Mengull Chedaol Tekoi

Chelsel a hong er a Exodus, e kede merael lobengkel a Moses el mo er a Rois er a Horeb el milche urerel-e milskid a tara tekoi el sebeched el rulii-el mo omes er sel kmard er a ngau el kekerel kerrekar e diak el seleseb. Me a le mermang ea, “Dios uleker ngii el er a kerensel tial kekerel kerrekar, el kmo, Moses, Moses. Meng ulnger, Ngak tiang. Me a [Dios] a dilu el kmo, … mngubet orcherem, e le kau a dechor er a chedaol el chutem.” Ng okiu a klou omengull, ngariou el reng, me a ongasireng, ea Moses a ngilubet oicherel e kudmeklii el morrenges a tekingel a Rubak e mo melchesuar sel chedaol Teletelel.

Tiaikid el chedaol silubii er tial rois, a teletael mui er a mengasireng el tekoi er a omengull, el milkrolii a Moses el mo er sel chedaol blebelel el ngii, a meral, uchul a beltel el mle mengkar a charm e ulebult el mo mesisiich el profet, meng mlo merael er a beches el rolel a klengar. Osisiu, e a dersta er kid a sebeched el ngodechii a belted el mora ngar bab el teletael er a chedaol tekoi el rulii omengull el mo chedaol telengtengil a klechad er kid.

Tial tekoi el omengull a mlengai er a tekoi er a Latin el mengull, el belkul a kmo “kede mechas a rengud.” A denguu er a ebangkelio, e a belkul a osisiu ngii me a omelchesiu malechub eng teletelel a dmolech lomengull, beltikerreng, ma omereng el saul. Tial teletael el kirel chedaol tekoi er tirkel medemdemk a rengrir e blak a rengir el kirel a Dios me a Jesus Kristo a mo nguu a mui el deureng er a rengrir.

A omengull er a chedaol tekoi a kot el ngarbab lolchotel a chedaol blekeradel; ngochotii a deleuill er kid el mo er a chedaol tekoi e olchotel a beltikelreng er kid me a cherided el mo er a Chedam er a Babeluades me a Osobeled, el Jesus Kristo. Ng dirrek el tara kot el ngarbab el teletael er a reng. Aikaikid el tekoi omtebechel a uldesued, rengud, me a klengar kid el mo er a Rubak. A mera er ngii, a omengull a diak di lolchotel a chedaol klechad; ngii a kmal—dodai el chedaol tekoi a mokdubech er a chelsel, lomak er kid el mo er a chedaol tekoi, el uai sel losischekill el cheliteklir a rengeleked “When I am rev’rent, I know in my heart Heav’nly Father and Jesus are near.”

Kid loltirakl er a Jesus Kristo, a mla mongit el mo mengeluolou er a sengk er a omengull er a klengar kid me luchul e lobok a rengud el bedul a Dios me a Ngelekel, Jesus Kristo, e dirrek el melisiich a chedaol blekerdeled. Omko ngarngii a ikaikid el domelchesiu er a rengud, eng meral mo klou a deureng er a klengar kid, e mo diak a kmal klengitelreng. Ng kired el mo melbedebek el kmo a dochotii omengull er a chedaol tekoi a meskid a moktek me a belkul a tekoi el doruul er a bek el sils e smisichid er a omereng el saul—ongasireng, omengull, me a beltikelreng er kid el mora lmuut el ngarbab e chedaol tekoi.

Mekngit el dolekoi, le kede kiei er a beluulechad el omengull el kirel a chedaol tekoi a dikea desal mesang. A mera er ngii, a beluulechad a oldeu sel lak omengull, el uaia ikel deues er a magazine, tibi, me a internet. Sel lak omengull er a chedaol tekoi eng di mo sel soal me a ungil er a rengul a chad el mo meterekakl a blekerdelel el tomelii a tal telcheroll me a remerael mei el telcheroll a mo ngara klengitelreng.

Sel lak omengull eng dirrek el sebechel ngoikid el mo cheroid er a telbiil lobengkel a Dios e choridid er a ngercheled el mo er a Rubak. Seikid, eng uaia di dosiik er sel mo ungil er kid, losiik er a soal a rengud; el sebechel ngoikid el mo er a diak el chedaol basio e mouketui chedaol tekoi, luldimukl er a Dios, me sel ngii a chedaol blebeled el ngelekel a Chedam er a Babeluades. Sel lak omengull el kirel chedaol tekoi a smisichii a klisichel a cherarou el mo melemall a roled er a chedaol ocholt, el ngii a meklou a ultutelel el kirel chedaol klengar kid er chelechal sils.

