Mnguu a Sengk el mla er Ngii

Merous a sengk a siukang er a buai eldi mla ngarngii er a betok el chelechad, me a beluu, me a betok el rak. A ikal rokui el taem, ea rechad a mla odars a sengk el mora derta er tir el mo melisiich a deleuill, olecholt a beltikelreng me a saul, e dmangch a meklou el miruul el tekoi el re ua merengel a chebechiil, klsel a cheroll, me a ulengull el sils. Engdi a rechad a diak el di tir el tang el blebelel a Dios a merous a sengk el mora rebebil. A bebil er a okesiu el sebeched lomasech, a penguins a dodengei el olab a mengeldoech el chidudes lomesterir tirkel sebechir el mo becherir, me a bonobos (el ta er a chimpanezee) a merous a rodech el mo omdois a resechelil.

Ngera el sengk obla modars? Ka momdasu er a taem el biltik—malechub e ke riruul—a tara kmal ungil sengk el mora chad el obetik a rengum er ngii. Ke kmal di mle medengei el tial sengk a sel kmal soal ngikal betik er a rengum el ngii a bol mekreos er ngii. Tiang mle ngeral sengk? Tiang mlora delam? sechelim? ngelekem? demam el rubak? Ngera kulmelchesiu er ngii sera obetik er tial sengk? Ng mle uangerang sel momdasu er ngikal chad el betik ra rengum el lomok er tial sengk? Osisiu, oingerang el chad a mla meskau sel kmal ungil sengk, e mle uangera er sera omnguu?

Sera bekord el euid a rekik, el kiliei lobengterir a rechad ra blik er a Arabia, ea huirum er a rengalek el ngklel a Chitty Chitty Bang Bang a tilobed. Tial huirum a mesaod er a ongasireng el mlai el sebechel di ngii lomekall er ngii, e ombibechakl er a ralm, e dirrek el suebek. Ak mle medengei el kmo ngara belumam er a England e te meruul a omotsia el mekekerel mlai el di uai ea, Chitty Chitty Bang Bang, e, meral mle soak a imo er ngii! Ng sebechem el kursii orkedellel e a osebekel tial mlai el omotsia me tuobed! A demak a mlo oureor el mora England e uleker el kmo ngera soak el klalou a lenguu sel luut el mei, me ak silbedii el kmo ngmeral soak a tara ikel mlai el Chitty Chitty Bang Bang.

Ng liluut el mei, e dimlak a mlai el kisang. Ak meral mlo mekngit a renguk e ulemdasu el kmo ng locha ulebes. Engdi, a teruich el klebesei ruriul eng mle tansiobi er ngak, ea kekerei el bliull el klalou, el kmal klebokel, e mle medechel mo er ngak. Ak meral mle semeriang, el diak el soak loureng el kmal mo imis, ak milkengii tial sengk e miltik er a mlik. Ak meral mloungil a renguk me ak di lilangel. Ak kilersii a orekedellel e a osebekel a tilobed, el meral di mle uaisel mlai el mla ra huirum. Ak meral ulureng a sulel a demak er tial mekreos el sengk. A kuluusekool er tial mlai el betok el rak e ulebang el lmuut el betok el rak. A kumdasu ea demak a mle soal lomeskak tial mlai el di uaingek el mle soak el melai er ngii.

Ng sebeched el omdasu er a odersel a sengk el olab a edei el techetechel.

1. Sel omsang a sengk, el ngikel oldars a ngiltii, rulii, e kudmeklii tial sengk e odersii el mora betik er a rengul. Tia uldimukl a ungil uldasu me a blak el reng er ngkel oldars el mo omsang a kmo ngerang el ngii a klou a belkul.

2. Sel kongeime a mekengii a sengk, el chad a nguu er ngikel loldars ra sengk, a blechoel el mechas a rengul, oba saul, me a klemeriar reng ruchei er a le beketii a lechetel me a bilel tial klakou el mo omes el kmo tiang ngera el sengk.

3. E okor ngarngii sel uai ea le kot el klou a ultutelel, sel ngeiula sengk. A ngeiul a sengk el meral ngara rengul a chad el melai er ngii a lmuut el ngarbab er a kongei e me a omoket er ngii. Ng lemuut el ngarbab, el dirrek, sel mesa ultutelel a sengk e oureng a saul el mora chad el milskau. Sel meral nguu a sengk, e kid a mo mesa ultutelel, el mei er kid e moungil lousbech er ngii er a klengar er kid, e melatk loba omereng el saul mora uldersii.

