Holim Pasim Gut Laip

Em i tok: “Ol wod famili bilong mipela i laikim na helpim mi tru. Mi pilim narakain tru. Bisop na presiden bilong ol Yangpela Meri [bilong mi] i mekim planti samting tru long soim laikim na helpim bilong ol. … Mi lukim han bilong Bikpela … gaidim mi na famili bilong mi. … Kain wod olsem em famili olgeta lain i nidim, olsem wanpela yangpela meri karim wankain olsem mi.”

Em na famili bilong em, na wod famili bilong em i welkamim pikinini man bilong em long mun Februari.

Presiden Russell M. Nelson i tok, “Namba wan mak bilong trupela Sios bilong Bikpela i gat laip em … wok bilong helpim ol wanwan pikinini bilong God … [minista wantaim gutpela pasin tru] long ol wanwan, olsem Em yet i mekim.”

Taim wanpela singel meri i painim olsem em gat bel long pikinini, ol hevi bilong helt, hevi bilong spirit, sem, wari bilong moni, tingting long skul, tingting sapos em bai marit o nogat, na sore bilong ol samting em laik bai i no kamap ken, long taim bilong pen tingting planti, ken mekim wanpela meri long mekim samting em bai pilim pen bihain taim.

Husat yu pilim pen na tingting sore bilong mekim dispela pasin bilong rausim bel, tingim olsem: maski yumi no inap senisim bipo, God i ken oraitim bipo. Pasin bilong lusim rong i save kam long marimari bilong Em, taim yu daunim yu yet wantaim bel sore bilong ol pasin yu mekim, na go long Em.

Taim wanpela i karim pikinini, dispela em i holi, na tupela tok i pas long en: laip na laik. Laip em wanpela bikpela pat bilong stretpela plen bilong Papa, na Em i tok yumi mas holim pasim gut laip; lukautim laip; banisim laip; na taim em kamap, yumi larim i stap gut. Yumi mas holim pas tu presen bilong sois, bilong ejensi—helpim long strongim raitpela sois we God i wanbel we i save bringim otaim amamas.

Taim wanpela meri na man i stap long dispela hevi, toktok, han, na bel bilong yumi—long spirit, tingting, na mani—i ken blesim ol long pilim lav bilong Seivia na, Presiden Henry B. Eyring i tok, bai kisim klia tingting ikam long spirit ai bilong ol “wanem ol iken lukim” long “wanem ol i no nap lukim.”

Presiden Dallin H. Oaks i tok: “Tingting na pasin bilong yumi long pasin bilong bel i no sanap antap long taim laip bilong dispela graun i stat. … Em i stret long save bilong yumi olsem … olgeta spirit pikinini bilong God mas kam long dispela graun long mekim bikpela wok, na wan wan i gat nem bipo long ol kamap long dispela graun na dispela bai go het long kamap oltaim oltaim.”

Tok bilong God long ol pikinini stap yet long bel bilong mama, long maus bilong Namba Wan Presidensi na Kwarum bilong Ol Twelpela Aposel, i no senis na i sanap antap long toktok bilong ol profet pastaim, givim tok klia bilong Bikpela i askim yumi.

“Sios Bilong Jisas Krais Bilong Ol Seint Long Las-De bilip olsem laip bilong man i holi. Olsem na, Sios i no wanbel long pasin bilong kilim pikinini insait long bel, long laik bilong wan wan o planti lain, na i askim ol memba bilong en long noken bihainim, mekim, givim tingting long mekim, baim, o mekim rot bilong dispela pasin.

“[Bikpela] i tok orait long sampela as bilong mekim dispela … taim:

• Dispela pikinini i kamap long reip o taim ol wanblut i slip wantaim, o

• Wanpela dokta i skelim olsem laip o helt bilong mama i bai stap long hevi, o

• Wanpela dokta i skelim olsem pikinini insait long bel i no kamap gut na em i no inap stap laip long taim mama i karim.”

Namba Wan Presidensi i tok: “Pasin bilong kilim pikinini insait long bel em bikpela samting. [Long ol dispela taim tu] ol i ken tingting long mekim bihain long ol pilim God i wanbel taim ol i beten” na kaunsel wantaim ol narapela.

30 yias i go pinis, profet bilong Bikpela i tokaut i go long olgeta graun. Ol dispela tok i stap insait:

“Mipela … tokaut olsem God i tok strong olsem pasin bilong slip wantaim bilong kamapim pikinini i mas kamap namel long man na meri husat i marit.

“Mipela tokaut olsem dispela rot laip i save kamap em God i makim na i holi. Mipela tok strong olsem laip em i holi na em bikpela samting insait long plen bilong God bilong stap oltaim.”

Pasin bilong lukautim na banisim laip mama i no karim yet i no lo bilong gavman. Em lo bilong gutpela pasin Bikpela i strongim long maus bilong ol profet bilong Em.

Wanpela toktok bilong Presiden J. Reuben, husat em bin mekim wok insait long Namba Wan Presidensi, i toktok gut tru long ol yut bilong yumi tude: “Ol yut bilong Sios i hangre long ol samting bilong Spirit; ol laik long lainim gutnius, na ol laikim em tru. Ol i laik save long … ol bilip bilong yumi; ol i laik kisim testimoni bilong ol tok i tru. Ol i save … askim, long painim tok i tru.” Yumi mas toktok moa wantaim feit na gutpela bel long ol yut long hom bilong yumi, na wantaim wanpela narapela, long Rilif Sosaiti na eldas kwarum miting, long lo bilong Bikpela long sastiti, holi laip, na kea long pikinini ino bon yet wantaim mama bilong ol.

