Klou el Ongdibel
Nguu a Ngklel a Jesus Kristo
October 2025 el klou el ongdibel
13:22

Nguu a Ngklel a Jesus Kristo

Mla er a Elder Dale G. Renlund

Er a Chelechad er a Teruich me a terung el Apostol

Sel dolasm lomes e dolbedebek er a Jesus Kristo, eng mo soad el merael mo uai Ngii.

Sera 2018, er a Daingak er a Utah, e a tokubets el techall er a ureor a milkedmokl lokedongall el “Dr. Russell M. Nelson me a Dantzel W. Nelson Presidential Chair er a Cardiothoracic Surgery”—cardio, belkul a “chaidireng,” me a thoracic, belkul a “ulul.” Ng milkedmokl el chetengakl el mo er a President Nelson el kirel a klou a belkul urerel el toktang er a hart me a ngesou lokiu a mla mo dibus el mle bechil er a, Dantzel. Tial ureor a milkedmokl lokiu a ngesou er a udoud el diak el mekimd el mo er a medad. A chad el mengilt el mo er a tial ureor a ngmai a chetengakl, kerkerengel, me a ngesou er a udoud el kirel omesuub.

Dr. Selzman lobengkel a President Nelson

A mle kot el toktang er a botk el mengilt a Dr. Craig H. Selzman, el semmong er a botk er a hart el diak el chedal a Ikelesia er kid. Sel sils le kldibel a rechad el siokai er a Dr. Selzman, eng mle betok el okiaksang a mlarngii, luldimukl er a President Nelson me a bechil er a, Sister Wendy W. Nelson. Chelsel tial miting, e a President Nelson a milngedecheduch el kirel a uchelel a urerel el toktang.

Sel bol siseb a Dr. Selzman a uluuchais er tial klou el chetengakl el ureor le bocha er ngii. Nguluchais el kmo eua el klebesei ruchei, ruriul er a tal sils lomotk er a smecher, eng mlo metik el kmo a tara smecher a kirel lmuut el mo er a botk. Ng kmal mle skareter e mesaul a rengul, lomdasou a lmuut el mo omotk er a tara smecher el tal kesus er a ospitar.

Dr. Selzman me a Sister me a President Nelson

Tiakid el kesus, e a Dr. Selzman a di mirreko el mengodech a rengul me a uldesuel er a dil ngii mengedecheduch er ngii. Tiaikid e ngomdesua, el kmo: “A Ongeim el ureor, e ak mo moterekokl el mo nguu a ureor lulengakl er a ngklel a Dr. Nelson. Ngii a dodengelii el ultebechel a rengul, e mengull er a rebek el chad, e diak el bekesengasech a rengul. E chelecha e a lsekum a ngklek a mocha obengkel a ngklel, eng kirek el melasm el mo uai ngii.” Dr. Selzman a dirrek el mle bekudasu el toktang er a botk. Eng di ngii a mle soal el lmuut el merael mo ungil toktang.

A ikal mla memong, ea rechad el dak loureor a mle medengelii sel skareter el checherd a rengul le ngulecholt er a osengel me a teletelel a longedecheduch. Eng di tiaikid el kesus er a lomotk er a smecher, e a Dr. Selzman a milasem el mo blak a rengul lolngeseu er a rechad el dak loureor. Ngulmelchesiu el klou a lengildechii er ngii meng tilbir el mo melemolem el melsam el mo uaia Dr. Nelson.

Dr. Selzman el bereked er ngii a RMN pin

Eim el rak ruriul, e a President Nelson a uldersii a babilengel er a ureor el mo er a University of Utah. A rengarbab el chetengakl chad er a daingak a mlei loureng a sulel a President Nelson. Tiaikid el taem, e a Dr. Selzman a liluut el mo mengedecheduch. Ng millekoi el kirel a llechukl er a uchelel a ngklel a President Nelson, el RMN, el kmo, “Chelecha e tirka el chad er a University er a Utah a melasm loltirakl a blekerdelel me a kse er a President Nelson.”

