A Telungalk-Rengul Ebangkelio er a Jesus Kristo

A osisechakl er a Ikelesia er a Jesus Kristo er a Uriul-klebesei el Santo a delalem er a telungalk. Sel klou a ultutelel el kirel osisechekled el mora telungalk a templo. A ikel chedaol ruoll el mengai er sei a techall el me rekid me deluut el mong el diak a ulebengelel telungalk elmo ra medal a Demad ra Babeluades.

Sera Ongeuang el buil 2025 el klou ongdibel, ea President Russell M. Nelson a milsubed el kirel a okedecherul a erul dart el beches el templo. Ng mle soal mesubed a ikal beches el templo ra bek el lorokiolel a ikal meklou longdibel, e kid el rokui el luleldeu a rengud el obengkel. Ngdi, ngokiu ra ikal lidisel a templo er chelechang el dirk ke ngara uchelel a uldasu me a okedecherul, e ngungil a bo dolngeasek er a sbedel a mo beches el templo. Uaisei, e ngokiu ra kengei ra re Teruich me terung el Apostol, eng diak ki bom mosubed a ngidil beches el templo er tial longdibel. Kede momuchel merael kirel omengedmeklel a chedaol ruoll ra templo el mora rechad er a Ikelesia er a beluulechad el rokir, luldimukl ra kmong oingerang e ngarker a mo sbedel a okedecherul a ikel beches el templo.

A telkib er a tekingek el blok merek el melekoi a mla meluches er a uriul ra bol secher a betik er a rengud el President Russell M. Nelson. Chelechang e tial mong meng ongingil a mla meluches e ngiluu a kengei ra telal sandei ruchei, eng di tiang a ochotii a osisecheklek, lulekrael er a Rubak.

A a chisel a telungalek , el lulsubed el kirel ra okedei el rak er a memong, a ouchais el kmo “a telungalk a cheledaol ra Dios, e moktek er a uldesuel a Ulemeob el kirel a diak a ulebengelel lomrolel a re Ngelekel.” Ng dirrek el omeketakl “el kmo sel llechul a Dios el mora Rengelekel el mo omdois e omekeek er a beluulechad a kmal direke mesisiich.” Ea “ki lmuut louchais el kmo a Dios a mla kmu el kmo sel chedaol klisiich el omeob er a rengalek a kirel di mekedmokl er a delongelel a sechal me a redil, el tir a mla moterekokl el kaubuch.” Sera le dirke-Elder Russell M. Nelson lulsisechakl er a ongdibel ra Brigham Young University eng kmo a telungalk “a kot el klou a ututelel ngara uldesuel a Dios. … A mera re ngii, a moktek er sel uldasu a olngesechekl ra telungalk.”

A Ikelesia er a Jesus Kristo a lodengelii el kmo a telungalek a rengul a Ikelesia. E uaisei! A delongeled el mora Dios me a moktek er a klengar er kid a selaod el okiu ra telungalk. A ebangkelio ra Jesus Kristo a uldesuel a Demad ra Babeluades el kirel a klungiolir a Rengelekel ra reng. Ng meral sebeched el melekoi el kmo a ebangkelio a mle kot el mosisechakl el me rekid er a chelchad er a diak a ulebengelel telungalk, ngii a delalem el okiu ra telungalk er chelechang, e sel moktek er ngii a mo lengesechekl er a rengelekel a Dios ra re diak a ulebengelel telungalk.

Meng ngarngii el llechukl el suobel, e ngdi ngarngii a ultok. Ngara United States e kede cheuarm el kirel a bridel a chebechiil me a cherellir a rengalk. Ng kmeed el dart el rak, ea klungel a ikel obliil el omtebechel a robekel a mla ngmanget, molmuut er a cheroll. A chebechiil me a cheroll ra rechedal a Ikelesia er kid a lmuut el loikab, ngdi dirrek el mla meriou. Klou a ultutelel kmo a re Uriul-klebesei el Santo lak loriid a ikel lodengei el moktek er a chebechiil me a ultutelir a rengalek. Seikid sel ngar medad el douedikel el kirel. “Ngarbab el klebkall a ngerchelel a telungalk,” President Nelson a mla osisecheklid. “Ngdi okiu ra ikel chedaol ruoll lolsobel ebangkelio ra Jesus Kristo eng sebechel a telungalk el ngosechekl.”

A beluu el mla meriou a chebechiil me a keldilir ma cherelir a rengalk a bleketakl leng moktek er a reksii er ngii, ngdi a re Uriul-klebesei el Santo a kirir el mengeluolou e melisiich a ikel loruul—ngdiak loltirakl—a ikel blekeradel.

Se er ak kekerei el Okeuid el rak ra memong, e ak kiei ra sersir a rulmechell ra rechad er a blik el ngara basio el rokui el tekoi longetmok ra bek el sils a lomtebechel a telungalk. Ng dimlak a tv malechub a electronics el mo mengesang a tekoi loruul a telungalk. Ea klekakerous, er chelechal taem ra meseked el beluu, e te kesai el chedal a ikelesia a dmak el ongalk e mekedekudem el meruul a kmong ngerang. Klengar ra chelsel a beluu ma olidiuul er chelechal beluulechad, chelderodel lomilil, me a merchereched el rolel a dechadecheduch a mla rulii meng beot er a rengeasek el remuul a blirir el kora di lultuil ku er ngii el delengchokl, el di lebad e melai ra telbodech el kall e a rechad ra keblirir a diak el sal lomekrael er tir er a ikel loruul.