A melai er a sengk a diak de chellellakl ng bai meral ngara rengud e ungil a belkul teletael el ngii a ngaruchei er a kuk di omoket a beresent. A mo melai a moureng a saul e omdid er a sengk me a rengul a uldersii el ngii a smisichii a deleuill er a oldars me a chad el melai. Sel kumdasu er sel omotsia el mlai e ak dobedebek a betok lungil el blok chau, e rullak el muut el mo melchesuar sel dmolech el beltkil a rengul a demak me a ullekereuil el mer ngak, el mlocholt lokiu tial sengk me a lmuut el betok el bekokokuii lomeruul.

A Demad er a Babeluadesa obdois a sengk er ngii er a llomes me a klemerang el kldmokl loltengel el mei er a derta er kid, el mekreos el Ngelekel. Aika omaoch el mla er a Bekerredechel el Oldars el uai ea madedok el ngara chereomel el mla er a bekokouii a Rengul. “A rokui lungil sengk me a bek el cherrungel el sengk a mlara eanged, e mei el mlara Chedam er a llomes.” Ngara deleuill er a telbiil lobengkel a Chedam, e Ngii ea Oldars e kid oba ngariou el reng el melai.

Eng di sebeched el diak a ngera el denguu a le mlak sel ngarbab er a rokui el sengk er a Chedam, el ngii a betik er a Rengul el Sib, el Ngelekel, er a Jesus Kristo. A rokui el sengk er a Chedam a omaoch el mla er a Osobel el mlo er ngii lokiu er a kengei er Ngii er a tengetengel er a Gethsemane me a kerus, me a mlo mesisiich er a Okisel er a Kodall. A Jesus Kristo, el ngii a ubechub el Olsobel, ngii ea ngarbab el sengk el mlara Chedam er a llomes. Ngokiu er a sengk er a Ngelekel, ea Dios a mla kudmelii el mer kid a lmuut lungil rael.

Ng soak el mo melekoi el kirel a chimong el orkemel a rokui el sengk el cherechar el klemerang el ngii a olngeseu er kid el mo melai a rokui el Chedam a soal lousengk el merkid—ng klou a ultutelel sengk, er a klemedengi el sel de kengei el nguu el dmolech ra chelsel a rengud ma ikel dodengei el deureng me a ringel er a klengar, me a ikel dirkak el monger el kerid: A kmo kid a meral ngelekel a Dios. Tial klemerang a mechas a rengud er ngii! Klebokel! E tia diak el belkul a tekoi.

Ka momdasu el ketengem el rongesii tial tekoi! Kau a meral mekreos er Ngii el ngelekel el redil. Kau a meral mekreos er Ngii el ngelekel sechal. E a rael el kau a ngarngii a sel Uldesuel er a deureng. Oba sel blerk el beltkil a rengul, e Ngii a ungil medengelkau el kmo ketechang ruchei er a omei er a beluulechadngera ikel blam siseb er ngii er tial klengar er kau, e Ngii a mla tuib loak a klechubechub a bek el klukuk er kau. E, Ngii a meral loureng el tara klebesei e mluut el mo er Ngii, el mo nguu sel ngarbab el moktek er a rokui el klebokel el sengk er Ngii el, diak a ulebengelel klengar el Obengkel.

A ker a diak el iior el kmo tial sengk er a klemerang a merang ng bai kid kede mo metik er ngii e nguu. Tial sengk a mla merkid el mla er a Chedam. A cheral tial ngarbab el moktek er tial sengk a mla mekekad lokiu a Osobel. Engdi alsekum ke mla mosisechakl er ngii, e mengitakl er tial klemerang el mla mo rak ma rak, locha sel klebokel ongasireng er ngii a meketeketa er a le ngemed e kau a dikea molchesuar er a klisichel me a budech er ngii.

Alsekum tial diak el mochar el sengk er a klemedengei—me a rokui lungil, budech, me a urunguled el omaoch el mla er ngii—a cheloit, dirkak a kongei er ngii, dirkak loboket e dierkak el mengai, e tia meral klou el keriror el merkid! Ng meral klou el klengit el reng el mora ngikel Oldars! Ng mekerang e mo klungiolel a chad alsekum a sengk a mo er ngii e ngii a diak el nguu? Mesang a chad a diak loldeu er a rengul ra mlodars el morngii, ma ka lebo lungil a rengul kirel ngkel uldersii tial sengk.”

Ak kulengit er kau el mo nguu, el ketengem malechub e mluut el nguu el morbab er a ikal mlo merek , sel klebokel e ultebengall el kmo kau a meral betik er a rengul a Dios el ngelekel. Ng kirem el kodekedii a lechetel, sodelii a bilel, mekengii a blil, e ouedikel el nguu loba saul me a klengariou reng er a klemerang, e klikiid el klemedengei el kirel tial uchetemel a klemerang. A Chedaol Reng a sebechel sioning el mora rengum el kmo kau a meral ngelekel ngikel Kot el Ngarbab.

