Atonmen bilong Jisas Krais i Givim Namba wan Rot bilong Seivim

Atonmen bilong Jisas Krais i givim namba wan rot bilong seivim yumi long ol hevi bilong dispela laip. Presiden Russel M Nelson makim mi long dedikeitim Casper Wyoming Temple leit las yia. I bin bikpela ekspiriens, kirapim bel na pulap long spirit. Em i bringim klia fokas long wok ol temple i mekim long seivim ol pikinini bilong God thru long Atonmen bilong Seivia.

Ol steik insait long Casper Wyoming Temple distrik i gat ol graun wanpela hap rot we ol Las-de Seint i bin yusim namel long 1847 na 1868. Long redim mi wan long temple dedikesen, mi ridim gen histori bilong dispela rot arere long Platte Wara klostu long Casper na i go yet long Salt Lake Siti. Dispela rot i bin wanpela gutpela rot bilong handret na tausen manmeri i bin kam long wes. Namba wan tingting bilong mi em moa long 60,000 Las-de Seint paionia husait i wokabaut long dispela rot.

Planti paionia bilong yumi i kam long wagon, tasol inap olsem 3,000 i bin krosim wantaim tenpela hankat kampani. Etpela bilong ol dispela hankat kampani i bin mekim dispela bikpela wokabaut wantaim gut tru na i no planti lain i bin dai. Ol Willie na Martin hankat kampani bilong 1856 i bin narapela kain.

Mi bin glasim ol akaun bilong Willie na Martin hankat kampani stat long taim nogut weta i bin stat. Mi go klostu long ol dispela salens ol i bungim taim ol i bin brukim Sweetwater wara, Martin’s Cove, Rocky Ridge, na Rock Creek Hollow.

Between Storms, long Albin Veselka

Mi no bin go insait yet long Casper Temple pastaim long dedikesen. Taim mi go insait long foya, tingting bilong mi i go long wanpela piksa bilong hankat we nem bilong en Between Storms. Dispela piksa i no bilong soim ol bagarap i bin kamap. Taim mi lukluk long en, mi tingim, “Dispela piksa i stret; planti ol paionia bilong hankat i no bin bungim ol hevi.” Mi no inap long stopim pilim olsem dispela i olsem laip olgeta. Sampela taim yumi stap namel long strongpela wind na sampela taim namel long ol klaut na san.

Heaven’s Portal, long Jim Wilcox

Taim mi tanim i go long namba wan piksa long narapela wol, taitel em Heaven’s Portal, mi luksave dispela naispela piksa ol i kolim “Devil’s Gate,” wantaim Sweetwater wara i ron isi na klia tru, i soim naispela kriesen Bikpela i wokim, na i no ol salens we ol paionia i bin bungim long dispela taim bilong kol.

Mi lukluk i go, baksait long desk bilong rekomen, na lukim wanpela naispela piksa bilong Seivia. Dispela kirapim bikpela tingting bilong amamas long ol samting. Insait long dispela naispela graun, i gat ol bikpela salens. Taim yumi tanim igo long Jisas Krais, Seivia bilong yumi, Em bai seivim yumi long ol bikpela hevi bilong laip thru long Atonmen bilong Em bihainim plen bilong Papa.

Long mi, dispela foya em i gutpela ples long redi long temple odinens rum bai larim yumi kisim ol odinens bilong eksaltesen, wokim ol sekred kavanen, na kisim tru na save long ol blesing bilong Atonmen bilong Seivia. Dispela plen bilong amamas bilong Papa i stap long atonmen bilong Seivia.

Dispela ol stori bilong ol paionia i givim ol Las-de Seint narapela kain pasin bilong bipo na wanpela pawaful laip stori long sait bilong spirit. Long ol sampela, maigresen i kisim planti yias bihain long ol i rausim ol long Missouri na Nauvoo. Long ol narapela, em i stat bihain long Presiden Brigham Young i tokaut long plen bilong hankat, long mekim wokabaut igo long wes i isi. Ol hankat i bin liklik moni long ol wagon na bulmakau.

Wanpela misinari long Englan, Millen Atwood, i tok olsem taim ol i tokaut long plen, “i bin gat hevi ren, na bel bilong ol pua saints i kalap wantaim amamas na bel isi.” Planti manmeri i bin “beten na fas olgeta de, na olgeta night, bai ol igat dispela sans long bungim ol brata na susa bilong ol insait long [dispela] maunten.”

