Ac Kuht Sramsramkihn Kraist

Ke sahflahiyen sie kunohkohn loeloes inkof uh, nga ac muhtwacn kiyuck, Lesa, utyak nuh lohm aksohk in ahkolah nuh ke suhrak sahflah se lasr—mas sruhsrah—in som ne lohm ah. Ke kuht tu wi mwet puhs kahkahsrihk fahsr nuh met ke tahk loeloes soko ah, kuht kuh in puhla elyah luhn mwet suhrak inge ke fahsr lalos, sang in liyeyuck passport ac visa lalos, ac wo ohiac pahselah security check ah.

Sahflahiyac kuht sun acn se orekmakihnyuck sin custom officer se suc tiac mayak ke elyah yohk ac fosrngah lun rum sac. Oacna in orek eki, tena ngetma liye muhtuhk, el eislah pepuh luhk ah, liye lah pwacye petsac luhk ah, som liye page tok ah, ac lihksreni stampiyac passport luhk ah.

Na el is pepuh lal Lesa ah. Tiac isracsr kuh sramsram, el kuhi ac lohacng nuhke ke orekma lal ah, el lohacng nuhke page ah, liye kais sie ma ke pepuh se ye muhtahl ah. Kuht luhman lut ke el tui, kweyak, ac ngwetacng liyacl Lesa ke ngwetngwet kuhlwacng ac isrwacsr. El isracsrwelihk, el kahkahsrihk na stampiyac passport lal Lesa ac fohlohkohnwacng nuh sel. Muhtwacn kiyuck ah isrwacsr nuh sel, sruokyac pepuh sac, ac elos sramsram arulacna kuhlwacng.

”Meac se sikyak ah?” Nga lut siyuck.

Na Lesa el use nga liye ma se ma mwet orekma sac liyacack ah—card srihsrihk se srallah Mwet Lahngo kac. Tahfonglac puhtatlac liki purse lal Lisa ah nuh ke pepuh in passport lal ah. Ma se inge pa mwet orekma sac sokwack ah. Ma se inge pa ekuhllah ohiyacl ah.

Grace and Truth, by Simon Dewey, courtesy of altusfineart.com, © 2025, used with permission

Petsac srihsrihk se luhn Mwet Lahngo inge kapsreni insiacn mwet luo suc tiac aetuhi. El ekuhllah ohiyac suhnuhnkuh se in nuhnkuh, sruokyac kahtoiyac, ma usrnguck, ac ma pwacye ke Kahlwem luhn Jisus Kraist. Ke pacl luhlah tok ke lwen sac, nga nuhnkuh ke kihtihn pacl sun ac sacohk sac ac fwefwelac kac ac kaksakihn oraclah wo ke Kahlwem luhn Kraist nuh sin tuhlihk nuhtin God.

Kuht mwet fahsr tukun Jisus Kraist, ac kuht suk kwewana in eis ac akacsruhi ke kahlwem Lal. Sihmlac kahlwem inen Alu etuh lasr lah ”Kraist Jisus sifacna pa eot insroasrihk sac.” Tuhkuh yurin mwet pahluh met ah ac ingena, Pahpah Tuhmasr Inkuhsrao el sapkihn nuh sesr in “Lohngohl!” ac in“tuhkuh nuh yurin Christ.” “Ac kuht sramsramkihn Kraist, kuht kaksakihn Kraist, kuht luti ke Kraist, [ac] kuht palye ke Kraist.”

Kuht luti lah Jisus Kraist el Wen nuhtin God, ac ke kuhlwacnsap Lal facluh, Jisus El luti wosasuc Lal ac akiyac Alu Lal.

Kuht etuh na pwacye lah sahflahiyen moul Lal, Jisus El iwaclah ma koluk lasr ke El kweok in Imac Gethsemane, srihpsrihpyak fin sahksin soko, na sifilpac moulyak.

Kuht engan ke srihpen kihsaclah muhtahl luhn Mwet Lahngo, kuht kuh in eis nuhnak muhnahs ac ahknwacsnwacsyeyucklac liki ma koluk lasr ke kuht auliyak. Ma se inge use mihs ac finsrak nuh sesr ac oraclah fihsracsr kuht in fohlohk muhta yurin God ac eis engan wacngihn sahflahiyac.

