“Dispela Bai i Soim Olgeta Man Olsem, Yupela i Disaipel Bilong Mi”
Laikim bilong yumi long God na ol pikinini bilong em i save tokaut stret long olgeta olsem, tru, dispela em Sios bilong Jisas Krais.
Planti yia i go pinis, Sista Uchtdorf na mi i go long saut Germany. Em klostu long de Ista, na mitupela i askim wanpela gutpela poro bilong mitupela husat i no memba bilong Sios, long kam wantaim mitupela long lotu long Sande. Mitupela laikim tumas dispela poro bilong mitupela, olsem na mitupela tokim em hau mitupela pilim long Jisas Krais na Sios bilong Em na askim em long kam na lukim! Em i tok orait long askim bilong mitupela na em kam wantaim mitupela long ol miting bilong wanpela brens i stap klostu.
Sapos yu kisim wanpela poro bilong yumi kam long lotu namba wan taim tru, ating yu bai pilim wankain olsem mi long dispela Sande moning. Mi laikim olgeta samting i mas orait. Poro bilong mipela em wanpela save meri, na em i gat bikpela save long bilong lotu. Mi laik tru olsem ol miting bilong dispela brens bai givim gutpela tingting long em na makim Sios gut.
Dispela brens i save bung long ol rum ol i baim antap long wanpela stua. Long go insait, mipela bai bihanim lata long baksait bilong stua i go antap, na abrusim strongpela smel bilong ol samting insait long stua.
Taim miting bilong kisim sakramen i stat, mi tingting long poro bilong mi i lukim kain ol samting namba wan taim, na mi lukim sampela samting i mekim mi bel hevi liklik. Kain olsem, taim ol i singsing, em i no wankain olsem Tabernacle Choir. Long taim bilong kisim sakramen, ol pikinini i mekim planti nois. Ol lain i autim tok i traim, tasol ol i no gutpela long toktok long ai bilong ol man. Mi no pilim gutpela long taim bilong miting, na mi ting olsem Sande Skul bai orait moa.
Tasol nogat.
Dispela taim mi tingting planti long poro bilong mipela i ting wanem long dispela Sios mipela i kisim em kam long en.
Bihain, taim mipela i draiv go bek long haus, mi tanim long toktok long poro bilong mipela. Mi laik tok klia olsem dispela em wanpela liklik brens tasol na em i no wankain olsem Sios long olgeta hap. Tasol bipo long mi mekim wanpela toktok, em i toktok.
“Dispela em i nais tru,” em tok.
Mi nogat toktok.
Em tok, “Mi laikim tru wanem pasin ol lain i soim long wanpela narapela long sios bilong yupela. Ol kain kain lain, tasol em i ples klia olsem ol laikim ol yet tru wantaim bel. Mi ting Krais bai laikim Sios bilong Em long stap olsem kain.”
Hariap tru, mi tok sori long pasin bilong skelim samting mi mekim pinis long en. Mi laikim ron bilong miting i mas go orait stret, bai poro bilong mi i laikim. Tasol ol memba bilong dispela brens i inapim tru wantaim bel bilong ol pasin bilong laikim, mekim gut long ol narapela, bel isi, na bel sore long narapela.
Bai Pasin Bilong Bilip Bai Kamap Bikpela Tru Hia Long Graun
Ol brata na susa, ol gutpela poro, mi laikim Sios Bilong Jisas Krais Bilong Ol Seint Long Las De. Em trupela Sios bilong Jisas Krais i gat laip, na em skulim ol man long trupela gutnius bilong Jisas Krais, Em yet i kirapim gen. Strong na tok orait bilong prishud bilong em i stap long hia. Jisas Krais yet i save go pas long dispela Sios, long maus na han bilong ol wokman Em yet i makim na givim ol tok orait, na long han bilong profet, olsem Presiden Russell M. Nelson. Em givim ol Bilipman bilong Las De dispela wok bilong bungim wantaim olgeta pikinini bilong God, na redim graun long Kam Bek bilong Em. Mi tokaut olsem olgeta dispela samting i tru.
Tasol em bikpela samting, long tingim olsem taim ol lain i kam na lukim Sios bilong Jisas Krais namba wan taim tru, ol i no tingting long tok orait bilong prishud o ol wok bilong lotu o wok bilong bungim gen Israel. Ol bai luksave, antap long olgeta samting, long ol i pilim olsem wanem taim ol stap wantaim yumi na wanem pasin yumi save soim yumi yet.