Me a chelsel aikel lomekseselkereng el teletael, e a Dr. Selzman a millekoi: “Ak meruul aikel kimolisechakl el mo er a remesuub—el mo ulterkokl a moktek, e rullii, el mo er sel tkul er bab el sebechem. Tial teletael er a blekeradel a ki mobang er a bek el sils. Aki mesterir a pin a rebek el chad me a rebek el beches el mesuub el chad. E sel cheungel aika el pin a llechukl a ‘RMN.’ Tial llechukl el RMN a dodai er a omesubam; e aki olisechakl er ngii el mo er a rebek el chad.” Dr. Selzman a meral ngildechii a blekerdelel me a kse er ngii e le ngklel a obengkel a ngklel a President Nelson.

Aikaikid el betok el teletael el dilubech el mo er a Dr. Selzman a rirelak loker el kmo: “Ngera mla mengodech er ngak er sera knguu a ngklel a Jesus Kristo? Ngarngii a bla kngai el blekerdelel a Kristo? Ngak ak mla melasm el merael mo ungil e mo uai Ngii?”

Teletael mlora Dr. Selzman, a sebeched el mes a kleim lolachitnger sel dolasm el mo oungakl er a ngklel a Jesus Kristo. Ng uaisei el tial teletael omuchel er a techolbechelid, eng di diak el cherrungel el di merekmo deluut el mo klikiid e chedaol e mo uai Ngii.

A kot el suobel a omes. A oterkeklel a Dr. Selzman el mo er tial ureor a uldekiar a ngklel el mo er a ngklel a President Nelson, ea Dr. Selzman a ulemuchel lomes a blekerdelel me a kse er a President Nelson. Sel denguu a ngklel a Jesus Kristo, e kede odekiar a ngkled er Ngii. Kede mo osisiu er Ngii. Kede mo mungakl el Kristiano. Kede chotengii el Osobel e mucherangel Lobengkel.

A osisiu ngii me a deues a blekeradel a lmuut el tara suobel—dobedebek. Sel bol siseb a Dr. Selzman er a obis er ngii, e a osengel a bedul sel medallion lengiluu er sera le mengilt el mo er tial ureor er a Nelson. Tial medallion omeklatk er ngii er a bek el sils er a blekerdelel a RMN. E kid, a sel dolai er a sakrament er a bek el sandei a ngosukid el melbedebek er a Jesus Kristo er a chelsel a tal sandei. Me sel dolai er a sakrament, e kede meruul er ngii lomeltked er a ringel le blo er ngii lolsobel er kid. Kede soiseb er a beches el telbiil el mo melbedebek er Ngii, e chotengii a Klisichel, e mereng a sulel er a Klungiolel. Kede blechoel kongei el kmo ngokiu a krasia er Ngii e kid a mo suobel er a kodall er a tech me a reng.

A melbedebek a belkul a kmo kede oltirakl osischeklel a profet Alma er a chelsel a Babier er a Mormon. A rokui el doruul bo lultuil er a Rubak, me a ngii di el ker el de bo er ngii lultuil er a Rubak, me a rokui el uldesued bo lultuil er a Rubak, me a soal a rengud bo lultuil er a soal a Rubak el mo cherechar.” Luldimukl a demechesang er a bebil er a tekoi, e kede melemolem el melatk er Ngii, el di uaia ngkled el dodengei, el diak el iior er a demechesang er ngii el tekoi.

E sel ngaruchei lomeltked er a ikel blal ruul kired Osobel a sel ongedei el suobel—omekesiu er ngii. A Dr. Selzman a ulemuchel el mesuub er a President Nelson e omekesiu er blekerdelel sel RMN. A kumera el kmo a blekerdelel a President Nelson a olchotel a klengar ngii loltirakl er a Jesus Kristo. E kid, sel dolasm lomes e dolbedebek er a Jesus Kristo, eng mo soad el merael mo uai Ngii. Me kid el Chedal, a mengodech el mo ungil sel dengai a moktek er kid el bedul Ngii, e diak kuk di domdasou el kired. Kede melasm el mo uai Ngii e osiik el mo mukngeltengat er a Blekerdelel. Ng blak a rengud el meluluuch me kede mo mui er a beltikerreng, el bliochel beltikerreng er a Kristo.