Planti ol hankat Seint i bungim bikpela birua tasol ol i bin abrusim dispela birua. Tasol tupela hankat kampani, Willie kampani na Martin kampani, i bungim bikpela hangre, ples i bin kol tru long ol, na planti dai.

Planti bilong ol i bin kam long Liverpool, England long Mei 1856 long tupela sip. Ol bin kamap long Iowa Siti ples we ol i wokim hankat long Jun na Julai. Maski ol i kisim ol tok lukaut, tupela kampani statim wokabaut go long Salt Lake Valley leit tumas long kol sisen.

Presiden Brigham Young i save long dispela bikpela birua bilong dispela tupela kompani long Oktoba 4, 1856. Neks de em i sanap long ai bilong ol Seint long Salt Lake Siti na tok, “Planti ol brata susa bilong yumi i stap long rot long ol hankat, … na ol i mas kam long hia; yumi mas helpim ol … pastaim long taim bilong kol i kamap.”

Em i askim ol bisop long givim 60-pela donki lain, 12-pela o moa ol wagon, na 12-pela tons (10,886 kg) bilong plaua na tokaut, “Go na bringim ol dispela pipol nau i stap long peles nating.”

Totel namba bilong ol paionia long Willie na Martin hankat kampani em i inap olsem 1,100 manmeri. Sampela 200-pela bilong ol i bin dai long rot. Sapos ol resku lain i no bin kam hariap, planti moa i bin ken dai.

Winta i stat klostu tupela wik bihain long namba wan resku lain i lusim Salt Lake Siti. Ol stori bilong ol memba bilong Willie na Martin kampani i tok klia long ol bikpela hevi bihain long ol win na ren i stat. Ol stori tu i soim bikpela amamas taim ol resku lain i kamap.

Em i bin givim tokpiksa long kamap bilong ol, Mary Hurren i tok: “Aiwara i kam daun long pes bilong ol man, na ol pikinini i danis long amamas. Olsem hariap tru ol i daunim piling bilong ol, olgeta i brukim skru untap long snow na givim tok tenkyu long God.”

Tupela de bihain, Willie kampani i wokabaut long hatpela hap bilong dispela rot, abrusim Rocky Ridge, long strongpela ren na win bilong ais. Ol laspela lain i no kamap long kemp inap 5:00 kilok neks moning. Tetinpela lain i dai na ol i planim olgeta insait long wanpela matmat.

Long Novemba 7, dispela Willie kampani i kam klostu long Salt Lake Veli, tasol long moning i bin gat tripela dai. Tupela de bihain, Willie kampani i kamap long Salt Lake, we ol i givim ol bikpela welkam long ol hom bilong ol Seint.

Long sem de, Martin kampani i stap yet 325 mails (523 km) bak long rot, go het wantaim bikpela hevi bilong kol na nogat inap kaikai. Sampela de pastaim, ol i brukim Sweetwater wara long kamap long ples ol i kolim nau Martin’s Cove, we ol i hop long hait long kolwin na ren. Wanpela paionia i tok, “Em i bin nogut taim tru long brukim wara long dispela wokabaut.” Sampela ol resku lain—olsem tumbuna-man bilong mi, David Patten Kimball, husait i bin 17 yias, na ol pren bilong em, “George W. Grant, Allen Huntington, Stephen Taylor, na Ira Nebeker—stap long taim long wara i kol tumas,” na helpim dispela kampani brukim Sweetwater wara.

Dispela samting i kisim bikpela luksave, taim mi lainim moa long resku lain, mi luksave olsem olgeta i bihainim profet na ol i wokim bikpela wok long seivim ol seints i bin nidim helpim. Olgeta resku lain bin soim strong, olsem ol dispela lain manmeri.

Mi stadim stori bilong ol, mi amamas long naispela rilesensip na longpela taim lukluk bilong stap oltaim bilong ol manmeri. John na Maria Linford na tripela pikinini man bilong ol i bin memba bilong Willie kampani. John i dai sampela aua pastaim long ol namba wan resku lain i kamap. Em i tokim Maria olsem em i amamas olsem ol i mekim dispela wokabaut. “Mi no inap kamap long Salt Lake, ”em i tok, “tasol yu na ol mangi bai mekim, na mi no sori long ol samting yumi go thru long ol sapos ol mangi bai bikpela na lukautim ol famili bilong ol long Saion.”