Kuht palyei lah ke srihpen Moulyak luhn Jisus, misac uh tiac pa sahflahiyen ma uh tuhsruhk step yohk srihpac se in fahsr nuh met. ”Kuht nuhkewa ac sifilpac moulyak tukun kuht misac. Kalmac pa nguhn ac mahno luhn kais sie mwet ac sifwil pac fohlohkweni nu sie ac tuhkweni ne tok.”

Mwet pahluh moul misenge—suc eis fwackyuck yurin God in luti ac kol kuht—elos suli kuht na upac in tuhkuh nuh yurin Kraist. Elos kahsre kuht in akiyac insiacsr, insrwacsr ac muhtahsr yohk nuh Sel. Kuht kuh in fahk kuhtuh ma eklac ac kapwack ahkahlwemyeyuck yurin Prestuhnsi Se Met ma oreklac kuht in lohacng nuh sin Jisus Kraist. Kuhtuh ma inge pa:

• Sulwaclah se in tiac sifil orekmakihn ine se “Alu Mormon” ac in ekuhllah nuh ke ine pwacye la, Alu luhn Jisus Kraist luhn Mwet Luhlahlfongi ke Lwen-sahflah.

• Oasr luhn ma sasuc, moklweack srwoal se ke Kraist ma in liyeyuck ke nien toeni.

• Sifac ac on ma fahkwack kacl Jisus Krasit ma Muhtwacn Fuhsr ac Aaronic Pristut orekmakihn, oacna ke “Mwet Tuhma Lutlut luhn Kraist” ac “Ngwet nuh sin Kraist.”

• Srihpac yohk ke Iwaclah ac Moulyak luhn Jisus Kraist oacna in pa ma wolacna se ma sikyak ke pacl somlah.

• Ahkfuhlwact ke Istuh orek pacl nuhkwewa ac tiac lwen luhlahp se na, ke sie ma yohk srihpac ke Jisus Kraist

• Ahkuhtweyacn sral kuh ma ahkuhteyac Alu luhn Jisus Kraist ac kalmen oreklac lal.

Lwelah kuht in lohacng nuhke eklac luhn kuhtuh ma inge. Ma se met, akucl luhn Alu uh.

Ke 2020, President Russell M. Nelson el sruhkwack sie mwe akucl sasuc luhn Alu uh. Akucl se inge ahkkahlwemye ma pwacye lah Kraist pa ma yohk srihpac se ke Alu Lal ac enenuh in pa yohk srihpac ke moul lasr uh. Kuht kuh in liye akucl se inge ke pwepuh in lwelah nuh tempuhl, ke website ac magazine luhn Aluh uh, oacna icon nuh ke Gospel Library app, ac finne nuh ke military ID tags luhn mempucr puhkwantwen luhn Alu uh ma wi solse. Akucl se inge weacng inen Alu uh nwanwack eot in sroasrihk se, sie ma in esamyuck lah Jisus Kraist pa sifen eot insroasrihk, ahkkahlwemyeyuck inge ke kahs Cambodia ac orekmakihnyuck ke kahs 145.

Ma yohk srihpac luhn akucl se inge sruhmuhn ke yot sacohk se lal Albert Thorvaldsen ma Christus srwoallah kac, suc oraclah kuhpahsr fokoko la nuh ke Alu uh ac kuh in liyeyuck ke acn in muhtacta ac acn ma tempuhl an we fin facluh nohfohn. Srihpac se oruh Alu uh orekmakihn akucl se inge pa enenuh Kraist elan an infulwen ma nuhkewa kuht oruh. In oacpacna, kohllah paho luhn Mwet Lahngo ahkuhtweyac olwelah Lal in eis nuhkewa ma tuhkuh nuh Yohrohl. Akucl se inge srallah ahkuhtweyac luhngse luhn Mwet Lahngo Jisus Kraist ac mwe ahkacsmak ke Kraist moul.

Nga kena etuh, nga siyuck sin sucu puhs ac kawuck ke sie ma yohk srihpac ke akucl luhn Alu uh. Mwe lut, puhs tiac etuh ke ma sacohk kac inge. Jisus Kraist El tu ye arch se. Kalmacn ma se inge pa Mwet Lahngo sifilpac moulyak el tuhkuh liki kuclyuck sac. Pwacyena kuht ahkfuhlwactye ke sifilpac moulyak, Kraist moul, finne orekmakihnyacn akucl luhn Alu uh.

