Kmal di Ngar Medad

Rodam me a rodos, ak mereng a saul el kteloi er kemiu. Ng betik a rengmam er kemiu, e mereng a suliu, e mal mukngeltengat er a nglunguchiu.

President Russell M. Nelson a dilu er sera de keldibel: “Ko mes aikal di ngar medad el tekoi? Nglunguchek meng diak el mochib er kid tial tokubets el taem! A Rubak a meral lorreched er a Urerel.”

Orreched er a Urerel. “Orreched” a tekoi el ngarngii a ututelel. Ng belkul a kmo orreched, orretii, lorchedii. A ulekerulel a Ikelesia me a moktek er a Kristo, e kede mesa rechedel a ureor. E kid rokui a uldimukl er ngii.

Sera April 1834 er a Kirtland, Ohio, e a Profet Joseph Smith a milngideb er tirkel rokui luleba priesthood er a chelsel a blai er a omesuub el locha teruich me a eua el sak (4.3 m) a klungel. Ng locha sebeched locha kmal betok er a ikel skuul er a omesuub er a chelsel tial Basio er a Ongdibel, e dirk ngarngii a medechel basio. A Joseph Smith a millekoi el kmo, “Kom di mekesai loba priesthood el ngar tia er chelechal kesus, eng di tial ikelesia a mo mekelkelii a Diluches me a Dims er a Merikel e mo mekelkelii a beluulechad.”

Tial ulaoch a mla me “chemolt er medad.” A Ikelesia er a Jesus Kristo er a Uriul-klebesei el Santo a merael mo obdois a rechedal me a telungalek er ngii, mision me a remisionari, blai er a ongdibel me a templo, me a rengara seminari, institute, me a daingak el meliuekl er a beluulechad rokir.

Kede mereng a saul el ngara beluulechad el Ikelesia a di meleketek a iidisel me a teletelel, eng di a klou a ultutelel a rengrir me a klengar er a rechedal. Kid a lodengelkid el oltirakl er a Jesus Kristo. Kede kauchais a klaumera er kid er Ngii, me a Ikelesia er Ngii, Rolel, me a sel Rolel er a telbiil. Kid a Chedal, e Ngii a Osebeled.

Ng mechas a renguk er a tekingel a President Nelson el kmo “ng meang el taem” e chotii a meisiich lomereng el saul el mo er a Rubak er a Urerel. Ak mengelechel er kid el mo mesisiich loltirakl er Ngii, e sioning er a mla tmaut lulaoch, er a ngara mong me a chelechang.

Ng betok a roltuub el melekoi el kmo, mei er tiei e bo er tilechangel di ua ikel luruul er a taem er a Profet Joseph Smith. Eng di, uriul e tirkaikid loltuub a kmal kekerei a relii er tial chetengakl ureor. Molatk aikel tekingel a Joseph Smith: Ng diak a diak el chedaol el chim el mo torbengii a berekel tial ureor; klautok a morngii , … eng di a klemerang er a Dios a di melemolem el merael el mesisiich, e chetengakl, e mimokl, di merekmo bol siseb er a bek el meklou el beluu, oldingel a bek el cheltel a beluu, merius a bek el basio, e oderngesall el mo er a bek el ding el di merekmo a moktek er a Dios a mo mekedmokl, ea Ngarbab el Jehovah a mo dmu el uasei a ureor a mla mo merek.

Tial urerek er chelechal rak, eak mal ungil mesa Rubak “el orreched er a Urerel.” A Ikelesia orreched lomkedchor a templo, e mesterir a techall a rebetok el chedal a Ikelesia el mo ngara ongdibel er a elsel a blil a Rubak. Ongerung, a ureor er a misionari a mengideb er a rechad el mei obengkel a Ungil Mengkar a Sib, el Jesus Kristo. Ea ongedei, a skulel a Ikelesia er a betok el beluu a ngarbab osischeklel el mo er tirkel “losiik er ngika el Jesus.”

Chelechal sils ea Ikelesia a ngarngii a 367 el templo el ngara kakerous el teletelel, a omkedecherul, me a urerel. El ngera moktek er ngii? A nger a ulecholt er a bek el templo: “Chedaol le bo er a Rubak.” A templo a mekengii a rael el mora ikel kot el ngarbab el klengeltengat el Demad er a Babeluades a msa tang me a tang er kid. Rodam me a rodos, kede orchedii a chedaol klengar kid sel de kiei el klikiid, e dengara ongdibel er a blil a Rubak, e doruul chedaol telbiil lobengkel a Dios el kired me tirkel beldeked el ngar sel kuk tara beluu.

