Engankihn Moul

El sulpac: “Yohk luhngse ac kahsruh nga eis sin ward family lasr ah. Arulacna ahluhkwelah. Pisap [luhk] ac prestuhn luhn Young Women eltahl som ahluhkwelah ma fal in ahkkahlwemye luhngse ac kahsruh laltahl. … Nga tuh liye poun Leum … kol yuc ac sucu luhk ah. … Kain ward se luhk ah pa sucu se ma mwet nuhkwewa enenuh uh, yohkna sie muhtwacn fuhsr ke ohiyac nga oasr kac uh.”

El ac sucu lal ah, ac sucu ward lal ah, paing ke luhngse ahwowo mukul se nahtuhl ke Fepweri tari ac.

Prestuhn Russell M. Nelson el fahk, “Ohiyac se ke Alu pwacye ac moul luhn Leum ac fah orek pacl nuhkwewa in sie … srihkasrak in luti kais sie tuhlihk nuhtin God … [karihngihn ke luhngse-kuhlwacng] nuh sin sie, oacna ke El oruh.”

Ke sie muhtwacn lolacp konwacack lah el ahkolah in oswelah sie tuhlihk ma tiac oasr ke plwacn, motko ke mas, fohs ke ma luhn nguhn, mwekihn, fohswack luhn ma kawihl, nuhkanlah luhn macruht, ac ahsor ke mwemwe muhsahllah kuh, in kihtin pacl ke ngal ac fohswack, kollah sie muhtwacn nuhnak yohk in sroacng nuh ke ma suc ac use ngal upac ac auli.

Nuh sin suc lohng ac puhlakihn ngal upac ac auli ke oraclah kuh wi oasr ke uhporsin, nuhnak muhnahs esam: Finne kuht tiac kuh in ekuhllah ma somlah tari, God el kuh in unwelah ma somlah tari. Nuhnak muhnahs kuh in tuhkuh ke ma usrnguck ke Iwaclah kuhlwacng Lal ke kom forlah nuh Sel ke sie inse puhsisacl ac inse auliyak.

Ma luo kwacna kuhpwahsr nuh ke muhtahliyacn isuslac in mahno: moul ac sulaclah. Moul uh ip sacohk emet se ke plwacn wolacna luhn Pahpah, ac ke masap Lal kuht engankihn ac karihngihn moul; ac kuht sulaclah tuhtahflah luhn sie moul ke el tuhfahna oreklac. Kuht oacyacpac sacohkkihn mwe sang luhn sukohsohk, ke sukohsohk in sulaclah nwacsnwacs— kahsruh ahkkweye sulaclah wowo, ahkkeyeyucklac sin God ma use engan wacngihn sahflahiyac.

Ke sie muhtwacn ac mukul oasr ke pacl upac se, sun sulaclah yohk srihpa se, kahs lasr, pahosr, insiacsr—ke ip luhn nguhn, puhla, ac mani—kuh in ahkinsewowoyaclos in puhla luhngse luhn Mwet Lahngo ac, oacna Prestuhn Henry B. Eyring el fahk, oraclah sie ayaol kahlwem nuhke muhtahlos liki “ma elos nuhnkuh muh elos liye” nuh ke “ma elos sonna kuh in liye.”

Prestuhn Dallin H. Oaks el fahk: “Elah lasr ke uhporsin tiacna fahk ke etwacack ke moul in mahno muhtwacwacack. … Oreklac ke etwacack lasr muh … nohfonna tuhlihk nguhn nuhtin God enenuh in tuhkuh nuh ke facluh se inge nuh ke sie srihpac wolacna, ac tuh kais sie mwet muhtwacacack met liki na el oreklac ac fah tuhtahflah ne tok ma pahtpaht wacngihn sahflahiyac.”

Kahs luhn Leum ke tuhlihk sonna isuslac se, oraclah puhsra sin Prestuhnsi Se Met ac U luhn Mwet Sap, Singucul Luo, sonna wi ikihlyucklac ac tahfuh kahs luhn mwet pahluh ke pacl loes, sang kahlwem muhtahl ke ma Leum El siyuck kacsr.

“Alu luhn Jisus Kraist luhn Mwet Luhlahlfongi ke Lwen-sahflah luhlahlfongi ke muhtahliyac moul luhn kais sie mwet. Ohinge, Alu uh lain sulaclah ke uhporsin luhn sie mwet kuh inseselac luhn u se, ac sang kahsruh nuh sin mempucr in tiac nuhnkuh in, ahkfahsrye, ahkkweye, moli, kuh sackuhnlah nuhke kain uhporsin se.

“Tuh [Leum] el lwelah nuh ke kuhtuh srihpac … ke:

• Pihtuctuc ma sikyak ke rep kuh pihkasr, kuh

• Mwet etuh ke ono se ahkuhtweyac lah moul kuh kuhiyen ninac se puhtatyang nuh ke elyah yoh se, kuh

• Mwet etuh ke ono se ahkuhtweyac lah oasr elyah yohk ke tuhlihk sonna isuslac sac ma ac tiac lwelah tuhlihk fuhsr se inge in pain moul ke el osweyucklac uh.”