Sel ongitikaik loba rechad er a keblirir a dikeang leng teletael el ngarngii er chelechal taem el betok el chedal a Ikelesia a mengereker. A ngara mong, ea tara klou el omesiul e mengeluoleu a telungalk sel le dak el meruul a tekoi e louedikel kirel a imol tekoi—el ua sel lolemotem ra oreomel malechub e te mengerker. A telungalk a mle belduut e selmechokl el chelechad er a ulekurulel a keizai . Chelechal taem, eng oumesind ra re telungalk a chelechad lolekiid er a keizai e tiang a diak lousbech er a ngarbab el skulel a blduut el telungalk ma klaingeseu.

Sel riid a ongitikaik er a roungalk, ea Uriul-klebesei el Santo a dirk kobang a ngerachel luldersii a Dios el mo olsisechakl ra rengelekir me longetmokl ra omerolel a telungalk er tir el mor sel diak a ulebengelel (mesa Doctrine ma Covenants 68:25 . Betok er kid a kired el rulii tiang sel sekum eng diak el bek el telungalk er kid a selbechakl ra tekoi ra ngaramong. Dertel a chebechiil, kodall, me a klechacheroid a ngarngii er chelechang. Ak mla melchesuar tiang er a chelsel a telungalk el ngak a mlukeroul er ngii.

A demak a mlo smecher sera ak euid a rekik, me ngak ma ochellek ma ochedak ea ulmekeroul er kemam a delmam el di mle ngii. Ngara ikel kot el chetiteuokel el teletael, eng nguluutekangel. Ngdi mle ngiltang e mechitechut, ngdi a Rubak a olengeseu, eng mle mesisiich lolsisechakl a suobel er a mla moluut el Ikelesia e ulemekrael er kemam. Ngii el di meluluuch el kirel a ngeseu ra babeluades el kirel a lomekeroul er a rengelekel, e ngii a mlukngeltengat! Kemam a mlukeroul ra blai loba deureng ea mla mad el demam a mle blechoel el ngar e teloi er kemam. Ngii a ulsisechakl er kemam el kmo aki ngarngii a demam e ngii a ngarngii a bechil e kemam a di blechoel el telungalk leng sel chelbechilir ra templo. A demmam a di ngara cheroid el di telkib le Rubak a ulemekedong er ngii el kirel a ngodech el ureor.

Ak medengei el kmo a bebil ra telungalk a diak el sal ungil a rengrir, ngdi a rokui el mesobil el chedil a sebecherir lolsisechakl er a beltikelreng ra Demad ra Babeluades ma mo meketmokl el klengeltengat er a chebechiil ra templo. Kau meng sebechem el dirrek el rullii tiang! A uldesuel a Demad ra Babeluades a olterkokl er tial techall el mora re bek el chad. Aki bek el chad lungil a rengmam el kirel a chebechiil ra templo ma ikel lultebechel el klengeltengat el mo mecherrungel ra diak a ulebengelel telungalk. El di ua delak, ng somam el melekoi er sel telbilel a Lehi el mora ngelekel ra Jacob el kmo Dios a “a ongarm el bloer ngii a mouchul a klisichem.” ( 2 Nephi 2:2 ). Tiang a mora re bek el telungalk er a Uriul-klebesei el Santo, a le cherrungel malechub eng diak er chelechang. Kid a ikelesia ra re telungalk.

A osisechekled me a doumerang el kirel a diak a ulebengelel telungalk a smisichid e somesemid. Ngdiak el sebechek lobes er sel telbiil el kirel a demak el rubak ra Harris, sera kim kekerei el kiei ra sersel el kmeed ra Payson, Utah. Nguluchais er ngak er a kereor el chais el kmo demak a mlo smecher ra cheroid el Denver, Colorado. Ak rirurt el mora delmerab e mlo tubareuach er bita ra dukellek, el lemangel el kmal mekngit a renguk. A demak el rubak a ulekiuelek e mlo tubareuach er bita er ngak e melekoi, “Ak mo demam.” Seikid el delmedemk el telbiil a mesisiich el okesiu el demad el rubak ma delad el mechas a kutmokl sel sekum me a telungalk a remiid malechub eng mo dibus a ta er tir.

Roungalk, remesobil malechub e te bechiil—me a re bebil, el ua rubak ma mechas, loltekau er seikid el ngerachel el mora rengalk—a re mastang el sensei. Sel kot el bedochel el rolel a lolsisechakl a lokiu okesiu. Sel cheldellel a telungalk a kot lungil basio el molecholt e mosuub a ikel ngarngii a ultutelel, el mo ra diak a ulebengelel el ua belkul a chebechiil me a rengalk, moktek er a klengar, ma meral luchul a deurreng. Ng dirrek lungil basio el dosuub a bebil ra usbechall el osisechakl er a klengar, el ua blekokeuii, klausubes, kelou el reng, me a ultutelel a tekoi ra skuul me a mera el oureor.

