Momes el Bedul a Dios me bom Ngar

Sera Ongelolem el buil, e a klou el aksident a dilubech er a beluu er a Lesotho er a dims er a Africa. A kekerei el bas loltak er a relluich el ngeasek el dil er a Maputsoe Branch er a Ikelesia me a reteuid loungerachel er tir a mirrael mo er a mats, el Maseru, el mo er a ongdibel er a rengeasek el redil el omteche belurir. Me a lengara omerollir er sel tutau, e a mlai el kuk ngara bitang el merael bedul tir, a millasm lolechit er a tara mlai ruchei er ngii, e siliseb er a rolel tial bas. Ng dimlak a taem a lechub a techall lolechib er tir, me a ikal mlai a mlo kasiuekl, e melitai el tuobed er a rael, e tmaut a ngau er ngii.

Chelsir rokui el chad, e te teruich me a teim a mlad, luldimukl ra telolem el ngeasek el dil, teru loungerachel er a Rengeasek el Dil, me a merredel er a branch me a bechil. A resilobel, rchedal a telungalek, me a resechelei a mlo chuarm er a klengitelreng, luldimukl er a ngasechereng, klekurusii, me a ouchelreng. Eng di diak el iior er a ikaikid lulmelchesiu me a diak el bleketakl nger, e tir a mlengelaod er a ta me a tang e ulebult el mo er a Dios lokiu chedaol chelitakl, chedaol llechukl, nglunguuch, el biltik ongelaod er a chelsel. A teruich me a euid a rekil silobel el Setso’ Selebeli a millekoi el kmo, “A Jesus Kristo a betik a rengul er kemam e obengkemam, eng di rengmam a ngara ringel.”

A ngeasek el dil me a tara oungerachel el mle nuiing el kirel a delul er a bedengir a dilak el mesuub er a Babier er a Mormon. A chimo er tir a millekoi, “Aki dirk milsuub a tekingel a Moroni, el tekingel a Moroni aikel ngii a kmal kumelchesiu. … A tekingel, a uaia ledu el kmo, ‘Ng kirem el suub aikang el milluches el kirem el mo ngosukau el imiu er tiang.’”

A uldekial a kemeldillir tirkel mlad, e a Elder Siyabonga Mkhize er a Area Seventy a millekoi, “Ng kired el rokui lobult el mo er a Rubak er chelechal taem e olengit er Ngii me lechelaod a rengud … e le sebecheklid er a ringel domelchesiu.” A merredel er a Rengeasek el Dil er sel kmeed el Leribe Branch, el Mampho Makura, a millekoi, “Mobult el mo er a Rubak, bo betik a klisiich el kongei er a Soal. A Jesus Kristo a ngii a ‘uchelel e ulebongel er a klaumera er kid’[Hebru 12:2]. Lak molechib osengem, e bai momes el bedul Ngii.”

Momes er Ngii. A tekingel a melekl a llechul a Alma el mo er a ngelekel er a Helaman el kmo momes el bedul a Dios me bom ngar. A Alma dilu teletael er a Lehi me a rechedal lousbech er a Liahona lokesiu: “Ng beot a doltirakl a tekingel a Kristo, el melutk er a melemalt el rael el mo er a diak a ulebengelel deureng, el uaia redemad er a uchelel lultirakl er tial kampas, el ngii a milutk er a melemalt el rael el mo er a beluu er a telbiil. Ng millekoi, “alsekum teomes e temo ngar. … E omko kid … omes e kede mo ngar el mo cherechar.

Ea kuk mle tara tekingel, e a Alma millekoi er a tara okesiu er ngike el ruul er a sintsyu el bersoech luldersii a Moses er a taem el Israelites a chilau a kerior er ngike el mekngit el suebek el bersoech. A Rubak a dilu er a Moses mel bebii a kora teletelel a bersoech e lenguu el turcheklii er bebul a skersel, e lodersii el mo er bab lobengkel a yaksok el kmo “ngike lulebangch, a lsekum eng chisngekl lomes er ngii, a mo ngar.” A Alma silodii el kmo ngike el bleob el bersoech a mle olengchelel a Kristo el mo mlodars er a kerus. Te betok a chilesngekl lomes me te mlo ngar, a tekingel a Alma kmo, a rebebil a kmal mle medecherecher a rengrir meng dimlak el chisngekl lomes er ngii me te ngilemed.

