Jenerol Konferens
Sanap Wantaim Strong long Ai bilong Bikpela
Epril 2025 jeneral konferens

Sanap Wantaim Strong long Ai bilong Bikpela

Presiden Russell M. Nelson i autim

Presiden bilong Sios bilong Jisas Krais bilong ol Seint long Las-de

Taim yumi wok strong long gat pasin bilong laikim wantaim bel na klinpela tingting na pasin long laip, strong bilong yumi long go klostu long God bai kamap bikpela.

Ol brata na susa, mi amamas long toktok long yupela tude, insait long dispela bikpela jenerel konferens. Ai bilong mi i kamap lapun. Tenkyu long luksave bilong yupela taim mi givim toktok bilong mi.

Yumi stap long taim planti samting i kamap insait long Sios bilong Jisas Krais bilong ol Seint long Las-De. Mi pulap wantaim amamas tru taim mi lukim gutplela wok i kamap long planti hap.

Ol yut bilong yumi i kirapim tingting na bel bilong mi tru. Ol i givim sevis long bikpela namba. Ol i painim aut ol tumbuna na mekim odinens insait long temple. Namba bilong ol yangpela man na meri bilong yumi husait i putim pepa bilong mekim wok misin i bikpela tru. Ol pikinini bilong yumi nau i sanap strong olsem ol strongpela lain bilong bihainim Jisas Krais.

Presiden Nelson wantaim tumbuna pikinini meri bilong em.

I no longtaim mi bungim wanpela tumbuna pikinini meri bilong mi. Taim mi skelim ol hevi bai kamap long laip bilong em, mi pilim bikpela laik tru long helpim em bildim bilip bilong em insait long Jisas Krais. Long em bai amamas bihain, em mas stap insait long gospel bilong Krais.

Olsem yumi olgeta, ol hevi bai kamap long em. Ol sik, bel hevi, traim, na sore bai kamap long yumi olgeta. Ol dispela hevi i ken daunim strongpela bilip we yumi gat. Tasol, ol disaipel bilong Jisas Krais i ken kisim wanpela narakain strongpela bilip.

Taim yumi mekim na bihainim ol kavanen wantaim God, yumi i ken gat strongpela tras na bilip we Spirit i kamapim. Bikpela i tokim Profet Josep Smit olsem strongpela tras na bilip bilong yumi ken “kamap strong insait long ai bilong God.” Tingim dispela gutpela tingting bilong gat strongpela tras na bilip long ai bilong God!

Taim mi toktok long gat strong long ai bilong God, mi toktok long gat strong long go klostu long God nau yet! Mi toktok long beten wantaim strongpela tingting olsem Papa long heven i save harim yumi, na Em luksave gut long wanem samting yumi laikim, moa long yumi yet. Mi toktok long gat strongpela bilip olsem Em laikim yumi, moa long yumi inap luksave, na Em save salim ol ensel long kam wantaim yumi na husat yumi laikim. Mi toktok long gat strongpela bilip olsem Em laik tru long helpim yumi wan wan kamap husait yumi inap long kamap.

Nau, bai yumi kisim dispela kain strong olsem wanem? Bikpela i bekim dispela askim wantaim dispela tok: “Larim bel bilong yupela … i pulap wantaim laikim bilong olgeta man, … na oltaim yupela mas bilasim yupela yet wantaim klinpela tingting; bai yupela sanap strong moa long ai bilong God.”

Ki em i dispela! Bikpela yet i toktok, siariti na klinpela pasin bai opim rot long gat strongpela tras na bilip long ai bilong God! Ol brata na susa, yumi ken mekim dispela! Strong bilong yumi ken kamap bikpela tru long ai bilong God, nau yet!

Yumi skelim siariti na klinpela pasin.

Namba wan, siariti. Tupela yia i go pinis, mi askim yumi olgeta, olsem ol husait i mekim kavanen na bihainim Jisas Krais, long kamap man bilong kamapim bel isi. Mi tok gen wanem mi tok bifo: “Bel hat i no inap kirapim tingting bilong narapela. Kros i no inap bildim wanpela man. Kros pait i no inap soim rot bilong stretim ol hevi.”