Lwelah kuht in nuhnkuh yohk srihpaciyen Istuh. Ke pweng sasuc luhn Prestuhnsi Se Met nuhnak ke Istuh, kuht ngihsreyuck in “ahkfuhlwactye Moulyak luhn Mwet Lahngo lasr in lutlutkihn mwe luti Lal ac kahsruh muhsahi facsin luhn Istuh ke acn sesr uh in ma se fanna, yohk na nuh sin sucu lasr uh.” In ahkfototoye, ahkkweyeyuck kuht in oruh ahkfuhlwact in Istuh lasr uh ke ohiyac fuhlwact ac muhtahl.

Nga luhngse tuhtahflah luhn fwackyuck ma sruhmuhn ke Istuh ac srui kihn oraclah wowo lowos in ahkfuhlwactye Istuh ke sie tuhkweni muhtahl. Weacng ao se fanna orek ke toeni ke kuhfa luhn Leum ke Sacnri in Istuh, kuhtuh pac ma orek muhtahl pa toeni alu luhn ward ac stek ac mukwikwi orek ke Palm Sunday ac weacng pacna mukwikwi orek ke Wik Muhtahl sacn. Mwe esam inge pa mukwikwi orek wi tuhlihk srihsrihk, ac tuhlihk fuhsr, ac kuhtuh pacl uh u in mwet on pac. Kuhtuh elos ahkfahsrye ”Living Christ” open house nuh sin mempucr ac kawuck ac elos wi pac kain in mukwikwi orek ke mura lalos.

Mukwikwi inge petsacelah u in mwet puhs se ke siti Jerusalem ma puhsraclos tuhkeni nuh sie kaksakihn Mwet Lahngo ke utyak wolacna se Lal ah. Yohk tarilac ke top lowos nuh ke nguhsr luhn Prestuhnsi Se Met in alu in lohm suwos oacna sucu in ahkfuhlwactye holiday yohk srihpac emet se inge.

Nga etuh suwohs muh sucu ma raunlac ahkfuhlwactye Istuh elos puhla muhtahliyac. Yac luo somlah ah, nga sruhmuhn insacnweacng luhn sucu lasr ah in ahkwoyelah ohiyacn ahkfuhlwact lasr ke Istuh. In fahk na pwacye, ma se inge srackna ahkfahsryeyuck. Kuht luhngse tuhkeni mongo ke ekuh in Istuh Sacnri, fohtoh in Istuh ac sukok ahtro ke Istuh, ac kuht srackna oruh. Tuhsruhktuh, in sang sie ohiyac muhtahl ma siiac Jisus Kraist ac Iwaclah Lal nuh ke ahkfuhtlwact lasr inge use petsac na wowo se nuhke ahkfuhlwact lasr ke ma sikyak muhtahl liki nuhkwewa inge.

Ac yac ahktolu pa inge kuht in srihke oruh Istuh in siiac na Kraist. Oacpacna ahkfuhlwact ke Krismas ah, sritacl sucu lasr uh oruh ke Istuh inge pa nuknukyang in oacna, riti ma suhmuhslah ke Wuhlweacng Sasuc ac Puk luhn Mormon, on, petsac ke Istuh, sra palm— ac kihtihn okahrkahr, fin nga fahk ma pwacye. Tuhlihk ac nuhtin nahtuh rit ac etahi kaksak orek ke Palm Sunday ma ”Hosanna. … God Elan ahkinsewowoye el suc tuhkuh ke Inen Leum; Hosana in fuhlwact liki nuhkwewa” ac ”El inge Jesus … fin acn Galilee” oacpacna nuh ke “Mislac nuh fin facluh, pweng wo nuh sin mwet” ke pacl in Krismas.

Kuht ingena engankihn kain in nahweyuck. Ahkfuhlwact orekmakihn puhni ac ahtro ke Istuh weacng pac Kraist ac petsac ke kuclyuck alal sac, Mwet Lahngo sifilpac moulyak sikyak ke Imac se lihkihn kuclyuck sac, ac sikyak luhn Mwet Lahngo nuh sin Mwet Nephi. Kuht oacyacpac sang kuhiyacsr in oruh Istuh ke puhlan pacl a in tiac lwen sefanna. Kuht srihke in oruh in mwe esam, oasr kalmeyac, ac ahkfuhlwact ke Palm Sunday ac Good Friday ac lwen muhtahl sahyac ma orek ke Wik Muhtahl sacn.

