Ng Di Tir Loukerkeriil er Tir

Sel kmal techel a moktek er a uldesuel a Chedam a mesterir a rengelekel er a reng a techall el nguu a bedengir er a tech, e subii a “ungil er a mekngit” lokiu aikel duubech er a klengar er a beluulechad, mukeroul er a chedaol tekoi, e omakes el bedul a diak a ulebengelel.

Sel losaod er ngii a Doctrine and Covenants el “mimokl melilt“ a moktek ra uldesuel a Dios el uchul a diak luut el kodall ma diak a ulebengelel klengar el mo er a rsechal me a redil Ngelekel. Tial klou a belkul suobel a selaod ra chedaol llechukl el kmo ng omelilt el mimokl el melilt e meruul.

A tekoi el “kldung lomelilt” a utebengall. A osisiu el tekoi ra “kldung” a uldimukl er ngii a “ungil,” “bleketakl” me a “klikiid.” Ea osisiu el tekoi ngii me a “mimokl el melilt” a uldimukl a “omeruul,” “ruoll,” me a “ureor.” A leuasiei, ea “kldung lomelilt” a sebeched el kmo ng duch ma techall el melilt a doruul el ngii a ungil, bleketakl, e klikiid, e klemerang.

A blebelel a Dios a uldimukl er ngii a “tekoi el kid a meruul me a tekoi el doruul kirel.” Ea kldung lomelilt a chedaol teletael er a “klisiichel a ileakl lomelilt” el rullid a rengelekel a Dios el mo di kid loungerachel a doruul el diak deklalou el kired el ruoll.

Tial beluulechad a ulebeob el basio el rengelekel a Chedam er a Babeluades a mocholt el kmo te mo “meruul arokui el tekoi el Rubak el Dios a dmu er tir.” A kmal moktek er a Blebelel a beluulechad ma delengchekled ra chelsel a meskid a techall el mo meruul e mo uai ngkel Rubak a soal a bode uai ngii.

A Rubak a dilu ra Enoch el kmo:

Ng kirel mesterir tirkal chad el blebelel a chimal a Rubak, e Ngii a milsterir a llomes er sel sils el Ngii a ulemeob er tir, leng te di mlara Sers ra Eden, eng mesterir a lemeltir el melilt.

E Ngii a mla dmu ra rodam, e mla mesterir a llach, el kirir el kaubeltikelreng , e kirir el el melilt er Ngii, el Demerir .”

A kmal moktek ra usbechellel a mimokl melilt a kirel a kaubeltikelreng e melilt er a Dios. Ea ikal erul moktek a osisiu ngii mesel kot ma ongerung el ngarbab el llach el loubeltikelreng ra Dios loba rengud el rokir, bedenged, me a uldesued, e mo oubeltikelreng ra tonari er kid.

Momtab el bla demodurch—ng diak di demorimel a lechub e demosisechakl kede mla modurch—el mo ousbech ra mimokl lomelilt er kid loubeltikelreng ra tang ma tang e ngiltii a Dios. Msall ek delii a tara tekoi el kmo chelsel chedaol llechukl, e a tekoi el “kldung” a diak el kora di besichel a tekoi ng bai locha chedaol losisechakl ra kmo ng mekera dungil melilt.

A dodengelii el chelitakl el “Choose the Right” a ngarngii a moktek er ngii. Kid a diak bla demukngeltengat ra mimokl lomelilt el meruul aikel soad er sel soad el taem. Ng bai, a doltirakl ra uldesuel a Chedam, e kede mimokl melilt e meruul aikel tekoi lultuil ra ikel diak a ulebengelel klemerang. Me kid el “di [kid] el mimokl melilt,” a kirel mo blak a rengud el meruul a ungil, ”el meruul a betok el tekoi el di [kid] el melilt, el lokeed a olchotel a llemalt.”

A diak a ulebengelel klou ultutelel ra mimokl lomelilt a bleketakl ra cheldecheduch er a chelsel chedaol llechukl er sel klengar ruchei ra beluulechad. A Diablong a ulemtok ra uldesuel a Chedam el kirir a Rengelekel e ulsiik el melemall ra klisiched el melilt a doruul. Ng bleketakl, el ultekengel a diablong a millemall ra llechul a mimokl lomelilt.

