Ng Meklou a Belkul a Tekoi

Rodam ma rodos, me a rsechelid el meliuekl ra beluulechad, ng klou el etengakl el bo kungedecheduch er tial klou el seked, el klou er ngii a rechedal a Ikelesia er kid e betok er kemiu a rsechelid ma re beches el mlei lorenges er tial ongdibel el merael ra melidiul. Mengemedaol!

A ikal klumech el mo medung er tial olkeiungel a mokiu a tekoi. Ng mokiu a English e mouiid el mo bekord el dart el kakerous el tekoi. Eng di blechoel diosisiu a belkul. Tekoi. E a tekoi a ngarngii a belkul. Hall e kluut el dulii. Ngarngii a ultutelel a tekoi!

A ikang a otil a tekoi sel de chadecheduch; a ikang a ocholt a doumerang, blekerdeled, ma domdasu. Bebil ra taem e kede melekoi a tekoi; ea bebil ra taem e kede orrenges. A tekoi a metebechelii cheldecheduch. A ikang a otobed a uldesued, ma domelchesiu, ma blekerdeled, a lungil ma le mekngit.

E ngarngii a kngtil, le tekoi a sebechel el diak e lultebechel, terekakl, e omekringel. Sel tal le medung, eng diak el sebeched e lmuut el ngmai. A ikang a sebechel mesuched, omekcharem, torebengid, e dirrek el meklrolid el mo ra ikel mekngit el lomeruul. A ikang a dirrek el mo beraod el doltekau.

A ikel kuk klungiolel, a tekoi a sebechel el loldeu ra mlo mesisiich, e menglou a rengud, e melisiich a reng. Ng sebechel loremlid me kede lmuut el mo ungil lomdasu, lmuut e lomuchel, e lmuut el mesengar a omroled. A tekoi a sebechel mekengii a uldesued el mora klemerang.

Sei ea uchul, ea kot e kmal lorechudel, a ikel tekingel a Rubak a ngarngii a ultutelel tekoi.

Sel ngara Babier ra Mormon, e a profet Alma me a rechedal er sel uodel taem ra Merikel a miles a diak el mekimd el mekemad lobengterir tirkel chad el mla emoit a tekingel a Dios, mlamo mekididai a rengrir, e mla ordengii a siukang er tir. Te dirrek el millekoi el kmo, “Ele osisechakl, a rullii a chad meng mo meruul a llemalt—choi, ng klou a klisichel er a uldesuel a chad er a saider, malechub eng ngii dil ngerang, el mla duubech el mo er tir—me a Alma a ulemdasou el kmo ng klou a belkul lebo er a chesemel a tekingel a Dios.”¹

A “tekingel a Dios” a engelakl ra rokui el cheldecheduch. Tiang a di mla uaisei er sera Lobeob a beluulechad ma Dios el dul kmo: “Le bo rengii a llomes: meng mlo rengii a llomes.”²

Ngokiu ra Rubak eng mlei a ikakid el tekingel a kllou el reng el ngara Beches el Renged: “Babeluades ma beluulechad a mokngemd, engdi tekingel a di melmolm.” ³

E tiakid: “Alsekum e ngikel betik a rengul er ngak, a mo oltirakl osisecheklek: e ngak ma Demak a mor ngii maki kiei el obengkel.” ⁴

Mlara Mary, el delal a Jesus, eng dilii tiakid e loba kle ngariou e loumerang: “Momes e ra mesiungel a Rubak; bol meterkokl el loltirakl a tekingem.”⁵

Oumerang e oltriakl a tekingel a Dios a ngoikid elmo kmeed er Ngii. A President Russell M. Nelson a mla yaksok, “Alsekum meke mesuub a tekingel, e a klisichem elmo uai ngii a merael el meleketek.”⁶

Kid ngdiak el soad el rokui elmo ua, sel elitakl el kmo, “lmuut el mo ngeltengat el chedaol—lmuut, Losobel, el uai ngii”?⁷

Ak di omes e ra ngeasek el Joseph smith el tubareuach el lorenges a tekingel a Demal ngara Babeluades: “[Joseph,] Ngkakid a Betik e ra renguk el Ngelekek, Mrengesii!”⁸

Kede “orenges er Ngii” ra ikel tekoi ra chedaol lechukl, ngdi kid kede mechei meng lechukl el ngara babier, malechub e kede dongchii el Ngii el mengedecheduch el me rekid? Kede mengodech?

Kede “orenges er Ngii” lokiu ra ocholt el me rekid ma otbechel a Chedaol Reng, lokiu a nger el ngara nglunguuch, ma ikel taem sel kuk dil Jesus Kristo, ngokiu ra klisichel a Tngakireng er Ngii, a sebechel lotekau a chelengeled, meskid a klausubes ma budech, e ngoikid el mora “imal a beltik el reng er ngii.”⁹

Ongerung, a tekingir a re profet a ngarngii a ultutelel.

