Ngeltengat Tirkel Chad er a Budech

Mobengkek e dedak lomdasou el leko ke ngeasek el chad el ngara Kapernaum, el kmeed er a Debel a Galilee, er sel taem er a Jesus Kristo. Chais a ulebriid er a rabbi— el sensei— el klemechel a milengudel er a rebetok el chad. A rechad a mirrael er a kemanget lomerael el mora rois el chemau a daob mel Rengesii.

Kau me ke teloi er tir el merael er sel hokori el rael er a Galilee. A obochang, eng mlo mechas a rengum er a klungel a seked er a ongdibel lorrenges er a Jesus. A rebebil a kakelulau el kmong, “Messiah.”

E kau orrenges. A tekingel a kmal silbechii er a rengum. A omerolem el mo remei, e kedi lmuk el diak mongedecheduch.

Ke melbedebek a mengasireng el tekoi— el ngii el tekoi a lmuut el ngarbab er a llechul a Moses. Ng millekoi el kirel a diak domtechei a mekngit e bai mo oubeltikelreng er a recherreued. Ng mla yaksok el kmo “Te ngeltengat a rechad er a budech: ele temo okedongall el ngelekel a Dios.”

A ikel meral teletelel a klengar kau, el momelchesiu er a berraod er a ikel meringel taem— e ke mo oumededenger e medakt— e a budech a ua le cheroid er kau.

Ke orchereched el merael; el meselsel mo remei. A telungalek er kau a kldibel; ma demam oker, “Ka mouchais el kmo ngera ke rirenges me a blo molechesiu.”

Me kouchisa el kmo Ngii a mle siotai er kid el mo ochotii a llomes er a rebebil, e osiik er a llemalt luldimukl ra omngara chelsel odechelakl. Ke medebdeb omongedecheduch lomelekl el kmo,“Te ngeltengat a rechad er a budech: le te mo okedongall el ngelekel a Dios.”

Me koker el kmo, “Ng meral sebechek el mo chad er a budech er tial klou a uldikel er ngii el beluulechad, ea renguk a mui er a dakt, e a budech a ua el sal cheroid er ngak?”

A demam ongengii a delam e mekekokil longer el kmo, “Oi. Kede omuchel er ngii er sel kot el basio—el ngii a chelsel a rengud. E sola mo er a rekeblid me a telungalek er kid. Sel domuchel risei, e a budech oberek el mo er a rael me a chelsel a beluu.”

Domes el mo ruchei er a erul telael rak. Ng diak a belkul dolbedebek— le tiaikid a meral teletael er chelechang. Ng uaisei el berraod er chelechal telcheroll a ngodech er a ikel berraod er a rengeasek er a beluu er a Galilee—a omeleakl er a rechad, mengeroid a tekingel a klechelid, melaitechei, ngasechereng er a bekall er a rael, me a otuub me a odechelakl el ngara social media— e a ikal eru el telcheroll a didiul obangel a uldikel me a sebekreng.

Kede mereng a saul el rengeasek el sechal me a redil ngeleked a mesuub ra kmeed el mosisiu el blekeradel er sel Osisechakl er a bebul a Rois: seminari, ongdibel el Kirel a Klisichir a Rengeasek, me a Mei, Moltirakl er Ngak . Ngar tiang e te ngmai aikel losisiu el siotai er a Rubak: el mo omekelomes el mora rebebil, e osiik er a llemalt a le ngara chelsel a uldikel, e mo oubeltikelreng er a rechereuir.

Te dirrek el ngmai olisichel a tekoi er a re ngar el profet er a Oluut: “Ke dousbech er a Rechad er a Budech.” Di ungil a lengodech a uldesuem eng di lak ke mou mondai. Btechir a ultok me a kldidai el reng loba klausubes me a beltikelreng. Mteketekii a ungil deleuill er a klaingeseu me a ungil klaodengei, e lak morritel ma lechub e moleakl. Ea osisiu el yaksok a mo er tir: “Te ngeltengat a rechad er a budech: ele te mo okedongall el ngelekel a Dios.”

A rengrir a telecheroll er chelechal sils a mui er a klaumerang er a Jesus Kristo me a urungulir er a ungil klukuk er tir. Eng di te dirrek el mo oker, “Ng meral sebechek el mo chad er a budech er tial chetituokel beluulechad, le renguk oberaod er a dakt, e a budech a uai a le cheroid er ngak?”

A mesisiich el nger a lmuut el kmo oi! Kede urrekodel a tekingel Osobel el kmo: “Budech ak beskemiu, budech er ngak ak beskemiu. … Lak louedikel a rengmiu, e lak ko medakt.”