Ma Dios a dilu el kmo, “E elechang … a Diablong el mla omtok er ngii, e millasm el melemall er a techellel a chad el melilt , … me a kuldikii el mei er a chutem.”

Sel mekngit el reng ra cherarou a mle soal rulterir a rengelekel a Dios el mo diak el “sebechir el di tir el melilt” ra llemalt. A moktek er ngii a mla soal rulterir a rengelekel a Chedam ra Babeluades el mo uai a klalou el modurt.

A President Dallin H. Oaks a mla melekl el melekoi el kmo a ebangkelio ra Jesus Kristo a siotai er kid el mo medengelii a kmo ngerang mo er seikid el kmo ngerang lokiu a melemalt lomeruul ra kldung lomelilt. Ng millekoi:

“Betok el ngara Biblia ma beches el chedaol llechukl a melekoi el kirel a ulebongel kerekeriil el rokui el chad a mo ngmai a ngkedir loltirakl omerellir ma lechub a urerir ma lechub a soal a rengrir. Eng di a bebil ra chedaol llechukl a dochelii tiang el melekoi el kirel a kerekeriil el bo denguu loltirakl ra teletael el kid a morngii.

“A Profet Nephi a mesaod el kirel a Ulebongel Kerekeriil er sel ngii a bla deborngii : ‘A lsekum a urerir a mle mekngit e tir a kirir elmekngit; e a lsekum e te mekngit eng diak el sebechir el mo kiei ra rengedel a Dios’ [1 Nephi 15:33; smisichii a belkul]. A Moroni a melekoi, ‘Ngike el mekngit a melemolem el mekngit; e ngike el melemalt a melemolem el melemalt’ [Mormon 9:14; smisichii a belkul].”

A President Oaks a melemolem el kmo: “A ikaikid el osisechakl eng sebeched el kmo sel Ulebongel el Kerekeriil a diak kedi bo domes er a cherrengelel a ungil me a mekngit el omeruul—el kid a mla remuul . Kede mo nger el kirel aikel mocha teleteled ma blekerdeled ma uldesued—leng kid el kuk ngedechang el chad.”

A omerelled ma soal a rengud a diak el di el ngii a sebechel losebelid el merekong. “Sel bla deruul aikel rokui sebeched,” e kede mo tang lobengkel a Dios lokiu a chubechub ma krasia lokiu sel cherrungel tngakireng ra Osobel.

A Alma millekoi el kmo “Momuchel el mo oumera er a Ngelekel a Dios, el kmo ng mei el me olsobel er a rechedal, e mo chemau a ringel e mo er a kodall el tngakireng er a kengterir; e dirrek el mo mekiis er a kodall, el mo uchul okisel a kodall, me a rokui el chad bol dechor medal, e le mukerkeriil er sel klou el kerkeriil loltirakl a urerir.”

“Aki oumerang el kmo ngokiu a Tngakireng ra Kristo, ea rechad el rokui a sebechir el mo suobel, lokiu a otireklel a llach ma ruoll el ngar a osischeklel a Ebangkelio.” Meral kired elmo dmeu a rengudel kmo a kengtid ma mekngit el lomereled a diak el bol medechel el lomtok er kid alsekum me kede meral “lmuut el mechell,” ouediekl ra klaumerang er kid er a Osobel, ouchel el “meral ngara rengud” ma “blak el reng,” e “outekangel el mora ulebongel.”

Betok er kid omdasou el uase sel bo de dechor ra medal a kingellel a Diak a Ulebengelel Loukerkeriil a osisiu ngii ma de ngara chelsel a kort ra beluulechad. A chad ra llach a mengedereder. A olchotel a tellemall a mocholt. A olchotel a kelebsengel a chad a modars. E kid a locha rrau a rengud e medakt el mo medengelii a modubech. Eng di a kumera el uase tial teletael a diak el melemalt.

