Odanges

A tara klou a belkul teletelel odanges a mo kldibel er a mla moterekokl el basio el debong e ngara omengull. A Rubak a kmo bom klikiid er a mekikiongel er a beluulechad, e bo er a blai er a nglunguuch e modars a uldersem er a chedaol sils er ngak. Tiang, a uaisei, el ngii a moktek er kid lomkedechor a blil a nglunguuch. Eng di, a lsekum ng kirel, ea kuk dirkak el moterekokl el basio a sebeched lousbech a lsekum eng sebeched el rulii el mo telkib el chedaol basio.

Sel kot el klou a ututelel aikel doruul sel de dak er a sils er a Rubak. Ng uaisei, kede ungil oubail aikel ngarngii er kid el bail—diak el el sal meringel chad, eng di ungil e ochotii a omengull er kid el mora Dios. Me a teleteled a dirrek el lochotii omengull me a omelengmes. Kede oldanges lokiu a nglunguch; me a chelitakl (el diak di dorrenges kede dirrek el mengitakl); e ngara odanges lokiu osisechakl me a omesuub er a ta me a tang. A Jesus a melekoi el kmo molatk el kmo tiaikid el sils er a Rubak, e ke oldars a uldersem (belkul a kmo uldersem er a temem, duch er kau me a ikel ngarngii er kau el mo mesiou er a Dios me a rebebilme a sakrament el mo er ngike el Kot el Ngarbab, e kombesar a kngtim el mo er a rodam, me a Rubak. Ng diak bo de kldibel el mo mengelaod malechub e bo longelaod er kid—el kora di orrenges a chelitakl—ng bai kired el mo melbedebek er Ngii e mo mui el mosisechakl er a ebangkelio er Ngii.

Tial dirk mlomerek el klou el ongdibel, e a Elder Patrick Kearon a ulemeklatk er kid el kmo “ng diak bo dekldibel er a Chedaol sils el kuk di ngara sakrament e lungiang. Kede mo dmak el ngara omengull. Ngarngii a klou el klekakerous er a ikal eru el tekoi. Sel mong a belkul a kmo ke ngar sei. Eng di a ngara omengull a ngara rengud el mo oldanges e oubeltikereng er a Dios el teletael el ngii a ngodechid!”

Sel dodersii odengesed er a Chedaol sils el mora Rubak me a ikel moktek er Ngii a teletael er a odanges. A bebil rak er a mla memong, seikid eng-Elder Russell M. Nelson a ulemtab: “Ng mekera de kulii a Chedaol sils? Sera kngeasek, e ak milsuub a urerir a rebebil er a rechad el tir a mla lmuches aikel tekoi el kirir el meruul me a ikel diak el kirir el meruul er a Chedaol sils. Uriul taem eak mlo medengei lokiu chedaol llechukl el kmo a tekoi el kuruul me a omerellek er a Chedaol sils a olangch er a deleuill er ngak me a Demak er a Babeluades [mesa Exodus 31:13; Ezekiel 20:12, 20]. Tiaikid el klemedengei a uchul, eng dikea kusbech a llechukl el kirek me a diak el kirek el meruul tekoi. Sel bocha kulilt er a kmo tia ngungil lomeruul er a Chedaol sils a lechub eng diak, e ak blechoel loker, ‘Ngera el olangch a soak el msa Dios?’”

A omengull er a sils er a Rubak a olengchelel sel moktek er kid el ngara tngakireng er a Jesus Kristo. Kede ngara ungil blekeradel me a deureng el kirel a Okisel er a Kodall er a temel a Baskua, eng di dirrek el bek el sandei el dolai er a chedaol belsoil lokesiul a Tngakireng er ngii, luldimukl er a Okisel er a Kodall. E tirkel ouchel a rengrir, sel lolai er a chedaol belsoil a meral mo dmolech a belkul omengull er a Chedaol sils el mo er tir.

A dedak el ngara omengull el “bedengel a Kristo” a ngarngii a tokubets el klisichel me a klungiolel sel dolisechakl, dosiou, e dosebechakl er a ta me a tang. Ng mengasireng, le dirk tilobed lomesuub a miltik el kmo tirkel kora uaia leberotel mengull a lengarngii el klengar a kekerei a techellir el mukeroul er a chedaol tekoi, a lechub el klou a ultutelel a klaumera er tir, a lechub el mesisiich otireklir er a Dios. Kid el cheldebechel er a re Santo, a melisiich er a ta me a tang lokiu odanges ma klaumerang.