Chelechal taem, a olchotel a budech a dirk melemolem lomuchel er sel kot el basio—el chelsel a rengud. E mo er a delengchokl me a telungalek. Sel domuchel risei, e a budech oberek el mo er a tonari er kid me a buai.

Ka deluut lomes a ika el kldei el basio er chelechal-taem-el Uriul klebesei el Santo a omekbudech.

A kot a omuchel er a chelsel a rengud. A bleketakl lolchotel a urerel a Kristo a ulecholt er a mle teletelir a rengalek lulsiik er Ngii. Tiakid a olchotel. Sel domes a klikiid el rengrir a rengalek er a budech a sebechel mekellomes a chelsel a rengud. A ikakid te milkerang a re bebil ra rengalek er a Primary a longer el kirel a “Ngua ngera sel dechad er a budech?”

A kuchais a meral mlara rengrir el nger! Lukas a dilu el kmo, “Blechoel lolngeseu er a rebebil.” A Grace a kmo ng klou a belkul dousubes er a ta me a tang, luldimukl a lak el melemalt. Ea Anna millekoi, “Ak milsa chad el dimlak a sechelil ledak el milil, me ak mlo milil lobengkel.” A Lindy kuk omdasou el kmo a chad ra budech a olngeseu er a rebebil. “E kau a kuk ngoseuir a tang. E melemolem el uaisei lomerk.” A Liam a kuk dilu el kmo, “Lak bol mekngit a blekerdelem el mora rechad, luldimukl a le mekngit a blekerdelir el me er kau.” Ea London a kuk millekoi, “A lsekum a chad omekakou ma lechub eng mekngit a blekerdelel mo er kau, e mdu el kmo ‘Lak kom uaisei.’” Ea Trevor a kmo, “A dil chimo el donats el medechel e somiu el rokui el menga er ngii, e morurous er ngii.”

Aika el nger tirkal ngalek a bleketakl el me rengak el kmo kid el rokui a mechell el ngarngii sel chedaol teleteled er a blekokouii me a chubechub. A ebangkelio er a Jesus Kristo a melisiich e omekuak aika el chedaol blekeradel luldimukl er a budech, el mera rengud, lomekngeltengat er kid er tial klengar me sel merael mei klengar.

Ongerung, kede meleketek er a budech er a rekeblid lousbech er sel teletelel a Rubak el kirel a deleuill er kid el mora tang me a tang el: mengesuseu, outekangel, delmedemk, bokokouii, kle ngariou el reng, me a dmolech el beltikelreng.

Tiakid a meang el cheldecheduch er a tal telungalek lolchotel a kmo ng mekera budech e mo ngerchelel a telungalek, loltirakl aikakid lomeruul.

A rengalek er tial telungalek a mle kurusii er a delongelir me a mle klou el chad el mle blechoel di checherd a rengul, di mengedereder, e omsuched. Tirkal ngalek, el mlara ringel e mla mo seselk a rengrir, a mocha omdasou el kmo a di tal rolel a bo dosuub er tial mekngit el blekeradel.

A tara klebesei e tirkal longalk a mlo katekoi el kirel tial longarm me a beraod el loltekau er ngii. E ngii a mermang a uldasu—diak el dil tara rael ngdi nguldasu el bo lolasem er ngii.

Te ulemdasou el kmo ngbai diak kedi deluk ma lechub e domteche mekngit, te bai rulii a kmo ngerang el kmal ngodech: te mo onger loba blokokouii el teletael. Ng diak el kora orrimel, ng bai meral, ngarngii ra rengrir locholt a ungil tekoi me a ungil lomeruul, el diak el iior er a mle mekngit lomeruul mlo er tir. Tir el rokui el kilengei el mo melasem er ngii er a ulterkokl sils, ea uriul e te mo dmak e chadecheduch el kirel.

Ng uaisei el bebil er tir a kora dimlak el sal sorir er a kot luchul, eng di te kilengei er tial uldasou.

Ng smiich e meang el teletael a dilubech ruriul.

A mekngit lomelekoi a mlo omerollel mo diak. Ungil ues er a mad a miltechei a mekngit el ues. Ngika el klou el chad, el mle mekngit a blekerdelel, a omerollel ngedechang. Tirkal ngalek, a miltekakl le te millilt el mo oba beltikelreng, a miltik er a deureng er tial klou lomelodech. Tial ngeldechel a kmal mle klou lungil a relii meng dimlak a belkul luut loumiting el kirel. A blokokouii el blekeradel a mla mocholt a urerel.