A ngodech eng di kmeed losisiu el dekted a kede blechoel melchesuar sel lolekoi er ngii chedaol llechukl kmo “dekted ra dios ” ma lechub “eng dekted ra Rubak.” Eng di a dekted ra beluulechad a rullid el mo suebek a rengud e bekikl, e a dekted ra dios a meskid a budech, selbechakl, ma blekebek.

A melemalt el dakt a meskid a dmolech lomengull ma mengasireng el mora Rubak el Jesus Kristo, ma otirekled ra Llechul, e olsingch ra Ulebongel Kerekeriil, ma llemalt ra Chimal. A dekted ra Dios a mocholt lokiu a meral klemedengei ra chedaol teletelel ma urerel a Osobel, el ngarngii ra rengud loltirakl ra Soal, ma klemedengei el kmo a bek el sechal ma redil a ngerchelir aikel soal a rengrir, uldesuir, omelkingir, ma omerellir ra lengara beluulechad er sel sils ra Ulebongel Kerkeriil.

A dekted ra Rubak a diak de kora bekikl el mo dechor Medal e mukerkeriil. Ng bai, sel cherrengelel a klemedengei er kid ra “meral teletelel a tekoi er chelechang“ ma mo “teletelel ruriul.“

A bek el chad e mla kiei, e kiei er chelechang, ma mo kiei ra beluulechad “a mo dechor er medal a kingellel a Dios, e mukerkeriil lultuil ra [ikel urerel] el kmo ng mle ungil ma lechub eng mle mekngit.”

Alsekum a soal a rengud a mle melemalt ma urered a mle ungil—belkul a kmo kede mle ultuil ra klaumera er kid ra Jesus Kristo, miruul e oltirakl a telbiil lobengkel a Dios, e ouchel a rengud ra kngtid—e seikid e a kerkeriil sils a ungil a rengud el kirel. El ua tekingel a Enos el kmo kede mo “dechor medal [Osobel]; e mo ungil a [rengud] el mesa medal.” Ea uriul sils e “kede mo nguu a ngkedel a llemalt.”

Ea kuk bitang, alsekum a soal a rengud a mle mekngit ma urered meng mle mekngit, e seikid e a kerkeriil taem a mo kdekudel. Kede mo “ungil medengei,” “e bleketakl dobedebek,”” e mo “omelchesiu a mekngit [lomerelled].” “Ng bai mo diak el sebeched longeng a medal a Dios; e bai soad a lokedong bad ma risois me lemei lotelechid el mertid er medal.” Ea uriul sils e kede “nguu [a] ngkedel a mekngit.” ”

A mera er ngii, kid a di kid loukerkeriil er kid. Ng diak a chad el kirel louchais el kmo kede mor ker. Chelsel a rengedel a Dios, e kede ocholt aikel dullilt elmeruul ra beluulechad e mo medengei el kmo kede mor ker.

A klemedengei el kmo a Ulebongel Kerekeriil a sebechel ungil a rengud el kirel a diak dil klengeltengat el mora Moroni.

A Alma smodii a yaksok el klengeltengat el mora rokui el blak a rengrir loltirakl ra Osobel. Ng millekoi:

“A belkul a tekoi lolutii a mo nguu a mekngit el mora mekngit, ma reng ra klechad el mora reng ra klechad, ma lechub a teletelel a diablong el mora teletelel a diablong— ma ungil el mora ungil; klemerang el mora klemerang, llemalt el mora llemalt; ma chubechub el mora chubechub.

“… Bo bleketakl, bol melemalt a kelulum, e molemolem el meruul a ungil; e sel bo moruul uaisei e ke mo nguu omeksullem; a chubechub a lmuut lekor kau; ma llemalt a lmuut lekor kau; ma melemalt el kerekeriil a lmuut lekor kau; ma ungil a lmuut el mo omeksullem.”

Ng dmeu a renguk el sioning el kmo a Jesus Kristo a ngar el Osobeled. A yaksok ra Alma a meral tekoi lekor kau ma ngak— er chelechal sils, ma klukuk, el mo cherechar. A kuuchais loba chedaol ngklel a Rubak el Jesus Kristo, amen.