A Rubak a Orreched er a Urerel

A Charles Dickens a mlo ungil luchesii sel merael isel babilngel el The Tale of Two Cities lomuchel el kmo “it was the best of times; it was the worst of times.” Sel domtab er ngii, e tiang a kmal klemerang er chelechal taem.

Kede kiei ra metachebesul taem el “beluulechad el rokir [a] ngara nglemuu.” A tekingel a President Russell M. Nelson a el kirel a mo chad er a budech, e kid loltirakl er a Jesus Kristo, a kired el mo chad er a budech e liluut el medung er chelechal tutau er a Elder Gary E. Stevenson. Tia klou a ultutelel el kirel omekdebechel a kltalreng, budech, me a omekungil er a “tchelsel a meringel taem.”

Kede dirrek el kiei er a chelsel a “ungil taem,” el ngii a moktek er a cheldechedechak. A Rubak er sel uchelel a Doctrine and Covenants, er a kot el bliongel, eng dilu el kmo a cherrengelel ebangkelio a mo oberk er a bek el merkelel a beluulechad. A Rubak a meral loreched er a Urelel er chelechal taem. Ng kired el kmal mo ungil melchesuar ra rengud el kirel tial lorechudel ureor, el mla dubech e ngarngii ra ikal etiteuokel taem. Kid a kiei ra taem sel sekum tirkel loltirakl er a Rubak a sebecherir rongesii a Ngerel e otireklii loba mui el reng ma uldesuir. A Rechedal a Ikelesia ra Jesus Kristo er a Uriuk-klebesei el Santo, el blak a rengrir loltirakl er a Osobel me a Lechul, a mla metik ra moktek me a bliochel el budech el ngara rengrir.

Ngarngii ra kakerous el taem er a reksi ra Ikelesia, e ngarngii a klou el lildois er rechad el mla soiseb ersel rael er a telbiil. A ta er tial taem a dilubech er a delongelel a 1837 ma 1850. A bebil er tirkel mle kot el Apostol er tial mla moluut el Ikelesia ra Rubak a mlo er a mision er a United Kingdom. A ikal mision a mlo uchul ea re telael el chad a mlo chedal a Ikelesia, e sera 1850 e te liluut el betok a rechedal a Ikelesia el kiei ra United Kingdom ra kuk United States. Seikid el taem, ea Rubak a ulemekrael er tirkal Santo me le bora Utah. Ng klou lomerael a dilubech, el bebil ngilai a ngeseu ra udoud lulekiu sel Perpetual Emigrating Fund.

Ng kmak soak sel teletael er a bol siseb er a Salt Lake Valley er tirkel betok el lulebult el chad el mlara England ma Wales er sera 1852. Sel chelchad a mlo kebetech tir ma Kot el Presidency er sel siseball er a Emigration Canyon, lulbengkel a Captain Pitt’s Band. A Deseret News milsaod er tir el “delbechelir a re meluaoch [luldimukl] ra rodos ma rengalk, el merael, delul ra sils, e telmall ra kengtil a yanged, ngdi ngdiak el eloit; ng kebekakl e dmeu a rengrir, el kmal lungil emolt er a ungil e mui el deurreng el ngara osengir.”

Me sera “lengelakl er sel techukiil er a templo , … ea re telael el sechal, redil, ma rengalk, el mlo kldibel, el mlara kakerous el mats ra beluu, el dmak el ngara mui el deurreng loutkeu.” A President Brigham Young a milsumech a tekoi elmo er tir: “A Rubak el Dios er a Israel lomekngektengat er kemiu. … Aki blechoel miluluuch el bedul kemiu; ng telael el nglunguuch a mlodars el kiriu, ra bekl el sils, elmo re Ngii el loldurech er kemam el mengudel er a Israel, lolsobel er a rengelekir a rechad el lolsisechakl er a ebangkelio, e mengetmokl er tir el kirel sel lomrolel a Messiah.”

