“Molekeed el Mei er Ngak”

Rodam me a rodos er a ngak, ng dmeu a renguk el obengkemiu er tial klou el ongdibel er a Ikelesia er a Jesus Kristo er a Uriul-klebesei el Santo. Tia Ikelesia er Ngii. Kede kldibel er a obliil me a blai er a bek el beluu er a beluulechad el lokiu a Ngklel.

Kede nguu a Ngklel sel bo desiseb er a Rengedel el lokiu a telbiil. Ng mekiis er a kodall e ditang el Ngelekel a Dios. Kid a di chad e kede ruebet er a klengit me a kodall. Eng di, sel beltikelreng er Ngii el mei er kid, Ngii a oleker er kid el mo kmeed er Ngii.

Aikakid a Tekingel mer kid: “Ng dilu el kmo bem keed er ngak me bo keed er kemiu; bol blak a rengmiu losiik er ngak me bo betik er ngak; molengit, me bo mngai; molengod me lobok a chesimer el kiriu.”

Bebil er a taem e ke domelchesiu el kmeed er a Osobel el Jesus Kristo. Ngdi, a bebil er a taem sel de ngara ringel er a reng, ng sebeched el omdasu el kmo kede cheroid er a Ngii e oureng el mo medengei el kmo Ngii a medengelii a ngara rengud e betik er a rengul er a derta er a kid.

A siotaikeng er a Osobel a olchotii a teletael el bo dodengei. Kede mo kmeed er a Ngii sel dolatk er a Ngii. Mosiik er Ngii el lokiu a blakelreng er a omesuub a chedaol el llechukl. Moker lokiu a meral nglunguuch el mora Demad er a Babeluades el mo kmeed er a Betik er a Rengul Ngelekel Sechal.

Ngarngii a a beot el teletael el bo domdasu el kirel. Ng sel omeruul el bom moruul er a ngii a om cheroid el kemanget el taem er a ungil sechelim. Ke mo osiik a rolel el mo mengedcheduch er a tir, ngidi el klumech el om nguu a mo klou a ututelel er a kau, ke mo rulii a kot el ngarbab el sebechem el mo olngeseu er tir.

Sel bol betok el omeruul, e ngii a mengai el mo kemanget, me a klisichel a deleuill er a beltik el reng mo smisiich, e ko mo mengai el kakeed. Alsekum a klou el taem el diak om chadcheduch me a techall el kaukledem, a deleuill a mengitechut.

Jesus Kristo a betik a Rengul er a derta er a kid. Ng uldars a techall el olkeed er a kid el mora Ngii. El uai a sechelei el oeak a beltikelreng, ke mo kutmeklii el lokiu a diosisiu el teletael, el mengedcheduch er a ngeluluuch el mora Demad er a Babeluades er a ngklel a Jesus Kristo, orenges a ungil ulekrael mlara Chedaol Reng, e omesiou er a rebebil er a kid er a deruchellel Osobel. Ko mocha medengelii sel klengeltengat er a kolekeed el mo kmeed er Ngii.

Se er ak kekerei, e ak mla oremii a deureng er a merael mo kmeed er a Osobel—me Ngii el merael me kmeed er ngak—lokiu a mekekerei lomeruul loltirakl a llach. Se er ak kekerei, ea chedaol belsoil a milkedmokl er a ongdibel er a klebesei. Ak dirk sebechek el dobedebekii a tara kesus, el bekord okeuid ma eim el rak ra mla memong, el mle milkolk e mekelekolt a iikr. Ak dobedebekak el omelchesiu er a llomes e mekekeald er a ikelesia me ak miltebengii kmo ak mle oltirakl a llach el mo kldibel ngak me a re Santo el mo melai er a chedaol belsoil, el melib a telbilek lobengkel a Chedam er a Babeluades el mo blechoel el melatk er a Ngelekel el mo oltirakl a llechul.

A ulebongel er a miting, ea ki milngitakl er a “Abide with Me; ’Tis Eventide,” me a tekoi er a chelsel el kmo “O Savior, stay this night with me.”

