Chedaol Ngesou el mo er a Rengara Beluulechad

Ngokiu a Profet Joseph Smith, e a Rubak ulecholt a betok el tekoi el kirel a klengar er kid ruchei. Seikid, e kede kiliei el ngelekel a Dios er a reng Le Dios aelmle soal a Rengelekel a le ngoriakl, meng milebii a beluulechad el mo sebeched el nguu a bedenged er a tech, e mesuub lokiu aikel mo duubech, e ngmai a chedaol blekeradel, e mocholt el kmo kede mo oltirakl a llechul a Dios. Tirkel ngosechekl a mo ngmai a klebkall el mo cherechar (Abraham 3:26).

Sel mo toketekii a cheldellel tial chedaol moktek, e a Dios a ngileltii a Di Chimo el Betik er a Rengul Ngelekel el mo Osobeled. A Lucifer, el kuk mle ngodech a uldesuel a mo torbengii sel mimokl er a chad el melilt, me ngmlo Diablong e mlodik el me riou. Meng mlodik el mei er a beluulechad e diak el ngai a klungiaol er a klengar er a chutem, e a Diablong a di sebechel melasm el mengesuseu e mengetikaik er a rechad, e omekrael er tir el mo er sel soal, tirkel betok el mo diak lorrenges er a Dios (Mesa Moses 4:4).

Sel klou a ultutelel er sel moktek er a Dios el kirel a ulekerulir a Rengelekel a mle kirir el mo chemau a ultok er a rokui el tekoi(2 Nephi 2:11). Ngosisiu el uaia klisichel a bedengel a chad el diak el sebechel mukeroul mo mesisiich a lak omtok er ngii, me a ulekerulel a chad a kirel mo chemau a ultok er a odbechel a Diablong er tial klengar er a chutem. Ea klou a ultutelel kirel a chedaol ulkeroul a sel melilt er a delongelel a ungil me a mekngit. Tirkel melilt er a ugil a ngosechekl el bedul a diak a ulebengelel lomerollir. E tirkel ngiltii a mekngit—el rokui el chad a soiseb er a kakerous longetikaik er a chutem—a mo ousbech a ngesou, el Dios a mla kudmeklii el kirir.

A ngaruchei, el kot el mesisiich el ngesou er Ngii a Osobel, el Jesus Kristo, el ngii a mo chemau a ringel e meskid a klausubes er a ouchel reng er a klengit. Tial lolchotel a chubechub me a chetengakl el Tngakireng a smodii a uchul e a klaumerang er a Rubak el Jesus Kristo a kot el osisechakl er a chelsel ebangkelio. A Tngakireng er Ngii a mesterir okiis er a kodall a re mla mad (Alma 42:23, e melngakl a klengit er a beluulechad (Alma 34:8, el smuld a rokui el klengit el douchel a rengud el kirel e msa Osobel a klisiich el mo ngosukid er a ikel chelitechetud.

Sel muut el klungiolel lengelakl er a di smuld e mousubes a kngtid, e a moktek er a oubletikelreng el Chedam me a ngalek a meskid a lmuut el betok el sengk lomecheliu er kid, luldimukl er a mesebechakl er kid meng diak dekot el ruebet er a klengit. A klengar kid er a chutem a blechoellomucheler a chedam me a chedil. E mera er ngii, tirka ngarngii el terung lolab a kakerous el sengk lomekrael er a ulekeruled. Le lak, tir eng kuk tara ultok el kired el ngosechekl er ngii.

A uldesuel a Demad er a Babeluades a meskid a bebil er a ngesou el sobecheklid er tial klengar kid er a chutem. Ak mo smaod a kleua er ngii. A kulengit me lak msal di omtab aikal kleua, el ngesou le bebil er ngii a kabekbuk. Osisiu, ng dirrek el ngarngii a lmuut el bebil er a ngesou el dechelel.