Ngokiu er seikid el reng er a deurreng ra delubch el tekoi, e bok kluut losichii el bekl el beches lulebult ma re luetang el mera Ikelesia ra Rubak: Ng betik a rengmam er kemiu; aki ousbech er kemiu; a Rubak ousbech er kemiu. Ng locha diak ki bo mongemedaol er kemiu lobengkel a band, ng di aki meluluuch me a klengeltengat er a babeluades bol lobengkemiu er a ureriu er a rolel a telbiil el bedul a Dios el Edam ma Jesus Kristo er sel rengedel a celestial.

Ngarngii a mui lolechotel el kmo a klaumerang el ngara Jesus Kristo a di omkuuk er chelechal temed. Chelsel a Ikelesia ra Jesus Kristo er a Uriul-klebesei el Santo, eng obdois el idisir a rechad a mla obult. A ikal merkong el lokedei ma elolem el buil, e te kmeed letiu el dart el telael a mla mo chedal a Ikelesia. Tirkal lulebut a cherengelel a eim el basent er sel klungel a rechedal a Ikelesia. Aki outkeu ra re beches el chedal a Ikelesia el blerek a imomam me a dmolech el mereng el saul er a rael el blam ngiltii.

Tirkal letiu el dart lulebult ra ikal mlo merek el lelolm el buil a chengelakl er sel klungel a rechedal a Ikelesia er tial Dart ma teruich el kelsel sera 1940, el mle ngarbab er a eai el dart el telael me a okolem el chad. Tial sel mle rak el President Jeffrey R. Holland, Elder Dieter F. Uchtdorf, me ngak a milchell.

Tirkal klebokel el beches el lulebult a mlei ra bekl el mats er a beluulechad. A ikel mle kot el lelolem el buil er tial rak, ea rulebuklt a mlo klou ra luich el basent ersel mlo merek el rak er a Europe, Africa, ma Taiheiyo, ma Latin America. Ngara North America e kede mla mesang a teruich ma euid basent lildois. A urelel a Rubak a melmolm el merael bedul luchei ersel mesisiich el rolel. A ikal lomdois el lochur a bleketakl el sioning el kmo a ebangkelio a remutech a reng e melodech a klengar ra bekl el basio.

Sera le temam, e tirkal dirk ulebult el chad a dimlak bol kldibel er a imol basio. Sel klaumerang er a rechedal a Ikelesia a uchul, ma ngeseu a ngarngii elmo olengeseu ra rechad—ma ikel lokedecherul a ikelesia ma templo—el meliuekl er tial rokir el beluulechad. Ma ikel lusbechall el kisel a priesthood me a ngeseu el modars, ea chedaol ruol lolsobel a ngarngii er chelechang ra bekl el merkelel a beluulechad.

Meng diak el ior ra de kiei er ngii, a rechedal a Ikelesia a kirir el loutkeu ra re dart el telael el beches el chedal a Ikelesia el uai ra ki moruul er ngii elmo er tirkel Santo ra England ma Welsh el ksilodii er a uchelel sel reksii er kemam. Ng soak sel tekingel a Elder Gerrit W. Gong’s er tial longdibel el ngii lolsichakl er kid el kmong diak a chad el kirel dengchokl eldi ngitang a le telmall a rengu malechub eng reng er ngii.

A chedaol ngerecheled a mo kongei e outkeu ra re beches me a re luetang el chedal a Ikelesia. Mesel loreched a Rubak era Urelel, e kid a kired lou beltikelreng, mengeluoleu, e mesiou er tirkel kilngei er a ebangkelio er Ngii. Kid a sebeched el lolengeseu el lomekdubech er a rechad ra Zion, el de “ngara imomg el reng e tal luldasu, e [kiei] el ngara lemalt.” Sel mo tang lobengkel a Rubak, kid a kired elmo tang ra medal a Rubak. A rokui el chedal a Ikelesia, el diak el ior ra sils ra techolb chelid a kerous er a ngerachel el loutkeu ra re bebil.