“Laikim wanpela narapela,” Jisas i tok. “Dispela bai i soim olgeta man olsem, yupela i disaipel bilong Mi.” Planti taim, namba wan testimoni bilong wanpela long Jisas Krais i save kam taim em pilim olsem pasin bilong laikim i stap namel long ol disaipel bilong Jisas Krais.
Jisas Krais i tokaut olsem Em kirapim bek Sios bilong Em, bai “pasin bilong bilip … bai kamap bikpela tru hia long graun.” Olsem na, taim ol manmeri kam long ol miting bilong yumi long Sios, Jisas Krais laikim ol long go bek wantaim strongpela bilip long Em! Dispela lav ol poro bilong yumi pilim namel long yumi bai apim ol go klostu long Jisas Krais Dispela em wanpela isipela wok tru, yumi mas mekim olgeta taim, taim yumi kam bung.
Wanpela husat i laik bilip moa long Krais, o go klostu long Papa long Heven, bai painim dispela insait long Sios bilong Jisas Krais bilong Ol Seint long Las-De. Taim yumi askim ol long kam long ol miting bilong yumi, em i wankain olsem yumi askim ol long kam long haus bilong yumi.
OlGutpela na Ol Trupela
Nau, mi luksave olsem mi toktok long ol gutpela. Na long dispela laip, wan wan taim yumi save lukim ol gutpela. Na “inap long dispela de ol samting i kamap stretpela,” i bai gat baret namel long ol samting i gutpela na ol samting i trupela. Olsem na bai yumi mekim wanem taim yumi pilim Sios i no stap gutpela? Taim, long sampela as, wod bilong yumi i no save soim yet pasin bilong bilip na laikim? O taim yumi pilim olsem yumi hat long stap?
Wanpela samting yumi noken mekim em long rausim ol gutpela samting!
Dispela taitel pes bilong Buk Momon i givim dispela tok lukaut: “Sapos sampela samting i kranki,” em i tok, “em ol asua bilong man; olsem na, noken tok daunim ol samting bilong God.”
Wanpela buk—o wanpela sios o wanpela man—i ken stap olsem wok bilong God taim i gat “asua” na i “kranki,” o nogat?
Bekim bilong mi em wanpela bikpela yes!
Olsem na, taim yumi strong long bihainim ol samting Bikpela i laikim, yumi mas bel isi tu long wanpela narapela. Yumi wan wan i save wok long stretim yumi yet, na yumi olgeta i save lukluk long Jisas Krais long helpim yumi. Em i tru, long yumi wan wan, na bilong kingdom bilong God hia long graun.
Bikpela i no laikim yumi long joinim kingdom bilong Em tasol. Nogat. Yumi mas wok strong long kirapim tu. God i laik olsem ol manmeri bilong em mas stap wantaim “wanpela bel na wanpela tingting.” Long stap wanpela bel, yumi mas gat klinpela bel, na yumi mas senisim tru bel bilong yumi.
Tasol em i no olsem bai mi senisim bel bilong mi i go wankain olsem bilong yu. Na tu, em i no olsem bai yu senisim bel bilong yu i kamap wankain olsem bilong mi. Yumi olgeta i mas senisim bel bilong yumi i kamap olsem bilong Jisas Krais.
Sapos yumi no kamap long dispela mak yet, tingim olsem: wantaim helpim bilong Bikpela, i nogat wanpela samting i hat.
Stap Gut long Dispela Hap
Na sapos yu pilim olsem yu hat long stap long hia, yu mas save olsem yu tasol i no pilim dispela. Yumi olgeta i stap insait long dispela kain samting, taim yumi pilim olsem yumi narapela olgeta insait long wanpela hap, o nogat? Dispela i kamap long mi planti taim. Taim mi stap 11-pela krismas, famili bilong mi i lusim hap mipela stap na go long narapela hap mipela no save long en. Olgeta samting i narakain long ol samting mi save pinis long en. Na nek bilong mi tu i soim ol narapela pikinini olsem mi narapela long wanem ol i save long en. Long taim we mi laik tru long gat ol poro na long stap gut wantaim ol, mi pilim olsem nogat wanpela i stap wantaim mi, na mi no bilong dispela hap.
Hia long graun, planti bilong ol narakain samting yumi save lukim—ol narakain samting yumi save yusim long skelim yumi yet—em ol samting bilong graun: yumi luk olsem wanem, kantri, tokples, kolos, ol kastom, na planti moa. Tasol “God i no save skelim ol samting olsem man i save skelim. Ol man i save lukluk long bodi. Tasol [Bikpela] save lukim tingting na laik bilong man.”