A Alma uleker:

Omko ng sebechiu el mo ungil a di mchisngekl el ngmai osengiu el bedul ngii me bo mungil, eng locha diak ko mereched el chisngekl, a lechub eng bai somiu docherecher a rengmiu el diak moumerang, e mesaul a rengmiu, meng diak mchisngekl, me ko mo nguemed?

A Alma dilu el kmo, momuchel el moumera er a Ngelekel a Dios, el kmo ng mei el me olsobel er a rechedal, e mo chemau a ringel e mo er a kodall el tngakireng er a kengterir; e dirrek el mo mekiis er a kodall, el mo uchul okiis er a kodall, me a rokui el chad bol dechor medal, e le mukerkeriil er sel klou el kerkeriil ruriul, loltirakl a urerir.

Ng uaisei, el sel tekoi el kmo “Momes el bedul a Dios me bom ngar” a ngarngii a belkul kired el diak di losaod er a mo suobel mo cherechar ng dirrek el klou a relii er a teletelel me a klungiolel a klengar kid er a chutem. Kom lematk a tekingel a ngeasek el Sister Selebeli er a Lesotho el blak delii—“A Jesus Kristo a betik a rengul er kid e obengked, luldimukl er chelechang el rengud a ngara ringel.”

Ng teletelel tial klengar er a chutem—el cherarou oldechelakl me a rokui el chad a diak el melemalt—meng mo er ngii a chetituokel er a rengud me a ngasechereng, ongarm me a klengitelreng, me a kodall, odechelakl me a diak el melemalt el teletael. Meng di okiu osenged el ngmai el bedul a Dios e a dersta el chad, telungalek, me a beluu a mo ungil beserir. A President Russell M. Nelson a ulisechakl: “Ngokiu Osobel, me sel cherrungel el Tngakireng er Ngii, e ngolsobel er a dertsa er kid er a chelitechetud, cheleuid er kid, kngtid, e dirrek el Ngii el mla soiseb er a bek el ringel, sebekreng, me a berraod el kemiu a mla soiseb er ngii el dirrek e sel [mesa Alma 7:11–13] omera el ouchel a rengmiu e mosiik a ngesou er Ngii, eng sebechiu el ngoriakl el mo er bab er tial beluulechad.”

Ng diak a blelekl yaksok el uaisel ngara Babier er a Mormon el uai tiang: “A lsekum e ko moltirakl a llechuk e ko mo selbechakl er a beluu; eng di a lsekum eng diak moltirakl a llechuk e kom tuobed er a rengedek.” A teletael dilubech er a klengar er a rechad el kiliei er a chelsel a Babier er a Mormon a meketeklii a klemerang er a ikal tekoi. A “Selbechakl” a belkul a kmo te mo kiei lulekrael e ngmai a klengeltengat er a babeluades er a klengar tir. “Selbechakl” a belkul a kmo ng mo ungil beserir er a delengcheklir meng rulterir el sebechir el bechiil, e omekdubech a telungalek, e ngarngii aikel lousbech er a klengar tir e olngeseu er a chelbulir a rebebil. “Selbechakl” a uldimukl er ngii a duch el ngosechekl er a ringel me a ongarm. Ngokiu a krasia er a Kristo, e a rokui el tekoi a dmak loureor el mo klungiolir, e mengikiid er tir, e smisichii a deleuill er tir Lobengkel.

