Mla Melasem e Smisichii er a Kristo

Rodam me a rodos er ngak, a kumelchesiu er a beltkil a rengul a Rubak er a chelechal de keldibel. Ng ungil a renguk el mengedecheduch el mo er kemiu. Nglunguchek me a Chedaol Reng a osiseb er a chelsel a rengmiu a ikel Rubak a soal bo morrenges, er a bai kuk di ikal bo kulekoi.

Serak kekerei el chad e ak milsuub a physics me a tekoi er a ochur er a kngara daingak. Ak mlo omelchesiu er ngak el kurusii. Ak mocha omdasu el kmo ngak a melasem el mesuub a ikal ngii a diak el sebechek el mo medengei. Me sel kora merael lmuut el mo kurusii, eng kora merael mo diak a klisichek el melemolem el melasem. Meral kora mlo merat a renguk meng uchul a kulmedasu el kmo a ikal kuruul a locha diak a belkul. Ak mocha omdasu el bai torbengii a ikal kusuub, e bai mo mesuub a ikel beot a omesubel.

Ng kora mlo mechitechut a bedengek. Me sera kululuuch, e ak mlo omelchsuar er a Rubak el kilungii a renguk. A kulmelchesuar er Ngii el mengedecheduch el mera uldesuek el kmo Ak melasem er kau, engdi Ngak a dirrek el lobengkem.

Ak di mle medengelii a telkib el belkul aika el tekoi. Ngdi ngak a mle medengei a kirek el meruul—Ak mlo oureor.

Mesel kulbedebek me a rak ruriul ra kurior, e ak mlo medengelii tial mesisiich el tekoi el ngara chedaol llechukl: “Ng sebechek el remuul a rokui el tekoi lokiu a Kristo el melisiich er ngak.”

Ak silubii el kmo sel meringel er ngak el mesuub a physics a bai mle sengk el mlara Rubak. Ngii a ulisechakl er ngak el kmo ngokiu ra Ngelsuil, e ngak a sebechek el remuul a ikel tekoi el kora meringel a rellel a lsekum a kubang a klaumerang el kmo Ngii a ngarngii lolngeseu er ngak. Ngokiu er tial sengk, ea Rubak a milasem er ngak e melisiich er ngak.

A tekoi el melasem a ngarngii a betok el belkul. Sel melasem a tekoi a diak el dil belkul a mo rengii a skeng el kirel. Ng mo omdois a klisichel. A bo modengelii a klisichel a tekking eng kirem el melasem el mengiud er ngii. Kleald, beredel, me a odbechel a le dechelii el dil merekmo sel meral teletelel a mo mesisiich el mo chemolt. A tekking a diak el bol mechitechut e leke melasem a teletelel. A bai me rengii, eng bai moua sel klalou el moumerang er ngii, el mesisiich el mo oltekau a beraod.

A Rubak a melasem er kid lousbech er a osisiu el teletael el mo melisiich er kid. A omelasem a diak le ngarngii er a chelsel a beot el taem ma lechub eng ungil besul teletael. Ng bai morngii sel taem sel kid a omelchesiu er kid el mla melamt el engelak er a ikel domedasu el ngii a sebeched el meruul. A Rubak a ulsisechakl el kmo kid a kired el melemolem a urekuruled e diak bol mesaul a rengud er a urered, e diak kede toched, e melemolem el blak a rengud.

Sel dolemolem el ngarngii a klaumerang er kid er a Jesus Kristo—me a dirrek el ikel taem el domdasu el locha diak el sebeched el remuul a ngerang—e kid a bai merael mo mesisiich er a chedaol tekoi. A chedaol llechukl a smisichii tial klemerang.

A profet Moroni, el olechotel a okesiu, a mlo ngara omelasem e mlo mesisiich el uai tial teletael. Ng di mle ngii el tang er a ikel ulebongel el klebesei er a klengar er ngii. Ng miluches el kmo ngii a dimlak a resechelil, ea demal a lulkodir, ea rechedal a mla meterakl. Ng chemiis er a rechad el mle sorir el melai er a klengar er ngii.