Wanpela susa i stori long mi long samting i kamap long em planti yia i go pinis: “Taim mi gat 17-pela krismas … mi bin gat bel na poroman bilong mi i no helpim mi. Mi pilim sem tru na i olsem i nogat wanpela stap wantaim mi [tasol] mi no tingting long [rausim bel]. … Mi [gat] naispela famili na bishop bilong mi, husat i save gaidim mi. … Mi lukluk i go long God. Mi ritim ol tok bilong God … na beten [na] mi kisim strong long Jisas Krais na ol samting mi mekim bilong tok sori long asua bilong mi. … Mi kisim ansa [bilong beten bilong mi] we mi no inap dinaim. … Bel bilong mi i bruk, tasol mi save mi bai givim pikinini meri bilong mi long narapela long lukautim. … Mi beten long kisim strong [na] mi pilim laikim bilong Seivia taim mi tok sori, na mi save olsem God … i save bekim beten na strongim yumi.”

Wanpela man na meri husat i marit i kisim em na lukautim em, na skulim em long gutnius. Nau em i marit na em i gat naispela famili bilong em yet.

Sampela taim, taim yumi laik lukautim laip, i gat sampela hatpela tingting pait tu bai kamap.

I no longtaim wanpela yangpela marit mi na Kathy i laikim i stori long pikinini bilong tupela husat i stap yet long bel.

Papa i stori olsem: “[Taim meri bilong mi] i bel long 10-pela wik, mipela painimaut olsem bebi bilong mitupela i gat sik ol i kolim Daun sindrom. Mitupela pilim hevi … bilong ol dokta i tok long kilim dispela pikinini. Sampela wik bihain mipela painimaut olsem … pikinini bilong mitupela … bai nidim planti operesen bilong lewa long namba wan yia bilong em. Namel long dispela taim, taim mipela beten strong long God i helpim mipela, … mipela pilim Spirit i givim bel isi long mipela. Mitupela kisim revelesen na mipela luksave olsem pikinini bilong mitupela em strongpela pikinini bilong Papa God na em i laik tru long stap insait long famili bilong mipela na kam long graun.”

Mama i stori olsem: “[Mitupela] i kirap nogut stret, paul, na dispela samting i mekim mitupela i no orait. … Taim mi bel inap 14-pela wik, mipela painimaut olsem lewa bilong bebi bilong mitupela i no kamap gut, na dispela i ken kilim em. Mipela go lukim planti dokta namel long taim mi bel inap long 10 igo 18-pela wik. Olgeta taim mipela go long dokta, ol i askim sapos mipela laik go het na karim dispela pikinini o mipela laik rausim. … Jisas Krais oraitim bel bilong mi na givim bel isi na amamas bilong pikinini meri bilong mitupela. … [Papa long Heven] i soim mi planti taim olsem Em i gat gutpela plen bilong mi [na] mi bilip long Em.”

Tupela welkamim pikinini bilong ol wanpela wik i go pinis. Em bilong tupela na tupela i bilong em oltaim oltaim.

Bikpela bilip na strong em ol namba wan mak bilong ol disaipel bilong Jisas Krais.

Long ol yia i kam, mi bungim ol man na meri husat i daunim ol yet na kam bek long rot bilong kavanen na long ol blesing bilong temple na prishud, planti yia bihain long membasip bilong ol i raus.

Wanpela taim, mi bai toktok wantaim wanpela man, long ples bilong Namba Wan Presidensi, long em bai kisim bek prishud na ol blesing bilong temple bilong em.

Bihain long em marit insait long temple, na bihain em gat 3pela naispela pikinini, dispela man i no stap gut wantaim meri bilong em na em i no bihainim kavanen bilong em. Wanpela singel meri i gat bel na laik kilim dispela pikinini.

Meri bilong dispela man i tokim dispela meri long karim dispela pikinini, na em promis olsem em bai lukautim dispela pikinini wantaim ol pikinini bilong em taim em i karim.

Dispela singel meri i tingting planti, tasol em wanbel long karim dispela bebi.

Nau em 10-pela yia. Dispela susa i sidaun long ai bilong mi, em laikim tru dispela pikinini man olsem em yet i karim, na tokim mi long samting man bilong em i mekim long tok sori na lukautim em na famili. Papa i krai taim em i stori.

Bilong wanem na dispela strongpela meri bilong God i kisim wanpela pikinini olsem bilong em yet, husat i ken mekim em tingim pasin man bilong em i mekim? Bilong wanem? Em i painim strong insait long Jisas Krais na em i bilip olsem laip i holi tru. Em i save olsem dispela pikinini em pikinini bilong God, nogat asua bilong em.

Ol brata na susa bilong mi, ol man i no tingting na laikim moa ol pikinini i stap insait long bel long olgeta hap, na dispela i bikpela samting bilong tingim. God i save holim pasim gut laip. Em wok bilong Em long bringim ol pikinini bilong Em long laip i nogat dai na i stap oltaim oltaim. Olsem ol disaipel bilong Jisas Krais, yumi mas holim pasim gut laip. “Long dispela olgate man bai save olsem yu disaipel bilong mi, sapos yupala laikim narapela.” Yumi mas soim laikim bilong yumi moa yet long husat ol i nidim yumi tru. Mi tokaut long lav bilong long yupela na Papa long Heven long ol pikinini bilong Em husat bai kam long graun. Long nem bilong Jisas Krais, amen.