Toeni Luhlahp
Luhlahlfongi Ye Muhtuhn God
Toeni luhlahp ke Eprel 2025
11:59

Luhlahlfongi Ye Muhtuhn God

Sel Prestuhn Russell M. Nelson

Prestuhn luhn Alu luhn Jisus Kraist luhn Mwet Luhlahlfongi ke Lwen-sahflah

Ke kuht insacnweacng in suk in oasr luhngse pwacye ac ma wo in nwacklah moul lasr uh, luhlahlfongi lasr in fototoyang nuh yurin God fah yohkwelihk.

Tamuhlwel ac tahmtahel sacohklacna wiyuck, nga kaksakihn lah nga kuh in sramsram nuh suwos misenge ke toeni luhlahp yohk srihpac se inge. Muhtuhk fahsr in mahtuhoh. Kuloh ke kahlwem lowos ke nga fwahkwack pweng luhk uh.

Kuht muhta ke pacl wowo ke Alu luhn Jisus Kraist luhn Mwet Luhlahlfongi ke Lwen-sahflah. Sesseslah insiyuck ke engan ke nga liye kapkapwack ke acn puhs.

Nga moklweyuck yohkna sin tuhlihk fuhsr nahtuhsr. Elos kuhlwacnsap ke pihsac luhlahp. Elos konwacack mwet lalos ma som liki faclse inge ac oruh akwuck lalos lun tempuhl. Mukul ac muhtwacn fuhsr nwacklah pepuh in kuhlwacnsap ekihn misineri ke pihsac sihmlac puhs. Fihl kapwack se inge pa tuyak ekihn mwet etahwi puhlaik luhn Jisus Kraist.

Prestuhn Nelson wi tuhlihk muhtwacn se nuhtin-nuhtin nahtuhl.

Pacl fototo somlah ah nga tuhfahna in ohsun nuh sin ahwowo muhtacn se nuhtin nuhtin nuhtihk. Ke nga motko ma upac elac muh sun ke moul se inge, oasr kena se luhk in kahsrel muhsahi luhlahlfongi lal ke Jisus Kraist. Moulkihn wosasuc Lal yohk srihpac nuh ke engan lal tok uh.

El, ac oacpacna kuht, fah sun ma upac. Kuht kwewa puhla tari mas, ahsor, mwe sruhf, ac wacngihnlac luhn mwet sacohk. Ma upac inge kuh in kuhnahoslah ma kuht luhlahlfongi kac. Ne ohinge, oasr inkacnek luhn mwet tuhma lutlut luhn Jisus Kraist nuhke siena ohiyen luhlahlfongi.

Ke kuht oruh ac liyacacng wuhlweacng lasr nuh sin God, oasr luhlahlfongi in kuht ma isuslac ke Nguhn. Leum El fahk nuh sel Mwet Pahluh Joseph Smith lah luhlahlfongi lasr uh kuh in fokokoi ye muhtuhn God. Petsacelah puhla wo se fin oasr luhlahlfongi lasr ke kuht tu ye muhtuhn God.

Ke nga fahk muh oasr luhlahlfongi ye muhtuhn God, nga luhma nuhke oasr luhlahlfongi in kaluckyang nuh yurin God ingena! Nga luhma nuh ke pruhe ke luhlahlfongi muh Pahpah Inkuhsrao El lohng kuht, lah El etuh enenuh lasr yohk liki na kuht etuh uh. Nga luhma nuhke etuh luhlahlfongi se lah El luhngse kuht yohk likit kuht etuh, lah El suhpacma lipufacn in wi kuht ac wi elos suc kuht luhngse. Nga fahk nuh ke in oasr luhlahlfongi lasr lah El finsrak kihn nuh sesr kais sie in sun acn sahflah sac.

Ingena, kuht e eis fuhkah luhlahlfongi se inge? Leum El topuk kihsen siyuck se inge ke kahs inge: “Lwelah kanon insiom … in sesseslah ke luhngse pwacye nuh sin mwet nuhkwewa, … ac lwelah ma wo in yucnwelah nuhnak lom tiac tui; na luhlahlfongi lom fah ahkfokokoyeyuck ye muhtuhn God.”

Pa ingacn key nuh kac uh! Ke kahs luhn God sifacna, luhngse pwacye ac wo ikacslah inkacnek in oasr luhlahlfongi ye muhtuhn God! Tamuhlwel ac tahmtahel, kuht kuh in oruh! Pwacyena luhlahlfongi lasr uh kuh in fokokoi ye muhtuhn God, ingena!

