Mekreos el Klengar

Ng milemolem el kmo: “Ak mla ngmai a betok el beltikerreng me a ngeseu er a telungalek er a ward er kemam. Ng kmal mle chemaot. A bisop er [ngak] me a merredel er a Rengeasek el Dil a meral mlora bkul rebab el sebecherir lolecholt er a beltkil a rengrir me a ngelsuir. . Ak miles a teletelel a Rubak … lomekrael er ngak me a teluanglek er ngak. … Tial ward er ngak a di uai a telungalek el bek el chad a ousbech, e tokubets el mo er a ngeasek el dil ngar tial omeruul el kngar ngii.”

Ngkal dil ma telungalek er ngii ma ward er ngii, a mlo outkeu er a ngelekel tolechoi el sechal er tial merko el Ongeru el buil.

A President Russell M. Nelson a dilung, “A teletelel a merang e kiei el Ikelesia er a Rubak a blechoel keldmokl … el mo olngeseu tirkel derta el ngelekel a Dios … [lolngeseu loba ungil teletael] mo er a chimol chad, el uaisel Rirellii.”

A mesobil el dil el mocha medengei el kmong dioll, ngarngii a chetituokel er a bedengel, ngara ultok er a chedaol tekoi, rur, simbai kirel a kerekerngel, ker kirel a omesubel, tekingel a chelebechiil, me a ikel soal mo meruul a mla mo diak el tekoi, me sel taem el ngara chelsel a ringel ma rau el reng, a bai uchul meng mo meruul a ikel ngii a dimlak el lomedasu el kirel meng mo uchul a kerior me a ouuchel el reng.

Ngidil chad lorrenges el mla mo chemau er a ringel ma ouuchel el reng eleng tirrebengii a kldiull, kulengit me bo molatk er tiang: Meng locha diak el sebechem el ngodechii a mla memong el omeruul, engdi a Dios a sebechel omekungil er a mla memong el omeruul. A klausubes a sebechel morngii lokiu sel ongasireng el krasia er a melngakireng er Ngii e oba ouchel e ngariou el reng.

Teblo el tekoi a blechoel dmak el kirel a chedolel a cheroll: klengar me a omelilt. A klengar a kot el meringelchad el telengtengil sel cherrungel el uldesuel a Demad, meng okiu a Tekingel e kede mekreos e mengeluolu a klengar; e melilt el melemolem er a klengar sel blal omuchel. Ng dirrek el mekreos a rengud er a sengk er a mimokl, el melilt—olngeseu el melisiich aikel melmalt el omelilt el Dios a kongei el mo uchul a diak a ulebengelel el duereng.

A redil me a sechal sel chau a meringel el taem, e chemau a klou a belkul lomelilt, ea tekinged, me a chimad, me a rengud—el kirel chedaol tekoi, reng, me a udoud—a sebechel omekngeltengat er tir el mo melechesiu er a beltkil a rengul a Osobel me a, ua ikel President Henry B. Eyring a milekoi, a meketeklii el mera osenged lokiu a reng er a ikel “ngera te ulmedasu e miles” el mo er a “ikel ngii a dirrekak el bol sebecherir el mes.”

A President Dallin H. Oaks a dilung: “A teleteled el kirel a melecheb a diak el ultuil er a klemedengei sel klengar a omuchel. … Ng bai ultuil er a klemedengei er kid el kmo … a rokui el rengelekel a Dios er a reng a kirir el mer tial beluulechad el kirel a klou el moktek, ea olengchelel a tal chad ulemuchel er a uchei er a le bora diil e melemolem el mo cherechar.”

A tekingel a Rubak el kirir a rengalek el ngara diil, a mildung lokiu a First Presidency me a Chelechad er a Teruich me a terung el Apostol, a dirrekak a ta mel mengodech ng bai omelekl er a chelsel a betok el rak, el meketeklii el merkid era ikel Rubak a mla olengit er kid el meruul.

“A Ikelesia er a Uriul-klebesei el Santo oumerang er a chedaol klengar er a chad. A leuaisei, e a Ikelesia omtok omelecheb er a kldiull er a kuk di soal a chad a lechub eng beluu, e mengelechel er a rechedal a ikelesia el diak el kengei er ngii, diak loruul er ngii, diak el longesuseu, diak el harau el kirel, a lechub e longituuk el kirel a omelecheb.