Eng di a Moroni, a dimlak el bol merat a rengul. Ng bai, miletkii a klaumernag er a ngii er a Jesus Kristo er a tibereberek el sintsyu el mo er a rechad el ngii a diak bolesterir er a chelsel a klengar er ngii, luldimukl er a telcheroll er tirkel rechad el mle sorir el mo omekeuad er ngii. Ngii a miluches el kired. Ngii a mle medengei el kmo te ngarngii a rebebil el mo oltuub a tekingel. Ngii a mle medengei el kmo te ngarngii a rebebil el mo oltngakl a tekingel. Eng di ngii a milemolem el meluches.

Sera le ngara omelasem, ea klaumeang er a Moroni a milketiit e mlo mesisiich. E mlo klikiid. A tekingel a oba klisichel a chad el blak a rengul loutekangel el mo er a ulebongel. Ng sebeched el melchesuar er tial klisiich sel donguiu er sel olechotel a klaumerang er ngii:

“Chelechang e ngak el Moroni a mo meluches el mo ersel kumes er ngii eng mo ungil; me ak meluches el mora rodam er ngak, er a rechedal a Laman; meng soak a bo lodengei el kmo, ngbetok er a euang el dart me a lluich el rak a mla mo merek er a olangech el mlo er ngii el kirel sel lemei a Kristo.

“Me ak mo somosm a ikang el rekord ruriul er a bo kdung a sesei el tekoi el kirel mengesuseu er kemiu.

“Ka morrenges, ak mengemedaol er kau me sel bo monguiu a ikang el tekoi, alsekum eng mo ungil er a Dios me bo monguiu, ebo mdebedebekii el kmo ng uangera chubechub er a Rubak el mla mo er a rengelekel a chad, er a lobeob a Adam el mo lmuut er a taem el bol mngai a ikang el tekoi e bo momdasu el kirel er a chelsel a rengum.

“E sel mngai a ika el tekoi, e a kulengit er kemiu me moker er a Dios, el Diak a Ulebengelel Chedam, el ngara ngklel a Kristo, el kirel a klemerang er a ikal tekoi; e alsekum e ko moker el meral ngarngii er a rengmiu, loba blakerreng, me a klaumerang er a Kristo, e ngii a mochotii a klemerang leko er kemiu, lokiu a klisichel Chedaol Reng.

“Le ngoeak a klisichel Chedaol Reng e kau a mo medengelii a klemerang er a rokui el tekoi.”

A klaumerang ra Moroni a mlo klikiid er sera le dil ngii el tang, ngdi mle emolt lokiu ra llomes elmo omekrael ra bekl el telcheroll el mo osiik er a Chedam er a Babeluades me a Osobel el Jesus Kristo.

A dirrek el tara profet er a Babier er a Mormon, el Jakob, a mlo chemau a omelasem e mlo mesisiich sera le kekerei el ngalek el mlo chemau a ongarm me a klengiterreng. Engdi a demal, er a Lehi, a ulsisecheklii el kmo a Dios a mo omekngeltengat er ngii sel ngara ringel.

“Me sera chomkekerei eng mle betok longarm me a klengit el reng choblo er ngii, le rubekum el mlo mekngit a teletelir.

“Endi chelechang e Jakob, kau el kot el kulchellau er a dengar oreomel, a ungil medengelii a klisichel a Dios; me a ongarm el blo er ngii a mouchul a klisichem.

“Me chelechang a reng er kau a mo ngeltengat, e mo kiei el ngara budech lobengkel obekum er a Nephi; ea klengar rekau a mo mechoit el mesiou er a Dios er kau. Seia uchul ea kmedengei el kmo , ke mla suobel, lokiu a melmalt el Osobelem; le ke mla mesang er sel le terka temel a rokui el tekoi e ngii a mei el mo olsobel er a rokui el chad.”