Kuht srihke motko ke kewana luhngse pwacye ac ma wo.

Ma se met, luhngse pwacye. Yac luo tari ac, nga pahngon kuht, ekihn mwet wuhlweacng fahsr tukun Jisus Kraist, oacna mwet ahkmisye. Ngan kalweni ma nga fahk ah: “Kasrkuhsrak uh tiac kuh in kuhtwanglah. Akwacsui uh tiac kuh in muhsaheack sie mwet. Lokoalok uh tiac kuh in kol nuh ke inkacnek mokleyuck.”

Luhngse pacye nuh sin mwet nuhkwewa pa akucl nuh ke mwet ahkiwe uh! Yohk srihpac in oasr sesr luhngse pwacye, kwewana ke acn puhslac mwet ac acn kuht muhkwena we. Kuloh nuh suwos suc eis kahs luhk met nuh insiowos. Tuhsruhk kuht srwackna kuh in oruh wo liki.

Lokoalok orek ke puhplihk ac ke social media in pacl inge ahksahngweng. Kahs ngal elos kuhfwen mweun in ahkmas. Lokoalok kosraclah Nguhn Muhtahl in wi kuht pacl nuhkwewa.

Ekihn mwet etahwi luhn Jisus Kraist, kuht enenuh in pwen mwet uh ekihn mwet ahkmihsye. Ke luhngse pwacye el oasr yohrohsr, ac wacngihnlac pacr lasr in ahkolukye mwet sahyac. Kuht ac tui tilac nuhnuhnkuh mwet sahyac. Ac oasr luhngse pwacye lasr nuh selos suc tuhkuh ke kain in moul nuhkwewa. Luhngse pwacye nuh sin mwet nuhkewa yohk srihpac nuh ke kapkapwack lasr. Luhngse pwacye pa pwelucng se nuh ke ohiyen mwet wowo se.

Lwelah kuht in ngihsre kahsruh lal Pahpah Inkuhsrao in nekuhtlac ke luhngse pwacye—yohk na nuh selos suc ma upac in luhngse—tuh luhngse pwacye el mwe sang se lal Pahpah Inkuhsrao nuh sin mwet fahsr tukun Jisus Kraist. Mwet Lahngo pa Fihsrwack luhn Mislac. Kuht pa kuhfwen sroasr Lal nuhke ahkmihsye.

Ingena, lwelah kuht in sramsram ke ma wo. Leum el fahk nuh sesr in nahwuh nuhnak lasr uh tiac tui ke ma wo. Petsacleah kahsruh wowo kom ac eis nuhke oacna sie nuhnak nwacsnwacs ke kom kapkapwack ke ma wo. Ma wo oraclah ma nuhkwewa wo ac engan! Ma se sahyac uh, petsacelah meac fah sikyak ke kom toeniyac ma wo nuhke nuhnak fohkfohk, nuhnak suhlallacl, kuh nuhnak suhpwacr se. Ma wo fah luhslah nuhnak ingacn. Ma wo ac fah ahksukohsohkyekomlac liki, nuhnak fosrngah elyah.

Tamuhlwel ac tahmtahel, ke upaclah ma koluk facluh, enenuh in yohkwelihk nwacsnwacs yohrohsr. Nuhnak lasr, kahs, ac mukuikui enenuh in wo pacl nuhkwewa ac sesseslah ke luhngse pwacye luhn Kraist, nuh sin mwet nuhkwewa. Ohiyac wowo se an ye muhtahsr pa in eklac mwet ma God El kena kuht in oacna.

Ahkfalye alu lun lohm sin Leum ahkkweye kuht ke kwewana luhngse ac ma wo. Ke ma inge, pacl lasr lun tempuhl ahkfokokoye luhlahlfongi lasr ye muhtuhn God. Ahkpuhsye pacl lun tempuhl ac kahsre kuht in ahkolah nuh ke Tuhkuh Ahkluo luhn Mwet Lahngo, Jisus Kraist. Kuht tiac etuh lwen kuh ao Elac tuhkuh. Tuhsruhk nga etuh lah Leum El pihrihkyuc in ahkelyah ikuht kwewa in ahkolah nuh ke “lwen luhlahp ac aksahngweng sac.”

Ke kuht insacnweacng in suk in oasr luhngse pwacye ac ma wo in nwacklah moul lasr uh, luhlahlfongi lasr in fototoyang nuh yurin God fah yohkwelihk. Nga suli kom in eis step inge ke srihpac in ahkfokokoye luhlahlfongi lom ye muhtuhn Leum. Na oruh, pacl se kuht som nuh yurin Pahpah Inkuhsrao ke luhlahlfongi kuh se inge, kuht ac sesseslah ke engan yohk, ac luhlahlfongi lasr kacl Jisus Kraist ac yohkwelihk. Kuht ac fah puhla kuh luhn nguhn ma som ahluhkwelah finsrak fuhlwact lasr uh.

