Tngakireng el Betlkil a Rengul a Jesus Kristo

A lsekum me ke tilmall a oberaod el klengit e ngara omerolem el louchel malechub eng soam el mui el mouchel er a kngtim e omelchesiu er a diak el mesaod el deureng er a klausubes, ongit me modengei el kmo tial ongasireng a mengiil er kau. A Osobel a melemolem lomekedong, “Mei er ngak.”

Sel molisiich er a klaumerang er kau er a Osobel, el Jesus Kristo, a odbechii a soal a rengum el bedul Ngii elmo medengelii, oumera er Ngii, e nguu a rengum el Msang. A Enos a uleker el kirel a klausubes er ngii: “Rubak, ng mekerang e mo uaisei?” Ma Rubak a ulenger: “Ng klaumerang er kau er a Kristo el dirkak mrengesii malchub e mesang.”

A Moroni a dilchelir, “A lsekum kotngeklau er a rokui el mekngit, e bol betik a rengmiu er a Dios loba rengmiu er rokir me a uldesuii er rokir me a klisichiu el rokir, e seikid e a chubechub er Ngii a medeel el kiriu.”

A obult el mo cheroid er a klengit, e mo chemau ra Dios, e melisiich er a klaumera er kau ra Jesus Kristo a klebokel el lungil a uchelel. Oba kle ngariou el reng e kongei el nguu msa Dios a uldimukl lolecholt a oberaod el kngtim el mora bishop malechub a branch president, engdi a mui el klausubes a mei el ngara Osobel. A klausubes a chedaol sengk el modars lokiu a krasia er a Jesus Kristo.

A lsoad el meral obult el mora Dios a obengkel a blakelreng elmo cherrungel loba klemerang el bedul a Demam ra Babeluades, bedul kau, me tirkel omtilemelterir, e bedul a roungerachel er kau loba priesthood. A Demam ra Babeluades a dmeu a rengul el blak a rengum el merael mo er Ngii e loba klengit el reng me a ouchel el reng. Oba ouchel el reng ea kle ngariou el reng lobekau el mora chimal a Dios; oba klengit el reng a ngmai a ikel losaod a Apostol Paulus el “imis louchel,” a rengul mesisiich el loureng el lmuut elmo er Ngii e diak el ior ra mo dubech.

A moureng a mekrolau elmo soam el remuul moungil a mtilmall. Engdi, ke mes el bebil er a tekoi a diak a klisichem el kudmokl moungil, me ke blak a rengum el meluluuch el mora Rubak, lokiu a krasia er Ngii, e olngeseu el omekungil er tirkel tir a miltemall leng omerellem a uchul.

A dubech lokiu a oberaod el klengit el mlora re bebil a blechoel meringel e chetituokel el bo dungil er ngii. Kau koltirakl okesiul a rengelekel a Mosiah, el meral mle “blak a rengrir el meruul el moungil a telemall el tir a riruul” ? Mongedecheduch er tirkel kau a melengmes er tir el kirel a ikel kau a locha diak kom mues.

Sera kungedmokl er tial cheldechedechak, e ak ngiluu a email er a chad el ngara ouchelreng e soal lemuut el mera Ikelesia. A mle bechil a dirke ngara ringel kirel a mla mechoit “el [tekingir] er a diak ulebengelel chelbichilir, [chetituokel er a rengalek], dikea le motoir a itel a udoud, … diak el [sal] sebechel a ududel kokad a rokui [e] kedebengang a telil ersel reng el milechoit.”

Nguluchais er ngak ra lokerang ra ulungerachel er ngii el priesthood ra “lomelchesiu e lotireklii [lolengit er ngii] elmo oba nglunguuch e omes el kmo [ngera lmuut el sebechel remuul el mora mle bechil me a rengelekel].” Ng kilengei mak mochotii a telkib ersel email er ngii:

“Ngak ra [kot] elk bildesuii ra ikal [udoud] el ngak a chiloit er a dertel a chebechiil a lmuut el kmal betok, engdi a branch president er ngak a milngesuseu er ngak elmo olsengerenger e meluluuch el kirel. …

“Sera kot, ak mle meringel er ngak er tial uldasu el kirel a lmuut el itel a udoud. A kngtik a dimlak el tekingel a udoud, ma kulumdasu el kmo a ‘bekokouii lodars’ ngera kmal belkul … [ngdi] ak di mle mereched elmo medengei el kmo tia diak el kuk dil kirel a udoud.