Presiden James E. Faust givim dispela sot tok: “Insait long stronpela wok bilong ol hankat lain i go pinis, yumi lainim bikpela trutok. Olgeta i mas go thru long paia, na ol samting ino impoten bai paia kukim na mekim feit bilong yumi i lait, stap gut na strong. I save gat bikpela kros, bel sore, na bel hevi long olgeta, wantaim tu ol lain husait i wok strong long mekim stretpela pasin na stap feitful. Tasol dispela em i rot bilong klinim long save long God ”

Long Atonmen na Kirap Bek bilong Em we i kamapim laip oltaim oltaim, Seivia i brukim “ol rop bilong dai, na em i winim dai” bilong olgeta manmeri. Long ol lain i tanim bel long ol sin, Em i “kisim long em yet ol sin na nogut pasin bilong ol, seivim ol, na inapim ol samting we jastis i laikim.”

Taim nogat Atonmen, yumi no inap long seivim yumi yet long sin na dai. Maski sin i gat bikpela wok long ol hevi yumi karim, ol hevi i kamap long ol rong, ol nogut disisen, ol pasin nogut bilong ol narapela, na planti samting yumi ino kontrolim.

Tokaut long Gospel Bilong Mi i tisim: “Taim yumi putim feit long Atonmen bilong Jisas Krais, Em i ken helpim yumi karim ol traim, sik na pen. Yumi ken pulap long amamas, bel isi, na gutpela bel. Ol samting i no stret long laip bai orait long Atonmen bilong Jisas Krais tasol.”

Long dispela Ista taim, fokas bilong yumi i stap long Seivia na sakrifais bilong Em. Atonmen i givim hop na lait long taim planti i lukim tudak na i nogat amamas. Presiden Gordon B. Hinckley i tokaut, “Taim lukluk long olget histri, … [i nogat] samting … i naispela, i antap tru, i bikpela tru long dispela pasin marmari.”

Mi bai serim tripela tingting mi ting ol i stret long taim bilong yumi.

Namba wan, noken daunim pasin bilong helpim narapela long ol salens bilong bilong bodi na moa yet long sait bilong spirit.

Namba tu, amamas long kisim Atonmen bilong Seivia. Yumi olgeta mas traim long soim amamas maski sapos yumi bungim salens bilong laip. Gol bilong yumi i mas long stap gut long dispela gutpela rot. Mi lukim gutpela poroman bilong mi, Mary, i mekim dispela olgeta taim. Mi save laikim gutpela pasin bilong em, pasin bilong strongim narapela maski mipela i bungim hevi long ol yia i go pinis.

Namba tri kaunsel bilong mi em long makim wanpela taim long stadim Atonmen bilong Seivia. I gat planti wei long mekim dispela insait long lotu bilong yu yet. Tasol, taim yumi go long sakramen na kisim sakramen em i olsem wanpela bikpela samting.

Em i impoten tu long go olgeta taim long wanpela temple istap klostu. Temple i givim tingting i go het long Atonmen bilong Seivia na wanem samting em i winim. Na, moa impoten, go long temple i larim yumi long givim spiritual reskiu long ol lain bilong yumi husat i dai pinis na ol tumbuna bilong yumi.

Presiden Russell M Nelson, long laspela konfrens, i tok strong long dispela toktru na i tok,“[Temple] blesing … i helpim long redim ol manmeri husait i helpim long redim wol long Namba tu Kam Bek bilong Bikpela!”

Yumi mas noken lus tingting long ol sakrifais na ol eksampel bilong ol jeneresen bipo, tasol pasin bilong preisim, amamas, na lotu i mas fokas long Seivia bilong dispela wol na sakrifais bilong Em. Mi testifai olsem ki long plen bilong amamas bilong Papa em i Atonmen we Seivia bilong yumi, Jisas Krais i mekim. Em i stap na gaidim Sios bilong Em. Atonmen bilong Jisas Krais i givim namba wan rot bilong seivim yumi long ol traim bilong dispela laip. Long nem bilong Jisas Krais, amen.