A re profet a ouchais e ra klebkelel a Jesus Kristo. Te olsisechakl ra ebangkelio er Ngii e olecholt ra beltkil a rengul el mora re bekl el chad.¹⁰ A kuchotii el sioning el kmo a ngar el profet, el President Russell M. Nelson, orenges e melekoi a tekingel a Rubak.

A President Nelson a kmal lungil lousbech a tekoi. Ngii a diluu el kmo, “Moltirakl ersel rael ra telbiil,”¹¹ “Mongidb e ra Israel,”¹² “Dios bo lomtebechel,”¹³ “Mongederodel a did e ra klemedengei,”¹⁴ “Moureng a saul,”¹⁵ “Moleketek a klaumerang el ngara Jesus Kristo,”¹⁶ “Dil kau el lomekdubech e ra klaumerang er kau,”¹⁷ e “Bom chad e ra budech.”¹⁸

Ng direke ulengit mede “domdasu el bedul a celestial.” “Sel mchebengelii a etiteuokel el tekoi,” ng millekoi, e momdasou el bedul a celestial! Sel mchebangel a ongitikaik, momdasu el bedul a celstial! Sel klengar malechub eng kmeed er kau a mekngit er kau, momdasu el bedul a celstial! Sel mad a chad leng mle bkais emrungel, momdasu el ngarbab el dauch. …Sel rengelel a klechad a mengimkumk e ra chelsel a btelum, momdasu el bedul a celestial! … Sel momdasu el bedul a celestial, a rengum a mekekokil el mengodech, … ke momes a ongarm ma olibesongel lokiu a beches el llomes, … [ea] klaumerang er kau a meleketek.”¹⁹

Sel domdasu el bedul a celestial, e kede mes a “tekoi ra meral delecherul ma meral mo teletelel.”²⁰ Me tial beluulechad el loltekau e ra rauelreng ma uldikel, e kede bekl el chad el lultuil er seikid el luldasu.

A Elder Geroge Albert Smith, uchei er a lebol President er a Ikelesiam a milngedecheduch el kirel a oterkeklel a profet ma oltireklel a tekingel. Ng dilul kmo: “Sel deruchall el de relii sel doldars a chimad … a kot el chedaol tekoi. … Ng belkul … a kmo kid a mo olengeseu er ngii; kede mo meluluuch el kirel; … e kede mo melasem e loltirakl a osisecheklel ea Rubak a mo mekrael.”²¹ A tara belkul, kede mo blak a rengud el loltirakl a tekingel a profet.

Mak ta er tirkel teruich ma teim el profet, lulemes a ues, ma melai ocholt el mlo terekokl er chelii el lulekiu ra cherengelel a Ikelesia el meliuekl ra beluulechad el rokir, eng soak louchais e lekor kemiu ra tara blekeradel ra kulterkokl e ra profet e mengeluoleu a tekingel. Sel blo kulchesuar a di uai ea profet Jacob, el silodii, “Ak mla rongesii a ngor el mla ra Rubak el mengedecheduch el me rengak a ika el tekoi.”²²

Tial mlo merek el Longeteruich el buil, ea bechik, Melanie, me ngak a mlara Bangkok, Thailand, lek mengetmokl er ngak elmo olterkokl ra mochang meng Dart ma okai ma eim el templo ra Ikelesia.²³ Knguu er ngak, e tial ngerachel a diul el ksemeriar er ngii e beot a belkul. Tiang ea mle kot el templo el ngara diluches sungos ra btelul a chang ra Asia.²⁴ Ng meral mlo ungil meketmokl—ngelolem el chelibel, e keltiu el mekedorm el dodai, “lungil chelderodel”²⁵el blil a Rubak. Ng mlamo buil el kumdasu el kirel sel mo mengedaol. Sel mlo kleuadel ra renguk ma uldesuek a kirel sel beluu me a templo el lulngeskes er ngii ra imorir a re profet ma re apostol. A President Thomas S. Monson a milsubed el kirel a templo²⁶ea President Nelson a ildolii.²⁷

E ngak a kilmeklii a nglunguuch elmo mengedaol ra telal buil ra memong. A ikel chedaol lechukl a mla moiuud elmo tacher ma eru el tekoi. Aki mla meketemokl. Sei ea mlara uldesuek.

Sel kesus ruchei ra omengedaol, e ak milchiuaiu e mekisang ra tekoi el mengesang er ngak el kirel sel nglunguuch el kirel a omengedaol. Mak kumdedenger er sel lodubech, e lomdasu el kmo sel nglunguuch a ungil keltmokl. Ngdi a Reng a dimlak el bechikak. Ak milchesuar el ngarngii a tekoi el dibus, e ngii okiu ra chedaol el blekeradel el mlei er ngak e lokiu ocholt, mak mocha locha a ikakid el tekoi er tial nglunguuch ersel lulebengelel: “Bo domdasu el bedul a celestial, me lemei a Reng er Kau me bol lomtebechel e ra klengar er kemam, el blak a rengmam el blechoel el chad e ra budech.” ²⁸ A Rubak a ulemeklatk el ngak me kurenges a tekingel ngkal ngar el profet er kid: “Momdasu el bedul a celestial,” “me a Rengl bo lomtebechel er kau,” “blak a rengmiu el chad e ra budech.” A tekingel a profet a meklou a belkul el mora Rubak me kid.