Osisiu, ng diak el kired lobes aikel doruul ra bek el sils el ochotii odengesed sel dil kid ma de ngara blid. A Osobel omekltak er kid el kmo a klaumera er kau a modars lokiu a llemalt er a rokui el klebesei me a bek el taem. A tal odos a millekoi, “Ng diak a ngodech el rolel el kudesuar el kirel odanges el mo er a Dios el uai sel dongemedaol er a remekekerei el ngelekel el mei er a klengar kid e domekerreu er tir e dolisechakl er tir a moktek er Ngii el kirir.”

A Alma me a Amulek a ulisechakl er a re Zoramites el tir a mla modik er a ikel blil oengull er tir el mo ngara odanges el mo er a Dios el diak di el ta er a tal sandei, ng bai blechoel, er a ngidi el basio lengarngii. Te milsaod er a nglunguuch el oldanges:

“Ng kiriu locholt a ngara rengmiu er a elsel a kloset, berrotel basio, ma chereomel.

“Choi, esel lak omlangel el mora Rubak, bol klou a rengum, e bom blechoel meluluuch el mor ngii.”

Te dirrek el milsaod omengiuel a chedaol llechukl, ouchais er a klaumerang er tir er a Kristo, me a ngara reng er a omesiou, e melai er a Chedaol Reng, e mereng a saul er a bek el sils. Ka momdasu er tial tekoi: “bom ngara omereng el saul er a bek el sils.” Ng melutk el kirel sel ongeru tekingek:

A domelchesiu me a dochotii omereng el saul el mo er a Dios, a ngii, a rulii odengesed el mo deureng meng diak domes er ngii el kuk tara ngerachel.

A meral odanges a belkul a kmo kede oubeltikelreng er a Dios e oterkeklid er sel Ngii a soal—el kot el mekreos el sengk el dochotii. Sera loker ngii el kmo ngera sel kot el ngarbab el llach er a rokui el llach, ea Jesus a ulenger el kmo, “Bo le betik a rengum er a Rubak el Dios er kau er a rengum el rokir, ma klengar er kau el rokir, ma uldesuem el rokir.” Ng dirrek el ulmekedong er tiang el kot el ngarbab el llach.

Tia ia mle teletelel a Jesus sel oldanges er a Demad. A klengar Ngii me a tngakireng er Ngii a luldars el mora Demad. Sel dolbedebek er a meringel longtil a Jesus er sel diak a smodii me a mtebengar el ringel le blo er ngii e lolengit: “Kau el Demak, a dil sebechel, e mnguu tial ringel ngar ngak,” e sola Kilengei el kmo “eng di diak lultuil er a soak, ng bai sel soam.”

A odanges a sel dolasm el oltirakl rsel cherrungel lokesiul. Ng diak bo denguu a cherrungel klengar er a mereched el taem, eng di a bek el sils el “dolenget el mo er [Ngii] a [ouchel reng] me a [blekongesenges] el reng e,” Ngii a lmuut el tochelbid loba Reng er Ngii e mekekid er a krasia er Ngii.

Chelsel a kot el bliongel er a Doctrine and Covenantse a Rubak a milketeklii a kngtil a beluulechad:

Te mla mo er cheroid er a ikal chedaol ruoll, e mla tomall a telbilir lobengkek.

Ng diak losiik el mo mengederoder er a llemalt lokiu a Rubak, le bek el chad el di meruul aikel sorir, e mengull a sorir el chelid, el blebelel a di uldesuel a beluulechad.

Ngungil a bo dodengelii okesiul tirkel tedei el ngeasek el chad er a Jew el Hananiah, Mishael, me a Azariah, el mlengai el mo kelebus er a Babylon er a telkib el taem ruriul er a ltobed er a Jerusalem a Lehi me a telungalek er ngii. A mle ngarbab el chad er a Babylon a milngekelterir el Shadrach, Meshach, me a Abed-nego. Uriul, el tirkal tedei chad er a lekotouar el mengull er a bleob el chaus, e a King Nebuchadnezzar, a ngilteterir el mo melul er tir er a ngau, e millekoi er tir el kmo, “Ng techa ngika el Dios el mo sobecheklemiu er a chimak?”

Kom locha lotkii a nger tir:

“A Dios er kemam el ki mongull er ngii a sebechel sobecheklemam er tial mekeald el ngau, e ngii a mo otebedemam er a chimam, e king.

“Ea lak, e di bo modengei … el kmo ng diak ki mongull er a chelid er kau, a lechub e ki mongull er a bleob el chaus el kau a mla mekedecherur medemam.”

