Jesus Kristo me a Beches el Uchelem

A Jesus “a mirael meruul a ungil.” Kede choiuii tial tekoi er a chelsel a hong er a Rrellir. Ng kmal klou el diak dotebengar el tekoi! A Jesus a meral mirael el meruul a ungil! Ngii a meral uchul—e moktek—ra klungiaol! Ngii a uldersii a klengar Ngii el rokir er a beluulechad el meruul a ungil. Ngii a “chubechub e mui er a krasia, e klou a rengul, mui er a klengeltengat,” e mui er a klungiaol me a diak a ulebengelel chubechub.

A dolasm el mesaod a Klugiolel me a chubechub er Ngii eng kede klou lolngesonges! Ng klemerang, a tekingel a Apostol Johanes el kmo, omko kede mo melasm el meluches a bek lolchotel a klungiolel omerellel Osobel, “ea beluulechad meng diak el sebeched lemuches a hong er a rokui lungil lomerellel.”

Aikel sesei lokesiu el ngara chelsel chedaol llechukl el kirel a Jesus el “mirael meruul a ungil“ a rullid el mo mechas a rengud, sel sekum kede kmal mo ungil lomtab omko kede mla risei er sel taem, me kede sioning ongasireng er Ngii, e ngmai Osischeklel, e mesa Lomekungil. Ng mle teloi er a remlodik er a beluu, e ulemor imal lomekungil er a resilecher me a remekikiongel, e milsterir ongelaod a remichetechut, e ulisechakl a mimokl klemerang, e ulemekedong er a remekngit el mo ouchel a rengrir. A rebek el mle chebedes, a mikou el chad, ma mlo melaok a rengul redil; a chelemus, me a mechad, me a bengong; me a bek el ngara klengitelreng el chedil, a kurusii el chedam, me a ngara chelebuul melakl dil; a re mlotutakl, me a mlotuub, me a re mlara ringel; me a kodall er a tech me a kodall er a reng, e a ikel Ngii a riruul a milsterir a beches luchelir. Ng uaisei, lolngesonges omesodel!

A bek Ledilung me a riruul a mlo uchul a beches luchelir tirkel Ngii a ulemekungil, ulemekngeltengat, ulisechakl, e silbecheklterir er a klengit. Ng dimlak el bo el ikrekelterir, e Ngii a kmal diak el bo likrau. Ka momtab er tiaikid el taem el mrenges aika el meral selbechakl Tekingel:

“Rungalek, a kngtim a mla mengubet.”

“Ekebil, Ak dmu er kau el kmo, bekiis.”

“Bom klikiid.”

“Me ngak meng diak bo kumals er kau: morael, ng di ke le mluut el mo er a klengit.”

“Rungalek, bol chelellakl a rengum: le kau el lulmerang a uchul me ke mlo ungil; morael el ngara budech.”

A tekingel Osobel el mo er tirkal chad a mle kedeb, eng di Ngii a ulechotii a beches el ngedechel a klengar lokiu a klausubes, omekungil, oluut, budech, me a diak a ulebengelel klengar. Ea klungiolel tial teletael a kmo, Ngii meng meskau me a ngak a osisiu el beches lucheled. Kid el rokui a sebeched el nguu a beches luchelel a klengar kid, lokiu a Jesus Kristo. Luldimukl er kau. A beches luchelel a klengar a ngii a kmal moktek er sel uldesuel a Chedam el kirir a Rengelekel. Tiaikid a Ikelesia er a beches luchelel a klengar! Tiaikid a Ikelesia er a beches luchelel!

Ngokiu a techolbechelid er a ralm me a Chedaol Reng, e kede “lmuut el mechell” e sebeched “el soiseb er a rael er a beches el klengar.” Ng kol uangera el klungiolel a reng el tial beches luchelel a klengar el mo er a chad el chellungel er a berredel a klengit ma lechub eng kurusii er a telmellel a mle mekngit el klengar me a mekngit el deleuill? A Jesus a dimlak lousbech er a klausubes er a klengit ma lechub a uchelel a beches el klengar, eng di Ngii a miltecholb, lochotii er kid a ngarbab el selbechakl rael bedul a beches luchelel a klengar el Ngii a mla ochotii el mei er kid.

Ea beches lucheled a diak di el tal dubech el merekong. Bebil e kede omdasou el kmo a techolbechelid a di tang el beches luchelel a klengar kid e merekong. Ng diak el uaisei. Ng diak di el tang a techelled el merekong. Aika el beches luchelel a klengar kid a sebechel duubech er a bek el sils! Me a bek el sandei sel donga er sel telkib el blauang e dolim a sesei el ralm lomeltked er a sengk er a cherrungel Losobeled el moktek er a kodellel a meskid a betok el beches luchelel a klengar er kid a bo dousbech! A Jesus a meskid a betok el beches luchelel a klengar kid sel bo dousbech.