Ongedei, e kmal klou a ultutelel, a tekinged. Ak beches e louchais, ngar tial beluulechad er a emoji²⁹ra bekl el sils, ea tekoi a meklou a belkul.

A tekinged a sebechel lolngeseu ma lechub eng ngasech el reng, deurreng malechub eng mekngit el blekeradel, chubechub ma lechub eng diak e lomekereu. A le meringel a klautok, ea tekoi a sebechel meredes e dmolech e lobtingel a rengelel elmo kelsous ra rengud—el medechel e ra rengud. A tekinged el ngara internet, text, chais ra melidiul, malechub a tweets a ngarngii a klengar er ngii. Ma alii e bom kerekikl a tekoi el molekoi e mekerang sel molekoi. Sel de ngara telungalk, tokuni a re sechal, redil, ma rengalk, a tekinged a sebechel somesemid malechub eng mridid.

Bok basech a keldei el luleklatk el sebeched el lousbech el melai e oltobed a ikel meredes er a ikel etiteuokel ma kle kakerous, melisiich, e kauklatk:

“Ke mesulang.”

“Ak mlo mekgit.”

E “Ak betik a renguk er kau.”

Lak kom molecheuekl a ikal lungil luleklatk el kirel a tokubets el sils malechub eng chelbuul. Bo mekedekudem el lousbech e ngara rengmiu, le ikang olecholt a blekerdeled el mora rebebil. A tekoi ra ngered a mlamo beot; lak moltirakl er seikid el teletael.

Ng sebeched el kmul kmo “ke mesulang” a de ngara elevator, ngara parking, stouang, obis, ma mongiil, malechub e kobengterir a re tonarii malechuba re sechelim. Ng sebeched el kmul kmo “Ak mlo mekngit” sel de rirelii a mekngit, dimlak kede bora miting, ulebes ra birthday, malechub mesa chad el ngara ringel. Ng sebeched el kmul kmo “Betik a renguk er kau” e a ikel tekoi a mekedeldar sel klumech “Ak melatk er kau,” “Ak ngar tiang el kirem,” malechub “Kau ea rokui el tekoi er ngak.”

Msall e kuchais er a okesiu. A re bechiil sechal, mo renges. Rodos, tiang a mo ngosukemiu el dirrek. Nguchei ra bochal mui a temek el loureor ra Ikelesia, e ak mle blechoel e lomais el kirel a kombalii er ngak. Ak mle blechoel dibus elmo ra ikel cheroid el mesechesechel a beluu ra beluulechad. Sel ulebengelel tial sils, dimlak belkul kmo ak ngar ker, ak blechoel omkedong er a blik. Ma bechik e ra Melanie, sel nguu a dengua e kusubed a milketmokl, ea cheldechedemam a blechoel el ngoikemam elmo kmul kmo “Betik a renguk er kau.” Bekl el sils, e aikel tekoi a ungil lotil a renguk ma omerelek; a ikei e a sobecheklak e ra mekngit el blekeradel. “Melanie, betik a renguk er kau” a medung el kirel sel klaumerang el ngarngii ra delongelam.

A President Thomas S. Monson a blechoel el melekoi, “Ngarngii a uach el domtebechel, chim el doreked, uldasu el dolisiich, reng el domekrael, ma delbenged el dolsobel.”³⁰ Sel kmul kmo “ke mesulang,” “Ak mlo mekngit,” “Betik a renguk er kau” a medeel el tekoi.

Rodam ma rodos, ng meklou a belkul a tekoi.

Ak yaksok el kmo alsekum e kede “mesuub a tekingel a Kristo”³¹ el lomekrael el mo suobel, ea tekingel a profet er kid el lomekrael e melisiich er kid, ma tekinged el dolekoi el lolterkokl er kid ma ikel domsau el mera rengud, ea ikel klisiich e ra babeluades a mo omaoch el me rekid. “A tekingel a Kristo a mo subedau a rokui el tekoi el kau a mo meruul.”³² Kid a Ngelekel e Ngii a Dios er kid, e Ngii a mengelechel er kid el mengedecheduch e loba “ngerel a anghel”³³ e lokiu ra klisichel a Chedaol Reng.³⁴

Betik a renguk e ra Jesus Kristo. Ngii ea, a doltirkl a lechukl el ngara Uodel Renged ra Isaiah, “Klebokel, Omekrael, Ngkel mesisiich el Dios, Ngkel diak a ulebengelel Demad, Ngkel Meredel ra Budech.”³⁵ E di ua ikel Apostol Johanes a milketakl, Ngii el Kristo “a Tekoi.”³⁶

E tiang a kuuchais el kirel el Apostol el mlo kedong el ngarsel klebkall lomesiou mora Rubak—el mo dulii a Tekingel—e mlo kedong el dechor el tokubets el sioning er Ngii. El ngara ngklel a Jesus Kristo, amen.