A President Nelson a mla kmul kmo: “A odelcheklel a cherarou a kmal di meleketek, e mesisiich el betok a rolel. Meng kmal klou a ultutelel el domais el mo er a templo er chelechal taem. A kulengit er kemiu me bo momes a teleteliu a mousbech a temiu.” Ngara chelsel a Blil e kede melchesuar a chedaol teletelel a Rubak lobengkel a budech.

Tial mlo merek el rak eng mlarngii a techellek el mo er sel oterkeklel a Mendoza Argentina Templo. Sel klemechek, eak dilii a lulemlaoch er ngii a Elder Melvin J. Ballard er a 1926 el kmo a urerel a Rubak a mo mekekokil mukeroul er a South America, el “di uaia oak el kerrekar el mekekokil mukeroul er a acorn. Ng diak di le kiul meteketek,” eng di te betok el telael chad amo chedal a Ikelesia e a beluu er a South America a mo “klisichel a Ikelesia. ” Ak milsa tial ulaoch el touta er me medak.

A Mendoza, el mle kesai a rechedal a Ikelesia er ngii, a mla mo obdois a rechedal er chelechang. Tial ulekerulel a ikelesia a mla mekelkelii a bek el beluu me a iuns.

Kede mesa Rubak loreched er a Urerel er a bek el mision. Sera 2024, eng 80,000 el misionari a ngara 450 el mision. Okedei me a kllolem er ngii a beches el mision. Tial mlo merek el rak e a ureor er a misionari a mlo uchul e a 308,000 el chad a mlo beches el chedal a Ikelesia. E sel ngaruchei, e sel reng er a omengideb a melai er a rechad el mo er a Jesus Kristo me a ebangkelio er Ngii.

Ak melatk er a Apostol Brigham Young me a Heber C. Kimball, er sera 1839 e te tilobed el mo misionari el mo er a British Isles. Te mle smecher; te chilteterir a re mle smecher e chebuul el telungalek er tir. Eng di, tirkal terung a ngilasech er a kareta, e ulemes er a rebetik er a rengrir, e a Heber a dilu el kmo, “Bo de dechor e dolisiich a rengrir.” Tir el terung el millisiich a rengrir e mlo dechor e oldiu el kmo, “Hurrah, hurrah el kirel Israel.”

Ak milsa osisiu el klemeriar reng el kirel a urerel a Rubak er a beluu er a Lima, Peru, er a bo kebetech ngak me a remisionari er sel missionary training center me a ikel mision el ngara Lima. Ng klebokel el ues! Ak milsa olchotel a rechedel tial ureor er medak. Chelechal taem e ngarngii a kleuid el mision er a beluu er a Lima.

Uriul er a miting er kemam, e a remisionari a mla er ngii a tokubets el tekingir el mei er ngak. Te milkiis el mo dechor e oldiu el kmo, “Hurrah el mo er a Israel.” Ng meral diak kubes er tial taem; a kuureng ulekum me kemiu el rokui me ko mla risei. A mla er medak a mle remisionari el tir a mla meche “tekingel a beluulechad” e mo mesiou er a Rubak e olngeseu lorreched er a Urerel sel lemei.

Kede mesa Rubak lorreched er a teletael er a omesuub me a skuul el mo er a rechedal a ikelesia luldimukl er a rediak el chedal a ikelesia el meliuekl er a beluulechad el rokir. A tara tekoi el ngodechid kid el chedal a Ikelesia a sel melisiich a tekoi er a skuul. A Rubak a millekoi er a uchelel a Oluut el kmo mosiik omesuub e mosuub lobengkel a klaumerang Tia desa lultaut er chelechal taem e sebeched el kmo “hurrah” el kriel.

Chelechal taem eng betok er a 800,000 el ngalek er a skuul a ngara seminari me a institute, el kot el ngarbab el iildois er a chelsel a reksi er a Ikelesia. A rengeasek el ngeleked a mo kldibel er a kakerous el teletael, lomkokl a le tutau, a le llomes me a klebesei el melai a klas el online me a rengara rekeblirir. Te meral mesisiich e melemalt el cheldebechel, el melisiich er a ta me a tang sel losuub el kirel a Jesus Kristo, e loltirakl, e louchais el Kirel el kmo Ngelekel a Dios.