Ngokiu a blakelreng me a deureng er a beches el klengar el ngara Kristo, eng sebeched el mo “beches el chad,” el mechut el klengar a nguemed e a rokui el tekoi a mo beches. Ngera mo mekioud er a uai seikid el beches el techall elmo er ngikel loutekangel eldi melasem, el melmolm el melilt el lokiu er a klaumera er a klisichel a Osebeled lomekungil e moluut, ma le blo rengii a meringel olibesongel el kirel a klengar er tial robetang el beluulechad? A Osobel a dimlak el kimer er a blakelreng er Ngii lotireklii a soal a Chedam e rokir a chedaol urerel ma tngkaireng er Ngii, el diak el iior er a ringel el rirelii el mlo omritel, e mengerngars a rsechel, e mlo er a ringel a bedengel me a rengul, me a nglunguchel lolengit me a ringel bol cheroid er ngii. Osisiu, e Ngii a ulecholt er kid a blakelreng loutekangel el uaia teletelel a Dios.

Me a bek el telbiil deruul me a blakelreng er kid loltirakl, eng sebeched el nguu a “beches el klengar” me a cherrengelel a “beches el reng.” Ea cherengel a taem, el dokekokid el siotai er a Klungiolel el mei er a rengud e decheroid aikel mengesuseu el ngor er a uldesued, e kid a mo Chedal le kid el meral Rulii meng mo Dios er kid. A Jesus a meral soal mo King er kid e Ungil Mengkerenged e Prince er a Budech el kired, e kid a sebeched el Ngiltii el mo uaisei er a chelsel a rengud me a uldesued.

A ouchelreng a mekengii a chesimer er a beches el klengar, beches luchelel, me a ongeru el techall. A osischeklel a betik er a rengud el President Russell M. Nelson a mla meketakl a cheleuid el tekoi el kirel a chedaol sengk er a ouchelreng, e a kumdasu e kede mocha medengelii a belkul.

Ng dmeu a rengud el rongesterir a rengeasek el ngeleked el mesaod er a belkul ouchelreng el kirir. Ak dirk rirngesii a ngeasek el dil, el klikmechur, e melekoi el kmo, “Sel kumdasu er a ouchelreng, ouchel reng er a bek el sils, eng meral dmeu a renguk lolsingch el kirel. Ak mlechesuar a beltikelreng me a deureng er a Demak er a Babeluades me a Osobelek. Ng diak medakt el mo er a Chedam er a Babeluades lokiu a nglunguuch e olengit a ngesou er Ngii er a ngi di el ngerang el kurusii el kirel. Ak medengei el kmo Te diak lolasm lomedikl er ngak el meruul a mekngit. Ng berrokel a chimorir. Tiakid a ouchelreng el merngak,” ngii a milekoi. Ngika el ngeasek el dil a medengei el kmo ngokiu a Jesus Kristo, eng sebechel nguu a beches luchelel a klengar ngii!

Ke ousbech er a beches luchelel a klengar kau? Ng sebechem lomuchel er a beches luchelel, e kau? Ka momtab er tirkel chad el Osobel a ulengeseu er tir—a rechad el Ngii a ulisechakl er tir, omekungil er tir, ulekiis er tir er a kodall, ulusubes er tir, e millisiich er tir. Omomdasu eng millilt er tir lokiu a deruchellir er a buai ma lechub a teletelel a klechad er tir? Ng locha ulemii er a remelemalt me a remekngit? Ng locha millilt er a rechad el tir a mle ungil ma lechub eng betik a rengul er tir? Ng diak.

A rebebil a mlei er Ngii loba mesisiich el klaumerang, loumera er a chedaol Klisichel lomekungil—ngike el redil el mla er ngii a secherel a rsechel, me ngike el soldau er a Rom el mesiungel a kilo ng mad, me ngike el chebeds, me a Jairus, ma mikou el Bartimaeus. Tir e mle ultuil er a klaumerang, e ulureng me a klungiolel me a klisichel a rabbi er a Nazareth bol ngedechii a klengar tir me a uldesuir. E Ngii a riruul. Ng mirrekii sel klisichel lomekungil.

Eng di Jesus a dirrek lulmekngeltengat er tirkel lulralmesils a klaumera er tir, el uaia ngkel chedam el silecher a ngelekel eng lilangel, locha uai kemiu el kmo, “Rubak, a kumerang; me mngesukak er a chelitechetuk.” Osisiu eng dirrek luldersii a chubechub er Ngii el mo er tirkel dimlak losiik er Ngii, el uai ngike el redil rirebet er a laokreng, a mla melakl dil er a Nain, sechudel chad el mla er a diong er a Bethesda, me a mlechell el chad el mikou. Ke mla melchesuar el meruul a ungil er a klengar kau luldimukl ra lak mosiik er Ngii ma lechub a lak moltirakl er Ngii?

