“Ngokiu Tiaikid ea Rokui a Momedengei el kmo Kemiu a Oltirakl er Ngak”
A beltikelreng er kid el mora Dios me a Rengelekel a mesisiich el sioning el mora beluulechad el kmo tia meral Ikelesia er a Osobel.
Betok er rak ra memong e ngak me a Harriet a milrael lokiu a diluches er a Germany. Uchei er a Baskua e kemam a uleker er a ungil sechelimam, el diak el chedal a Ikelesia, el mo obengkemam el ngara ongdibel er a Sandei. Ng betik a rengmam er ngikal sechelimam, meng beot er kemam el ouchais er ngii a ki momelchesiu el kirel Osobel me a Ikeleisa er Ngii e oleker er ngii el mei e omes! Ng kilengei er a ongtmam e ulebengkemang el mora miting er a iklelesia el mle kmeed er kemam.
Alsekum ngarngii a tal mnguu a sechelim el mora ikelesia er a kot el taem, eng locha sebechem el medengelii a kumelchesiu er ngii er seikeid ra tutau er a Sandei. Ng mle soak a rokui a bol kot er a ungil. A sechelimam a mlar bab a skulel, e mesisiich el chedal a chelid. Ak meral uluureng el kmo tial ondgibel er a branch a mo ungil er a osengel ng kal redil e ungil olechotel a Ikelesia.
Tial branch a mle meleng er a ocheraol basio er a ongerul chelibl er a bebul a stouang. Sel dorael mong, eng kired lokiu a terebel er a rebai er tial blai, el imiu er a mesisiich a bul klako el medechel ra soko.
Sera lomuchel ongdibel, e a kulumdasu er a sechelik el soiseb er tial ketengel lomeruul, e ak miles a bebil ra tekeoi el rullak el mo telkid el merur. A chelitakl, tia di okesiu, a dimlak leua Tabernacle Choir. A odikel, e secherodech el ngalek a derengesterir ra le ngarngii chedaol belsoil. A remlo mengedecheduch e mlora ikel sebechir, eng di dimalk el chad er a omengedecheduch el buai. Ak dilengchokl el diak lungil a renguk er tial rokir el miting, e ulureng me bo lungil a Sandei Skuul.
Ng dimlak.
Tial rokir el tutau e ak mle simbai el kmo ngera ngomdasu ngkal sechelimam er tiak ikelesia el bla ki mnguu el mong.
A uriul, ea ki ulemekall el mo remei, ak mlo chemau a sechelimam. Mle soak el kmo tia kuk di tara imol branch el diak el lomtechei er a rokir el Ikelesia. Engdi uchei er a kdelii a imol tekoi, eng millokoi.
“Tia meral mle klebokel,” ng millekoi.
Ng mlo diak a tekoi er a ngerek.
Ng millemolem, “ak meral mlo mechas a renguk er a rechedemiu er a blekerdelir el mora tang er a ikelesia er kemiu. Te ual kakerous a le mla re ngii el mei, eng di ngullecholt el tir a meral kaubeltikelreng el mora tang. Tiakid a uai ea kumdasu er ngii el Kristo a soal a Ikelesia er Ngii a le uaisei.
Meng, ak di mle mereched el mouchel el kirel a mekngit luldesuek. Ng mle soak a meral ungil miting el mo ousulecholt er ngii ra sechelik. Engdi sel bla lekedmeklii a rechedal tial branch a mle ungil-cherrungel el reng er a beltikelreng, blekokouii, kllou el reng, me a klechubechub.
Me a Klaumerang Bol Mesisiich er tial Beluulechad
Rodam me a Rodos, resechelik, ak betik a renguk er a Ikeleisa er a Jesus Kristo er a Uiul-klebesei el Santo. Tiag sel Ikelesia er a Osobel el merang e ngar el Ikelesia, lolisechakl a mla moluut el cherrungel ebangkelio er a Jesus Kristo. A ngerachel me a klisichel er a priesthood a kiei er tiang. Jesus Krist a omekrael er tial Ikelesia, lokiu a remesiungel el Ngii a mla omekedong er tir, e okiu a ngara el profet, el President Russell M. Nelson. A Osobel a mla msterir a Ruriul-klebesei el Santo a ngodech el moktek el ngii a mo mengedibel er a re ngelekel a Dios e mengedmokl er a beluulechad el kirel sel Ongerul Lemei a Osobel. Ak sioning el kmo aika el rokui a klemerang.
Eng di tia kot el klou a ultutelel el bo dolatk er ngii le betok el chad sel ketengir el mera Ikelesia er a Jesus Kristo, eng diak lomdasu a reua ngerachel er a priesthood malechub a chedaol ruoll malechub a mengedibel er a Israel. Aikel bol ues, el ngarbab ra rokui, a sel lomelchesiu er ngii sel lobengked me a blekerdeled el mora tang.