A kot, ak melekoi el kirel sel Llomes a lechub eng Reng er a Kristo. Ngar sel ungil osisecheklel el ngara hong er a Moroni, ea Moroni a melekoi a tekingel a demal el kmo “a Reng er a Kristo a mlo er a rebek el chad, me bo lodengelii a ungil me a mekngit” (Moroni 7:16). Kede menguiu er tial osisiu el osisechakl er a chelsel chedaol ocholt er chelechal taem:

Ea Reng a mesterir a rebek el chad el mei er a beluulechad a llomes; el ngii el Reng a mekelselmeterir a rechad el mei er a beluulechad, el tir orrenges er a ngerel a Reng(Doctrine and Covenants 84:46).

Lmuut: Le Reng er ngak a mlodurokl el mo er a beluulechad el mo omekellomes er a rengariou e medemdemk a rengrir e ouketiu er a re diak el chedal a Dios (Mesa Doctrine and Covenants 136:33

A President Joseph Fielding Smith a milsaod aikakid el bades: “Le Rubak a dirkak el chiteterir a rechad (sel mechell el mei er a beluulechad) el cheloit, e rrau a rengrir losiik er a llomes me a klemrang, le bek el chad … a mechell e ngarngii a llemeltel ngmai a ulekrael, me a suobel, me a osischeklel a Reng er a Kristo a lechub a Llemesel a Klemerang.”

A ongerungel ngarbab el ngesou el beskid a Rubak a ngosukid el melilt er a llemalt e betok el kabekbuk omesodel el ngara chedaol llechukl el telengtengil a uldasou el kirel a mo suobel (el uldasu er a deureng). Aikang lomekrael a llach, chedaol ruoll, me a telbiil.

A llach a meketeklii a rael el Demad er a Babeluades a mla locha olangch el kirel omerolled el mo er a diak a ulebengelel klengar. A rechad lomdasou el kmo a llach a rael el Dios oba el mengelbus a diak lodengelii a moktek er a Dios er tial uldasou er a deureng. Tial el rael, a ngoikid el mo er sel klou a belkul deleuill lobengkel Osobel e meskid a chachisois el Klisichel el ngosukid el mo er sel basio el Ngii a soal a de bo er ngii el rokui. A Demad er a Babeluades a kmal soal luut a rokui el Ngelekel el mo er a rengedel a Celestial, el Dios me a Osobeled a kiei er ngii, e bol nguu sel klengar el tirkel mo kiei er sel rengedel a celestial.

A chedaol ruoll me a telbiil a telengtengil a llach el smodii a rael el mo er a diak a ulebenglel klengar. A chedaol ruoll, me a chedaol telbiil el deruul lobengkel a Dios lokiu a ikaikid, a meklou a belkul dauch lomekrael er kid er a roled. Ng soak lomdasou el kirel a deruchellel chedaol ruoll el kmo ngolchotel a uldesuel a Dios, el ikel kot el ngarbab el klengeltengat er Ngii a mo er tirkel tir a tibir ruchei el mo oltirakl a dersta el llach e oltrikal a telbiil.

A bebil er a ngesou er a Dios el ngosukid el melilt er a llemalt a ulekrael er a Chedaol Reng A Chedaol Reng a ongedei el chedal a Kle Dios. A urerel, el ngara chedaol llechukl, a ouchais el kirel a Chedam me a Ngalek, e olisechakl er kid, e omeklatk er kid a rokui el tekoi, e omekrael er kid er a rokui el klemerang. A chedaol llechukl a uldimukl er ngii a betok el cheldecheduch el kirel a olechotel a Chedaol Reng, el uaia chedaol sioning er a ker el kirel a klemrang er a Babier er a Mormon. A olchotel a diak el kired el mecheuid er ngii me a sengk er a Chedaol Reng, el ngii a mengai ruriul er a techolbechelid.

A tara kot el klou a belkul moktek er a ngesou er a Dios el kirir a reblak a rengrir el Ngelekel a sengk er a Chedaol Reng. A klou el belkul bo dodengelii a kmo tial sengk a mera er ngii a mengai ruriul er a ouchelreng me a techolbechelid er a ralm, “e sola [chedaol llechukl a melekoi] kede mo nguu a ngbetel a klengit lokiu Chedaol Reng” (2 Nephi 31:17). A rechad el nguu tiaikid el ngbetel a klengit—e mereko belechoel lomekbeches er ngii lokiu ouchelreng er a bek el sils e kiei loltirakl a telbiil el bla el ruul lokiu chedaol ruoll er a sakrament a sebechir el nguu a yaksok el kmo a Chedaol Reng, el ngii a Reng er a Rubak, a mo blechoel lobengterir (Doctrine and Covenants 20:77).

