Blekebek er a Rengedel a Dios

Rodam me a rodos er ngak, a kuureng a saul el mo mengedecheduch er kemiu er chelechal sils, er tial klou a belkul el klou el ongdibel. A medak a di merael mo cheuodel. Ko mesulang er a ungil klemedengei er kemiu er chelechal bo kulekoi er a klemechek.

Kede kiei er a taem er a betok lorechudel tekoi er a chelsel a Ikelesia er a Jesus Kristo er a Uriul-klebesei el Santo. Ak mui er a deureng sel kumes a ngescheklel a ureor er a betok el basio.

Ng kmal klou ak subii er a rengeasek el ngeleked. Te meral meruul a betok el teletelel omesiou el betok el chad. Te osiik a ngklir a rebeldekir e meruul chedaol ruoll er a templo el kirir. A rubdois el ngeasek el sechal me a redil ngeleked a mengedmokl a babilengir el mo er a mision. A merael mei el telcheroll a merael mo mesisiich loltirakl er a Jesus Kristo.

Ak milsa beches el ngelekel a ngelekel a ngelekek. Sel kumdasou a ongarm el bol chelbangel er a klengar ngii, e a kumelchesiu el soak el ngoseuir el toketekii a klaumera er ngii er a Jesus Kristo. A kiei lotireklel er a ebangkelio er Ngii a klou a ultutelel kirel a deureng er a ngar medal taem.

Ngii, el uai kid el rokui, a mo chemau ongarm. Kede rokui el mo chemau a secher, klengitelreng, ongetikaik, me a kodall. Aika el ongarm a sebechel tomelii sel klisichel a rengud el mo blekebek. Eng di, a roltirakl er a Jesus Kristo a ngarngii a techellir er a kuk ngodech el bedengel a klisichel a reng.

Sel doruul e doltirakl a telbiil lobengkel a Dios, eng kilungii a rengud lokiu Chedaol Reng. A Rubak a dilu er a Profet Joseph Smith el kmo a klisichel a rengud a sebechel merael mo mesisiich er a chelsel a medal a Dios. Ka momtab sel de selbechakl leng klou a rengud er medal a Dios!

Sel kusaod el kirel a mui el blekebek er medal a Dios, e ak melekoi el kirel a de blekebek el merael el mora Dios er chelechang! Ak melekoi el kirel a meluluuch el meral medengei el kmo a Chedam er a Babeluades a medengei a dousbech er a bai kid. Ak melekoi el kmo sel mui el memedengei el kmo Ngii a betik a rengul er kid di kid a diak dungil medengelii, el Ngii a oldurokl er a re anghel el me obengked me re betik er a rengud. Ak melekoi el kirel a blekebek el medengei el kmo Ngii a kmal soal lolngeseu er a dersta er kid el mo er sel kot e rebab el sebeched el teletael.

Meng, mekera bo doba tiaikid el blekebek el reng? A Rubak a ulenger tial ker lolab aikakid el tekoi el kired el mo mui er a bliochel beltikelreng el mo er a rokui el chad me a kldung bol kiei er a uldesued el diak el ngemed; e seikid e kau a mo blekebek er medal a Dios.

Tiaikid a rolel! A meral tekingel a Rubak a kmo a bliochel beltikelreng me a kldung a mekengii a rael kirel a blekebek er medal a Dios. Rodam me a rodos, tia sebeched el rulii! A rengud el blekebek a meral sebechel mo mesisiich er medal a Dios, er chelechang!

Ka domes er a bliochel beltikelreng me a kldung.

A kot, bliochel beltikelreng. Eru el rak er a memong, e ak millekoi er kid el rokui, kid loltirakl er a Jesus Kristo, el mo chad er a budech. A klmuut el meleklii ak dilii: “A ngasechereng a diak a ngeral relii. A mekngit el blekeradel a diak a ngera el relii. E a klautok a diak a ngera el ungil relii.”

A meral beltikelreng el mo er a rokui el chad a ngii olengchelir a rechad er a budech! Meng klou a ultutelel el ngarngii a beltikelreng sel dechadecheduch, er a buai me a de berrotel. Ak mereng a sulir tirkel ngiluu sel tekingek e ultirakl er ngii. E dirk sebeched el muut el mo ungil.