Kuht tarilacna nuh sin Leum ke pihsrpihsriyen muhsah ke tempuhl ke yac ekahsr tari ah. Ye kolyuck Lal, misenge kuht ahkkahlwemye plwacn in muhsahi tempuhl ke kais sie acn inge:

  • Reynosa, Mexico

  • Chorrillos, Peru

  • Rivera, Uruguay

  • Campo Grande, Brazil

  • Porto, Portugal

  • Uyo, Nigeria

  • San Jose del Monte, Philippines

  • Nouméa, New Caledonia

  • Liverpool, Australia

  • Caldwell, Idaho

  • Flagstaff, Arizona

  • Rapid City, South Dakota

  • Greenville, South Carolina

  • Norfolk, Virginia

  • Spanish Fork, Utah

Nga fahkwack lah Jisus Kraist, Mwet in Molwelah Israel, kol, Alu Lal. El ahkoo in sifil tuhkuh. Lwelah kuht in oacpacna ahkoo in ohsun nuh Sel. Ke ma inge nga pruhe ke inen Jisus Kraist, amen.

Mwe Kahsruh

  1. Yot srihsrihk se ma mwet pahluh Daniel el liye ke meme lal ke lwen sahflah el ipiplac som in nwacklah facluh (liye Daniel 2:31–45; Doctrine and Covenants 65:2).

  2. Doctrine and Covenants 121:45

  3. “Tuh Nga fah som met liki kom. El fahk lah elac oasr ke lacpo lacyot ac lacsac lasr, ac Nguhn Lal ac fah oan insiacsr, ac lipufacn Lal fah raunikuhtlac, ac sruhkkuhtyak. (liye Doctrine and Covenants 84:88

  4. Doctrine and Covenants 121:45, mwe ahkuhtweyac ituckyang; liye pac fuhs 46.

  5. Russell M. Nelson, “Enenweyuck Mwet Ahkiwe Mwet Uh,” Liahona, Mei 2023, 98.

  6. Sulaclah in fohs nuh sin mwet sahyac pa sulaclah in tiac moulkihn kolyuck luhn Nguhn Muhtahl.

  7. Enenuh in oasr sesr luhngse pwacye nuh sin mwet nuhkewa, ac nuh sin oacna sie mwet luhlahlfongi. (Liye Doctrine and Covenants 121:45).

  8. Kalmac pa in pruhe “ke kuhiyacn insiowos nohfohn” (Moroni 7:48).

  9. Liye Moroni 7:48

  10. Liye Isaiah 9:6.

  11. Oacna ke Joseph Smith el luti, “fin [kuht] finsrakkihn in som nuh yen ma God El oasr we, [kuht] enenuh in oacna God, kuh in oasr sesr ma yohk ma oasr sin God” (Teachings of Presidents of the Church: Joseph Smith [2007], 72). Oacpacna, ke Mwet Sap Paul el fihliyac kahs in kahsruh lah kuht enenuh in “pulaik in utyak nu ye mutun tron lun God, yen lungkulang oasr we, ac kut ac fah eis pakoten ac konauk lungkulang in kasrekut ke pacl kut enenu” (Hebrews 4:16).

  12. Liye Matthew 24:36–37.

  13. Malachi 4:5; liye pac Zephaniah 1:14–18.

  14. Leum El fahk nuh sesr in “esam luhlahlfongi, ma wo, etwacack, mongfihsracsr, muhtweng, kuhlwacng nuh sin mwet wiom, muhtahl, luhngse pwacye, puhsisacl, [ac] insacnweang” (Doctrine and Covenants 4:6). Ke kuht oruh, luhlahlfongi lasr ac yohkwelihk, na, ke kahs Lal sifacna, ke kuht siyuck, kuht ac fah eis. Ke kuht tohwohlwack, ac fah ikacklah nuh sesr. (Liye Doctrine and Covenants 4:7.)

  15. Kuht kuh in puhlakihn ma mwet lal Tohkohsrah Benjamin oruh ah: “Elos sesseslah ke engan, eis nuhnakmuhnahs ke ma koluk lalos, ac eis mihs ke nuhnak, ke srihpen luhlahlfongi yohk suc oasr yohrohlos ke Jisus Kraist” (Mosiah 4:3).