El ua osischeklel a President Nelson er sera Ongeua el buil: “Sel bo doba beltikerreng, eng mo diak er a rengud oltuub er a rechad. Kede torbengii omerritel er a tang me a tang. Ng mo betik a rengud er a rokui el kakerous el chad. A beltikerreng el mora rokui el chad … a klou a ututelel er a omerolled. A beltikerreng a dodai er a teletelel a kledios.” A obengkel a beltikerreng, e kede osiik, “omekdubech, … e meleketek” a bebil er a chedaol sengk er a Osobel, luldimukl er ngii a klemerang, kllouerreng, me a blakerreng.

A omekesiu ra blekerdelel a Jesus Kristo a ngoikid el mo er sel ongeua el suobel—oltirakl a moktek er Ngii. Kede obengkel er a Urerel. El uaia chad er a botk, el Dr. A Nelson a ble lodengelii el sensei, chad er a omekungil, e chad er a omesuub. E sel pin lulusbech er ngii a Dr. Selzman a omeketakl aika el blekeradel, lolchotel a tekoi el olsisechakl, omekungil, me a osiik. E kid, a telengtengil a oungakl er a ngklel a Jesus Kristo a uldimukl er ngii a blakerreng, ngarngii er a rengud, e semeriar el ngmai a moktek er kid el bedul Ngii. Kede mo Obengkel er a Urerel sel “doubeltikerreng, omerk, e siotai.” Kede Obengkel er a Urerel sel doldingel er a rebebil, oumesingd a rekurusii me tirkel telemall a rengrir, ngara klengiterreng, ma lechub a chelebuul er a tekingel a beluulechad.

Kede mui el nguu a ngklel a Jesus Kristo lokiu osenged, omeltked, otirekled, me a blekerdeled. Sel doruul aika kleua el suobel e ngoikid el mo er sel longeim—metik a klisiich. Kede ngmai a klisiich er a Dios me a klengletengat er a klengar kid. Sel ureor el Nelson a milsa Dr. Selzman a chetengakl me a klengeltengat er a udoud el ngii ousbech el ngodechii a teletael er a chelsel a urerel. Ngii a uleba tial “klisiich el melodech” lolngeseu er a rebebil. Osisiu el teletael, sel denguu a ngklel Osobel, e a Demad er a Babeluades a omekngeltengat er kid er a Klisichel el ngosukid el remuul a ngercheled er tial beluulechad.

E sel deruul a lmuut el bebil er a telbiil lobengkel a Dios, e kede smisichii a ngklel a Jesus Kristo el dobang. Ea mo okiuellel, a Dios omekngeltengat er kid er a Klisichel. El ua osischeklel a President Nelson: “A bek el chad el sosiseb er a telbiil er a techolbechelid me a templo—e oltirakl—a kmal klou a techellel ngmai a klisiich er a Jesus Kristo. … A klungiolel otireklel a telbiil lobengkel a Dios a klisiich er a babeluades … klisiich el smisichid el ngoriakl er a ongarm, ongetikaik, me a ringel el mo ungil.”

Kede mo ungil lorrenges loba reng. Ng mo mesisiich a rengud el obangel a meringel tekoi. Kede mo metik a klisiich sel blak a rengud loltirakl er a Jesus Kristo. Kede mereched el mo ouchel a rengud er a kngtid e obult el mo er Ngii sel derebet. Kede mo meduch lomerk er a ebangkelio er Ngii loba Klisichel me a deruchellel. Kede mo olngeseu er tirkel rengesool e diak dorritel el kirir, el meral mo diak ke dorritel. Kede mo ngmai a ngbetel a kngtid. Kede mo obang a klou el budech, e mo blechoel ungil a rengud e leng sebeched el blechoel loldeu a rengud. A klebkellel a mo iliuekl er kid, ea reanghel er Ngii a mo mengkerenged.

A Osobel a siotai er kid el mei er a Chedam el ngara ngklel, me bo dengai a rokui lolab. A kulengit er kemiu me bo moruul er tiang. Mei er a Demad er a Babeluades. Mnguu a ngklel a Jesus Kristo. Bo Modengelii. Bo blechoel melbedebek er Ngii. Molasm el mo uai Ngii. Bo mkeldemel er a Urerel. Mnguu a klisichel me a klengeltengat er Ngii el mora klengar kau. A llecheklel a Ngklel bol ngara rengum, el meral blak a rengum el kirel. Tia meskau a “deruchellem” er medal a Diose uchul e a Osobel a sebechel mesebechakl er kau. Ke mo ngmai a blingelem er a chelsel a rengedel a Demad er a Babeluades, lobengkel a Kot el Ngelekel, el ngii a betik er a rengud el Osobel e Olsobel.