A Alma silodii el kmo a omes el bedul a Dios a belkul a mo oltirakl a Llechul, e melemolem el meluluuch lolengit a ngesou er Ngii, e osiik er Ngii er a ikel rokui el doruul, me a rengum bol mui er a omereng el saul el mo er Ngii a le llomes me a le klebesei. A llechul me a tekingel a Dios a debetik er a chedaol llechukl me a tekingir a Rmesiungel. A osisechakl me a suobel el ngar sel “Telungalek: Chais el mo er a Beluulechad” a ngaruchei lokesiu. A kuk chimong a ulekrael el ngar sel babier el Kirel a Klisichir a Rengeasek. A kerbai er a Rengeasek el Sechal me a Redil er chelechal rak a “Omes el bedul a Kristo,” el mengai er a ongelaod el tekoi el mlo er a Joseph Smith me a Oliver Cowdery a kmo momes el bedul ngak er a bek luldasou, lak moumededenger, e lak ko medakt. Ea Kirel a Klisichir a Rengeasek a mesaod a bebil er a kmal meklou llechul a Dios me a teletael e olisechakl el kmo ng mekera domes el bedul a Rubak sel dolilt er a ungil. Ng tekoi el diak di lomekrael er a rengeasek ng dirrek el mei er kid el rokiu.

El uaia chimol klou a belkul lokesiu, e sel babier el Kirel a Klisichir a Rengeaseka ngarngii a klou a belkul ulekrael er sel bliongel kmo “A Bedengem a Chedaol.” Ng dmu el kmo “Bo mongull er a bedengem—me a bedengir—a rebebil. Sel molilt a bilem, teletelel a cheium, me a teletelem, e moker er kau, ‘Ngak a mengull er a bedengek el chedaol sengk el mlara Dios?’”

Tial Kirel a Klisichir a Rengeaseka melemolem el melekoi el kmo, “Bo mongeluolou a tekingel a teletael er a deleboes e momelchesiu el chedaol. A ikang a diak el kirel tekoi er a ngellakel malechub e lomosiroi. A ikrel a chebechilel a sechal me a redil, eng mekngit el morutech a berrotel, e chedaol bedengel a chad ngii me a loubail. Aikel molilt el meruul tekoi, me a omomes, omonguiu, omorrenges, omomdasu, me a om post, a lechub e ke text, e bo mongeroid er kau er a ikel omuchel a laokreng er kau a lechub a tara chad.”

Tia mekletkid er a omellach el dirk ke mla er a President Nelson el kmo:

“Kesai el tekoi a mo chetituokel ra klengar er kau er a mereched el taem er a bai mtemelii tial chedaol llach er a [klikiid er a delboes]. Tirkel tir a mla kutmokl a telbiil lobengkel a Dios, a deleboes a tara kot el mereched el rolel e koridii a klaumerang er kau.

“… Sel klisiich el omeob a klengar a ichimol lemelted er a re chelid el Demad ra Babeluades a kongei er a Rengelekel er tial klengar el meruul er ngii. A leuaisei, ea Dios a kutmokl a bleketakl llach el doltirakl el kirel tial, chedaol el klisiich. A teletael er a cheliuaiu a di kirel mekedmokl er a delongelel a sechal ma redil el kaubuch el terung.

“Klou ra beluulechad a diak loumera er tial tekoi, ng di a uldesuel a buai a diak lomiich er a klemerang. A Rubak a mla dmu el kmo ng diak a diak el klikiid el chad el mo nguu sel kot el ngarbab el renged. … A lsekum e ke mla ruebet er a teletael er a deleboes, e ak kulengit er kau me bo mouchel a rengum. Mei er a Kristo e mnguu a yaksok er Ngii er a cherrungelklausubes sel omeral louchel a rengum er a kngtim [mesa Isaiah 1:16–18; Doctrine and Covenants 58:42–43].

Molatk el kmo sel yaksok el ngara chelsel a Babier er a Mormon, e a ulemtok er a klungiaol a dimlak el chelebuul—ng bai cherroid er a medal a Ruabk. A ngara Medal a melutk er a odbechel Chedaol Reng er Ngii er a klengar kid. Rokui el mechell el mei er a beluulechad a oba sel Llomes er a Kristo. Osisiu, a rebebil a nguu a techolbechelid e nguu a sengk er a dechelel a llomes el ngii a Chedaol Reng. Ng meskid a llomes me a ulekrael, e choisois e smisiich a sengk me a duch er a chad, e ngoseuir lodngakl ongetikaik er a cherarou, me a mekngit lomelilt, me a rebetel.