Prestuhnsi Se Met el tahfwelah: “Uhporsin el ohiyac na upac se. [Finne ke ma tiac kwacna sikyak inge] enenuh in motkwoeyuck tukunna mwet se oraclah inge eis ahkpwacye ke pruhe” ac pwacpa yurun mwet sahyac.

Yac tolngoul somlah, mwet pahluh luhn Leum oraclah sie mwe fwahkwack nuh sin facluh. Ac weacng kahs inge:

“Kuht … fwahkwack lah God el sapkihn tuh kuh muhtahl in orwaclah tuhlihk uh enenuh in orekmakihnyuck inmahsrlon mukul ac muhtwacn, pahyuck ekihn mukul tuhma ac muhtwacn kiac.

“Kuht ahkkweyelah lah moul se inge oreklac ke kohkoh luhn God. Kuht ahkkahlwemye muhtahl luhn moul uh ac yohk srihpac la ke plwacn luhn moul ma pahtpaht luhn God uh.”

Tuhfahlah ac karihngihn moul ma sonna isuslac tiac ma luhn politics. El masap suwohs se ma ahkkeyeyucklac sin Leum tuhkuh sin mwet pahluh Lal.

Sie mwe fwahkwack sel President J. Reuben Clark Jr., suc kuhlwacnsap ke Prestuhnsi Se Met, ahkuhtweyac kahlwem ke mwet fuhsr lasr misenge uh: “Mwet fuhsr luhn Alu uh misenge elos masrinsracl ke ma luhn Nguhn: elos ke luti na pwacye ke wosasuc, ac elos ke in suwohs, tiac laisyucklac. Elos luhngse etuh ke … luhlahlfongi lasr; elos luhngse muhsahi luhlahlfongi kuh ke ma pwacye. Elos pa … mwet lohlngohk, mwet suk tukihn ma pwacye.” Lwelah kuht in sramsram in fusus ke luhlahlfongi ac pahkomuhta nuh sin mwet fuhsr lasr in lohm sesr, ac yurin sie sin sie ke Rilif Sosaiti lasr uh ac u luhn elder ke miting, ke masap luhn Mwet Lahngo ke kosro, ke ahknwacsnwacs luhn moul, ac karihngihnyen tuhlihk sonna isuslac ac ninac kiaclos.

Sie tahmtahel sacohk sihm nuh sihk ke sie ma sikyak nuh sel ke pacl loeloes somlah: “Ekihn sie [mwet fuhsr matwac], Nga konwacack lah nga pihtucutucyak ke srihklac kuh wacngihn kahsruh sin kawuck mukul se luhk. Nga puhla mwekihn ac muhkwena [tuhsruhk nga] tiacna motko [ke uhporsin]. … Oasr [yuruk] sucu wolacna se luhk ac pisap luhk, suc nga ohsun nuh se pacl nuhkwewa in suk kahsruh. … Nga forlah nuh sin God. Nga lutlut ke ma suhmuhslah … ac pruhe [ac] konwacack kuh sin Mwet Lahngo ac ke orekma ke auliyak. … Nga eis top se [nuh ke pruhe luhk] suc nga koflah lahfwekihn. … Muhsahllah insiyuck, tuhsruhk nga etuh lah ngwac fihliyac tuhlihk muhtwacn se nuhtihk inge in nuhtlah. … Nga pruhe nuhke puhlaik [ac] puhla luhngse luhn Leum arulacna kahlwem ke auliyak, nga etuh lah God … El topuk pruhe ac ahkkweyekuht.”

Siacnyacn wolacna se tuh nuhtwelah tuhlihk muhtwacn sacohk sac ac lotwel ke wosasuc. Ingena el pahyuck wi sucu kahto se lal sifacna.

Kuhtuh pacl uh, ma ahluhkwelah upac ac kweok ma koflah etweyuck uh kuh in wi karihngihn moul.

Ke pacl fototo somlah siacnyacn fuhsr se nga Kathy luhngse sihm nuh sihk ke tuhlihk fuhsr sacohk se eltahl tuhpan.

Pahpah sac sihm: “[Ke nga ac muhtwacn kiyuck ah tuh] wik singucul pihtucutuc kuht konwacacklah muh tuhlihk usrnguck se nahtuhsr inge oasr we sel genetic condition of trisomy 21, inkaiyacn pacl pahngon Down syndrome. Kuht puhla presihr kac … tuhkuh sin acn luhn ono in nuhnak ke kuhnahoslah. Wik ekahsr tohkoh kuht konwacack lah … tuhlihk sonna isuslac se nahtuhsr inge … ac enenuh laslas puhs ke insiacl ah ke yac se emet in moul lal. Ke ma nuhkwewa orek inge ke kuht tiac tui in pruhe ke kahsruh wolacna, … kuht puhla Nguhn ahkwoyekuht. Kuht eis fwackyuck ac etwacack lah tuhlihk muhtwacn se nahtuhsr inge el tuhlihk sollac se nuhtin Pahpah Inkuhsrao ac oasr luhngse na upac se lal in oasr in sucu lasr ac tuhkuh nuh facluh.”