Aikal ngarngii el mekngit el cheldecheduch er a buai me a social media a mengas a rengud. A mekngit el tekoi a kengaol omeruul. A klautok a tomer er a Chedaol Reng meng mo diak el kldemed.

Me kid loltirakl er a Jesus Kristo, a kired lolchotel a rael er a budech. Sel bo doba beltikelreng, eng mo diak er a rengud oltuub er a rechad. Kede torbengii omerritel er a tang me a tang. Ng mo betik a rengud er a rokui el kakerous el chad. A beltikerreng el mora rokui el chad a klou a ututelel. A beltikerreng a dodai er a teletelel a keldios.

Mei e do luluuch er a Demad er a Babeluades me lomekeek a rengud loba dmolech el beltikelreng—tokuni mo er tirkel meringel er kid a oubeltikel reng el mo er tir—e le a dmolech el beltikelreng a sengk er a Demad er a Babeluades el mora remera el oltirakl er a Jesus Kristo. A Osobel a Prince er a Budech. Kede mo dongu er Ngii el kirel a budech.

Elechang, e kuk dosaod er a kldung. A Rubak a kmu er kid el mo mui a uldesued el di blechoel lomdasu a kldung. Ka momtab er a olisiich el bo mnguu, er a ungil luldasou sel omkilungii lobengkel a kldung. A kldung a remuul a rokui el tekoi el mo ungil! Ea kuk bitang, e momtab el ngera mo duubech sel mo dekiar a kldung me a diak lungil luldasou, mekngit luldaosu, a lechub a mengesang er kau luldasou. Ea kldung a choroidaikaikid el uldasou. A kldung a choroid a sebekreng, me a mengesensang er a uldesuem.

Rodam me a rodos, a beluulechad el di merael mo mekngit, meng kired el mukeroul el mo mesisiich el klikiid. A uldesued, omelkinged, me a omerelled a kirel diak lokor el mo klikiid, e mui er a bliochel beltikelreng er a Kristo el mo er a rokui el chad. Sel klou el techall el ngar medad a mo er sel klechad el Dios a soal kid a de bo er ngii.

Sel om blechoel el oldanges er a blil a Rubak eng kilungii a rengum el mo mui er a beltikerreng me a kldung. Maleuaisei, a temem el ngara templo a rulau el mo blekebek er a medal a Rubak. A klou el taem el ngara templo a kudmeklau el kirel sel Ongerul Lemei Osobel, Jesus Kristo. Ng diak dodengelii sel sils me a temel a le Mei. Eng di ak medengei el kmo a Rubak a oldurch er ngak el melekoi el mo mengedmokl er kid el kirel sel “ungil e kdekudel sils.”

Sel blak a rengud lolsiseb a beltikerreng me a kldung er a klengar kid, e kede mengai el mo blekebek el merael mora Dios. A kulengit mel meral ngara uldesuem me a rengum el momakes el mo mukeroul el mo blekebek er a medal a Rubak. E sel de bo er a Demad er a Babeluades el mui el blekebek, e kede mo mui er a deureng, ma klaumerang er kid er a Jesus Kristo a mo klou. Kede mo medengelii a chedaol klisiich el engelakl er sel urunguled.

Kede mereng a sulel a Rubak el kirel a mereched lureor el kirel okedecherul a templo er aikal mla mo merek el rak. Ngara eungel a Deruchellel, er chelechal sils, ea ki ouchais a teletael kirel a okedecherul a templo er a ikal bek bedengel a basio.

• Reynosa, Mexico

• Chorrillos, Peru

• Rivera, Uruguay

• Campo Grande, Brazil

• Porto, Portugal

• Uyo, Nigeria

• San Jose del Monte, Philippines

• Nouméa, New Caledonia

• Liverpool, Australia

• Caldwell, Idaho

• Flagstaff, Arizona

• Rapid City, South Dakota

• Greenville, South Carolina

• Norfolk, Virginia

• Spanish Fork, Utah

A kuuchais el kmo a Jesus Kristo, el Osobelel a Israel, a omekrael er tiang, el Ikelesia er Ngii. Ng mengedmokl er Ngii el muut el mei. Me kid a dirrek losisiu el mengedmokl er kid el mo Nguu. Aika nglunguchek el ngara ngklel a Jesus Kristo, amen.