Mesisiich, Melemalt e Melemolem e Losisecheklel a Kristo

Telal rak ra mla memong, a bechik, el Ruth, ma ngelekek el redil, el Ashley, me a ngak a mle teloi er a rebebil er a re tourist e mlo meius a kayak er a Hawaii el ngara beluu er a Merikel. A kayak omdengchokl er a chelsel engdi mo kmeed er a ralm, el chad a dengchokl lomes ruchei e ousbech a eru medal oius el meius er a medal mo ruriul el ngara bitang el mora bitang. A uldasu a mo meius el mo er a teblo el mekerei el chelbacheb el ngara Oahu el mong e mei. Ak kmal mle ansing er ngak el e, sera ak ngeasek el sechal, e ak milikes a kayak el ngara meklou el omoachel. Ng diak el bol ungil sel de chansing.

Ngkal loungerachel er kemam a uluchais a kiram el meruul e ocholt a ikal kayak el ki bo mousbech. Aika mle ngodech er a ikel bla kuusbech. Ng kirek el mo dengchokl er a bebul a kayak, e bai diak el kdengchokl er a chelsel. Sera ak ngasech er tial kayak, ea beraod a kuk mle ngarbab er sel blek sau er ngii, me ngak a di mle omteuitech.

Me sera ki momuchel, e ak mereched el meliiks er a Ruth me a Ashley. Uriul er a telkib el team, e ak mle cheroid el ngarmedal. Mak kora di mle ngak el chemat er ngak, ak mlo stob el meius e mengiil er tir el me kmeed. A klou el iuul—el ua tia klungel, el locha 13 centimeters¹a silbechii a bkul a kayak er ngak mak miluitech el reuebt er a chelsel a ralm. Chelsel sel taem el kbechereuii tial kayak e melasm el ngmasech er ngii, ea Ruth me a Ashley a bai mla engelakl er ngak, e ngak a bai kekedeb a telik e mesaul a bedengek el mo meius. A uchei er a kutuu a telik, ea tara iuul, tiang a meral—uasei a klungel, el locha 20 centimeters²a silbechii a kayak er ngak mak liluut el meuitech. Me ak bocha ksemecheklii tial kayak, eng meral kedeb a telik me ak meral mlo bekikl el kmo ngmo diak el sebechek el ngmasech er a bebul.

Ngomes er tial omeruul el kchau er ngii, engika el loungerachel a meliiks el mei e mocha choleklii tial kayak er ngak, meng rulii mo beot er ngak a ngmasech er ngii. Me sera lesekekak el kmal dirk kultoil a telik meng diak el sebechek el meius, eng lilchetii a chekil er a kayak er ngak e mocha meliks, loltamet er ngak. Telkib el taem eng mocha sebechek el di ngak el meius. Meng kodekedii a uak, e ngak a mlo sebechel di ngak el mor sel kot el chelebacheb. Me tia er kbong, e ak di uleberk er a chelechol, el skareter.

Uriul er a ki molengull, e ngika loungerachel a kmu er ngak el uaisei, “Ngira Renlund, a lsekum me ke melemolem el meius, e melemolem el blak a rengum, ak kumedasu e kau a kmal di mo ungil.” Ak kultirakl er a tekingel sera kimoius el mo er sel ongeru el chelebacheb e lmuut el mo er sel ki mulemuchel er ngii. Ng erul taem, e ngikal loungerachel a meius el merngak e kmul uaise kau a kmal di ungil. E mla er ngii a meklou el iuul el subechii ra kayak er ngak, eng di dimlak kubitech.

Mesel melemolem el meius er a kayak, e ak melemolem el blak a renguk e melemolem er a omerolek, e mo ungil lomes a ikal iuul sel mei el subechii ra kayak. A osisiu el osisechakl a meketmokl er a chelsel a chedaol klengar er kid. Ng mo mechitechut a rengud sel bode mekekokid tokuni sel de stob.³ Omko kede melemolem el blak a rengud er a chedaol tekoi e dolemolem el “meius” el mo er a Osobel, e kede selbechakl e mesisiich e leng diak a ulebengelel klengar er kid a ultuil er a klaumera er kid er Ngii.⁴

Blak el reng er a chedaol tekoi a duubech “er a chelsel a klengar sel de blechoel mengeluolu a osischeklel a Kristo.”⁵ Mesel doruul er ngii, a President Russell M. Nelsona ulsisechakl el kmo, ng mekdebechii a “mesisiich e melmalt e di melmolm.”⁵ Ng uaisei, a ikel osisecheklel a Kristo—el uai a klaumerang er a Rubak el Jesus Kristo, ouchel reng, mo soiseb er a deluill e ra telbiil lobengkel a Rubak lokiu a techolbechelid, nguu a sengk er a Chedaol Reng, e outekangel el mo er a ulebongel⁶a diak el dil kirel di tal doruul, e diak deluut lomdasu el kirel. El uai sel, “outekangel el mo er a ulebongel” a diak el lileakl el osisecheklel a Kristo—el ua sel deruul aikel kot el euang el teletael e mocha chelelakl e diak deluut el meruul a ngidil ngerang, e osiu a ungeled, e mengiil mo mad. Ng diak, outekangel el mo er a ulebongel a omelekl e ngoriakl meruul a bebil ra osisecheklel a Kristo, el meruul ersel “mesisiich el klisiich e melmolm” el President Nelson a mla ouchais el kirel.⁷