Me ak uai kemiu, el medengei el kmo a rebebil el mle tal ngara deureng er a sengk er a Chedaol Reng eng di ngokiu a rebetir loltirakl a llechul a Dios e te mla metom er tial klengeltengat. A tal me soiseb er a uldesuek a chad el mla mengubet a ngklel er a Ikelesia el rebetel a uchul. Ng millekoi el kmo a mle kot lomelchesiu er ngii a ngasechereng. Ngulmelchesiu el merritel er a re diak lungil loungerachel. Ng mle medengei el kmo a le rirrelii a diak lungil, eng di ng milsebechakl er ngii loltelechakl a telitur me a mekngit er a rebebil. Telkib el taem, eng mlo smau er a klengar er a ikrel a Ikelesia el mlo diak a ngerchelel me a diak el ngara rua ongdibel me a ka loldingel er a rebebil.

Ng millemolem el uaisei el telkib el taem, eng di ng dikea lomelchesiu er a Chedaol Reng—me a Dios—er a klengar ngii. Aikel dilubechel el mo er ngii sera ngaramong, eng mle medengei a lullab, er a bek el sils, a ongelaod, ulekrael, me a selbechakl lokiu Chedaol Reng, e chelecha ngosiik er ngii. Uriul, eng mlo ouchel a rengul luchul eng mlo sebechel muut el nguu a techolbechelid er a ralm me a Chedaol Reng.

Ng kora ua lak a ulebengelel a kakerous el bedengel a teletael el rechad a mong loskiik a belkul, deureng, me a ngesou. Betok a “rosiik lengelakl er a olangch.” Eng di kid a diak el kired “el mediderurt losiik el mong e mei, e dorrenges a kakerous el osisechakl [a lechub a teletael].” Le domes el bedul a Dios, e kede metik er a budech er a chelsel a chetituokel, e a klaumera er kid a melemolem el mukeroul luldimukl a ikel taem el dengara rraureng me a ringel. Ng sebeched el metik olisiich er a chelsel a ultok me a klesabisi. Ng sebeched mes a ungil er a teletael ngarngii er chelechang. Ng meral diak a ngodech el rolel ng di ikel Dios a Ngii a mla dmung: “Momes er ngak, me bom sobel, kemiu el rokui el ngara beluulechad: le ngak a Dios, e diak a ngodech.”

A omes el bedul a Dios a belkul a kmo Ngii a diak el kuk dil tara ikel meklou el ngercheled; ng bai, belkul a kmo, Ngii a kot el ngaruchei el ngercheled. Ak lmuut el melekoi el kirel sel aksident el dilubech er a Lesotho er sera Ongelolem el buil. Me ngara dukellel er a ospitar, e a tara oungerachel er a Rengeasek el Dil el silobel, el dimlak loumera er a Dios ruchei er a bol chedal a Ikelesia, a melkinga el kmo a moktek er ngii er chelechang a osiik el kmo ngera uchul meng silobel a klengar ngii. “A blakelreng er ngak er chelechang el mesiou er a Dios, a ngii a nger el mei er ngak,” ng millekoi. “A kulemdasou el kmo ng betik a renguk er a Dios, eng di chelechang eng meral, meral, meral, el meral, betik a renguk er Ngii. Chelecha e Ngii a [kot el] ngaruchei er a klengar er ngak.”

Ak sioning el kirel a Chedam, Ngalek, me a Chedaol Reng, el tir a cherrungel loba chimol tekoi, uldasou, moktek, me a omeruul, el chimol Dios, el tir a dosiik er tir er a rokui lungil tekoi. Ak sioning er a Tngakireng er a Jesus Kristo, luchul a klisiich el kudmokl a mengasireng el yaksok, “Momes el bedul ngak, e moutekangel el mora ulebongel, me bom ngar; le ngike loutekangel el mora ulebongel a bok bsa diak a ulebengelel klengar.” Loba ngklel a Jesus Kristo, amen.