Long lukluk bilong God, i gat wanpela skel i save stap paslain tru: pikinini bilong God. Na yumi olgeta stap stret insait long dispela.
Yumi save laik long stap wantaim ol lain i save lukluk, toktok, mekim ol samting, na tingting olsem yumi yet. I gat ples bilong mekim kain.
Tasol long Sios bilong Jisas Krais, yumi bungim olgeta pikinini bilong God husat i laik long bung wantaim na painim tok tru. Yumi luk olsem wanem, lukluk bilong yumi long gavman, ol kastom, o wanem ples bilong yumi i no bungim yumi wantaim. I no ol wanpela kain pasin bilong yumi tasol i bungim yumi wantaim. Namba wan as tingting bilong yumi tasol i bungim yumi, laikim bilong yumi long God na ol narapela, na pasin bilong stap strong na mekim wok bilong Jisas Krais na gutnius bilong Em, Em i bin kirapim bek. Yumi stap “wanpela insait long Krais.”
Pasin bilong wanbel yumi laikim long en, em i no bilong yumi olgeta sanap wantaim long wanpela hap; em i bilong yumi lukluk long wanpela hap tasol—long Jisas Krais. Yumi wanpela tasol, i no long we yumi stap bipo tasol long we yumi traim long go long en, i no long yumi husat tasol long husat yumi laik kamap.
Trupela Sios bilong Krais em i sanap antap long dispela.
Wanpela Bodi
Sapos yu laikim God, sapos yu laik bihainim Pikinini bilong Em long save moa long Em, yu mas stap long hia. Sapos yu save traim long bihainim ol lo bilong Jisas Krais—wankain long taim yu no bihainim gut yet—em i gutpela long yu stap long Sios bilong Jisas Krais bilong Ol Seint long Las-De.
Na sapos yu narakain long ol manmeri raun long yu? Dispela i no mekim yu narakain—em i mekim yu wanpela hap bodi bilong Krais we i gat nid bilong en. I gat nid bilong yumi olgeta insait long bodi bilong Krais. Yau i save skelim ol samting narakain long ai. Lek i save mekim ol samting han i no inap mekim.
I no bilong yu long senisim ol narapela long kamap olsem yu yet. Tasol em i bilong yu givim wanpela samting long ol narapela—na yu gat bikpela samting long lainim!
Wanpela Nek
Long olgeta miting bilong jeneral konferens, ol kwaia i save blesim yumi wantaim gutpela musik bilong kirapim bel. Taim yu harim, ating yu bai luksave olsem ol i no singim wanpela nek tasol. Sampela taim wanpela hap i kisim nek, sampela taim narapela hap. Tasol olgeta i bung wantaim long mekim gutpela musik, na ol i stap wanpela. Wan wan memba bilong kwaia i gat wanpela as tingting tasol: long liptimapim God na apim bel bilong yumi go long Em. Tingting na bel bilong wan wan bilong ol i mas pas long dispela wok bilong God. Na taim ol i mekim olsem, tru tumas, ol i kamap wanpela nek tasol.
Sapos yu no memba bilong Sios bilong Jisas Krais bilong Ol Seint long Las-De yet, mipela i laikim yu long joinim mipela na yumi amamas long “song bilong ridiming lav” bilong Seivia. Mipela nidim yu. Mipela laikim yu. Sios bai kamap gutpela wantaim ol wok yu mekim long sevim Bikpela na ol pikinini bilong Em.
Sapos yu soim pinis, taim yu baptais, taim yu mekim kontrak wantaim God, laik bilong yu long “kam insait long banis bilong God, na stap olsem manmeri bilong em,” tenkyu long stap wanpela wantaim dispela bikpela wok bilong God na long helpim long mekim Sios bilong Jisas Krais kamap wanem Seivia laikim em long stap.
Olsem mi lainim long poro bilong mi long Germany, laikim bilong yumi long God na ol pikinini bilong Em em wanpela strongpela testimoni i go long wol olsem, tru, dispela em Sios bilong Seivia.
Bai God i blesim yumi long wok strong long bihainim ol samting Seivia, Ridima, na Masta bilong yumi i putim long yumi bihainim—bai olgeta i save yumi disaipel bilong Em. Long holi nem bilong Jisas Krais, amen.