Tirkaikid el chad er a chelsel chedaol llechukl, me tirkel rokui el mo orrenges e kongei, e Ngii a uchul a beches luchelel a klengar, a le beches luchelel a klengar el mo mousubes er a klengit ma lechub eng beches el klengar el mo ungil er a secher ma lechub a beches el klengar lokiu okiis er a kodall.

Me tia ngera belkul el mo er kau me a ngak? A klungiolel me a chubechub er ngii me a beltkil a rengul a diak a tomer ngii. A beches luchelel a klengar a ngii a kmal ngara chelsel a rengul a moktek er a Chedam! Beches luchelel a ngii a urerel a Ngalek el Jesus! Beches el sils, beches el bliongel er a klengar, beches el techall a beot luchelel a ungil chais er a ebangkelio!

A leuaisei, e ke locha kmal cheridang er a telbilem el nguu a beches luchelel a klengar? Ng diak. Ke locha mla rulii tiang me sei el betok el taem meng dikea techellem? Ng diak. Ke locha kmal cheridang er a Kristo meng dikea lengesukau er a beches el klengar kau er chelecha el mong? Ng diak. Ng di tal cherarou a ungil a rengul sel momdasu el kmo ng dikea rolel. E diak el uaisei.

Ea beches luchelel a klengar a lmuut el ngaruchei er a di klengit ma chelbirukl el deruul. Ngokiu a klungiolel me a krazia er a Osobel, eng sebeched lomuchel beches el ngmodech a uldesuel, mekngit el kse, mekngit lomerelled, mekngit el blekeradel, omelchesiu el diak a klisiched, me a ultelchekled er a rebebil me a el diak el soad el nguu a ngerachel. Kau a kmal sebechem el ngmodech a teletael el ngii a meketeketang el mengesang er kau. Ng sebechem el muut lomuchel lokiu a klisichel a Mastang er a beches luchelel a klengar. Ngii a diak bol mesaik lolngeseu er kid lomeskid a beches el lucheled.

Tirkel tir a kurusii er a ringel er a osisu el klengit ma lechub ngosisiu longetikaik er a bek el taem, e moutekangel melemolem. Ngii a dirkak lia orars el melenget er kau. Ngii a dirkak lia terbengel a ongeru el techellem. Ke melemolem. Ke melemolem el melasm. Mosiik a ngesou er tirkel ngara bita er kau. E oumera er a beches luchelel a klengar el medechel kirem er a bek el taem el mobult el mo er a Chedam loba blakelreng. Bo bechei a klengit, aikel domelekl meruul, me a klengarbab el reng lomtok bo dengai locheuekl, er a ikel lolsechelel. Ng diak a belkul mluut el mo er sel klengar el kau el bla er ngii ruchei. Bo murrekodel er a beches luchelel, a longerung a lechub e ngongedei ma lechub e ngongeuang—me a le dart—el techall, el modars el kirem lokiu a tngakireng el rsechel a Jesus Kristo.

Ng meral diak el sebechek el smodii a tial omereng a saul el kirel a beches el luchelek el blak ngai me a ikel ngii a bok ngai ruriul.

A Osobeled a dilii a tara tekoi, el sekum eng diak le ngarngii eng diak a belkul a urunguled me a deureng er kid. Uriul er a ringel er a Gethsemane me sel lulebongel el ngara kerus, e Ngii a dilu el kmo, “Ng kol merekong.” A ulochel a Mesiah a mla tmaut, e a kelebsengel a klengit er a rokui el chad me a ringel a mla mochar. Ng millekoi el kmo “ng merekong” sel cherrungel e diak a ulebengelel tngkaireng er Ngii. Eng di a Tngakireng er Ngii a diak bol cherrungel a lak Ngii el soiseb er a beches el klengar er sel longedei er a klebesei, el beches luchelel, e chetengakl, el mla mekiis er a kodall lokiu a klisichel a Chedam.

Le Ngii el mle blechoel meruul aikel tekoi el soal a Chedam, e Ngii el “mlo chuarm er a ikel rokui el soal a Chedam,” me kau me a ngak a sebeched el nguu a beches luchelel a klengar. Mnguu a beches luchelel a klengar kau, er chelechal sils, er a chelechal taem. A Jesus Kristo a Uchelel e Ulebengelel a klaumera er kid, el meluches a diak el mochur el bliongel er a klengar kid. Ngii a Uchelel e Ulebengelel—ulebengelel a kngtid me a ringel el dengarngii e uchelel a beches el klengar Lobengkel, e mechikid el mo nguu a krasia er Ngii, el ngosukid locheueklii a mechut el klengar, e lmuut e lomuchel er a beches el sils, mo betok el taem el kirel a usbeched. Ng klemerang el “klungiolel me a chubechub er Ngii a [diobengked] er a klengar kid el [rokir].”. El ngara ngklel a Jesus Kristo, amen.