Trupela siariti long olgeta man em i namba wan samting long ol lain bilong kamapim bel isi! Em i bikpela samting yumi mas gat siariti insait long ol toktok bilong yumi, long ples klia na hait. Mi tok tenkyu long yupela husait i tingim gut kaunsel bilong mi. Tasol yumi ken mekim gut moa.

Long nau ol toktok pait long ai bilong ol manmeri na long intanet i bikpela tumas. Ol toktok bilong daunim narapela i olsem samting bilong kilim ol manmeri. Ol tok pait i stopim Holi Spirit long stap olsem poroman bilong yumi oltaim.

Olsem foloa bilong Jisas Krais, yumi mas go pas long rot olsem ol lain bilong kamapim bel isi. Taim siariti i kamap pasin bilong yumi, tingting bilong daunim ol narapela bai lusim yumi. Yumi bai lusim pasin bilong skelim ol narapela. Yumi bai gat siariti long olgeta manmeri bilong kain kain sindaun. Siariti igo long olgeta manmeri i bikpela samting insait long wokabaut bilong yumi. Siariti i nambawan pasin bilong God.

Yumi mas askim Papa long heven long pulmapim bel bilong yumi wantaim pasin bilong laikim tru wantaim bel—moa long ol lain yumi painim hat long laikim.—long wanem, pasin bilong laikim tru wantaim bel em presen Papa long heven i givim long ol lain husat i save bihainim tru Jisas Krais. Jisas Krais em King bilong bel isi. Yumi mas stap olsem wokman bilong Em long kamapim bel isi.

Nau, yumi toktok long klinpela tingting na pasin. Bikpela i tokim yumi long bilasim tingting bilong yumi oltaim wantaim klinpela tingting na pasin. Tingim bikpela strong moa yu bai kisim, i go long ol gutpela tingting, taim yu strongim wantaim klinpela tingting. Klinpela tingting save mekim olgeta samting orait na i save givim amamas! Long narapela sait, tingim wanem bai kamap, taim yu putim klinpela tingting na pasin go wantaim ol doti tingting, o tingting bilong rausim amamas. Klinpela tingting na pasin bai ronim ol dispela tingting i go. Klinpela tingting na pasin bai frim yu long ol tingting i givim wari na hevi.

Ol brata na susa, dispela graun i kamap moa nogut, yumi nid long kamap moa klin. Ol tingting, toktok, na pasin bilong yumi mas stap klin tru, na pulap wantaim laikim bilong Krais i go long olgeta manmeri. Bikpela sans i stap em bilong yumi kamap ol manmeri God i laik yumi mas kamap.

Taim yumi lotu olgeta taim long haus bilong Bikpela, em bai pulmapim yumi wantaim pasin bilong laikim tru wantaim bel na klinpela tingting na pasin. Taim bilong yumi insait long temple bai strongim konfidens bilong yumi long ai bilong Bikpela. Taim yumi stap moa insait long temple, dispela bai helpim yumi redi long Namba Tu Kam Bek bilong Seivia, Jisas Krais. Yumi no save wanem de na aua Em bai kam bek. Tasol mi save olsem Bikpela i putim long tingting bilong mi long tokim yumi long redi long dispela “bikpela na de nogut tru.”

Taim yumi wok strong long gat siariti na klinpela tingting na pasin long laip, strongpela konfidens bilong yumi long go klostu long God bai kamap bikpela. Mi askim yupela long mekim ol wan wan samting bilong mekim strong bilong yu long sanap long ai bilong Bikpela i go bikpela moa. Na, taim yumi go long Papa long Heven wantaim bikpela strong, yumi bai pulap wantaim amamas, na bilip bilong yu long Jisas Krais bai go bikpela. Yumi bai stat long save long strong bilong spirit we i abrusim bikpela hop bilong yumi.