“Bom kaubeltikelreng” a Jesus a millekoi. “Ngokiu tiang ea rechad a momedengei el kmo kemiu oltirakl er Ngak.” Ng blechoel, el sel kot el klaumerang era Jesus Kristo a morngii sel bo lomelchesiu a beltikelreng er a delongelir a reoltirkal er a Jesus Kristo.
A Osobel a uluchais el kmo Ngii a mla olutii a Ikelesia er Ngii me a klaumerang … bol klou er a beluulechad. Ma le uaisei, ea rechad sel le mei er a ongdibel er a Ikelesia, ea Osobel a soal tir a lorael loba lmuut el mesisiich el klaumerang er Ngii! A beltikelreng el re sechelid a melchesiu el ngarkid a mo ngoititerir al mo kmeed er a Jesus Kristo! Tiaikid a chimol moktek er kid sel bek el taem el bo dekldibel.
Ngii di el chad el osiik er a klou el klaumerang er a Kristo ma lechub e lolekeed el mo er a Chedam er a Babeluades a kirel lomelchesiu el ngara blil sel ngara Ikeleisa er a Jesus Kristo er a Uriul-klebesei el Santo. A siotai er tir el mera ongdibel a sebechel di ua sel bek el doleker er tir el mei ra blid.
Ungil me a Merang
Chelechang, ak medengei el kmo ak mesaod er sel ngii a ungil. E ngartial klengar, eng diak de sal monguu sel ungil. El mol muut er sel “cherrungel el sils” eng blechoel el di ngarngii a teleu er a delongelel a ungil me a merang. Me ngera, sebeched el rulii sel Ikelesia a diakdomelchesiu el ual cherrungel el sils? Meng, kol ngera uchul, ea ward er kemam a dirkak bol sebechel lomekeroul er a cherrungel el klaumerang me a beltikelreng? Malechub e ke domelchesiu el diak dulsiseb er ngii?
E a tara tekoi el kired el rulii a diak de chitii sel ngii a ungil!
Sel dai er a Babier er a Mormon a uldimukl tial klou a belkul el uleklatk: “A lengarngi a cheleuid,” ng mekeloi, “eng cheleuid er a rechad; maleuaisei, e lak moltuub a tekingel a Dios.”
Ng sebechel a hong—a lechub a ikelesia a lechub a chad—lolab a“chelitechut” me a “cheleuid” e dirk urerel a Dios?
A nger a omeleklel a choi! choi!
Me sel, durrekodel er kid el ngar sel ngarbab el telkelel a Rubak, e ke dirrek el mo klou a rengud er a kuk tang. Kid a derta el ureor el merael, me kid a rokui el ultuil er a Osobel el kirel a ngeseched el de kuldmeklii. Tia klemerang el mei er a derta er kid, e dirrek el merang el mora rengedel a Dios er tial beluulechad.
A Rubak a oleker er kid el diak di bo de teloi er a Rengedel ke debai kirrek el blak a rengud loureor elmeleketek er ngii. A uldesuel a Dios a rechad el tir “obang a kltalreng me a imol uldasu.” Sel bo doba imolreng, eng kirel loba bliochelreng, e tia ousbech a klou el ngedechel a reng..
Engdi tia diak el belkul a kmo ak ngodechii a renguk el mo mengaisisiu er a rengum. Malechub em ngedechii a rengum el mo mengaisisiu er ngak. Tia belkul a kmo kid a mo ngmodech a rengud el mo mengaisisiu er a Osobel.
A lsekum eng dirkak de bor tiaikid, e bo molatk: el kmo ngultui er a ngesou er a Rubak, eng diak a diak el sebechel.
Ulsiseb e Ulecherangel
Malsekum eng diak omelchesiu el ulsiseb, e kulengit el kmo kau a diak el dil kau el tang. Kid ng diak de bla de tal mla soiseb ra teletael el domelchesiu el ngodech el chad el ngara chelesl a basio? Ak mla soiseb er tial teletael el mla mo betok ra tang. Seral teruich me a tang a rekik, ea telungalk er ngak a mlodik el tuobed er a blimam el mora ngodech e diak kudengelii el beluu. A rokui el tekoi a mle ngodech er a ikel bleksau er ngii. Me sel kungedecheduch a mileketeklii el mora rebebil er a rengalek el kmo ngak a mle ngodech er a ikel tir a mle smau. Sel taem el ble kulis lousbech ra sechelei e uldimukl, ak mle omelchesiu el sabisi e ngara ngodech el basio.
Ngar tial beluulechad, ea betok el klekakerous a de ues—el klekakerous lousbech el mengaisisiu er a tang—e di meruul lokiu a tekingel a beluulehcad: teletelel a bedenged, beluad, tekinged, doubail, siukang, me a lmuut el bebil. Engdi “a Dios a diak lomes a tekoi el uai ea rechad. A rechad a omes er a ikrel a bedenged, endi a Dios a omes er a reng.”