Ea cherengel a taem, e a ungil deleuill er a resechelei a mlor ngii, me a rebek el chad a mlo selbechakl. A dechad er a budech, e kede ousubes er a rebebil e mesebechakl er a bebil e diak dolemall er tir.

Ongedei, a budech er a buai el dengarngii. Aikel mle meringel rak er a Ongeru el Mekemad , ea Elder John A. Widstoe a ulisechakl el kmo: “A di chimol rolel el teketekel a budech el beluu a domdois er a rsechal me a redil el tir a sorir el chad er a budech. A derstal chad, lokiu osischeklel a Kristo … a obang er a chimal a budech el kirel a beluulechad el rokir.”

Tiakid el cheldecheduch a okesiul tial tekoi.

Sesei el rak er a memong, e a reteru el chad—a chad er a Muslim me a pastor er a Kristiano el chad er a Nigeria—a mle meringel kaumondai a tekingel a klechelid. Te di diul mlo kurusii. Eng di, ngokiu a omekungil klisichel a klausubes, e te mocha kangunguuch.

A Imam Muhammad Ashafa me a Pastor James Wuye a kmal mlo ungil sechelei e mlo chad er a budech. Te mlo dmak e kudmeklii a basio el rechad er a kakerous el klechelid a mo re ngii. Chelecha e tir el terung lolisechakl er a rebebil el mo mtechir a klauketui loba ungil lomeruul. Tir el terung el di diul mla mo eru el nguu a Nobel Peace Prize, e te kmal dirk mlengilt el mo nguu sel Commonwealth Peace Prize.

Tirkal terung el mle kaucherarou e chelecha e te dmak lomais el mesmechokl a telemall, e sioning el kmo a siotai er a Osobel el kmo bom chad er a budech a diak dil sebechel tekoi el merekong—ng dirrek el kmal mesisiich.

Sel bo dodengelii a klebkellel a Dios, eng mo “diak er a uldesued a melemall er a ta me a tang, e bai mo kiei el ngara budech.” Chelsel ongdibel de ngarngii me a beluu, e dolilt lomes er a ta me a tang el ngelekel a Dios.

A kedeb lomesodel, e kudersii ongit. A tekoi er a budech a ultuil er a omeruul—meng locha mo uangerang, el mora dersta er kid, a domuchel er a klukuk? Locha sebechiu el mo meruul er a edei el terebel er a budech, er a chelsel a tal sandei?

1. Diak a ultok er ngii el delengchokl: Sel lomuchel a ultok, e molengull e mutechir lolab a ungil tekoi me a omeruul.

2. Omak a deleuill er a social media: Uchei er a om post, onger, ma lechub e ke melekoi a tekingem, e moker, “Tiang omak a ungil deleuill?” A lak, em terbengii. Lak moldurokl er ngii. Bai, mouchais a ungil teletael. Mochotii a budech el mtechir a klauketui.

3. Msemechokl e mluut loldak: A bek el chedal a telungalek a sebechel mesa mekngit el teletael er a deluill e lolengit a klausubes, lolngeseu, lesemecheklii, e loldak.

Ng mla mo telal buil el kumelchesiu er a odubech el kirel tial tekoi: “Ngeltengat Tirkel Chad er a Budech.” Ulebongel, e kuchais er a tekoi el meketeketang el ngara renguk.

A omekbudech a blekerdelel a Kristo. A rechad er a budech a lebebil er a taem e te omdasou el kmo te metitur ma lechub eng—diak a ngera lodengei. Eng di, a mo chad ra budech a diak el bol mechitechut, ng bai mesisiich er a ngodech el teletael el beluulechad a diak lodengelii. A omekbudech a kirel mesisiich a rengul e diak lechoit a meral osisechakl. A omekbudech a omekrael loba klungiolel a rengul, ng diak el blutk a uldesuel. Kede mo chachebangel e kaiuereked chim, ng diak el chelimetemet a chimad. A omekbudech a diak el beches el tekoi, el dirk mlo er ngii. Ng mlosisechakl er a Jesus Kristo, el mo er tirkel ngara Biblia me a Babier er a Mormon. Ea tekoi er a budech a di mla lolisechakl er ngii a reprofet er chelechal taem er a uchelel Oluut el me lmuut er chelechal sils.

Kede mo er sel chedaol tkul re bab el ngercheled kid el ngelekel a oubeltikelreng el Chedam er a Babeluades sel dolasem el mo chad er a budech. Ak sioning el kirel a Jesus Kristo, el ngii a Prince er a Budech, el Ngelekel a ngar el Dios, el ngara ngklel a Jesus Kristo, amen.