Kedmeklel a Tal Chad le mo Omes er a Osobel

Rodam me a rodos er ngak, tial mlomerek Longeteruich me a tal buil, e a President Russell M. Nelson a ulisechakl kmo, “Chelecha eng taem el kemiu me a ngak a mongedmokl er kid el kirel Ongeru Lemei a Rubak el Osobeled, el Jesus Kristo.” A President Nelson sel losaod el kirel Ongeru Lemei Osobel, eng blechoel loba deuil a reng e olsingch el kirel. Eng di, a ngalek el redil ngara Primary a dirk dilu er ngak el kmo ng kora mo suebek a rengul sel tal renges el kirel a Ongeru Lemei Osobel. Ng millekoi, “AK medakt le mekngit lomeruul a mo duubech ruchei er a luut el mei a Jesus.”

Te diak di el ngalek a mo omelchesiu el uaisei. Me a bedochel tekoi el mo er ngika el ngalek el redil, me kemiu, me a ngak a mo oltirakl osischeklel Osobel. A osischeklel a diak el beskid a rraureng a lechub el chetiteuokel. Sel doltirakl, eng diak el kired el medakt a lechub el sebek a rengud.

Mocha er a ulebongel er a Urerel er a beluulechad, e a ker a mlo er a Jesus Kristo el kmo ng oingerang e Ngii a lmuut el mei. Ngii a ulenger, lullab osisechakl er a chelsel a kldei lokesiu, el llechukl er a Mateus 25, el kmo ng mekera bo domes er Ngii—a le ngar sel Ongeru Lemei er ngii el sils a lechub eng sel demad. A ikal osisechakl a kmal klou a ultutelel ele kedmeklel a chad el mo mesa Osobel a kmal chedul a moktek er a klengar.

A Osobel a mle kot louchais er sel lokesiu el kirir tirkel teruich el klikiid lekebil. Tial okesiu, a kirir a rteruich el klikiid lekebeil el mlo er a mur er a merengel a chebechiil. A rteim er tir el mle bekudasou a ngilai a cheluchul a olbdelir, e a rteim el mesesuau a dimlak. A leme tekoi el kmo a chad el mo bechiil a merekung, e tirkal mekebelung lekebil a tolibed el mo omechar a cheluch. Ea le mermang, e te mla mo meoud; le ng mla mechesimer a chesimer elmo er a mur.

A Jesus a dilu kldei el suobel er tial okesiu el mo ngosukid. Ngii a ulechais:

“Seikid el sils, el kmei er ngii loba klebkellek, eng mo tmaut sel okesiu el kdilii el kirir tirkel teruich el ekebil.

“Le tirkel bekudaosu el mla nguu a klemerang, emla nguu Chedaol Reng lomekrael er tir, e diak el bla el mecheblad—a bok du er tir, el kmo … te mo kiei lobengkek risei el sils.”

Ng belkul a kmo, ng dimlak el medakt a lechub el sebek a rengrir, le te mle medengei el mo suobel e mo ungil a klengar er tir. Tir a mo mesisiich.

A lsekum eng mellomes a rengud, e kede nguu a klemerang sel dekengei er a ebangkelio er a Jesus Kristo lokiu a chedaol ruoll me a telbiil er a priesthood. E sola, melasm el melemolem el klikiid me a Chedaol Reng a blechoel lobengked. Tial teletael a kirel mekedmokl er a dersta el chad, el ta er a tal taem. A blelekl, e berrotel lomeruul, er a dersta el chad a siotai er a Chedaol Reng el mo omekrael er kid.

A ongedei el tekoi el Jesus a ulemeketakl er ngii a mengeroid er kid er a cheleblad. A Osobel a ulemeklatk:

“Bom kerekikl me lak a ngera el mo chobeldemiu.

“Le te betok a mei el bleiull er a ngklek, e kmo, Ngak a Kristo; e betok a mo mecheblad er tir.”

A Osobel a mle medengei el kmo a recheblad a mo melasm el mengesuseu er tirkel ngellitel me te betok loltirakl er ngii a mo mecheblad e ruebet. Meng diak el kired loumera er tirkel oleko te olab a chedaol tekingel a Dios a lechub e dobult el mo osiik a llomes me a ulekrael er a diak el merang me a cheleblad el teletael.

A Babier er a Mormon osischeklid el kmo ng mekera bo dodengelii a klekakerous er a recheblad el mengesuseu me a re mera loltirakl. A roltirakl a blechoel loldubech er a klaumera er a Dios, e mesiou er Ngii, e meruul a ungil. Meng diak el sebeched el mecheblad sel sekum e kede osiik e oltirakl a tekingir a rechad el doumera er tir le te blak a rengrir loltirakl er a Osobel.

