai ea kekerei el ngalek.” Ng dirrek el ulsisechakl el kmo a rokui el sorir el mei er Ngii el meral ngarngii er a rengrir a kirir el mo tabeserir el mo er tirkel kesib a rengrir er tir a lechub e tolab a kmong ngerang el omtok er tir. Ng uleba ulserechakl me chubechub el reng, e Ngii a ulterkeklii el merkid el sel loumekngit el merkid loba delcherechel el reng, diak el lungil, diak lolengmes, ma lechub e di locheueklid, ea blekokouii er Ngii a diak el bol cheroid er kid, me a telbiil el budech er Ngii a diak el mengai el mocheroid er a klengar er kid.

Sesei el rak ra mla memong, ea bechik me a ngak a mlo techellam el oldingel er a re blak a rengrir el chedal a Ikelesia er a Mexico City. Te betok er tir, el blel tal chad malechub ngokiu ra rebetik er a rengrir, a mla soiseb er a diak el mesaod el ringel, uldimukl ra omdechem ra rechad, omekoad, me a lmuut el bebil ra omeruud a reng el kereor.

Me sel domes a mederir tirke el Santo, eng dimlak kimues a ngasechereng, omechumel reng, malechub a sorir el melaitechei. A ki bai, miles a klengariou el reng. A ikel losengir, el lou chelangk ra klengiterreng, a emolt el meral sorir el nguu a omekungil me a ongelaod. Meng uaisei el rengrir a mlo meringel, tirka el Santo a ulemakes el bedul uchei loba klaumera er a Jesus Kristo, el melilt me a ikal ringel lak bol chemersel a klaumera er tir malechub bo luchul e lolmesim klaumera er tir er a ebangkelio.

Sera rekil tial chedaol ongdibel, ea ki mlo outkeu er a derta er tir. A bek el klaiuereked el chim, bek el kebechull a mlo sioning el kmo ngokiu a ngesou er a Rubak, eng sebeched el melilt el mo onger loba ulserechakl reng el mora ikel mengesang a rengud me a ringelel a klengar. Sel dil muk er tir ma okesiul a delmedemek el reng a olechotel ongit el mo merael er a rolel a Osobel loba ulserechakl reng er a rokui el tekoi. Aki ulemelchesiu el ua kim teloi er a reanghel.

A Jesus Kristo, el ngarbab er a rokui, a mlo chuarm el kired e mlo merserasech a bedengel rokir, e Ngii okor e dimlak a tang mel becherei a ngasech reng mel siseb er a rengul, malechub a delcherechel el reng, ng kikiongel, malechub a mekngit el tekoi mel tobed ra Ngerel, molmuut ma le ngara chelsel tial ringel. Loba cherrungel el ulserechakl reng me a diak a uai ngii el delmedemek el reng, Ngii a dimlak lomdasu er Ngii e bai ulemdasu ra derta er a rengelekel a Dios—rangaramong, chelechang, me a ngarmedad. A Apostol Petrus a sioning er a medemedemek el teletelel a Kristo er a lolekoi, “Ser a le motuub eng dimlak lolaitechei el oltuub; me ser a bo lecharm, meng dimlak lorrouk er a ngidil chad; e bai di ultuil omeltkel el mor ngikei el melemalt a loukerrekeriil.” Molmuut ra lengara chelsel a klou el ongarm el mlo re Ngii, a Osobel a ulechotii a cherrungel e ngarbab el ulserechakl reng. Ng millekoi el kmo a klebkall le bo er a Chedam, E Ngak nguu e rekir a ngerechelek el mora rengelekel a chad.

Betik er a renguk el rodam me a rodos er ngak, a kudersii a ongit el me er kid el rokui el mo mekeek a uldesued me a rengud loba teletelel a Kristo el melmalt er a ulserechakl reng ra chedaol nger el mora okedongel e lulemlaoch a betik era rengud el President Russell M. Nelson. Mesel dolasem loba klaumerang e le blak a rengud el mo melasem er a ulserechakl reng el ngara omerelled me a tekinged, e ak ouchais el kmo kid a mo smisichii e m otil a klengar er kid me ngungil selbechakl er bebul a meral uchetemel a Osobeled.

Ak ouchais a klaumera er ngak el sel blechoel skel a ulserechakl reng a kikidid e chedolii a rengud er medal a Osobel, el mekekokil el mengurs er kid el mo kmeed er Ngii e mengedmokl er kid, loba ongiil me a budech, el kirel sel klebokel sils el kid me Ngii elmo kebetech Lobengkel ersel a Ongerul taem el Lemei. Ak ouchais aika el chedaol tekoi el ngara ngklel a Osobeled, el Jesus Kristo, amen.