A belkul me a klou el ultutelel omengull er a chedaol tekoi a kmal bleketakl er a chelsel chedaol llechukl. A tal okesiu a ngara Doctrine and Covenants el ngii a meketteklii el kmo a omengull el mo er a Chedam er a Babeluades me a Ngelekel, er a Jesus Kristo a klou a ultutelel blekeradel er tirkel mo nguu sel kot el ngarbab el renged.

Kid el chedal a ikelesia a melasm el mengull er a Chedam me a Ngalek er sel kot el ngarbab el chedaol teletael er a bek el tekoi, luldimukl a dousunga Llecheklir. A ulekrael er a Chedaol Reng a klou a belkul telengtengil a llechekled leng kirel lolchotel a chedaol teletelel, kse er kid, me a blekerdelel a Chedam me a Ngalek. Kede kerkikl el diak doruul a tekoi el mo mengesang er sel kot el moktek er kid el kirel a Chedam er a Babeluades me a Ngelekel, el Jesus Kristo me a Osischeklir, luldimukl a beches el klekedall el dousbech, el uaia rua artificial intelligence (AI) el dolab el meluches a tekoi me a sunga.

Tial osisiu el teletael a dirrek el mo er a ngii di el ngera el dolai a tekoi me a uldasou er ngii el kirel lokiu a meral teletael er a cheldecheduch er a Ikelesia. A bek el suobel, hong, manual, me a klumech a kired el kerkikl a doruul me a kengei a ultuil er a Chedaol Reng meng sebeched el melemolme el mengeluolou er a chedaol, kldung, me a teletael er a chelsel ebangkelio er a Jesus Kristo. A dirk tilobed el klemechel mo er a rengeasek er a Ikelesia, e a Elder David A. Bednar a ulisechakl kmo, “Sel dosaod el kirel a chetituokel teletael er a chedaol tekoi me a technology, e a Ruriuk-klebesei el Santo a kirir loba ngariou el reng me a nglunguuch e (1) ousbech aikel osisechakl er a ebangkelio el sebechel lomekrael er tir er a usbechellel a artificial intelligence me a (2) melasm el mo ultuil er a chedaol Reng me a ulekrael sengk er a chedaol ocholt.”

Kemiu el rodam me a rodos er ngak, ng uaisei el kmal klebokel e meang a technology, eng di ng diak el sebechel mo uaia meang, mengasireng, e klebokel el bedengel omengull el mokdubech lokiu odbechel Chedaol Reng. Kid loltirakl er a Kristo, a kired el mo kerkikl meng diak dechitechetur a deleuill er kid lobengkel a Dios me a Ngelekel el mo ousbech er a AI el meruul a diak lungil tekoi me a sunga. Ng kired el mo melbedebek el kmo a dultuil er a beches el technology “uldesuel a chad” a diak el melemalt e diak longull e mtechir a chedaol ulekrael, kltalreng, me a sioning el di sebechel mei lokiu a klisichel Chedaol Reng. El ua Nephi el dilu el kmo: “Rubak, a kuumerang er kau, e di oumerang er kau el mo cherechar. A klaumera er ngak a diak bo lultuil er a uldesuel a chad.”

A kuk tara chedaol ocholt, e a Profet Joseph Smith a mlosisechakl kmo a templo el modechor el blil a Rubak a kirel basio er a omengull el mo er Ngii. Chelsel aikel urerel, e a profet er kid, el President Russell M. Nelson, a kmal mla omeketakl el kirel omengull er kid er a chelsel a chedaol templo. Chelsel a blil a Rubak, e kede mosisechakl el kirel a sisbelled el mo er a chedaol medal a Chedam me a Ngalek. Ak mla metik er a tara tekoi el kmal ungil osisechakl el kmo a tara kot el tekoi el doruul er ngii sel desiseb er a templo e dongedmokl er kid el kirel aikel chedaol ruoll e kede ngubet orchered e oidid er a becheleleu el bail. El uaia Moses, el sekum e ngarngii er a rengud, e kede mo mtebengar el kmo a dengubet orchered e nguchelel a sisbelled el mo er a chedaol basio e obult el mo er a ngarbab e chedaol teletael.