Omelekl a belkul a kmo kede di melemolem e lomelekl el meruul aikel osisecheklel a Kristo er a chelsel a klengar er kid. Ngoriakl a belkul a kmo kede meleketek e blak a rengud el mo ungil er a ikel domelekl. Meng locha kede omelekel a ikal teletael, e kid diak di dorael di meliuekl el lak ke domaks el bedul luchei. Ke de bai, mo kmeed el mo er a Jesus Kristo sel bek el taem el doruul er tial teletael.

Blak el reng a ngarngii a retel me a bleketakl el omerollel.⁸ Omko e ak milikes er a kayak el bedul a cheluid el rael, e ak mlo bekerurt, eng di ngdiak kbor sel kirek el mo er ngii. Osisiu, el ngara chelsel a klengar, eng kired el “meius” el merael mo bedul Osobel e mo er Ngii.⁹

A klaumerang er kid er a Jesus Kristo a kired el melisiich er ngii er a bek el sils.¹⁰ Ng mo mesisiich sel doluluuch er a bek el sils, mesuub a chedaol llechukl er a bek el sils, melbedebek a ikel ungil er a Dios er a bek el sils, ouchel a rengud er a bek el sils, e oltirakl a odbechel a Chedaol Reng er a bek el sils. Ng di uai sel diak lungil a bedenged sel lak domengur dil merekmo bol Sandei e okor e melitm er kid el melai a cheio er kid, eng dirrek el diak lungil a bedenged el kirel a chedaol teletael sel dolisiich er a klaumerang er kid el di mo er a chimol sils er a chelsel a tal sandei.¹¹

Sel dengai a ngercheled el kirel a klaumerang er kid,¹²e kede ngmai a chedaol blak el reng e mekokid el melisiich a dai er a klaumerang er a Jesus Kristo, me a osisecheklel a Kristo a mo chedul a moktek er a klengar.¹³ Blak el reng a meteketek sel dolasem el mo oltirakl a llechul a Dios e mo ouchel a rengud. Ouchel reng a deurreng el uchul eng sebeched el smuub a ikel chelitechetud, el ngii a uchul e kede merael mo ruchei.14 Ngarngii a taem e kid a meuitech sel dengara kayak er kid me kede ngara chelsel a dmolech el ralm. Ngokiu a ouchel reng, eng sebeched el lmuut el mo er bab e melemolem, el diak el iior ra kmong telal taem el derebet.¹⁵ Sel klou a ultutel a sel diak de kimer.

Sel tara teletelel a osisecheklel a Kristo a techolbechelid, luldimukl er a techolbechelid er a ralm e, okiu a omengedaol, eng sel techolb er a Chedaol Reng.¹⁶ Me a techolbechelid a di tal doruul er ngii, ngdi kid a omekbeches a telbiled er a techolbechelid sel de blechoel el dolai er a sakrament. A sakrament a diak lomtechei er a techolbechelid, eng di ngomech er sel teletelel a osisecheklel a Kristo—klaumerang me a ouchel el reng—e melchesuar ra Chedaol Reng.¹⁷ Me sel dolai er a sakrament, ¹⁸e kede siotai er a Chedaol Reng el mera chelsel a klengar er kid, eldi uai sera de metecholb e mechedaol.¹⁹ Me sel doltirakl a telbiil el medung er sel nglunguchel a sakrament, ea Chedaol Reng a mo kldemed.

Me sel Chedaol Reng a klou a rellii er a chelsel a klengar er kid, e kid a melemolem el merael e ngoriakl el mo ngarngii teletelel a Kristo el ngar kid. A rengud a mengodech. A teleteled el mo meruul a mekngit a mo diak. A uldesued el mo meruul a ungil a mo klou el di lmerekmo el soad el “blechoel meruul a ungil.”²⁰ E kede mo nguu a klisichel a babeluades el dousbech er ngii el outekangel el mo er a ulebongel.²¹ A klaumerang er kid a mla mo klou, e kid a keldmokl el mo omelekl er sel mesisiich el klisiich e melmolm.