Sel om nguu tial klebokel klemerang el mera klengar er kau e mo melchesiu er a mengellakl e smiich a rengum er ngii, e a osengem er rokir a mengodech! Kau a sebechem lomelchesiu er a Beltkil a rengul, rongesii a Ngerel, e mtebengii Chimal, diak el iior er a chom chelbangel tekoi, malechub a dirkak el dubech, er a klengar er kau. Ng sebechel mongodech a teletael el momes er kau me a rebebil. A ulak el telbiil lobengkel Osobel a mengai el mo mesisiich, e okiu sel osengel tial ungil sengk, ea klengar a nguu a beches el klebekelel, me a doureng.

A kulengit, kau ng sebechem el mo meluluuch el mo medengelii el kmo ke meral mla nguu tial omult el klemedengei el mora chelsel a rengum? Kau ng sebechem el kongei a ikal sengk? Kau ke mo lmuut el mesisiich el meruul, el mimokl, e mo betok el meruul er ngii er a ikel mla memong—me sel omongedmokl er ngii e ke mo ngmai a ikel betok el sengk el mei el obengkel?

Ke locha omdasu, “Ngera kirek el ruli el mo nguu tial sengk er a Dios?” A, mera rengii, a diak a ngerang. Tiang a sengk er ngikel Oldars. Tia meral tekoi. Di becherei mel siseb. Kau a Ngelekel. Ngii a betik a rengul er kau. Lak moruul er ngii el mo chetituokel. Lak molenget er a ngeiul tial sengk loba uldasu el kmo kau a locha diak el kirem el nguu. A mera rengii e ng diak a ta er kid el kmal “kirel ngmai”—a rokui el sengk er a Chedam a bol ngai el kmal di okiu a omerellel, klechubechub, me a krasia er a Chedaol Messias,engdi Ngii a meral soal a derta er a Rengelekel a bol ngai! Uaisel, mesel beches e mla mukbeches el klemedengei bo molchesuar, e moutkeu loureng a sulel a Uldersii tial sengk.

Me sera knguu a klaumera er ngak sera lengara-20 a rekik, e ak mla mekar el medengei el kmo ak meral ngelekel a Dios. Sel kudengei loba tial sengk, e ng meral mo ungil di ngak el medengelkak el cherrungel a beltikelreng el mer ngak. A bebil er a tekoi el mla ngosukak el mukeroul el moungil medengei a ikakid el tekoi er a chedaol llechukl, klengeltengat er a patriarchal, mengull el ngara templo, mesiou er a rebebil, mereng a saul, me a chedaol nglunguuch el mora Demak. Ak mechas a renguk er a ikel klengit el reng, ringel er a klengar er ngak ra uchelel el mla mesemechokl, mla moungil, ea betok er ngii a bok mesisiich er ngii omko me ak mle medengelii tial klebokel el klemerang.

A Moroni a orrimel er kid el kmo “lak moltngakl a sengk er a Dios,” e bai “mei er a Kristo, e moreked a rokui lungil sengk.” Kau a sebechem el mei er a Kristo loba kloulreng er a ungil betikelreng er Ngii e ngmai a rokui el sengk er Ngii er a deureng, budech, ongiil, llomes, klemerang, ocholt, klemedengei, me a llomeselreng—el bdelum a bedul bab, chimal el blerk, chimam el blok, el kldmokl el mo melai. Kau a sebechem el ngmai aikal sengk le kau el selbechakl e oba klemedengei el kmo kau a betik ra rengul a Dios el ngelekel redil, kau a mekreos el ngelekel a Dios el sechal, e ngii a mla ousengk el merkau a cherrungel e chedaol el Ngelekel el mo olsobel er kau, mesebechakl er kau, e mengikiid er kau.

Kau a ngelekel a Dios. Tia diak el kuk di lungil chelitakl el dongitakl er ngii. Kau ng sebechem el kongei, mekengii, e mnguu tial sengk el mla er Ngii? Kau ng sebechem lurrekodel er ngii el mekreos el klalou le ngii el mekreos? Mluut el nguu tial sengk, malechub el meral ketengem el nguu, e becherei mel ngodech a bek el teletelel a klengar er kau. Tia sel ngaruchei el teletael el Dios a mla kudmokl el kirem lokiu a sengk er a Ngelekel. Kau a ngartiang meng mo sebechem el nguu a deureng! Loba ngklel a Jesus Kristo, amen.