Sel denguu er a Osengel, eng di imol teklo a mei el ngaruchei er a rokui: ngelekel a Dios. E kid a rokui el ulsiseb e dmak el ngar ngii.
Ng diak lokor el soas lobengterir a rechad el tir a omes, mengedecheduch, meruul, e omdasu el uaikid. Ngar ngii a basio el kirel tiang.
Eng di a chelsel a Ikelesia er a Osobel, e kid a mengedibel er a rokui el ngelekel a Dios el tir a sorir el mo chelludel e osiik er a klemerang. Ng diak losengel a bedenged, osenged ra balatiks, siukang, malechub a beluu el ngii a ngoikid el mo dmak. Ng diak losisiu el de blarngii el mei a oldak er kid. Ng sel osisiu el moktek er kid, beltikelreng er kid el mora Dios me a ngar bitar kid, a blak el reng er kid el mora Jesus Kristo me a mla moluut el ebangkelio er Ngii. Kd a “tang er a Kristo.”
A kltalreng el dosiik er ngii el diak de ngoititerir a rechad el dechor er a osisiu el basio; ke de ngoititerir a rechad el mo chemau a osisiu el omerael—bedul a Jesus Kristo. Kid a di tang le uchul a diak el sel de bla er ngii ng bai sel kid a melasem el merael mo er ngii, e diak luchul a kmo kede techang el chad ng bai sel ngii a dosiik el mo ngii.
Tiaikid a sel Ikelesia er a Kristo a melekoi el kirel.
Imo el Bedengel a Chad
Alsekum eng betik a rengum er a Dios, alsekum eng soam el mo ungil medengelii me koltirakl er a Ngelekel, e sekid e kau a ulecherangel el ngar tiang. Alsekum me kemeral blak a rengum lomes el mo oltirakl er a llechul a Osobel—ngii mesel dirkak me churrungel—e kau a cherrungel lulsiseb el mora Ikelesia er a Jesus Kristo er a Uriul-klebesei el Santo.
E mekerang alsekum me ke ngodech er a rechad el iliuekl er kau? Tia diak el rullau el mo diak mchatter —ng rullau el ulsebechall el tebedechel a bedengel a Kristo. A rokui a lousbech er tir er a bedengel a Kristo. A ding a remenges a tekoi el mad a diak a tang mel sebechel. A uach a remuul a tekloi el chim a diak a tang me sebechel.
Tia diak a belkul a kmo a ngerchelem a mo melodech er a bek el chad el di mo uaikau. Ngdi tia bekul a kmo kau a obang a kmong ngerang el ngii a klou a ultutelel el bo modersii—e kau a ngarngii a kmong ngerang el klou a ultutelel el bo mosuub er ngii.
Di Tal Ngor
Ngara bek el ongdibel er sel klou el ongdibel, e kid a mukngeltengat er a omekllomes el chelitakl me a duch er a remengitakl. Me sel morrenges, e ke locha mes el kmo a remengitakl a diak el rokui el mengitakl a osisiu el hu. A lebebil ea tara bliongel a oba tara hu, ea lebebil eng kuk tang. Eng di tir rokui oldars el mora klebokel el chelitakl, e tir a dmak el cherrungel. A derta er a chad ra chelitakl a oba osisiu el moktek: el mo oldanges er a Dios e odars a rengud el mo er Ngii. A derta er a uldesuir a uldalem er a osisiu el chedaol moktek. Me sel le dubech tiang, e te meral mo obang a di imo el ngor.
Alsekum eng diak mchedal a Ikelesia er a Uriul-klebesei el Santo, ea ki oleker er kau el mo obengkemam e doutkeu er a “cheliteklel a olsobel belkitelreng.” er a Osobel. Aki ousbech er kau! Ng betik a rengmam er kau. A Ikelesia a moungil sel loba blak el reng er kau el mo mesiou er a Rubak me a Rengelekel.
A lsekum me ke mla ochotii, loba techolb, loba telbiil lobengkel a Dios, a klemeriar reng er kau el “mei er a chelechad er a Dios, e bo mokedongall el chedal,” ke mesulang el tebedechel tial klou e chedaol lureor lolengeseu el meruul er a Ikelesia er a Jesus Kristo el Osobel a soal ngii a bol uaisei.
Uai sera ksubii er a sechelik er a Dois, a beltikelreng er kid el mora Dios me a Rengelekel a misisiich el sioning el mora beluulechad el kmo tia meral Ikelesia er a Osobel.
A Dios bo lomekngeltengat er kid el moba kllouel reng el blak a rengud lomes el mo kiei lokiu aikel ungil el Osobel, e Mastang a mla kudmokl el mei er kid—me a rokui el chad bolodengei el kmo kid a oltirakl er Ngii. El ngara chedaol ngklel a Jesus Kristo, amen.