A ikal tekoi a rirellak el mlo imis lomelchesiu er a Chedaol Reng, ngii me a blek kekerel buik. A kulmelchesiu er a beltkil a rengul Osobel e kmeed er seikid el kesus lokiu a ongelaod er a Chedaol Reng.

Betok el rak ruriul, eng mle soak el lemuut el mo melchesiu a osisiu el beltkil a rengul Osobel el kmeed er ngak el ble kumelchesiu el mo er Ngii er seikid el ongdibel er a sacrament er se er ak ngeasek. Me ak oltirakl a tara llach: el mesuub a chedaol llechukl.

Ngar sel hong er a Lukas, e ak milenguiu er sel ongedei el sils ruriul er a le Mekerus el medakl, sera blak a rengrir el mesiou bla lemei, leng beltkil a rengrir el mora Osobel, el mo mengilt er a Bedengel. Sera le mei, e te miltik er a bad el mla metitiai el mo cheroid er a debull ea Bedengel a mle dibus.

A reteru el anghel a dilechor e uleker el kmo ngera uchul me te medakt:

“Ngera me ko mosiik er a ngar er a delongelir a re mla mad?

“Ngii a diak el ngar tiang, ng mla mekiis: ko medengei er a lolekoi er kemiu er a mngara Galilee,

“El kmo, A Ngelekel a chad a modars el mora chimorir a remekngit el chad, e mo mekerus, ea ongedei er a klebesei eng mekiis.”

Seikid el mochu kebesesengei, ea reteru el oltirakl er ngii a milrael el mlara Jerusalem el mora Emmaus, e a mla mekiis ra kodall el Rubak a mle duum er tir e milrael lobengterir.

A hong er a Lukas a ngoikid el mo merael lobengterir er sel kesus:

“Me tial, le katekoi el ua isei, ea Jesus a ulekedii er tir, e mirrael el obengterir.

“Eng di a mederir a mle urresorch meng dimlak le dengchii.

“Eng dula er tir el kmo, Ngera ikal mkatekoi er a rael, e mekngite rengmiu?

“Ea imo er tir, el ngklel a Kleopas, a okere er ngii el kmo, kau ke di tal chad el mle oldingel er a Jerusalem, el diak modengei a ikel dilubecher isei er a chelsel a ikal merekol kesai el klebesei?”

Me te ouchais er a Ngii er a kngtil a rengrir el kmo a Jesus a mla mad e tir a oumerang el Ngii a mo Osobelel a Israel.

Ng di locha mla er ngii a klengit el reng er ngika el mla mekiis el Rubak er a longedecheduch er tirkal teru el ngara klengitelreng el chedal.

Sera kulemolem el menguiu, ea ikakid el tekoi a mlei el kmeldii a renguk, el diua sera kumelchesiu er ak kekerei el buik:

“Me te kmeda er a chelsel a beluu, el mo er sel borngii: e ngii a di melemolem el merael.

“Me tulerreked er ngii, el dmu el kmo, Di mkiei el obengkemam: e ng kebesengei el mocha milkolk, e cheroid a tutau. Meng tiluchakl el obengterir.”

A Osobel a kilengei er seikid el kesus er a ongit el mo soiseb er a blirir a roltirakl er Ngii. E ulemesoill lobengterir. E ngiluu a blauang, e miluluuch, e mechedii, e ngiluu el mesterir. Ng mlengam a mederir me te dilengchii. E tiaikid e Ngii a mlo dibus er mederir.

A Lukas ouchais er kid aikel blo lomelchesiu tirkal ngeltengat el chedal: “Me te mocha chadecheduch el kmo, A rengud ng dimlak bol mekekeald, er a longedecheduch er kid er a dorael mei, e losaod chedaol llechukl el mei er kid?”

Til terung el chedal el ulerreched el lmuut el mora Jerusalem el mo ouchais er a re teruich me a tang el Apostol er a ikel dilubech. Me sera losaod a dilubech, ea Osobel a liluut el mo duum er tir.

Ng mlo dechor er a delongelir e “dmu el kmo, a Budech lekor kemiu.” Ng liluut el smaod a ulaoch el kirel a Urerel el mo tenget el kirel a kngterir a rokui el ngelekel a Chedam e mo kodekedii a lechetel a kodall.