Ngii a ngar. A kmal mui el medengei. Ng betik a rengul er kau. Ng uldersii a klengar er Ngii el kirem. Ngii olengit me mei er a Chedam lokiu Ngii. Loba ngklel a Jesus Kristo, amen.

Uleklatk

  1. A udoud a uaia le klengeltengat.

  2. A tara chetengak lureor a urerel a President Nelson el kildmeklii sel kot el mesil er a hart sel le bo er a botk er a hart a chad.

  3. A President Nelson a uluuchais el kmo sera dirk losuub el mo toktang, e a tara toktang er a botk le dilak a ngilasech rengul e metechii a klekedall er a botk el meked er a bebul a chimal a President Nelson. A President Nelson a millekoi: “Eng di tial teletael a kmal klou a lulsisecheklii er ngak. Tiaikid el taem, a rirellak el yaksok el kmo ngii di el ngerael duubech er a urereker a chelsel a blil a botk, eng kmal diakel bol kesib a renguk. Ak dirrek el mle yaksok el diak kumetech a ngii dil ngerang el ngasechereng a uchul—a le scalpels[kekerei oles er a botk] a lechub eng tekoi” (“Peacemakers Needed,” Liahona, May 2023, 98).

  4. Tial donation a uldimukl er ngii a betok er a euid el telael el report er a tekoi er a botk, me a babier er a omesuub me a lmuut el bebil er a llechukl tekoi el ngii a luldekdak a President Russell M. Nelson er a taem el dirk loureor el toktang.

  5. Bebil er a rechad a milngedecheduch el kirel a President Russell M. Nelson, luldimukl er a Merredel er a University of Utah, el President Taylor R. Randall, el millekoi el kirel a President Nelson el kmo ng kot el chetengakl el chedal a University of Utah.

  6. A tekoi el ethos[blekeradel] a melutk el kirel a tokubets el kse, kldung, ungil a blekerdelel, a lechub eng tekoi lomtebechel er a chad, chelechad, a lechub a basio” (Merriam-Webster.com Dictionary, “ethos”).

  7. Sera 2018, a bechik, er a Ruth, me a ngak a mlo sebechemam el mo er sel ungil klebesei el Dr. Selzman a miltutk el mo er sel deruchellel a Nelson er a ureor. Sera 2023, eng mlo sebechek el mo er sel sils el President Nelson a uldars a ikel babilngel er a ureor el mora University of Utah.

  8. Mesa Moroni 7:48

  9. A tekoi er a Hebrew sel loidii el uai a “take[nguu]”el uai tial tekoi “nguu a ngklela Kristo” a belkul a kiderii el morbab” a lechub “obang,” el uai a banderang sel olengchelel a chad a lechub eng cheldebechel (mesa James Strong, The New Strong’s Exhaustive Concordance of the Bible [1984], Hebrew dictionary section, page 80, number 5375).

  10. Mesa 2 Nephi 10:24; Moroni 10:32–33; Doctrine and Covenants 76:69.

  11. Alma 37:36

  12. A Dr. Selzman a mla dmu el kmo: “Sel momuchel mesaod a tekoi er a ulekerreuil a bedenged lobengkel a [President Nelson], eng kora mo klikmechur. … Selzman a mla melekoi el kmo: “Sel momuchel el mesaod a tekoi er a health care lobengkel a [President Nelson], eng di mo ungil a osengel a medal. … Ng meral mechas a rengud sel desang el blak a rengul [sel] longedecheduch el kirel a ikal tekoi” (ngara Sydney Walker, “As President Nelson Turns 100, His Family and Associates Reflect on His Life and Legacy,” Church News, Sept. 7, 2024, thechurchnews.com). Ak mla mesa tial “klikm er a osengel er a tekoi er a ukeruul“ a President Russell M. Nelson, eng di diak el bol uai sel longedecheduch el kirel a Jesus Kristo.

