15:22

Mrelii sel Blingelem El Meral Ngara Rengum

Mla er a Elder Dieter F. Uchtdorf

Er a Chelechad er a Teruich me a terung el Apostol

Moumerang er a Osobel e bom nga er a omeruul, loba kllouelreng el blak a rengum, el meruul er sel ngii a blingelem el meral ngara rengum.

A bisek er tial merko el rak el mlora Europe, e ak mlo oldingel er a basio el kulureor er ngii, el Lufthansa German Airlines er a Frankfurt Airport.

Sel lolsisechakl a romekall a skoki er tir, e tolab a meringel chad el mesil lomekesiu a meral teletael se le sebek a skoki el ngii mesil a sebechel mekdebechii a beot el teletael me a bkais chemrungel sel sebek a skoki. A ikel betok el rak sera kumekall a skoki, eng kirek el nguu a skeng er a bekellel a skoki lousbech er tial mesil sel bek el elolem el buil mel sebechek el di oba kengei lomekall. A kungil lematk a ikeikid el taem el mui er a berraod me a sebekreng engdi dirrek el ungil a renguk sel kngesechekl er a skeng. Ak mle kekerei el chad er seikid e mle soak el chobangel a chetituokel.

Me sera bo kuldingel, ea tara oungerachel er a Lufthanasa a uleker el kmong soak el lemuut el tal kulasem lomekall er a mesil el diuai a B747.

Uchei er a bo kungil omdasu er tial ker, e ak rirengesii a ngor—el mechas a renguk leng di uai a oto ra ngerek—el kmo, “Choi, ng meral soak.”

Sel rechedel er ak delii tial tekoi, ea betok el uldasu a ulebekeek er a bteluk. Ng kmal meketeket ra kumekall er a 747. Seikid el taem e ak mle kekerel chad e medengelii a renguk el captain ra skoki. Chelecha ng kirek lurrekodel ersel mle medengelii a renguk el mle chief pilot. Ngak ak mo merur er a mederir tirkal semmong?

Eng di ak mla mo meoud el kotouar, me ak mocha dengchokl er a kingellel omekall, e ngila chimak el locha ra kmal kudengei el klekedellel a skoki, e liluut lomelchesiu, sel deuil a skoki el meruumk el merolang er tial rolel a skoki e sobekang el bedul a melidiul.

Ngungil a renguk el kmo tial omerael a mle ungil, a skoki a dimlak el mekesakl, e ak mle medengelii a renguk.

Meng uaisei, e tial teletael a ngiluu a renguk el meriou. Sera le temek, e a omekall a skoki a di beot el diak kumdasu el kirel. Chelechang eng meral mo blak a renguk el omdasu el meruul a ikal mekekerel tekoi.

A Chad el Oltirakl a Ousbech a Blak el Reng

Sel ksiliseb er ngii el skeng lomekall a skoki a klou a ultutelel el omeklat el kmo sel merael moungil er a rokui el tekoi—el reua omekall a skoki, meius, merasm, malechub a medengei—a kirel blechoel ousbech a duchelreng me a omelasem el tekoi.

Ke locha mo chemoit a betok el rak el mesuub el mo meduch malechub e komekdubech a tekoi er a duch. Ke locha mo imis loureor meng merael el mo beot er kau. Engdi a lskeum komdasu el kmo tia belkul a kmo ke mo diak ke molasem el meruul e mesuub, ea ikel ble modengei me a omeduch el tekoi a di merael mo nguemed, el kau a mle tal omngai e iloit a sulem el kirel.

Tiang a dirrek el mora omesubel a tekoi er a tara beluu, ousekool a klekedall er a ongak, me a omekall a skoki. Tia dirrek el tekoi el mora merael el mo chedal a Kristo.

A beot lomesodel, a chad el oltirakl a kirel loba duchelreng.

Ng diak el beot el tekoi, e diak el dil keberuul el morngii.

A klaumera er a Jesus Kristo a sengk, engdi a ngeiul a domdasu el melilt el kirel leng ulsbechall a blak el reng er a “rengum, uldesuem, me a klisichem.” Tiang a omeruul er a bek el sils. Bek el sikang. Ngii a ousbech ra mekedekudem lomesuub me a blak el reng. A klaumerang, rengud el mora Osobel, a merael mo mesisiich sel le siseb ra skeng lomtok er a cherarou el de chebangel er tial klengar. Ngotekengelii le kid lomekeroul er ngii, ker di ouedikel el oureor el kirel, e diak de meterob.