“Ngdi a [Rubak] a kongei a bebil er a teletael … sel sekum:

• A kldiull a ulemuchel leng mloterebek me a lechub eng mlukdubech lokiu a chad ra blai, malechub

• A semmong el toktang a kongei e le klengar er a chedil a chetituokel, a lechub

• A semmong el toktang a mla metik el kmo a ngalek er a diil a kmal klou a telmellel meng diak el sebechel mo ngar a lemechell.

A First Presidency a melemolem el kmo a: “Melecheb a kot el okedeldaol el tekoi. [Ngii me a lengara ikaikid el derta el teletael] eng kmal di kirel mo okiu a ungil uldasu me a chad el mo meruul a mla nguu oterkeklel lokiu a nglunguuch” e mla mengedecheduch er a rebebil.

Okedei el rak ra mla memong, e a re profet er a Rubak ultebedii sel chais el mo er a beluulechad. Ng uldimukl a ikakid el tekoi:

“Aki … ouchais el kmo a Dios a mla kmu el kmo sel chedaol klisiich el omeob er a rengalek a kirel di mekedmokl er a delongelel a sechal me a redil, el tir a mla moterekokl el kaubuch.

“Aki ouchais el kmo sel uchul a blebelel a klengar tial beluulechad a kmal ulterekokl el chedaol. Aki smisichii el kmo a klengar a chedaol e kmal klou a belkul er sel diak a ulebengelel el uldesuel a Dios.”

Omekerreu e mengeluolu er a klengar er a tolechoi el dirk ngara diil a diak a deruchellel er a tekoi er a balatiks. Ng llach er a kldung el mloterekokl el mla er a Rubak lokiu a re profet er Ngii.

A tekingel a President J. Reuben Clark Jr., el milsiou el ngara Kotel Presidency, a klebokel omesodel el kirel chelechal taem: “A rengeasek er a Ikelesia a songerenger el kirel a tekoi er a Reng; tir a kmal sorir el mo mesuub ebangkelio, e sorir sel le melemalt, e mechellins. Ng sorir el mo medengei el kirel a … doumerang; te sorir el mo oumerang [a] klemerang. Te … chad el oker, e osiik a klemerang.” Bo de blechoel kadecheduch loba beltikerreng me a klechubechub el mora rengeasek er a re keblid, me a re derta er kid er a Relief Society me a miting er a elders quorum, el kirel a llach er a klikiid er a teletael er a deleboes, el chedaol klengar, e omekerreu er tirkel dirk ngara diil me a rederir.

A tara ungil odos a milluches el mer ngak er a blol chau er ngii er a bebil rak er a mla memong: “Sera teruich me a euid a rekik … , e ak miltik er ngak el dioll el dimlak a ngelsouil a sechelik el sachal. Ak mle merur e sabisii [engdi] dimlak a tal kumdasu el kirel a [omelecheb]. … A [ulebengkek] a telungalek er ngak me a bisop er ngak, el blek blechoel mo omes er ngii me lomekrael er ngak. … Ak mlo er a Dios el kirel a ulekrael ma ngeseu. Ak milsuub a chedaol llechukl … e miluluuch [e] miltik a klisiich lokiu a Osebelek me a ouchel reng. … Ak ngiluu a nger [er a nglunguchek] e dimlak el sebechek lomtok er ngii. … Ng meral miltirm a renguk, engdi ak mle medengei el mo mecherei a ngelekek me bol merodel. … Ak miluluuch me bol mesisiich a renguk [e] mlo melchesiu er a beltkil a rengul a Osobel kmal mle bleketakl lokiu a ouchel reng, Ak medengei el kmo a Dios … onger a nglunguuch e melisiich er kid.”

A rungil lobekel a mle rodelii ngkal tolechoi el redil e ulsisecheklii er a ebangkelio. Me chelecha eng bechiil e ngarngii a klebokel el telungalek er ngii.

A bebil er a taem, a kmal meringel e diak dodengei el teletael a sebechel sobecheklii a klengar.

Ng dirke mlei a babilengel a ngeasek lobekel el kirel a mekreos el tolechoi el longiil er ngii.

A chedam a miluches: “[Sera bechik a blel] teruich el bilel e a ki mlo medengei el kmo ngkal mengasireng el tolechoi er kemam a mo ngarngii sel genetic condition er a trisomy 21, el dodengelii el Down Syndrome. Aki ulmelchesuar el blel muri er kemam …tirkal rechad er a osbitar el mo torbengii tial kldiull. A uriul er a sesei klebesei e aki mlo medengei el kmo… ngkal ngelekam el ngara diil … a mo chemau a betok el botk er chaidirengul er a chelsel sel kot er rak ra klengar er ngii. Meng chelsel tial omeruul eng mle blak a rengmam el meluluuch lolengit a chedaol ngeseu, … aki mlo omelchesiu er a Chedaol Reng el mengelaod er kemam. Aki ngilai a ocholt me a llomes el kmo a ngelekam el redil a mekreos el ngelekel a Chedam er a Babeluades meng urungulel el soal chedal a telungalek er kemam e mei er a beluulechad.”

