Me a Ki Mengedecheduch er a Kristo

Bochak merek er a urerek el mlora tara beluu, ea bechik er a Lesa me a ngak a mlora skosio el mocha ulebongel omerolam el ngara skoki—el klebesei a temel a skoki—el mo remei. Sera kim dechor lobengterir a rebetok el merael bedul uchei el meoud, e a ki ulmelchesiu er a sebekreng er a re momerael el simbai el sebechir el mora skoki er tir, le te dirk molecholt a passport me a visa, e mochu mes er a security.

A ki mocha ra basio el ngarngii a chad ra custom el uai ea lak a ngerang lomelchesiu el kirel tial klou el berraod me a sebekreng er a chelsel tial basio. Ng uaial mesil, el diak lomes a medad, di nguu a babier, e mesa siasing, omes a bek el llel, e mocha stamp er a passport er ngak el klou oto er ngii.

E mocha melai a babilengel a Lesa. El diak a lomelchesiu, terrob el omes a urerel, me ngulemes aikal babier loba mad el ngii a selmong, el omes a mekekerei el tekoi el ngar tial babier er medal. Aki kilbetiekl er a le keberuul stob, okisii a medal, e omes er a Lesa el lungil osengel. Ng mle klikmechur, e milkekokil stamp er a passport er a Lesa e liluut el msa ikal babilengel. A bechik a mlo klikmechur, ngmai aikal babier, e te kasmesumech.

“Tiang ngera dirk dilubech?” Ak kulleker.

A Lesa ulechotii a lilsa ngkal chad ra custom—kekerel babier el ngarngii a llecheklel a Osobel. Tia mle keberul el ruebet er a til a Lesa el mora chelsel a passport er ngii. Tiaikid a blel betik er ngii ngkal chad ra custom. Tiaikid a mle ngodechii a blekerdelel.

Grace and Truth, mla er a Simon Dewey, courtesy of altusfineart.com, © 2025, ousbech loba kengei

Tial kekerei el siasing er a Osobel a mle oldak a rengrir a reteru el ngodech el chad. Ngildechii a diak lomelchesiu el mo ngarngii ra rengul, el nguu sel klebekelel, ongasireng, me a meral Llomes er a Jesus Kristo. Seikid el sils e mla mo betok, e ak mla omdasu er sel ungil, beot el dilubech el mechas a renguk e outkeu er a klebekelel ngarngii a lengedechii sel Llomes er a Kristo er a rengelekel a Dios.

A ki oltirakl er a Jesus Kristo, me kemam a osiik el mo nguu e merous er a Llemesel. Mla medung el ngklel a Ikelesia a osisechak el “Jesus Kristo ngii ea sel oltekau el bad.” Ngokiu a rechuodel me a re kiei el profet, ea Demad er a Babeluades a mla mellach er kid el mo “Rongesii!” me a “mei er a Kristo.” A ki mengedecheduch er a Kristo, a ki outkeu er a Kristo, a ki olisechakl er a Kristo, [e] omlaoch el kirel a Kristo.

A ki olisechakl el kmo a Jesus Kristo a Ngelekel a Dios, me sera losiou er a lengara beluulechad ea Jesus a ulsisechakl a ebangkelio er Ngii e milkdebechii a Ikelesia er Ngii.

A ki ouchias er sera ulebongel er a klengar er Ngii, ea Jesus a mlo tongetengii el kirel a kngtid sera bol charm er a Sers er a Gethsemane, e mlo mekerus er a kerus, e milekiis er a kodall.

A ki outkeu er sel tngakireng er a Osobel luldersii, eng sebeched el nguu a klausubes e mekikiid e ra kengtid sel douchel. Tiang a meskid a budech me a urunguled el kutmeklii meng sebeched el lmuut el mora medal a Dios e nguu a mui el deurreng.