Esel kuk erbita er tial tekoi, a lsekum eng mo diak ke dousbech er a klaumerang mesel mesisiich el klisichel doba el meruul a tekoi, e kid a merael elmo diak kede sal medengei a ikal tekoi el dulrekodel el cheledaol—e kede mo kedeb a rengud er a ikel tekoi el ble dodengei el klemerang.

A ikel ngibesereng el dimlak a tang me de ngibes er ngii a kmal sokod kung.

Sel ngeuil a klaumerang er kid er a chelii a sebechel di koeldid el di kedeb el taem. Ke dousbech lomekeroul er ngii el di blechoel meruul er ngii meng di melidiich a kerdel.

Ngara Beches el Renged, ea Osobel a ulsisechakl ra cheldecheduch el kirel a mastang el ngilai el mesterir a remesiungel a chedaol el klaumerang—el idisel a udoud el ngklel a duch. Tirke el mesiou el mle blak a rengrir el ousbech a duch er tir a liluut el dochel. Ngkel mesiou el dileklii a dechal a miltom er ngii.

Ngera osisecheklel tiang? A Dios a meskid a sengk—er a klemedengei, er a klisichel a bedenged el meruul, er a techall—e Ngii a soal kid a dousbech e donglou mel sebechel klengeltengat el mei er kid e klengeltengat el mora Rengelekel. Tia diak el bol tekoi a lsekum me ke de lochang ra tana el di ual nguked el domeseues sel bebil ra taem. A sengk er kid a donglou e omdois a lsekum e ke dousbech.

Kau a Dachelbai

“Engdi Elder Uchtdorf,” ke locha melekoi, “Ng diak a sengk me a duch el kulab—el ngii, a meklou a ultutelel.” Ke locha omes er a rebebil el sengkir a domes el meringel chad me komelchesiu el di ua hutsui el chad sel dongaisisiu. Kau a locha omdasu ersel mle klengar ruchei, er sel sils lomingodel ra tebel a bek bedengel a sengk me a duch, ea blatingem a betok a diak er ngii—tokuni sel dongaisisiu er a chachisois e mereberebet el ngara blatingir a rebebil.

Ak meral oureng el mechulau e ngosukau el moungil medengelii tial klou el klemerang: Kau a ngeltengat el chad el llomes; reng el ngelekel a diak a ulebengelel Dios! E kau a obang er a chelsem a klisiich el chengelakl ersel kau a sebechem el medesuii.

A melluches a lilechesii, kau a mlei er a beluulechad “lolab chedaol er a babeluades”!

Sel cheldechedecham er a uchelel a chedaol, me a dirrek el sel obo er ngii. Ke tilobed er a babeluades el mei er tiang, eng di a babeluades a dirkak a tang mel bol cheroid er kau!

Kau a diak a tang me dim hutsu el chad.

Kau a dachelbai!

Ngara Doctrine and Covenants, ea Dios a uluchais:

A Dios a melekoi el kmo ng betok a sengk, me a derta el [chad] a ngiluu a sengk el mlara Reng er a Dios.

Mora rebebil e te ngilai a dertang, me a rebebil a kuk ngilai a bebil, ngokiu tiang e bol sebechir a rokui el ngmai a klungiaol mo er tir.

A bebil er a sengk er kid a beldukl el ngara chedaol llechukl. E betok a diak.

El diua ikel dilu profet Moroni, “Lak komdung dikea sengk er a Dios, leng ngarngii a betok; el ngara diosisiu el Dios el mei.” Meng ngarngii a “kakerous el teletelel … ; endi ngii a diosisiu el Dios el meruul a rokui.”

Ng locha klemerang el chedaol sengked a diak lolechau mad, engdi tia diak el belkul a kmo ng diak el sal meklou a ultutelel. Ng sebechek e louchais er kemiu a bebil er a chedaol sengk el blak ues er a rebetok el chedal a ikelesia el meliuekl er a beluulechad? Ka momdasu el kmo ke mlukngeltengat er a imong ma lechub a betok er ngii el sengk er reua:

Chubechubechad.
Metebengelterir a rechad el cheloit.
Osiik a uchul eng morngii a deurreng.
Chad er a budech.
Mes a mekekerei el ongasireng.
Melekoi a klungiolel a chad el meral ngara rengum.
Di ngerang Ousubes.
Ouchel Reng ra klengit.
Outekangel.
Beot el mesaod a tekoi.
Ungil lobengterir a rengalek.
Oldubech er a roungerachel er a Ikelesia.
Olengeseu er a rechad me te medengei el kmo te ngara belsachel.

Ke locha diak kom ues aika el sengk sel ngarngii a olechotel a klekool ra duch er a ikelesia. Engdi kuureng el kmo kemes el kmal mekreos el mora urerel a Rubak me kau a locha rirtechii a rengul, kulumekngeltengat, malechub e kulsebelii a tara rengelekel a Dios loba sengk er kau. Molatk el kmo ngokiu a mekekerei el tekoi ea meklou el tekoi a mekedmokl.