Istuh use nuh sesr in suhnakihn kwewana iwaclah muhtahl lal Jisus Kraist ac kaksakihn engan ke Moulyak Lal. Insiacsr toasr ke kuht nuhnkuh kweok luhn Mwet Lahngo Calvary ac, tuhsruhk insiacsr engan ke kuht petsacelah kuclyuck alal sac ac kaksak inkuhsrao, “El moulyak!”

Prestuhnsi Se Met ingena inge ahkkweye “ahkolah nuh ke Istuh ac Moulyak luhn Jisus Kraist—pweng wolacna se met nuh sin mwet uh” ahkkohnye yohk srihpaciyen puhlan pacl se inge. Puhs ma eklac tuhkuh yurin mwet Kristin suhmaht sahyac ma liye luhmah kuh ohiyacn Moulyak se inge, kuht ahkkweye mwe luti lasr lah “Moulyak sac kalmac pa mwet nuhkwewa ma moul ke muhtwacwack ah me ac fah sifil moulyak, ac Moulyak el ma pwacye se.”l “Tuh kacl Adam mwet nuhkwewa misac, finne nuh kacl Kraist mwet nuhkwewa fah ahkmoulyeyuckyak.” Jisus Kraist El tuhlahlihk mwe kapihr luhn misac luhn mwet nuhkewa.

Kuht fwefwelac na pwacye ke luhngse Jisus El acse nuh sesr. Kuht sruokyac kahs Lal ma fahk muh “wacngihn luhngse yurin mwet yohk liki luhngse se inge, tuh sie mwet fah fihliyac moul lal ke mwet kawuck lal.”

C.S. Lewis el fahk lah “in luti Mwet Kristin kalmac pa yohk na [nuh sin Mwet Sap] in luti Moulyak. … Moulyak pa sifac se infulwen mwe luti mwet Kristin nuhkewa luti ke Orekma. Moulyak sac, ac ma tuhkuh kac, pa ‘wosasuc’ kuh pweng wo ma mwet Kristin inge fahkwelihk uh.”

Nga fahkwelihk lah “oasr Moulyak se, … kuclyuck uh wacngihn kuhtanglah la, ac mwe acnwuck luhn misac kuhtwangyucklac sin Kraist.”

In kaliyac, nga fahk na pwacye lah elos nuhkwewa suc ahokiyac nguhsr se yurin mwet pahluh moul ac mwet in kahsruh lal in ahkfuhlwactye in yohk ma muhtahl sikyak ma Istuh ahollah fah konwacack kuhpahsr lalos nuh sin Jisus Kraist fokokoi liki met ah.

Lwen ekahsr somlah, nga lohng ke ninac mahtuh se ma sifil sruhmuhn sramsram ke Istuh nuh sin tuhlihk mukul yac ahkosr se nuhtin nuhtin nahtuhl orekmakihn ohiyac ma oacna kuclyuck, yot se ma afinyac luhf sac, Jisus, Mary, mwet tuhma lutlut, ac lipufacn se. Tuhlihk mukul sac liye ac lohng ahkwoyac ke ninac mahtuh kiacl ah sruhmuhn ke puckpucki, ikacklah ac kaliyac kuclyuck sac, ac folin imac se ke acn in Moulyak sac. Tok el kalweni sramsram soko ah mwe lut lah el tahkuhnlah wo nuh sin ninac pahpah tuhmwacl ah ke el sifacna tahkihn ma ahkuhteyac sramsram soko inge. Tukun ma inge, siyuckyuck sel lah efuh kuht oruh Istuh. Tuhlihk mukul srihsrihk sac ngwetwack topuk, “Mweyen El moul.”

Nga oracni luhlahlfongi luhk nuh ke etuh lal, ac etuh lowos, ac nuh sin lipufacn ac mwet pahluh, lah El moulyak ac El moul, nga fahkack ma inge, ke inen Jisus Kraist, amen.