A ki omlaoch e le a uchul a Jesus el Milekiis er a Kodall, ea kodall a diak el ulebengelel engdi bai klou a belkul el bakes el moruchei. “Kid a mo lmuut el mekiis sel de mad. Tia belkul a kmo a dertal chad me a reng ma bedengir a lmuut elmo dmak e di ngar elmo cherechar.”

A re kiei el profet er chelechang—el melai ocholt er a Dios el mo olisechakl e omecheliu er kid—a betok el oleker er kid el mei er a Kristo. Tir e a olngeseu er kid el mo melemalt a rengud, dingad, me a medad el mui el mo er Ngii. Ng sebecham el omasech a betok el okesiu er a omelodech me a omeruul el mla medung lokiu er a First Presidency el ngii a ruul el mo uldalem er a Jesus Kristo. A ikakid a bebil:

• Sel uldasu el mo mecherei a ngakl el “Ikelesia er a Mormon” e mo mtechir er a meral ngklel, el Ikelesia er a Jesus Kristo er a Uriul-klebesei el Santo.

• Ngarngii el beches, ulekrael el kerbai lokiu a Kristo el sunga el telecherakl er a blil ongdibel.

• Rengeasek el Dil me a Aaronic Priesthood el dai er tir ma chelitakl a bedul a Jesus Kristo, el uai sel “Ngak a Oltirakl er a Jesus Kristo” me a “Momes el mora Kristo.”

• Melisiich el kirel a Tngakireng me a bedengel Okisel a Jesus Kristo el ngii a kot el klebokel er a rokui el mla mekedmokl er a reksi.

• Outkeu er a Baskua el belsechel e diak el kuk dil ulengull el sils, e melisiich el kirel a Jesus Kristo.

• Olechotel a domes er ngii el olangch er a Ikelesia er a Jesus Kristo me a sel belkul.

Ka me domes a ikel mla dubech eleng ikaikid a uchul. A kot, sel olangch er a Ikelesia.

Sera 2020, ea President Russell M. Nelson a ultebedii a beches el osongel a olengchelel a Ikelesia. Tial olangch a olechotel a klemerang el kmo a Kristo a chedul a Ikelesia er Ngii e kirel mo chedul a klengar er kid. Chelecha ke de mesa tial olangch el ngara temple recommends, website er a Ikelesia me a magazines, e medal sel Gospel Library app, me a ID tags er a re soldau el chedal a Ikelesia el ngara klsoldau. Tial olangch a uldimukl a ngklel a Ikelesia el ngarsel mesisiich el bad, el omeklatk el kmo a Jesus Kristo angarbab el mesisiich el bad, el ulecholt er tial tekingir a re chad ra Cambodia me a lmuut el dart me a okeuang ma eim el tekoi er a bebil ra beluu.

Sel belngel tial olangch a olechotel sel bedul a Bertel Thorvaldsen bleob el chaus er a Kristus, el betok el chad a medengelii el tebedechel a Ikelesia el debetik er ngii er a basio er a roldingel me a chetemel a templo er a belulechad el rokir. Sel klungel a ultutelel er a olangch er a Ikelesia a ouchais el kmo a Kristo a kirel ngii a ngara belngel a rokui el tekoi el doruul. E uaisei, el Osobel a blerk chimal melekoi el kirel sel yaksok er Ngii el mo ngoititerir a rokui el tir a mei er Ngii. Tial olangch a desang el olechotel a beltkil a rengul Osobel el Jesus Kristo me a di blechoel uleklatk er a ngar el Kristo.

Kora di mle melemlim a renguk, me ak mle oker er a betok el chedak me a resechelik el kirel a tara kot el klou a ultutelel el tebedechel tial olangch er a Ikelesia. Mechas a renguk, e le te betok a diak lodengelii sel tebedechel bechachau el meliuekl. A Jesus Kristo a dechor cheungel a arch. Tiang olechotel a mla mekiis ra kodall el Osobel el merma tuobed er a debull. Kid a meral outkeu er a mla mekiis, e ngar el Kristo, ngii me a ulsbechel sel olangch er a Ikelesia.