“A oungerachel er a priesthood a mlomes er a [mle bechik] me a rengelekek e miltebengar el kmo tir a meral dirk ke meringel er tir e dirkak el bo lungil. …

“A beches el moktek el kirek a mo merael mo ruchei loba klaumerang. … Ak mle ouchais el soak lolengeseu el diak a ngara el kulai er ngii. … Ak tilbir elmo [odureklii el mora mle bechik a telal udoud] er a bek el kududel, el ngii a kmal klou a mengai ersel mo medechel. Nguchei ra kulecha ersel kot el udoud, ea Rubak a [smisichii er a uldesuek el kmo ngak a kirek] el harau er a [erul taem el klungel er tial ludoud].

“Ak silubii el kmo a oluut me bo lungil a diak el dil tekingel a udoud. Tiang a kirel dengai a rengud el meriou e odars a klengar er kid el mora Rubak. … A ikal ludoud a mo mtechei a ikel ngak a ngilai er a telungalek er ngak lek mle mekngit el melilt. Tiang a kirel a omeruul e urekodel a telbiil el diak dongerchir er a kmong ngerang e olengeseu er ngii meng diak el meringel a btelul kirel a chitel a udoud mel sebechel losiik er a Reng.”

A urerem elmo omekungil a omtilmall a locha diak a moktek er ngii el kirel a udoud, engdi sel moba ngariou el reng el olengit er a Rubak, eng sebechem el mes a betok el sebechem el remuul.

Mesel mosiik er a klausubes er a Rubak, e bol klou a rengum sel mongiil er a mui el kengei er a Rubak. Ka bo momdasu er tial bades:

“Te … ngilai a rengrir el meriou … ersel delchel a kle ngariou el reng; e … lilangel el mesisiich el mora Dios; el tal sils. … [Engdi a] Rubak a mle meoud el remenges a lengelir e leng kngterir a uchul.

“Meng uaisei a Rubak a rirenges a lengelir, e mlo muchel … mengebekakle a chelngelir; … me … te milrael moungil beserir el mekekokterir.”

Bol klou a rengum sel Rubak le beskau a klengeltengat er Ngii me a kengei el mekekokil.

Ngokiu a temel a Rubak, e kau a mo omelchesiu er a Ngerel melekoi er kau, “Lak mongesang er kau el kirel a ika el tekoi.” A tara klebesei, sel molemolem lobult el mora Osobel, ea Demam ra Babeluades a mo ngmai el “oroid ra uldesuem a ikel kngtim el ngara [rengum], lokiu a urerel a Ngelekel.”

Me kau el mlo mekngit el metemall lokiu a oberaod el kngtil a tang, ng soak el louchais er a beltkil a rengul me a klubechub er a Osobel, chelodel me a budech er Ngii.

Sel klengitelreng a blo molchesuar, chelam a rengum, kereor, sel kedeb a telim le ke milchoit, ma dikeal teletelel a klengar el kau mulemdasu el kirel—ak meskau a meral lulterkokl el tekoi, a Osobel a medengelkau e betik a rengul er kau. Modersau el mo er Ngii. Ngii a ongelodem e klisichem; Ngii a mo odurekleterir a re anghel el mo oltekau er kau. Kol mo oingerang eng mo diak mngara ringel, ma diak el mekngit a rengum, ma ikel diak el soam el melbedebek a mobes? Ng diak kudengei. Engdi tiakid a kudengelii: Ngii a oba klisiich elmo msau a klungioul el mengai er a ikal chebul a ringel.

A re betik er a rengud el rodam ma rodos er a Grand Blanc, Michigan, lokiu ra diak el mesim el klaumerang er tir ra Jesus Kristo, ma blekengir e bekururau, a mla ngmai e mo melai, ra elsel a telal sandei me a buil ra ngar medad, a mui el diak a mo uai ngii el beltikelreng ma krasia er a Osobel.

Mesel molemolem el oumerang er Ngii, ea eabed er a ilkolk me a lengelem el meringel a le kebesengei a mo obult elmo merberebet el chiuosech er a deureng me a budech er a llomes er a tutau. “A llengelem a mobult el mo deureng. … Me a deureng er kau a diak a di [imol] chad elmo nguu er kau.” Sel taem a mei. Ak sioning el kmo ngii a mei.

A beltkil a rengul el tngakireng er a Jesus Kristo a sebeched el metik er ngii er a kot el chetituokel teletael, eng di kid a di blechoel lousbech ersel melngakireng el krasia er a Osobel. President Dallin H. Oaks a ulsisechakl: “E leng sel melngakireng el blo er ngii sera le ngara beluulechad, ea Osobeled a sebechel mengelaod, omekungil, e melisiich er a rokui el sechal ma redil ra ngii dil ker, engdi a kuumerang el kmo Ngii a meruul eldi mor tirkel tir a osiik er Ngii e olengit a ngesou er Ngii. A Apostol Jakobus a ulisechakl, ‘Bom nguu a rengum el meriou er a medal a Rubak, e ngii a mo kiderau.’ (Jakobus 4:10). Kid a nguu tial klengeltengat sel bo doumerang er Ngii e meluluuch lolengit a ngesou er Ngii.”