A leuaisei, ea President Joseph F. Smithe a ulsisechakl el kmo a Chedaol reng a mo “omekellomes a uldesuir a rechad er a tekingel a Dios, e mengesuseu er tir er sel taem lobult el kmo te mla kudmeklii a soal a Chedam, meng bol kiei lobengterir el keldemir er a klengar tir, e oureor el lomekrael er tir el mo er a rokui el klemrang e omekeek a rengrir er a bek el sils er a deureng, me bol tibir el mo meruul a ungil el mo er a rokui el chad, e bol charm a mekngit e lak loruul a mekngit, e bol bekokouii el chubechub, e loutekangel el chuarm e le mui er a dmolech el beltikelreng. Tirkel rokui el mo oba tial diak a mo uai ngii el sengk, tial mekreos el ngisel a chesiuch, a melemolem losiik er a llemalt. A lak a ngesou er a Chedaol Reng,” ng millekoi a President Smith, “eng diak a chad el sebechel merael er sel melemalt e chibutek el rael.”

Ng uaisei el kmal betok a meisiich el ngesou lomekrael er kid er tial klengar er a chutem, eng mekngit a rengud el betok er kid a diak el kldmokl el mo omes er a Osobeled, el Jesus Kristo. A cheldechedechal er tirkel teruich lekebil, el mla mo betok losaod er ngii er tial klou el ongdibel, a meketeklii el kmo tirkel blal siotai er tir el mo omes er Ngii, a di mle tedobech er tir a kldmokl.

Kede rokui el medenge okesiu er a rediak el kldmokl: a re mla momerek el misionari el mla mo diak el mesisiich a ulekerulir er a chedaol tekoi leng diak el ngara ikelesia, rengeasek el mla tomelii a chedaol ulekerulir el mla mo diak el teloi er a osisechakl me a omeruul er a Ikelesia, remeklou el sechal el di omosech er a ngeiul a Melchisedek Priesthood, rsechal me a redil— lulchellir a re mle mesisiich er a uchelel a ikelesia a lechub e te ungil loungalek—el mla mo cheroid er a rolel a telbiil e diak loruul a lechub e loltirakl a telbiil er a chedaol templo.

Betok er a ikaikid el teletael a duubech sel sekum a rechedal a ikelesia a mo diak loltirakl a meklou a belkul chedaol osisechakl el uaia nglunguuch, omengiuel chedaol llechukl, me a blechoel ouchel reng. A rebebil, a kuk diak lomekbeches a telbilir el diak lolai er a chedaol belsoil er a bek el sandei. A rebebil a kmo a Ikelesia a diak lolngeseu er a ikel usbechellir; e ngmai a sorir el mo ruchei er a ikel Rubak a mla mesterir lokiu a betok el Osischeklel me a techall el dosiou er a rebebil.

A ngariou el reng e ultuil er a Rubak a ngii a choroid aikaikid el teletael. El ua ikel osisechakl el ngara Babier er a Mormon, el Rubak a omekngeltengat e mesterir a klungiaol tirkel loumera er ngii”(Helaman 12:1). A oumera er a Rubak a tokubets lusbechall er a rokui el chad el tir a ngmai a llechul a Dios me a osischeklir a reprofet er Ngii el omtok er a beches el tekoi me a llemesel a chad.

AK mla dmung a betok el ngesou el oubeltikelreng el Demad er a Babeluades a mla odars el mo ngosuterir a Rengelekel lemuut el mo er Ngii. A sel kired el meruul er ngii er tial chedaol uldasu a mo oumerang er a Dios e osiik e mousbech aikal chedaol ngesou, a kot sel Tngakireng er a Betik er a Rengul el Ngelekel, el Osobeled el Jesus Kristo. Ak meluluuch me bo dolisechakl e de kiei loltirakl a ikal osisechakl, loba ngklel a Jesus Kristo, amen.