Tial mlomerek el rak e ak milngedecheduch er a rebetok el ngalek er a seminari me a institute me a rechad er a blirir er a University er a Utah. A idisir a rechad a ulechotii sel klemeriar reng er tir el mo medengelii e oltirakl er a Jesus Kristo. A tekingek el mor tir el ngalek er a skuul a mle bleketakl: Bsa Rubak a cherrungel temem. Ak millekoi er tir el mo sumechokl omesubir lobengkel a meral ngarbab lomesuub, el ngii omesuub el kirel a “Ngelekel a ngar el Dios.”

A kulengit er a osisiu el tekoi er a rebek el chad er chelechal sils: Ngii di el ngera el kirem el meruul, e bsa, osisiu klungel a taem, ng diak el ikel ungil temem, el mo er a Rubak er a omesubel chedaol llechukl, omesuub er a telungalek Come, Follow Me, nglunguuch, ngerchelem er a Ikelesia, oldingel, melai er a sakrament, omengull er a templo, e melbedebek a tekingel a Dios. A Rubak e Osebeled a mla kmu, “Mosuub el kirek … e komo medengelii ulengull.” Mnguu a Tekingel. E bsang a ungil cherrungel temem.

A President Nelson a mla kmu: “A kulengit er kemiu me a Dios bo lomtebechel a klengar kemiu. Bsa Rubak a klebech a iidisel temem. Sel bom uaisei, e momtab el kmo ngera duubech er a ungil blakereng er a chedaol klechad er kau.”

Kede mesa rechedel er a seminary, insitutute, me a skulel a Ikelesia. Chelsel aika el basio, e a Rubak a kot el ngaruchei. E dirrek el kirel Kot er a klengar kid.

A dirrek el tara basio lolchotel a di meleketek el teletael er a omesuub er a Ikelesia a BYU–Pathway. Beluulechad el rokir, e a rengara tial skuul a mla chengelakl er a 75,000 e di meleketek a iildois. Betok a rechedal a Ikelesia, e betok er a edei el itiud a ngara Africa. A Pathway a kirel a techall er a tekoi er a skuul. Sel urirul er a omesuub eng sebechem el metik er a urerem, e sel borngii a urerem eng klengar kau el mo ungil lobengkel a lmuut el techall el mo mesiou er a Rubak.

Sera bo kebetech ngak me a roungerachel a stake er a Uganda, e ak mlo medengei el kmo tirkal rokui el ngara omerredel er a stake a ngara BYU-Pathway. Sel demui el kldmokl er a reng me a tech, eng klou a techelled el choridid er a chelbeldil a cherarou. Molatk a tekingel a Petrus: “A diablong, el ua ngerel a raihong, a mererorael, losiik er a sebechel kolii.”

Ak mtebengar el kmo tial ungil chais er a ebangkelio, ete ngarngii tirkel kurusii, el chetituokel a klaumera er tir, rraureng, me a ker el uaia lak a nger ngii. Rodam me a rodos, a Jesus Kristo a nger. Momuchel Lobengkel. Momtab er a Chimal er a klengar kau. Morrenges er Ngii. “Lak louedikel a rengum,” Ngii a millekoi er a ikel ulebongel sikang er Ngii el mo er a rultirakl er Ngii ruchei er a Gethsemane, ruchei er a longol er a kerus er Ngii e lorael er a rael er a Jerusalem, ruchei er a Kolkata, el Ngii a mlo rokir a tngakireng er Ngii—el di mle Ngii, el Chimol Ngelekel a Dios, a sebechel rulii.

Bo modengei el kmo Ngii a medengei. Ngii a ngilai a rokui el kngtid, telitur kid, kngtil a rengud, me a ikel mekngit el sils er kid me deluut el mo ngar lobengkel a Demad er a Babeluades el mo cherechar. Ng dilu, momes er ngak er a bek luldasou; lak moumededenger, lak ko medakt. A klaumera er a Jesus Kristo a sebechel tikeuaou el mo er a babe omekungil er a telemall el rengum. Multuil er Ngii e kau a mo orchedii a luut er kau el mo er a “chimal a beltik el reng er Ngii.”

A klmuut el meklii a tekingel a ngar el profet er kid: “Ko mesa el kmo ngera mla duubecher medad? Nglunguchek meng diak de mochib er tial tokubets el taem! A Rubak a meral lorreched er a Urerel.” Mei me kid loltirakl bo doldiu el kmo, “Hurrah el kirel Israel” sel dongedmokl el kirel a luut er a Rubak e Osobel. Loba ngklel a Jesus Kristo, amen.