Uai sei, betok el chedal a Ikelesia a ngarngii a betik er a rengrir el chederir el diak lomsau ra ututelel a ebangkelio ma tekoi el kirir el meruul. A re uai tirkal chedal a Ikelesia a ousbech a beltikelreng er kid me a kllou el reng. Sel bo dungil kaudengei, eng kired el diak dobes el kmo sel mo cherrungel dosiik er ngii a diak el telkael el mora teletael ra ongarm er a klechad. A klou losisechakl el ngara Doctrine and Covenants 138:57–59 a kilou a rengud el kmo a ouchel reng ma ulekurulel a reng a sebechel melemolm er sel belurir a re deleb ra uriul ra le mad. A lmuut el klou a belkul, sel de telungalk el dmak el kasisiich, eng kired el rokui el diak ke dobes el kmo a klengit me a diak ke dochib el tekoi a de bek el chad el mor er ngii er tial klechad a sebechel lousubes leng sel klebkall e olsobel Tngakireng er a Jesus Kristo.

A Osobeled, el Jesus Kristo, a ngii a ngarbab lokesiu el doltirakl er ngii. Kede mo mukngeltengat alsekum e kede sumechokl a klengar er kid loltirakl Osisecheklel me sera lolenget. Oltirakl er a Kristo e kongei el mo mesiou ra re bebil a kot el bedochel el kerul a kle ngarbab el reng me a rechorech el reng el kmal klungang er chelechang.

A roungalk a dirrek el ngarngii a ngerechelir lolsisechakl ra rengelekir er a tekoi ra klechad el diak el dil losisecheklel a ebangkelio. A telungalk a mo dmak sel loruul a ngarngii a belkul tekoi sel le kaingeseu. A sersir a telungalk a mekdubech a deliongel er a telungalk. A ungil loruul a telungalk a smisichii a deliongel ra telungalk. Ensok, klekoul, omeruul, me a bebil ra keruul a kmal ngarngii a belkul el lokes a telungalk. A re telungalk a kirir el mechederodel el mo dmak el telungalk me lolatk ra ruchelir, me luchul el bora templo.

A roungalk a kirir lolsisechakl ra rengelkir er a ikel dechal omeruul tekoi ra klengar, luldimukl ra oureor er a sers me a blai. Mesuub a tekoi a usbechall el mengetmokl el kirel a mo mesiou el misionarii me tial klengar er chelechal taem. A re sensei ra ikal suobel a sebecherir el mo oungalk malechub e te demerir rubak ma derir el mechas malechub e temo chedal tial telungalk. A re telungalk a ngoriakl sel sekum e te mesuub el chelchad e dmak el kausisechakl el ngara rokui el tekoi el kirel seuadel er a telungalk ma re chedal.

A re bebil a locha melekoi, “Ngdi kemam a diak a temam ra uai lechal tekoi.” Sel losiik er a taem el mo meruul a meral tekoi, e te betok loungalk a metik el kmong sebecherir lomult a telungalk er tir mel bekar alsekum ma ikel rokui lomes ra melidiul le bekeuad . Kemiu loungalk, molatk, el kmo sel kmal sorir a rengalek er a temel a belsoil a taem lobengkemiu .

Klou el klengeltengat a mora re telungalk alsekum me te dmak el meluluuch, el tubareuach ra klebesei ma tutau el oldars a omereng el saul er a klengeltengat e meluluuch el kirel a ngarngii el sebekreng. A telungalk a dirrek el mukngeltengat sel dak el mengull el ngara Ikelesia me a bebil ra basio ra osisechakl. A oldak er a re telungalk a dirrek el mo mesisiich sel lokiu ra cheldecheduch el chelid ra telungalk, omekdubech a siukang ra telungalk, ma kauchais a chedaol blekeradel. President Spencer W. Kimball a omeklatk er kid el kmo a “cheldecheduch el kirel a ulekrael lokiu a klengar er kid me a rucheled … a mesisiich el donguu ra osisechakl.” Ng blechoel bedochel klekedall er a ulekrael el kired ma re telcheroll.

A kuchais er a Rubak el Jesus Kristo, el ngii a Dital Ngelekel a Dios, el Diak a Ulebengelel Demad. Ngii a oleker er kid el moltirakl er sel rael ra telbiil el mekrolid el mo dmak el telungalk er a babeluades. Sel omerenged el klisichel a priesthood, el chederdall ra ikel kiis el mlo luut el mora Kirtland Temple, a oldak ra telungalk el mo dmak el mora diak a ulebengelel (mesa Doctrine ma Covenants 110:13–16 ). Chelechang e touedikel er a idisel a mla mokdubech el templo er a Rubak el meliuekl ra beluulechad. Tiang a klemerang. Mei me bo de tebedechel, nglunguchek, el ngara ngklel a Jesus Kristo, amen.