Mei me de ruul a ikel mekekerei el blingeled.

Mrelii Sel Kekerei el Blingelem

Rodam me a rodos er ngak, alii e resechelik, ak meluluuch me a Reng bol ngosukau el mtab a sengk me a duch el Dios a mla ngmai el meskau. Me kid dokor, el di uai tirkel blak a rengrir el mesiou el ngar sel cheldechedechal a Rubak, domdois e donglou.

A sils a mei el bode dechor er medal a chubchub el Chedam er a Babeluades el mouchais a de riruul el kirel a ngercheled. Ngii a soal bo medengei el kmo ngera ke de milruul lolab a sengk er kid el Ngii a ngilai el meskid—tokuni, ke de milkerang er a dousbech el omekngeltengat er a rengelekel. A Dios a ungil medengelkid el kmo ke de kmal techang, e kid a mle keltmokl elmo ua techang, ma le uaisei e Ngii a mengerchir er a kmal klou el ngar kid.

Eng di Ngii a diak longerchir el meruul er a kmal klou, uldirkork lungil lomeruul malechub a ulis el klou el bakes el mo er ngii. Ngara beluulechad el Ngii a milebii, ea ulekeroul a morengii el mekekokil lokiu ra kelou er reng—engdi dirrek el mekedekudem e diak el mekimd.

Ka bo molatk, ngii el Jesus Kristo a di mla kudmeklii sel diak a chad el sebechel rullii er sera bol mesisiich er a kodall me a klengit.

A blingeled a mo oltirakl er a Kristo. Ng blingeled el mo ikrii a klengit, obult el bedul Osobel, e merael er a Rolel, el tal bakes er a ta el taem. Mesel doruul er tiang, loba blakel reng, e kid a nguubet a lechetel a ngelsengesed me a telmelled e mekekokid el merael lobiich, dil merekmo le borsel cherrungel el sils me bo demecherrungel er Ngii.

A klengeltengat a sebeched el ngmai. A yaksok a kldmokl. A chesimer a blok e meteu. Tiang a dolilt el mo soiseb e omuchel.

A uchelel a locha di der telkib. Engdi tiang a di ungil.

A klaumerang sel mechitechut, e momuchel loureng el ngara Kristo el Jesus me a Klisichel el mo omekbeches e mengikiid.

A Demad olengit me de nguu tial omelasem er a klaumerang me a otireklel mel lak el kora di chad loldingel e bai le rengud el rokir ra roumerang el mla mo ikrii e choitii a Babylon e ngmai a rengud, uldesued, e omakes el bedul a Zion.

Kid a medengei el kmo a urered a lileakl eng diak el sebechel rullid el mo ersel ngarbab el klebkall. Engdi aika sebechel rullid el mo oltirakl e tibir ra rengud el mora Jesus el Kristo, e Ngiia sebechel rulid el mo chad er a ngarbab el klebkall.

E le nguchul el betik er a rengud el Osobel, eng diak a tekoi el kmo ngdiak-el sebechek elmo mesisiich er ngii el teletael. Sel sekum kede ngmai el msang a urunguled me a klaumera er kid el mo er Ngii, e kede ulterekokl el mo kats. Ngii a yaksok er kid er a techall el Ngii a melisiich, me a Klisichel, ma omdois el krasia er Ngii. Derta el bakes, el mekekerei, e kid a mukeroul el mo kmeed er sel cherrungel sils el mo kiei lobengkel Ngii me a rebetik er a rengud el ngara klebkall el mo cherechar.

A mo risei, eng kired el kudmeklii sel blingeled er chelechal sils me a bek el sils. Ke de mui ra saul er a ikel bekesed el de ngilai er a chelii, engdi kid a diak de meterob er sei. Kid a medengei el dirk ke kemangel omeroled el mong, engdi kid a diak de becherei tiang mel rellid el mo mesaul a rengud.

Tia ea cheltel sel kmo ke de techang—el oltirakl er a Kristo.

A kuldubech e omekngeltengat er a rebek el chedal a Ikelesia, me a rokui el sorir el mo uldimukl er ngii, el mo oumerang er a Osobel el mo ouedikel, loba kllou el reng el blak a rengum, el meruul er sel blingelem el ngara rengum—me a deuil a rengum bol mui me sel, tara klebesei, e kau bom nguu a cherrengelel el ngara Chedam. Tiaikid ak sioning er ngii el loba ngklel a Jesus Kristo, amen.