Ak ngiluu a turk er a ungil sechelelik e mlamo merek el General Authority, Elder Robert E. Wells, el 97 a rekil er chelechang, el bo kuchais er a teletael dilubech elmo er ngii er a kmeed el okolem el rak er a mla memong:

Sera le kiei er a Paraguay er a 1960 e ulureor er a bank, a Robert Wells, seikid eng 32 rekil, me a bechil el Meryl, tir el terung lulmekall a kakerous el skoki, el suebek elmo remei el ngara Uruguay el mora Paraguay. Sera lesiseb er a okrokl el eabed, ea Robert me a Meryl a miltenget osengir ma kal sebechir el kaukedong er a radio. A Robert a mle mereched el sorechii a chutem, e mlo medengei el kmo a skoki er a bechil a miltemall. A bechil me a re teru el sechelil silebek lobengkel a dimlak el sobel. A rengelekel, el mla ra blirir er a Asunció, a rekrir a mle euid, eim, me erung.

A Elder Wells a mellekoi er a kngtil a rengul:

“A tekoi a di ngsonges elmo cherechar el diak el sebechel smodii tial klengitelreng el omkuuk er a chelsel a renguk, el mekekii a renguk elmo diak kulchesuar a ngerang. Dmolech el chiuosech er a klengitelreng a diak el sebechel meterob el merberebet. A rulii el mengai el mo mekngit, sel uldesuek el melasm elmo obengelii tial blak betebengii el bechik a mla merael, ak mlo ulis lomelchesiu er a uldesuek loberaod le kulmelchesiu el ngak a mle uchul tial tellemall.”

A Robert a kmo ngii a uchul leng dimlak el lungil mesa omengedmeklel tial skoki me a dimlak el bo lungil losisecheklii a bechil ra ikel lomsodel a klekedall sel sebek. Ngulmelechesiu el kmong ngii a uchul e leng ngarngii a dimlak el kedmokl.

Robert a melekoi:

“A uldesuek a mlo ngara ilkolk. … A kuk di mle chad—[el di kirir a rengelek,] e diak a ngodech.”

“Ng … mlo diak el soak el melemolem.”

Omerolel a taem, ea Robert a mlukngeltengat er a dmolech el chedaol omeruul. Ng millekoi:

“A tara kesus, el locha tal rak ruriul, e ak mle tubaruach el meluluuch, eng dilubech ongasireng. Sera kululuuch e kulengit er a Chedam ra Babeluades, e a kulmelchesiu el Osobel a mlera chebodek ma krirengesii a ngor el melekoi aika el tekoi el mora renguk me a dingak: ‘Robert, a melngakireng el tengetengek a mlo kokad a kngtim me a cheleuid el mriruul. A bechim a ousubes er kau. A resechelim a ousubes er kau. Ak mo kiderii a chelngelem. …’

“Seikid el telkib el taem, ea berredel a uldesuek [me a klengitelreng] a meral milengubet er ngak. Ak mlosobel! Ak di mle mereched el moungil medengelii tial lileuekl el klisichel a Tngakireng er a Osobel e… ngii a milketmokl el kirek. … Ak … mlo soiseb er a llomes me a deureng el dirkak a tang me kisang. … Ak mle nguu a sengk el dimlak kurreor el kirel—el sengk er a Rubak el krasia. … Ng diak el kirel me rengak—ng dirkak ak relii elmo sebechek el nguu, engdi Ngii a okor e ngiluu el meskak.”

Rodam ma rodos, mei me a derta er kid lbol “mechedaol er a Kristo lokiu ra krasia er a Dios, e loeak er a milchoit el rsechel a Kristo, … [merael elmo] chedaol, el diak a kngtil.”

Ak ouchais er a beltikelreng, chubechub, me a krasia er a Osobeled e Olsobel. Ngii a ngar. Kid a bliongel mo er Ngii: kid a ngalek er a telbiil. Mesel doumerang er Ngii, loltirakl er Ngii, e ultuil er Ngii, Ngii a mo kiderir er a klengitelreng me a kngtid. E okor, ra uriul er tial klengar, el de ngara blil a Demad, e kede mo kiei lobengkel el diak a ulebengelel mo cherechar. Loba ngklel a Jesus Kristo, amen.