  13. Mesa Moroni 7:47–48

  14. Russell M. Nelson, “Confidence in the Presence of God,” Liahona, May 2025, 128.

  15. Mesa 1 Corinthians 12:31; Doctrine and Covenants 46:8.

  16. Russell M. Nelson, “Sisters’ Participation in the Gathering of Israel,” Liahona, Nov. 2018, 69.

  17. Mesa Preach My Gospel: A Guide to Sharing the Gospel of Jesus Christ (2023), 123–38.

  18. Mesa Moses 1:39 A Kerbai er a Chelechad er a Aaronic Priesthood omuchelkmo: “Ngak a betik er a rengul a Dios el ngelekel sechal, e Ngii a ngarngii a urerel el bo kuruul” (Gospel Library). A Kerbai er a Rengeasek el Dil a kmo: “Sel kultirakl er a Jesus Kristo, e ak melasm el mo uai Ngii. A kusiik e meruul a chedaol ocholt el kngai e mesiou er a rebebil loba chedaol Ngklel” (Gospel Library).

  19. Mesa Dieter F. Uchtdorf, “Missionary Work: Sharing What Is in Your Heart,” Liahona, May 2019, 16–18; Gary E. Stevenson, “Love, Share, Invite,” Liahona, May 2022, 84–87.

  20. Sera uchelel a Urerel er a beluulechad, e a Osobel a silodii a moktek er Ngii el millekoi a tekingel a Isaia: “A Reng er a Rubak a ngar ngak, ele ng mla ngiltak el mo ouchais er a ungil chais el mor a re mechebuul; ng ulderchak el mo omekungil a re ngara klengiterreng, e ouchais el kmo a re rrengodel a mengubet, ma re miko a mo omes, [ma] lomcheracheb er tir a mo mimokl” (Lukas 4:18).

  21. A nglunguched el mo er a Demad er a Babeluades a mo mengodech. El llechukl er sel uchelel a Bible Dictionary a“Nglunguuch”: “Re Kristiano a mlosisechakl el meluluuch el oba ngklel a Kristo. Kede meluluuch lousbech er a ngklel a Kristo sel uldesued a uldesuel a Kristo, e a urunguled a urungulel a Kristo—me a Tekingel a mo obengked. Me kid a mo olengit a tekoi el ngii a sebechel a Dios el mo odars el merkid. Ng betok el nglunguuch a diak longer e leng diak el ngara ngklel a Kristo; ng diak lolechotel a Uldesuel ng bai kuk di sel ngara soal a rengul a chad.”

  22. Mesa Doctrine and Covenants 109:26.

  23. Russell M. Nelson, “Overcome the World and Find Rest,” Liahona, Nov. 2022, 96; odekiar el smisichii a belkul.

  24. Mesa Doctrine and Covenants 109:21–22. A tekoi el sel rechad a meruul a klengit, e tir a ousbech er a tekoi el “oingerang,” e bai diak el “a lsekum.” Tiang a olecholt el kmo a Osobel a medengei el kmo kid a mo meruul a klengit, meruul a chelebirukl el tekoi, e reuebet er a klengit. Eng di sel uldasu a kmo kid a “di mereched el ouchel a rengud” me a “klengeltengat luut el mo er ngii” el blel yaksok el merkid.

  25. Mesa Johanes 16:33; Mosiah 4:11; 18:26; Alma 36:2, 28–29; Ether 7:27; Moroni 9:25.

  26. Mesa Doctrine and Covenants 109:22

  27. Doctrine and Covenants 93:19.

  28. A Mormon a silodii sel dilubech el mo er a rechedal er a taem el dibus a Kristo er a delongelir. A rechedal a mle tal taem ete kmal mle ungil chad, ea Kristo a mle mengkerengir, le tir el mle ulekrael er a Dios el Chedam. Eng di chelechang, e a Diablong omtebechel tir, el di ua ses el eolt, a lechub a bilas er bebul a daob, el diak lou yars e diak otil lomtebechel er ngii, me a diak omesiull er ngii; meng di uaisei(Mormon 5:17–18). Ng di sel doba Osobel er a klengar kid, e kede mukngeltengat er a klisiich, selbechakl, me a ulekrael.

  29. Doctrine and Covenants 109:24

  30. Mesa Doctrine and Covenants 45:3–5

  31. Mesa Rom 8:17.