Rodam me a rodos, ng diak a belkul bodengasech el mora bebul a rois, el uaia Moses, el mo osiik omengull el kirel chedaol tekoi e dobult ngkung el mo oltirakl e blak a rengud. Ng sebeched el metik er ngii, el uaia, sel dolasm lomecheliu a rekelblid er a mekngit er a beluulechad. Tia sebechel mekedmokl sel meral ngarngii er a rengud e doluluuch el mora Demad er a Babeluades el ngara ngklel a Jesus Kristo e dosiik el mo ungil medengelii Osobeled lokiu a blakelreng er kid el mesuub a tekingel a Dios el ngara chelsel chedaol llechukl me a osischeklir a reprofet er kid. Osisiu, tial chedaol bult a sebechel mei sel dolasm loltirakl a telbiil el bla deruul lobengkel a Rubak el mo kiei el mengull a Llechul. Aikal teletael er a blakelreng sebechel olleklii a rengud. Sel dengai a moktek er kid el bedul aikaikid el tekoi eng meral sebechel mult a rekeblid el mo basio er a chedaol selbechakl—el basio er a klaumerang el Chedaol Reng a kiei er a chelsel, el uai sel dilubech el mo er a Moses er a lengara rois.

Ng dirrek el sebeched el melchesuar tial klou el chedaol bult sel dengara omengull er a chelsel aikel ongdibel er a Ikelesia, luldimukl sel debult a rengud el mo er a Rubak lokiu a meral ngara reng el mengitakl a chedaol chelitakl. A decheridid—el uaia a Moses—er a mengesang el tekingel a beluulechad, oumesingd a cell phone a lechub a ngii di el ngerang el osengkid er tial chedaol taem, a sebechel rullid me kede mo mui el ngara omengull er a temel a sakrament, el uldesued me a rengud a bedul Osobel me a tngakireng er Ngii lobengkel aikel kuk telbiled. Tiaikid el moktek er kid er a temel a sakrament a mekdebechii a taem el domekbeches otirekled lobengkel Oosbel el rulii Chedaol sils meng klebokel e omult a klengar kid.

E sel ngaurchei, e kede melchesuar a chedaol ngeldeched er a otirekled sel deblechoel ngara ongdibel er a blil a Rubak—el ngii a chedaol templo er kid—e dolasm el kiei loltirakl a telbiil, oumesingd sel bodechau ongarm er tial klengar.

Ngak ma bechik a mla soiseb er a chelsel a chedaol teletael er a omengull sel ki molasm loltirakl osisechakl er a klengar kemam, el ngii a mle uchul a beltam er a otireklam. Ak dobedebekii el uai ea ldirk chelii el ki murrael el mo er a olekull el mo melakl er a ongeru el ngelekam, el milechell el ngesonges a bendel meng dimlak el sobel, e a bechik a dirk ngara ospitar. Ak dobedebekak el meluluuch el mora Dios loba blak er reng me a omengull, lolengit a ngesou el mo meduch er tiaikid el meringel lomeruul. Tiaikid el taem, e ak ngiluu a bleketakl e mesisiich el tekoi er a renguk: A rokui el tekoi a di mo ungil besul er a klengar kemam a lsekum a bechik me a ngak a outekangel, lurrekodel er a deureng el mei sel doltirakl er a ebangkelio er a Jesus Kristo. Sel uaia le sal mle klou el berraod, el mesisiich el klengitelreng er seikid el taem a ulebult el mo chedaol, e kellechakl el teletael, el ngii a melitech el bad el silbecheklii a klaumera er kemam e smisiich a rengmam er a telbiil el ki bla mruul lobengkel a Rubak me a yaksok er Ngii el mei er ngak me a telungalek er ngak.

Rodam ma rodos, a omengull er a chedaol tekoi a mekdebchii a meral omereng el saul, oisisii a meral deureng, e mukrael a uldesued el kirel a chedaol ocholt, e meskid a klou el deureng er a klengar kid. Ng otab ochid er a chedaol basio e ngmai a rengud el bedul a Rubak.

A kuuchais er kemiu el kmo sel dolasm el melalm er tial blekeradel er a klengar kid er a bek el sils, eng mo sebeched el osisii a klengariou el reng er kid, oisisii a klemedengei er kid er a soal a Dios el kired, e smisichii a rengud el kirel a yaksok er a telbiil el bla deruul lobengkel a Rubak. Ak sioning el kmo sel denguu tial sengk er a omengull er a chedaol tekoi—a dengara blil a Rubak, a lechub a blil ongdibel, a lechub a rekeblid—e kede mo mui er a mengasireng sel domak el mo er sel cherrungel beltikelreng er a Demad er a Babeluades me a Jesus Kristo. A kuba omengull e sioning aika el klemerang loba chedaol ngklel a Osobeled, el Jesus Kristo, amen.