A osisecheklek el mora rechedal a Ikelesia a ngmai a imad el mechulterir tirkal kesiokel, el ngelitel el chad el kilngei er a ebangkelio ra Jesus Kriato.

A President Gordon B. Hinckley a ulisechakl kmo a bek el beches lobult a ousbech er a “sechelei, ngerachel, me a ulekeroul ‘er a ungil tekingel a Dios’ (Moroni 6:4).” Kid a sebeched el mo secheli el rulterir tirkal beches el mla obult el mo teloi er kid e diak el di le okiak. Kid a sebeched el lolengeseu er tir elmo medengei el kmo te mesiungel a Jesus Kristo el sebechir el mesiou el mora re bebil e kongei a okedong elmo mesiou. A rengeasek el lulebult el chad a kirir el lomes ersel mo mui el mesiou ra mision. Rokui el kirir el melasem el kiei el ua klengar er a Kristo.

Te betok a mlo chedal a Ikelesia el mlo tonget a rengrir e meringel losiik a beltikelreng ma ngeseu el ngara re bebil er tir ra re Santo.

Mo er kemiu el beches malechub e kom luetang el mera Ikelesia, ngarngii a bom chebangel lomelasem. Bo leklou a rengum el kirem. A re misionariis a ulsischeklemiu a mekloi a ultutelel llach e smaod a ikel telbiil ma chedaol ruol er a renged, el lechukl er a Preach My Gospel.

Melai a chedaol ruol me a telbiil e kiei loltirakl a llach a usbechall. Momes a ikel telbiil el ngarngii a belkul a de nguu sel ngarbab el klebkall. A ebangkelio a kutmeklii a meng sebeched el nguu tial ngarbab el klebkall, meng kired el mengetmokl e mengeluoleu a chedaol telbiil lobengkel a Dios. Meng diak el techolb chelid, olterkokl, me a oterkeklel a Melchizedek Priesthood el mora re sechal, a ikel telbiil el debo rengii a meketmokl er a elsel a templo. Sel kirir a mla mad, ea derta ra ikal chedaol lureor el lolsobel a di meketmokl er a elsel a templo. Ng uaisei, el kedmeklem el mo er a templo a kirel lorechudel moktek er kau.

Kau a mo melchesuar ra bebil er a taem el lolengesonges a ikel modengei. A klaudengei ra ebangkelio a klou klengeltengat elmo mengedengodech sel lorael a taem el mong, di ngdiak el chedaol lureor el lolsobel. A ebangkelio a diak el skeng er a omodengei. Engdi, uai sera President Nelson ra le yaksok: “Sel moluluuch e mosuub er a Babier ra Mormon er a bek el sils, e kemiu a mo meruul a ungil a telbiil er a —bek el sils. … Sel momdasu el kirel a ikel mosuub, e a mado er a babeluades a mo obok, e kemiu a mo ngmai a nger er a kermiu me a omekrollel a klengar er kemiu.”

Ma lmuut el tang, a bekl el rak el loliuekl a ikel suobel er a Ikelesia ra miting sel Sunday a mesaod er a Uodel el Renged, ma Beches el Renged, ma Babier ra Mormon, me a Doctrine ma Covenants. Lorael a taem el mong e kau a mo melchesiu el klou a rengum sel lorael mukeroul a klemedengei er kau er a ebangkelio. Bekl el taem el mosuub a chedaol lechukl a mo omekngeltengat e smisichii a klengar er kemiu elmo mesisiich el lomult er kemiu el mora ebangkelio ra Jesus Kristo.

Mesuub er a klikiid el losisecheklel a Jesus Kristo a tekingel a klengar er kid el rokir, el diul kirel a medengelii a osisechakl ma kiei ra klengar el ua Kristo. Orechudel el telbiil a meskid a telketek el luldasu el kid omes er ngii elsel rael ra telbiil. A ikal llach a mlamo ungil mosisechakl er a President Nelson. Rokui el chedal a Ikelesia, tokuni a re beches ma re luetang el mei, a mo mukngeltengat sel losuub el ngai a ikel klumech ra ulauoch el kirel a telbiil mesel rael ra telbiil.