Ng dirrek el sebeched lodngeklii a cheleblad sel deblechoel mo er a omengull er a chelsel a tmeplo. Tia ngosukid el melemolem loba sel losenged er a diak a ulebengelel tekoi e sobecheklid er a ikel omeruul el mengesuseu a lechub eng mengeroid er kid er a rolel a telbiil.

A klou belkul suobel er tial ollachitnger er a re truich el ekebil a kmo kid a mellomes a rengud sel dekengei er a ebangkelio, e dosiik el mo olngesenges er a Chedaol Reng me lobengked, e dongeroid er kid er a cheleblad. Tirkel teim el mellomes a rengrir el ekebil a dimlak el sebechir el ngosuterir tirkel dimlak ngai a chelucherir el ekebil; ng diak a chad el kongei er a ebangkelio, e nguu a Chedaol Reng el mo omekrael er ngii e longeroid er ngii er a cheleblad el kired. Ng kirel dikid el kudmeklii el kired.

Uriul e a Osobel a kuk uluuchais er a cheldechederir a redachelbai. Chelsel tial okesiu, e a chad a milsterir a kakerous a idisel udoud, lolekoi el kmo kldachelbil, el mo er a retedei el mesiunggel. A tara mesiungel a le bilsa kleim el dachelbil, e a tang a ngilai a teblong, e a ongedei a lebilsa chimong. Cherengel a taem, e tirkel teru el kot el mesiungel a dilchel aikel lengilai. Eng di ngike el ongedei el mesiou a dileklii sel chimong lengiluu. Tirkel teru el mesiou el dilechel a lengilai, e a chad a dilu er tir el kmo, “Ngungiang, … kau el kedung e meduch a rengum el mesiungek: ng mle blak a rengum er a kesai el tekoi, me ak rullau el mo mengedereder a betok el tekoi: bem siseb er a rengedel a rubak.”

Me a chad a chileklii ngike el dileklii a kldachelbil leng mle “mekngit e mesaik.” A klddachelbil ngika el mesiou a mlengai er ngii, e dirrek el mlodik. Eng di, omko ngika el mesiou a chilsisii a kldachelbil, eng dirrek locha ngilai osisiu el nguked el uai tirkel bebil.

A tara tekoi el ngar tial okesiu a kmo a Dios a mengerchir kid el mo mengisois e ousbech aikel bla dengai eng di Ngii a diak el soal a dongaisisiu a duch er kid er a rebebil. Ka momtab er tial klemerang er a semmong el chad el ngklel a Zusya er a Anipol. A Zusya a mle klou a chisel sensei el mlo medakt er a bocha lekeed a kodelel. A rultirakl er ngii a uleker, “Mastang, ngera me ke medakt? Ke mla kiei er a ungil klengar; me a Dios a kmal mo meskau a chetengakl ngkedem.”

Ng dilu Zusya el kmo: “Omko Dios a dmu er ngak el kmo, ‘Zusya, ngera meng dimlak kuk bom tara Moses?’ Eak dmu el kmo, ‘Le kau a dimlak beskak a reng el uaia rengul a Moses.’ E omko ak dechor medal a Dios e Ngii a dmu el kmo, ‘Zusya ngera meng dimlak bom tara Solomon?’ Eak dmu el kmo, ‘Le kau el dimlak beskak a llemesel a Solomon.’ Eng di, e solae, omko kdechor medal a Ulemeob er ngak eng dmu el kmo, ‘Zusya, ngera meng dimlak bom Zusya? Ngera meng dimlak bom ngike el chad el ngak a milskau a decham el mo er ngii?’ Ah, seikid eak mo mritel er a dakt.”

Ng klemerang, el Dios a mo kesib a rengul a lsekum eng diak dultuil er sel kot el ngarbab el klungiaol, chubechub, me a krasia er a Osobel el mo smisiich aikel duch el bla dengai er a Dios. Ngokiu a ngelseuil, e Ngii a mengerchir kid el mo er sel kot el ungil klechad er kid. A lskeum kede kmo kede mo oumuchel er a klengar kid lolab a kakerous el teletael a diak el Ngii a ngara Uldesuel. E kirel losisiu el mei er kid.

A ulebongel, e a Osobel a uluuchais er sel okesiu el cheldechedechal a sib me a kaming. Sel luut er Ngii el mei lolab a Klebkellel, “ea rokui el beluu a mo kldibel er medal: e ngii a mo omii er tir, el uaia mengkar a charm lomii a sib me a kaming: e a sib a lengai el mo er a kadikm er ngii, e a kaming a mo er a katur.”