“E dula er tir el kmo, Ng llechukl, el Kristo a kirel mo chouarm, e mo mekiis er a kodall er a ongedei el sils:

“Ea ouchel el reng me a ngbetel a klengit a kirel mo mosisechakl er a ngklel el mora rokui el beluu, lomuchel er a Jerusalem.

“E kemiu a sioning er a ikal tekoi.”

El kmal diua tirkel betik er a rengul el oltirakl er Ngii, a bek el ngelekel a Chedam er a Babeluades el mla melilt el mo soiseb er a siseball er a techolbechelid a ngar eungel a telbiil el mo sioning er a Osobel e olengeseu er a rengesool er a klengar er tir er a beluulechad. Tial telbiil a le bilketeklii el merkid el ngara Babier er a Mormon a profet Alma el betok el dart er rak ra mla memong er a Ralm er a Mormon:

“Elecha kemiu tia el somiu el mei er a chelechad er a Dios, e mokedong el chedal, e somiu el mo ngosuir a tang me a tang er a chelngelel me bol kebekakl;

“Oi, e mla kongei el mo lmangel lobenterir a re ngara klengit el reng; oi, e mengelaod er a renga klengitelreng, e mo dechor el sioning er a Dios er a rokui el taem me a rokui el tekoi,er a rokui el basio … , el dimerekmo kodall, me bol sebechem el mosobl er a Dios, … me bom nguu a diak a ulebengelel klengar.”

Mesel blak a rengum loltirakl a ikal yaksok, e ke mo metik er ngii el Rubak a urekodel a yaksok er Ngii el mo tang lobengkem er a omesiou er kau, el remuul a chelngelem el mo kebekakl. Kau a mo medengelii, el omerolel a taem e kau a mo uai Ngii e “mo cherrungel er ngii” Sel dolengeseu er a rebebil el kirel Osobel, e ke mo metik er ngii el kmo kolekeed el mo kmeed er Ngii.

Betok er kemiu a ngarngii a rebetik er a rengrir el mla touchakl er a rael diak el bedul a diak a ulebengelel klengar. Ke melchedech el kmo ngera lmuut el sebechiu el remuul el uchul ete lmuut el mei. Ng sebechiu lultuil er a Rubak el uchul e ko mo kmeed er tir sel mosiou er Ngii loba klaumerang.

Ko medengelii a yaksok er a Rubak el mora Joseph Smith me a Sidney Rigdon er a le ngara cheroid er a telungalek el meruul a Urerel: “Kemiu el sechelik er a Sidney me a Joseph, a telungalek er kemiu a ungil beserir; te ngara chereuel chimak, e ak mo meruul aikal soak el mo er tir; le ngak olab a rokui el klisiich.”

Mesel mlechet a telemall er tirkel lousbech, ea klisichel a Rubak a mo tokeklau. A Chimal a blerk lobengkem el mo olngeseu e omekngeltengat er a rengelekel a Chedam er a Babeluades.

A bek el ngara telbiil el mesiungel a Jesus Kristo a mo ngmai a ulekrael el mla er Ngii sel lomekngeltengat e losioiu er a rebebil lomtechei er Ngii. E te mo melchesuar a beltikelreng er Ngii e metik er a deureng le te mla lekeed el mor bita er Ngii.

Ngak a sioning er a Okisel er a Kodall er a Rubak el kmal di uai a blek ngarsei el lobengterir tirkel terul chedal er a blai er sel rael er a Emmaus. Ak kmedengei el kmo Ngii a ngar.

Tiaikid a klemera el Ikelesia er Ngii—tial Ikelesia er a Jesus Kristo. Kid a mo, ngar sel Sils er a Kerrekeriil, el mo dechor er medal Osobel, el chachebangel. Tia mo temel a klou el deureng el mor tirkel, ngar tial klengar, a mla lekeed el mor bitar Ngii el meruul a Urerel a sebecherir el semeriar e mad el tmuil el mo orrenges a ikal Tekingel: “Kmal lungil, kau el blak a rengum el mesiou.”

Aika kdung ngak el sioning er a mla mekiis el Osobel e Olsobel er kid, el ngara ngklel a Jesus Kristo, amen.