Chelecha e bo domdasu er a klou el belkul a Baskua. Ngar sel dirk tilobed el klumech er a First Presidency el kirel a Baskua, ke de mla nguu omelsemai el mo “outkeu er a Okisel a ngar el Osobel el mo mesuub a Osisecheklel e olengeseu el mukdubech a siukang er a Baskua er a beluad, tokuni a chelsel a telungalek er kid.” A dongedeb er ngii, e kid a mla modubech el mo oba sel ngarbab e chedaol el outkeu er a Baskua.

Ngak a soak a melemolem el ocholt el kirel a Baskua e mui el kirel a ureriu el meruul er a Baskua el chedaol e cheledaol sils. A dechelel sel ngara ongdibel er a sakrament el tal sikang sel Sandei el Baskua, ea bebil er a ungil omeruul a uldimukl a ongdibel er a ward me a stake me a omeruul sel Dui er a Sandei me a direk er sel Chedaol el Tal Sandei. Tial omelatk a uldimukl a omeruul lobengterir a rengalek me a re ngeasek e blechoel lolsiseb er a rengodech el klechelid el chad ra chelitakl. A rebebil a mla meruul er a osongel er a “Ngar el Kristo” er a rekeblirir el mora rechedad me a resechelirir e mla teloi er a betok el chedal a buai er a tekingel a Baskua.

A ikaikid el omeruul a osisiu el mor tirkel betok el chad el ngara mats er a Jerusalem el ngerir a mlo dmak el oldanges er a Osobel er sera bel siseb. A lmuut el mechas a rengud a ikel mouchais el kirel a nger er kemiu el mo er a ongit er a First Presidency el mo oldanges er a rekeblid el telungalek el oldeu er tiaikid el kot el klou a ultutelel el sils.

A kumerang el kmo a telungalek el oldanges sel Baskua a kmal mla ngoriak. Erul rak ra mla memong, e ak millekoi el kirel a telungalk er ngak er a blak a rengrir el mengedmokl el moungil sel ki mongull er a Baskua. Ak kongei, el kmo tia dirk merael a urerel. A ki blechoel el oldeu er a tokubets el belsoil er a Sandei el Baskua, saru er a Baskua, me a osiik a ngais er a Baskua, e a ki dirk meruul a ikang. Eng di, sel mo dochelir a lmuut el chedaol lomeruul el ngii a omes el bedul a Jesus Kristo me a Tngakireng er Ngii el mo er aikel ki moutkeu a mla meskemam a ungil e tabesul el omeruul el mo outkeu er tial chedaol er a rokui el tekoi.

Chelecha el rak a mong meng ongedei el kimolasem el meruul er a Baskua el omdalm er a Kristo. El di uai sel nativity er a Kurismas, ea Sils er a Baskua er a blimam a uldimukl a bail ra sibai, menguiu a chedaol llechukl er a Beches el Renged me a Babier er a Mormon, chelitakl, siasing er a Baskua, llel a lius—el telkib el cherremetai, a lsekum me ak meral louchais a klemerang. A rengelekam me a rengelekir a menguiu e melekoi er sel odanges er a Palm Sandei el “Hosanna … Ngeltengak ngikei el mei el ngara ngklel a Rubak; Hosanna el ngarbab” me a “Ngika a Jesus … er a Galilee” el diuai a “Budech el mora beluulechad, ungil chais el mora rechad” er sel temel a Kurismas.

Chelecha ea ki somam a kakerous el besiich. Sel di mla ki moruul a mle betok a usangi me a ngais er a Baskua a mla mo moded ngii me a Kristus me a siasing er a bechachau el debull, mla mekiis el Osobel el duum er a sers er a ikrel a debull me a Osobel el mle duum er a rechedal a Nephi. Aki dirrek el melasem el meruul er a Baskua el mo kemanget a temel el diak el dil ta el sils. A ki melasem el mo kadecheduch el betok, bekudasu, e outkeu er a Lius er a Sandei me a Ungil Ongeim Lurreor me a ikel chedaol lomeruul el dilubech er sel Chedaol el Tal Sandei.