Tial ngau a kmal mle mekeald me tirkel lulbidokl er a chelsel a mlad, eng di a Shadrack, Meshach, me a Abed-nego a dimlak el mekesakl. “Me a Nebuchadnezzar a, a dula el kmo, Le modanges a Dios er a Shadrach, Meshach, me a Abed-nego, el mla … otebedeterir a remesiungel el oumera er ngii … e osobel a bedengir, me lak bo losiou a lechub e longull er a chelid, a lak el Dios er tir.” Te uluumera er a Jehovah el kmo ng mo sobechekelterir, “eng di lak,” el belkul a kmo, omko Dios lokiu a Llemesel a dimlak el tomer er a kodellir, eng di tir a melemolem el loumera er Ngii.

Ngii di el ngera el mo ruchei er a Chedam me a Ngalek a ika ea bleob el chaus. Tirkel tomer er a Dios el ngii a uchul a klemerang, a lechub e te diak lultuil er Ngii, a di tir el rulterir el uaia le chelid. A chad el mo ultuil er a kmo ngera el chelechad a lechub a moktek e nguu el mo ruchei er a chedaol ulekrael a mengull er a klsuul chelid. Uldimukl er tirkel oleko te mengull er a Dios eng di diak loltirakl a Llechul a di tir merael er sel sorir el rael: Te di oleker ngak loba ngerir eng di a rengrir a cheroid er ngak. A moktek er a omengull er kid a kirel mui el “ngara chimol meral Dios, me a Jesus Kristo, el [Ngii] a mla odureklii.”

Sel kot el ngaruchei, e a teletael er a kelngar kid a kot el klou a ultutelel, kot el bedochel teletael er a omengull. A olchotel a blakelreng er kid a belkul a kmo kede omekesiu er a Chedam me a Ngalek—el melalem a Blekerdelir me a teletelir er a klengar kid. Ea lskeum, e sel tekoi el kmo, a domekesiu er a chad a olchotel a omengesuseu, eng locha sebeched lokiu omengull el mo er a Dios e kmo, a doltirakl a blekeradel a meral teletelel a blakelreng lomengull. Ng belkul a kmo kede ngara omeruul, el blak a rengud losiik chedaol tekoi. Eng di a dorael mo uaia blekerdelel a Kristo a dirrek el di ngii el me chemolt lokiu a blekeradel er a omengull er kid. A tekingel a Elder Kearon ruchei el kirel omengull a kmo, “er sel teletael el meltid,” a ngii a klou a ultutelel. A meral omengull a omult er kid.

Tiaikid a klebekelel a rolel a telbiil—el rael er a omengull, beltikelreng, me a ultiled er a Dios. Kede soiseb er a tial rael lokiu a techolbechelid, e kongei el mo nguu a ngklel a Kristo e mo oltirakl er a Llechul. Kede nguu a sengk er a Chedaol Reng, el oderchelel a krasia er a Osobel lolsobel e mengikiid er kid er a klengit sel douchel a rengud. Ng dirrek el sebeched el kmo sel douchel a rengud e kede ngara omengull el mo er Ngii.

Tia obengkel a bebil er a chedaol ruoll me a telbiil er a priesthood el meruul er a chelsel a blil a Rubak el muut el kikidid. A teletael ma chedaol ruoll er a templo a uchelel a ngarbab el odanges.

A President Russell M. Nelson a mla smisichii el kmo “rebek el chad me a bek el redil el meruul a chedaol ruoll er a priesthood e urekodel a telbiil lobengkel a Dios a ngarngii a melemalt el rolir el mora klisichel a Dios.” Tia diak el di el klisiich el dobang el mesiou e omekngeltengat. Ng dirrek el chedaol klisiich loureor el mesmechokl e mengikiid er kid. Me sel dorael er a rolel a telbiil, e a mengikiid el klisichel a kledios a mocholt er kid.

Me kid, el uai ea recheuodel el re Nephite me a re Lamanite “de beriou el obangel ochil a Jesus, e … dongull er ngii.” Mei me kid, el uaikel blal lollach er kid a Jesus, “de beriou e doldanges er a Chedam el [ngara] ngklel a [Ngelekel].” Mei e denguu a Chedaol Reng e dengai a rengud el msa Dios, e lak a ngodech el chelid el moruchei er Ngii, mesel de oltirakl er a Jesus Kristo, e domekesiu er a blekerdelel er a klenger er kid. A kuuchias el kmo sel bo de uaisei, e kede mo medengelii sel deureng er a odanges. Loba ngklel a Jesus Kristo, amen.