A klebechel e ultebechel el reng a dirrek el metebechelid meke de kutmokl a bebil ra telbiil e lobengkel a Dios e ra elsel a blil a Rubak. Betok el telbiil a olekeed er kid el mo er a Kristo e mo mesisiich lomak er kid el mo er Ngii. Ngokiu a ikal telbiil, eng klou a techelled el mo nguu a Klisichel. Bol bleketakl, a techolbchelid ma telbiil ra templo a diak ek dil ngii ea uchul a klisiich. Sel luchul a klisiich a Rubak el Jesus Kristo me a Demad ra Babeluades. Mengektmokl e mengeluoleu a telbiil a mekdebechii a rael ra ikel Klisichir ra elsel a klengar er kid. Me sel de kiei lolab aikal telbiil, eng mo sebeched el ngmai a ikel rokui el Chedam er a Babeluades a olab.²² A blak el reng a ngarngii sel om kiei lolab a osisecheklel a Kristo el diak el dil klisiich el ngedechii a chedaol teleteled el mo er a diak a ulebengelel blekekled, ng dirrek el lomekduch a rengud el mo olngeseu er a rebebil e lokiu a ungil teletael.

Ka momtab el kmong milkera ngkel loungerachel a ngilsukak ruriul er ak kubitech el ngara kayak. Ng dimlak el loldiu el melekoi er a diak a belkul ker, el uaisei, “Ngira Renlund, ke mekerang er a chelsel a ralm?” Ng dimlak lolikes el merngak e loungeroil er ngak. el kmul uasei, “Ngira Renlund, kau a locha dimlak bom chau er tial teletael omko ng mle mesisiich a bedengem.” Ng dimlak el longurs ra kayak er ngak el mo cheroid sera ak kulasm el mo ngamsech er a bebul. Ng dimlak el semecheklak er a mederir a rebetok el chad. Ng bai, ngilsukak er sel taem el ngak a ulusbech er ngii. Ng milngedecheduch er ngak sera ak kurrenges. E ulmekduch er a renguk.

Me sel dosiou el mo er a rebebil, eng diak kired loker a ker el diak a ngeral rellii ma lechub e dolekoi a ikel bleketakl er a osenged. Betok ra rechad el ngara ringel a medengei el kmo te ngara ringel. Ngdiak el kired el merritel; esel dorritel a diak a ngeral ngesuir ma lechub el sorir lorrenges er ngii eleng blechoel el teluadel el tekoi.

Mengaisisiu er kid el mo er a rebebil a diak lungil, tokuni a lsekum kede omdasu el mo kid a kuk ungil er tirkel ngara ringel. Tial omengaisisiu a uai sel omros el delchel a ralm a ²³3 meters, e mesang a omodengelii el chad el remos ra delchel a ralm el ²⁴4 meters, e merritel er ngii el kmong klou a kengtil, e kau a chemat el kirem. E kede medengei, el kid el bekl el chad eldi cheuarem. Ng diak a ta er kid elmo suobel.²⁵ Ng diak el sebeched. Jacob,el ngara Babier er a Mormon, a olsisechakl er kid el kmo sel bo dungil lobengekel a Dios, eng di okiu a krasia er a Dios e kid a mo suobel.²⁶ Kid el rokui a ousbech er sel diak a ulebengelel Tngakireng er a Osobel, eng diak el dil telkib er ngii.

Bo locholt a klechubechub, klemedengei er a delongeled, me a beltikerreng sel dobenterir a rebebil meliuekl er kid.²⁷ E tirkel ngara ringel a kirir el “mo medengelii sel bliochel beltkil a rengul a Jesus Kristo lokiu omelkinged me a omerelled.”²⁸ E sel dosiou, e kede omekduch a rengrir a rebebil e oldars a ngeseu. Ea omko ngarngii a chad el diak el soal, e kede melemolem el mesiou sel le kengei er kid. A Osobel a ulsisechakl el kmo “le tirkang ea kiriu el melemolm losisechakl er tir; leng diak modengei el kmo kele lobult e louuchel el lemei er ngak loba blak el reng, me ak mo omekungil er tir; meng kemiu a mouchul e tir a mo suobel.”²⁹ A urerel a Osobel a mo omekungil. A urered a mo oubeltikerreng—mo oubeltikerreng e mesiou el ngara teletael ma rebebil a mo kmeed el mo er a Jesus Kristo. Tiang a tara redechel sel mesisiich, e melmalt e melmolm el osisecheklel a Kristo.

Ak siotai er kemiu el mo kiei lolab a osisechekelel a Kristo el lomelekl e ngoriakl e olngeseu er a rebebil er a omerollir. Ak kuuchais el kmo a osisecheklel a Kristo a klou a ultutelel el mo er a uldesuel a Chedam er a Babeluades; el ngii, a Osisecheklel. Me sel louedikel a klaumera er kid er a Jesus Kristo me a Tngakireng er Ngii, e kede merael er sel rael er a telbiil e semeriar el mo olngeseu er a rebebil el mo oumerang roltirakl er a Jesus Kristo. Ng sebeched el mo diukes er a rengedel a Chedam er a Babeluades, el ngii a kot el ngarbab el klaumerang el kiei lolab a osisecheklel a Kristo, el loba ngklel a Jesus Kristo, amen. El ngara a ngklel a Jesus Kristo, amen.