Mipela i amamas long Bikpela long wok bilong sanapim temple i kamap hariap tru long yia i go pinis. Aninit long daireksen bilong Em, tude, mipla i tokaut long ol plen bilong sanapim temple long ol dispela ples:

  • Reynosa, Mexico

  • Chorillos, Peru

  • Rivera, Uruguay

  • Campo Grande, Brazil

  • Porto, Portugal

  • Uyo, Nigeria

  • San Jose del Monte, Philippines

  • Nouméa, New Caledonia

  • Liverpool, Australia

  • Caldwell, Idaho

  • Flagstaff, Arizona

  • Rapid City, South Dakota

  • Greenville, South Carolina

  • Norfolk, Virginia

  • Spanish Fork, Utah

Mi tokaut olsem Jisas Krais, Man husat i kisim bek Israel, i go pas long dispela Sios bilong Em. Em i redi long kam bek. Olsem na yumi tu mas redi long bungim Em. Long dispela mi prea long nem bilong Jisas Krais, amen.

Ol sampela liklik toktok

  1. Dispela liklik ston we profet Daniel i lukim long driman bilong em long ol samting bai kamap bihain i wok long “i go aut long inapim dispela graun” (lukim Daniel 2:31–45; Doktrin na ol Kavanen 65:2)

  2. Doktrin na ol Kavanen 121:45.

  3. “Mi bai go pas long ai bilong yu. Mi bai stap long han sut bilong yu na han kais bilong yu, na Spirit bilong mi bai stap insait long bel bilong yupela, na ol ensel bilong mi bai raunim yu, long apim yu go antap” (Doktrin na ol Kavanen 84:88).

  4. Doktrin na ol Kavanen 121:45, ol putim mak bilong strongim tok; lukim tu ves 46.

  5. Russell M. Nelson, “Peacemakers Needed,” Liahona, Mei 2023, 98.

  6. Sapos yumi laik kros pait wantaim ol narapela yumi soisim long stap wantaim nogat gaidens bilong Holi Spirit.

  7. Yumi mas i gat pasin bilong laikim tru wantaim bel “long olgeta man, na long husait i gat bilip” (Doktrin na ol Kavanen 121:45).

  8. As bilong dispela em yumi mas “beten wantaim olgeta bel bilong yumi” (Moronai 7:48).

  9. Lukim Moronai 7:48.

  10. Lukim Aisaia 9:6.

  11. Olsem Joseph Smith i skulim yumi, “Sapos [yumi] laik long go long hap God i stap, [yumi] mas kamap wankain olsem God, o bihainim ol tingting na pasin God i gat” (Teachings of Presidents of the Church: Joseph Smith [2007], 72). Olsem tasol, Aposel Paul i givim tok stia olsem yumi mas “go klostu long God na noken pret. Em i man bilong marimari. Yumi go long em, na bai yumi lukim em i sori long yumi. Na sapos yumi gat hevi, orait marimari bilong em bai i helpim yumi” (Hebrews 4:16).

  12. Lukim Matthew 24:36–37.

  13. Malachi 4:5; lukim tu Zephaniah 1:14–18.

  14. Bikpela i tokim yumi long “ tingim bilip, klinpela tingting na pasin, save, pasin bilong noken belhat kwik, pasin bilong bel isi, pasin bilong mekim gut long ol narapela, klinpela pasin, pasin bilong laikim tru ol arapela wantaim bel, pasin bilong stap pasin bilong daunim yu yet, [na] pasin bilong mekim wok wantaim bel na strong” (Doktrin na ol Kavanen 4:6). Taim yumi mekim dispela, strongpela tras na bilip bilong yumi bai kamap bikpela, na bihain, long toktok bilong Em yet, taim yumi askim, yumi bai kisim. Taim yumi paitim dua, dua bai op long yumi. (Lukim Doktrin na ol Kavanen 4:7.)

  15. Samting i kamap long ol manmeri bilong King Benjamin i ken kamap long yumi: “Ol i pulap wantaim amamas, na Bikpela i rausim sin bilong ol, na tingting bilong ol i stap isi tru, long wainem, ol i gat strongpela bilip long Jisas Krais” (Mosaia 4:3).