Tirkel mo er a kadikm er Ngii a mo kiei er a Rengedel, e tirkel mo er a katur Ngii a diak a Rengedel bol nguu. A klou a ultutelel tekoi a kmo te Milkelii er a lesengerenger, milsa Imelel er a lemeched a rengul, milsa bo lulderuul er ngii er a loleuaoch, Mililii er a lemeau, e uleldingel er Ngii er a lesecher a lechub el kelebus.

A rokui el chad a mlo mechas a rengrir, tirkel mla er a kadikm me a katur ngii. Me te uleker el kmo, ng oingerang e te dimlak el bsang, a Kelel, imelel, bail a lechub e lengeseuir er a le chebuul. Me ngulenger, Osobel el dilu el kmo, “Chelecha e a kmal subedemiu el kmo, Sel moruul el mo er ta er tirkal ngariou el chedak, e ko mla rulii el mei er ngak.”

A suobel el ngara tial lokesiu a bleketakl: sel dosiou er a rebebil, e kede mesiou er a Dios; e sel lak, eng mo merat a rengud. Ngii a mengerchir kid el mo ousbech a sengk, duch, me a kldachelbid el mo omekngeltengat a klengar er a rengelekel a Chedam er a Babeluades. Sel chedaol teletael loldubech er kid el mo mesiou er a rebebil a llechukl er a olachitnger lulluches er ngii a Finnish Johan Ludvig Runeberg. Ngak me a rebebil er ngak a mle blechoel lorrenges er tial olachitnger el “Farmer Paavo” er a ki mekekerei. Chelsel tial olachitnger, e a Paavo el chebuul chad er a sers el kiliei ngii me a bechil me a rengelekir er a tkul omeuachel er a chelsel a beluu er a Finland. Ng mle blechobech el telal rak, e ngoumesind er a dellemelel a miltemall, el sel toker a snow e lomaoch a ralm el me riou, a lechub a ses el eolt, a lechub eng metecheb a sers. Bek el bol temel omeridm, e a bechil ngika el rubak er a sers a mo medideklokl, .”Paavo, Paavo, kau el mekerior el chad, a Dios a mla mo ikrid.” A Paavo, blechoel diak loumondai, e kmo, “Mruul a merikengko lobengkel a budel a kerrekar el mo blauang e longa rengalek me a lak bol sengerenger. E ngak a merenguk loureor lotobed a ralm er a sers. A Dios a melasm er kid, eng di Ngii a mo meskid aikel dousbech.”

Bek el taem el metemall a dellemelir, e a Paavo a dmu er a bechil meng dochel a budel a kerrekar lobengkel a merikengko me lak el mad er a kall. E ngii e mlerengul meringel loureor, el meruul a rolel a ralm el mo tuobed er a sers a bol klou a chull me a le toker a snow e lak el tuu a ralm er a sers.

Uriul er a telal rak le meringel loureor, e a Paavo a mocha sebechel meridm a betok el rodech. Me a bechil a kuk dulang, “Paavo, Paavo, ng meral dmeu a rengud! Ng mla mo taem el dechoit aikal budel a kerrekar, e di meruul a blauang lolab a merikengko.” Eng di Paavo a mlekekokil lorkedii chimal a bechil e dilu el kmo, “Mrachem a merikengko lobengkel a budel a kerrekar, le sersir a tonari er kid a mla metecheb.” A Paavo me a telungalek er ngii a mle meringel lolngeseu er a tonari er tir el mla er a kerior me a chelebuul.

A suobel er tial okesiu el cheldecheduch er a Osobel el kirel a sib me a kaming a kmo kede mo ousbech a sengk el bla dengai—a temed, duch er kid, me a klengeltengat—el mo mesiou er a rengelekel a Chedam er a Babeluades, oumesingd tirkel chebulang me a rengesool.

Me a siotai er ngak el mo er ngike el suebek a rengul ngalek er a Primary el kullekoi er ngii er a uchelel, me a dersta er kemiu, a kmo bo moltirakl er a Jesus Kristo e multuil er a Chedaol Reng el uaia omoruul el mo er a kmal mekreos er a rengum el sechelim. Multuil er tirkel betik a rengrir er kau e betik a rengrir er a Osobel. Mosiik a ulekrael er a Dios el mo metik a kldachelbim, e olngeseu er a rebebil, tokuni sel sekum eng diak el beot lomeruul. Seikid e kau a mo kldmokl el mo omes er a Osobel, e mo obengkel a President Nelson loba selbechakl deurreng. Me sel moruul er ngii, e komo olngeseu el mengedmokl er a beluulechad el kirel Ongeru Lemei a Jesus Kristo, e mo ngeltengat er a klebech el klemedengei el kmo komo ngara ulengull me a deurreng lobengkel a Rubak, er chelechang me a ngar medad el taem.

El ua sel tara beches el chelitekled el kmo:

Loba ngklel a Jesus Kristo, amen.