A profet Joseph Smith a mlo chemau er ngii el omelasem me a omelisiich sera le ngara blil a kelbus er a Liberty. Chelsel tiaikid el ringel, e a Profet Joseph a lilangel el kmo:

Dios, ke ngara ker? …

Ngmo oingerang el dil cheroid a chimam?

A Rubak a milesang a Joseph el melemolem el ngarngii a klaumerang er ngii sera lechau a cherarou me a ringel me Ngulenger:

Ngelekek el sechal, a budech leko er a rengum; cherarou me a ringel el om ngarngii a di ngarngii el kedeb el taem.

Me a lsekum e ke moungil lotekengelii, e a Dios a ngoikau el mora babeluades; e kau a mo mesisiich er a rokui el cherarou el omchau er ngii.

Sel kot el ungil okesiu el kirel a omelasem me a omelisiich a mlo er ngii lokiu a Tngakireng er a Osobel. Ngii a ngilai a kengtil a beluulechad. Ngii a mlo chemol a ringeled me a kengtil a rengud. Ng millim er sel mechuached el kob. Ngii a ulechotii el uluumerang er a bek el taem.

E leng sel klebokel el Tngakireng er Ngii a uchul, a Jesus Kristo a sebechel melisiich er kid sel dechau a ringel. Ngii a medengei el mekera lolngeseu er kid e le Ngii a mlo chemau a rokui el olibesongel el kid a mo chemau er tial klengar. Ngii a mo otekau a ringeled me a sechered me Ngii a mo medengei el mekerang a lolngeseu er a Rechedal kirel a ikel elitecheterir.

Kede mesuub el kmo ser a le ngara Sers er a Gethsemane, ea Osobel a ulengit er a Chedam a lsekum me bo le sebechel nguu tial ringel el choridii er Ngii—e ngdi Ngii a dirrek el milekoi el kmo a lsekum meng sel soal a Chedam, ea Osobel a mo rullii. A tara omelekoi a uasei, a Osobel a dirrek el lultekau a rauerreng me a oumededenger el reng, eng di Ngii a ngarngii a klaumerang er ngii er a Demal er a Babeluades.

Rodam me a Rodos, a omelasem me a omelisiich er kemiu a locha diak el bo el uai a Moroni ma lechub a Jacob ma lechub a Profet Joseph. Eng di ngmo dubech. Ng mo dubech, el okiu a ringel er a klengar er a telungalek. Ng mo dubech lokiu a secher ma lechub a merat el reng ma lechub a klengiterreng ma lechub eng sabisi.

Ak sioning el kmo a ikal taem a diak lolechotel a kmo a Rubak a mla choitemiu. Ng bai, olechotel el kmo Ngii a betik a rengul er kemiu el uchul eng mo mengikiid e melisiich er kemiu. Ngii a meruul er kemiu el mo mesisiich me bol sebechemiu lotekau a berredel a diak ulebengelel klengar.

A lsekum me kede melemolem el blak a rengud er a urered, a Rubak a mo mengikiid er kid. Ngii a mo melisiich er kid. Ea tara klebesei e kede mo melatk e mesa el kmo a ikekid el ringel a olechotel a Beltkil a Rengul. Kede mo mesa el kmo Ngii a ulmeob er kid me bol sebeched el dechor Lobengkel el ngara klebkall. El uai a Paulus el Apostol er a Rubak a milekoi er a ulebengelel a klengar er ngii el kmo, “Ak mlor sel tkul er bab el sebechek er a klaidesachel el kngar ngii, e mla rokir, e dimlak kuiit a llechul ngii el klaidesachel.”

Ak sioning el kmo a Rubak a medengelkemiu. Ngii a medengei a ringel el omchau. Ngii a obengkemiu. E Ngii a diak bo likremiu. Ak sioning el kmo a Jesus Kristo a Ngelekel a Dios. Ngii a klisiched, e Osobeled, e urunguled. A lsekum me kede oumerang er Ngii, e Ngii a mo remuul a chedaol klisiched el mo tabesul ngii ma rokui lomelasem el bo dolab. Aika kuuchais el ngara chedaol ngklel a Jesus Kristo, amen.