A delal ngkal tolechoi a miluches: “[Aki] mlo mechas a rengmam, rau a rengmam, e meral miltirm a rengmam er a kim ngai a chais. … Sera le teruich ma eual bilek, ea ki mlo medengei el kmo a ngelekam el tolechoi a mo betok a chetituokl er a rengul, el ngii a sebechel mo uchul a kodall. Aki milsterir a rebetok el toktang ma re semmong sera le teruich el mo teruich ma eai el sandei. … Ea bek el temel a osesngelam, e te uleker er kemam a lsekum somam el melemolem er tial cheroll a lechub e kim torbengii. … A Osobel a ulmekungil er a renguk e milskak a budech ma deurreng el kirel ngkal ngelekam el tolechoi el redil. … [Chedam er a Babeluades] a melemolem lolecholt er ngak el kmo Ngii a ngarngii a uldesuel el kirek [e] ngak a oumerang er Ngii.”

Te mle semeriar el nguu a ngelekir el tolechoi redil el mla mo tal sandei. Te mo dmak el mora ulebongel.

Diak el mesim el klaumerang me a ducherreng a teletelir a roltirakl er a Jesus Kristo.

Chelsel a ikal rak, e ak mesterir a resechal me a redil el blak a rengrir el lmuut el mo er sel rael er a telbiil me a priesthood me a klengeltengat er a templo ruriul er a betok el rak sera bo lak el chad er a ikelesia.

A tara dilubech el tekoi, e ak kulumtechei ra First Presidency e milngedecheduch er a chad mel boluut el nguu a preisthood ma klengetengat er a templo.

Uriul er a bol bechiil er a chedaol templo, ma uriul er a lebo er ngii a tedei el rengelekel, e ngkal chad a mlo melaok a rengul e mlo diak loruul a chedaol telbilel. A mesobil redil a mlo dioll e mlo soal mo melecheb.

Ngkal ungil redil bechil ngkal a chad a ulengit er ngkal dil me bol bechellii ngkal tolechoi e mle yaksok el mo omekeroul er ngii, sel mechell, lobengterir a rengelekel.

Ngkal mesobil el dil a mlo kongei el diak el bol torbengii tial kldiull.

Me chelecha eng mla mo teruich el rak. Ngkal ngariou a rengul odos a dengchokl er medak a betik a rengul er ngkal ngalek el sechal el uai a lengelekel e ulechais er ngak el kmo a bechil a blak a rengul mesmechokl a ikel telemall el riruul e oubeltikerreng e omekereu er ngii me a telungalek er tir. Ngkal chedam a lilangel sera longedecheduch.

Ng mekerang eng kal chetengakl el redil er a Dios a nguu a ngalek meng ngelekel el ngii a uai ea lomeklatk a ikel mekngit el omeruul el bechil a riruul? Ng mekerang e uaisei? Ele ngii a miltik a klisiich lokiu a Jesus Kristo e uluumerang er a okedeldaol el klengar, el chedaol klengar. Ngii a mle medengei el kmo ngkal ngalek el mla er a diil a ngelekel a Dios, el klikiid, e bliochel.

Rodam ma rodos er ngak, a mochu nguemd el beltikerreng el mora rengalek el dirrekak el bechell el meliuekl er a beluulechad a meral de bebikl el kirel. A Dios a mekreos a rengul kirel a klengar. Tiang a Urerel e Klebkellel el mo uchul ea Rengelekel a mo diak le mad e mo nguu a diak a ulebengelel klengar. Sel doltirakl er a Jesus Kristo, eng mekreos a rengud el kirel a klengar. “Me tia ikid e a rokui el chad a mo medengei el kmo kom oltirakl er ngak, a lsekum e kom kaubeltikelreng.” Me bo dolecholt a meklou el beltkil a rengud el mo er tirkel meral lousbech er kid. Ak kuuchais er a beltkil a renguk el mo er kemiu me a beltkil a rengul a Chedam el mo er a Rengelekel el mei er a beluulechad. El oba ngklel a Jesus Kristo, amen.