A Baskua a meskid a omengull el mora odersel a tngakireng er a Jesus Kristo me a merang e mui er a deureng el Okisel er a Kodall. A rengmam a oberaod sel ki momdasu er a ringelel Osobel er a sers me a ngara Calvary, engdi a rengmam a outkeu sel kimomdasu er a bechachau el debull me a chais el mlara eanged “Ngii a mla mekiis!”

Sel dirk tilobech el melisiich a reng el tekingir a ngara First Presidency el momes “el bedul a merael mei el Baskua me a Okisel a Jesus Kristo—el kot el klebokel er a rokui el klumech el mora rechad” a olechotel a klungel tial tekoi er tiaikid el taem. Meng uai ea lengarngii a klou el omeruul er a delongelir a rebetok el mesuub el Kristiano el omes er a Okiis er a Kodall el di belkul a tekoi e olangch, kid a olterekokl er a suobel el kmo a “Okiis er a Kodall a belkul a kmo a rokui el mla kiei a mo mekiis er a kodall, e tial Okiis a mera bedenged.” “Le Adam a uchul e a rokui el chad a mo er a kodall, me a Kristo a uchul e a okiis er a kodall a mo er a rokui el chad.” A Jesus Kristo a liloched a lechetel a kodall el mora rokui el ngar el chad.

Kede meral dechor el mechas a rengud er a krasia el Jesus omeskid. Kede ngmai a Tekingel el kmo “ng diak a ngaruchei el beltik el reng el mora chad el uai tiang, el chad a choitii a klengar er ngii el mora resechelil.”

C. S. Lewis a melekoi el kmo “a molisechakl er a kle Keristiano a belkul a [denguu er a re Apostols] a mo kot el olisechakl er a Okiis er a Kodall. … A Okiis er a Kodall a klou a ututelel el dai el ngara bek el osisecheklir a re Kristiano el lechukl el ngara Omerellir. A Okiis er a Kodall, me a mo duubech el kirel, a ‘ebangkelio’ malechub a ungil chais el Kristiano a ngilai el mei.”

A kuuchais el kmo “ngarngii a okiis, … e a debull a mlo diak el bo le mesisiich, ea ringellel a kodall a mlo diak e leng Kristo a uchul.”

Sel mo meng ulebongel, e ak kuuchais el kmo a rokui el tir a nguu tial ongit er a kiei el profet me a re counselor er ngii el mo ngara rengrir el outkeu er a chedaol omeruul er a Baskua a mo metik el kmo a deleuill er tir lobengkel a Jesus Kristo a merael el mo mesisiich.

A ikal merko sesei el klebesei, e ak mlo medengei el kirel a mechas el liluut louchais er a cheldecheduch er a Baskua lobengkel a eua rekil sechal el ngelekel a ngelekel el ousbech a beot el ruul el debull, bad el melenget er a debull, Jesus, Maria, roltirakl, me a re anghel. Ngikal buik a ulemes e mle ungil lorrenges er a delal mechas louchais er a bol medakl, me a mengesimer e omok er a debull, me a dilubech er a sers er a Okiis. Ngii el buik a mlo melekl louchais er tial cheldecheduch el mora rechad ra blil er a lolukl a ikal mekekerei el klalou el di mle ngii. Oingingil tial ungil taem, e tuleker er ngii el kmo ng medengelii a uchul e ngarngii a Baskua. Ng kal buil a ulemes el morbab e ua uldesuel a ngalek a ulenger, “Le Ngii el ngar.”

Ak dochelii a klaumerang er ngak el mo er ngii—me a kau me a reanghel me a re profet, el kmo Ngii a mla mekiis e Ngii a ngar, el ngak a ouchais el ngara ngklel a Jesus Kristo, amen.