Alsekum ke kutmokl a moktek el klikiid omeliul ra derta ra ikel telbiil el kirel a ngarbab el klebkall, e kau a ngarsel rael el bedul sel kot ek ngarbab el renged. A templo ma chedaol ruol er a templo a kirel moktek er kid. A bekl el telbiil a ngarngii el mora re dertang el chad. A tal telbiil, diak a ulebengelel chebechiil, a obengkel sel melemosem el louedikel kau ma keldemem. A moktek a kired el losiik er ngkel keldemed elmo ra diak a ulebengelel.

E tiakid, lak ke bom mesaol a rengum alsekum ma diak a ulebengelel chebchiil a diak el sebechel er chelechal taem. A re profet a mla lsisechakl el kmo ngdiak a klengeltengat el bo loreked er tirkel mekedung el chedal a Ikelesia el loltirakl a llach. A tara profet er a Babier ra Mormon, King Benjamin, a milekoi el kmal lungil: “Tirkel loltirakl a lechul a Dios … a ngeltengat er a bekl el tekoi, … e alsekum e [te] mekedung el mora ulebongel … e te mo kiei lobengkel a Dios el ngara klengar ra diak a ulebengelel deurreng.”

Kau a mo metik, alsekum meng direkak ke bo modengei, el kmo a rechedal a Ikelesia a diak el klikiid. A mlocholt el losisechakl a rulii meng bleketakl el kmo tial telkib el klengar er kid er a beluulechad, e kede remuul a chelbirukel el tekoi. Kid a kiei er a olngesonges e uleiit el beluulechad, el diak el ngarbab el beluulechad. Tial klengar a taem el de ngara skeng, el ngarngii a mekedekudem el techall el douchel el mesmechokl er kid.

Kede bekl el chad el lomelchesiu el lolngesonges sel dolasem elmo ua Jesus Kristo. A Tngakireng er Ngii a techall me kede mo uchel ra bekl el sils sel bode mechitechut. Ea Nephi, tara profet ra Babier ra Mormon a dilung:“ [Kired] loutekangel di merael mo ruchei el mla tibir a rengud el kirel a Kristo, e bleketakl a ongilem, me a beltikelreng el mo er a Dios me a rokui el chad. Malsekum, e ko moutekangel merael mo ruchei, el di urrekodel er a tekingel a Kristo, e outkangel mo er a ulebongel, momes, ea Edam a dilung el kmo: ko mo nguu a diak a ulebengelel klengar.”

Mesel dolbedebek a ikal longarm er chelechal taem, eng kired elmo melebedebek er a Osobel, Ngii ra losiou, e dirrek el mle kiei ra metacherbesul e kengaol el taem. Sel Ngii a lulemes er ngii a diak el blel tekoi ra ikel ongarm er a buai ersel taem; ng mle kirel a cherengelir a re Santo.

Nguriul ra Osebeled me a Lechul ma Osisecheklel eng diak a tal bla bol beot er tial beluulechad el blechoel eldi ngarngii a uldikel. Ng dimlak el beot er a Osobel el ngara tial chetituokel beluulechad, e dimlak el beot er tirkel mengetekled er a uchelel me a rechedal a ikelesia, e dirrek el diak el beot er kid. Kede ngeltengat, e le a rengar el profet a meskid a ulekrael el desal lousbech er chelechal taem. A President Dallin H. Oaks a mo melemolem er tiaikid el chedaol klisiich.

A kuchais el kmo sel lechul a Ikelesia ra Jesus Kristo a diak a ulebengelel a klemerang. A kuchotii a meral kudengelii a klebechel el sioning el kmo a Jesus Kristo a ngar eng sel Tngakireng er Ngii, e kid a sebeched el di mo tang Lobengkel. El ngara chedaol ngklel a Jesus Kristo, amen.