Ninac kien tuhlihk sac sihm: “[Kuht] tuh lut na pwacye, fohsack, ac ma na pwacye foloyak ke pweng sac. … Ke nga tuh wik ahksingucul ahkosr pihtuctuc, kuht konwacack lah ahwowo se nahtuhsr ah oasr fihkac koluk ekahsr ke insiacl, sie ma ac sahp kuh in pwacnwacng misac. Kuht liye daktuh pucspucs ac spesuclis muhtwacwack ke wik 10–18 gestation. … Ke kais sie uhpoinmacn lasr inge, siyuckyuck sesr lah kuht srwackna nuhnkuh in fahlac na ke pihtuctuc sac kuh in kuhnahoslah. … Mwet Lahngo el ahkwoyelah insiyuck ac use puhla se ke mislac ac enganweyacn ahwowo muhtwacn se nahtuhsr uh. … [Pahpah Inkuhsrao] el ahkkahlwemye nuh sihk pacl nuh ke pacl lah El oraclah plwacn wolacna se nuh sihk [ac] nga Luhlahlfongwel.”

Eltahl enganwack na pwacye in paing tuhlihk fuhsr muhtwacn se nahtuhltahl inge wik se lac nuh misenge. El pa ma natuhltacl ac eltacl pa ma lal ma pahtpaht.

Luhlahlfongi fokoko ac puhlaik yohk pa akucl luhn mwet tuhma lutlut luhn Jisus Kraist.

Ke yac somlah, tuh oasr pacl luhk in ohsun nuh sin mukul ac muhtwacn suc puhsisacl in suk in fohlohk nuhke inkacnek in wuhlweacng ac nuhke mwe insewowo ke pristut ac tempuhl lalos yac puhs tukihn wacngihnlac pwepuh ke mempucr laltahl.

Ke sie pacl ah, nga sirapei sie mukul in ahollah ip luhn Prestuhnsi Se Met nuh ke fohlohkyang luhn pristut ac mwe insewowo ke tempuhl lal.

Tukihn macruht lal ke tempuhl muhtahl, ac tukihn oasr tuhlihk wolacna tolu nahtuhl, mukul sac ahklahlfohnye muhtwacn kiacl ah ac wuhlweacng muhtahl lal ah. Muhtwacn lolacp se pihtuctucyak ac luhngse uhporsin.

Muhtwacn wowo se kiacn mukul sac kwacfwe sin muhtwacn se ma pihtuctuc ah elan sang ahwowo sac ac olwelah muh elac tuhfahlah tuhlihk sac, ke elac oswellah uh, weacng tuhlihk nahtuhl sifacna ah.

Muhtwacn lolacp sac inseselac nuh kac in tiac kuhnahoslah pihtuctuc sac.

Ac yac singucul lac ingena. Muhtwacn puhsisacl se muhta met likiyuc nge luhngse tuhlihk mukul sac oacna ma nahtuhl sifacna ac fahk nuh sihk lah mukul tuhmwacl ah sang kuhiyacl in orek ayaol ac in luhngse ac karuhnganuhl ac sucu lal ah. Pahpah sac tuhng ke el sramsram ah.

Muhtwacn wowo se luhn God inge oruh fuhkah tuh elan eis tuhlihk se oacna ma nahtuhl sifacna suc kuh in mwe acsmakihn se ke lwen nuhkwewa ke ma suhfal luhn mukul tuhmwacl ah? Orek fuhkah? Mweyen el konwacack kuh ke Jisus Kraist ac el luhlahlfongi ke ma muhtahl luhn moul, ke muhtahllacna luhn moul. El etuh lah tuhlihk se ma sonna isuslac ah el tuhlihk nuhtin God, nwacsnwacs ac wo.

Tamuhlwel ac tahmtahel sacohk luhk, srihkeni luhngse nuh sin tuhlihk sonna isuslac fin facluh nohfohn el ma yohk se in nuhnkuh. God el engankihn moul. Orekma Lal ac wolacna Lal in use moul kawihl ac moul ma pahtpaht nuh sin tuhlihk Nahtuhl. Ekihn mwet tuhma lutlut luhn Jisus Kraist, kuht engankihn moul. “By this shall all men know that ye are my disciples, if ye have love one to another.” Lwelah kuht in akacsruhi luhngse lasr uh finne ahluhkwelah yohk yohrohlos suc enenekuht na pwacye. Nga ahkkahlwemye luhngse luhk nuh sum ac luhngse luhn Pahpah tuhmwacsr Inkuhsrao nuh sin tuhlihk Nahtuhl tuhkuh nuh facluh. Ke inen Jisus Kraist, amen.