Mwe Sang Yohk Wacngihn Sahflahiyac: Iwaclah, Sifil Moulyak, Fohlohkyak

Yac ekahsr somlah ah, kuhlahs se lasr ke lututacng ah kaliyac pohloh kahs ke Bible. Nga luhman luhngse na fuhs fototo ah. Ma se inge weacng John 11:35—fuhs se ma fototo emet ke ma suhmuhslah—“Jisus el tung.”

Nuh sihk ingena, lah Jisus El tuhng ke ahsor ac engan fahkwack ke ohiyac usrnguck luhn moul: Wen wolacna nuhtin God El tuhkuh in mahno nuh ke moul suhkawihl ac etwaclah oacna nuh ke moul in mahno in wi ac ahkinsewowoye kuht fuhkah pacl nuhkwewa.

Ke kuht wowoyak tuhng ke ahsor kuh sasa ke engan, Jisus Kraist El kahlwem na pwacye kac. Ke pahkotwen, wal, ac kuh, El kuh in oasr ke pacl ma kuht enenuh mwe sang yohk emet—Iwaclah, Sifil Moulyak, fohlohkyak luhn Jisus Kraist.

Mary ac Martha tuhngel Lazarus wiyaclos, ke el misac tari. Mokleyuckyak ke pahkotwen, Jisus El tuhng. El ahkmoulyelwack Lazarus.

Jisus El liye Jerusalem ke ekuhn Kuhfwen Ahluhkwelah. El tuhng, ke El tiac kuh in oracni mwet Lal oacna ke sie won el oruh nuh sin torokrok nahtuhl. Misenge Iwaclah Lal use nuh sesr finsrak ke kuht ahsor ke ma tuh finsrakkihnyuck.

Leum luhn imac in grape sac El tuhng ke El siyuck sin mwet kuhlwacnsap Lal, kuh siyuck pac sesr tamuhlel ac tahmtahel, “Meac Nga kuh in oruh pac nuh ke imac in grape Luhk?”

Mary el tu suwollac ke kuclyuck uh. Jisus El siyuck, “efu kom ku tung?” El etuh “oasr tung ke fong, tusruktu, engan fah sikyak ke lotutang.” Sifil moulyak uh use kuhsruhn lwen nuh sin nuhkwewa.

Ke acn ke Puk luhn Mormon, ke un mwet oaru pucspucs tuyak nuh Sel, engan lal Jisus fohnlah. El tuhng.

“Ac El eis tuhlihk srihsrihk nahtuhlos, sie sin sie, ac ahkinsewowoyaclos, ac pruhe nuh sin Pahpah kaclos.

“Ac ke El tuh oraclah ma inge El sifilpac tuhng.”

Pa inge Istuh ke Jisus Kraist: El topuk kena luhn insiacsr ac kihsen siyuck luhn nguhnasr. El elah sronin muhtahsr, sahyac sronin muhta ke engan.

Ke sronin muhtahsr kahklah, kuhtuh pacl uh kuht taltal koluk, mwekihnlac. Tuhsruhk in etuh lah Jisus Kraist El kahlwem ke kweok ac engan luhn moul kuh in use nuh sesr kuh yohk liki na kuh lasr sifacna ke kuht kihfucs moul lasr nuhke ma koluk ac wo.

E South America, pahpah se tuhng. Tuhlihk muhtwacn fuhsr se nahtuhl, suc pa sie ma kuloiyuhk ke moul lal uh, el misac. “Ngac sang oacna sie ma in sifilpac liyacl,” el tuhng in pouk. Nga tuhng pac.

Ke kihsaclah luhn Tempuhl Puebla Mexico, sronin muhtuhn tahmtahel sacohk se oruh sroksroki muhtahl. Luhmahl ahkkahlwemye luhlahlfongi ac kihsac. El fahk, “Todos mis hijos estan aqui en el templo hoy”—“Nohfohn tuhlihk nuhtihk uh oasr inge ke tempuhl misenge.” Fihlin fihl toeni ke lohm sin Leum oruh el tuhng ke engan ac inse kuloh.

Ke civil mweun kweoklacna sac, sucu ac mwet tuhlan elos aforacni lain sie sin sie. Sronin muhta mwen kahkahsrihk na ahkwoyelah inmahsrlo. Pusracl rarrar, mutacn se ke mura srisrik fahk, “Mwet tuhlan, met liki nga an in kuclyuck luhk, nga ke kom in etuh in sokwack mempucr tuhlac ke sucu lom an.”

Muhtwacn kahto ac mukul watwen se elos siliyucki lin lohm sin Leum. Mutwacn el matwac yac 70, oacpacna mukul sac. Mutahn kahto se ma e macruht inge, el nwacsnwacs tuhpan lwen se inge. Muhtwacn kahto se inge mwekihn oracoht oracma nuknuk in macruht se lal ah. Kuht tuhng ke engan. Olweacng luhn God ahkpwacyeiyucklac. Wuhlweacng Lal acse mwe insewowo.

Ke forfor luti tahmtahel katinmas se, ke Boyd K. Packer el fuhsr ah, el lotwelah mwe luti na sacohk se. Tukun akuhkuhinlac nuh sin mukul tuhmacl ah, tahmtahel sac fahklah kahs na ahkngal se. Accident se eislah moul luhn mukul tuhmwacl ah ke lwen sac pac na. “Ke lusen yac luhmngaul,” katinmas sac tuhng fahk, “nga muhta in kweok etuh lah kahs sahflah el lohng ke oalihk ah pa kahs kohsroh, ahkngal sac.”

Istuh ke Jisus Kraist uh kahsre kuht in ahkwoyelah, wolac inmahsrlo, ahksuwohsyelah inmahsrlosr, ke kewana lacfahl ke acn lihsrlihsr. Jisus El kuh in onwelah ahsor; El kuh in ahkkweye nuhnakmuhnahs. El kuh in tuhlwekuhtlac ac mwet sahyac liki ma suc kuht kuh elos fahklah kuh oraclah ma kaprikuhti in srohuh.

Istuh ke Jisus Kraist lwelah tuh kuht in puhlakihn kaksak luhn God. Facl se inge fahk nuh sesr lah kuht arulacna loes, arulacna fototo—arulacna sralacp, arulacna ohsrihksrihk, tiacna suhmaht, kahto, kuht suhfal in nguhn. Ke Jisus Kraist kuht kuh in eklac,kahinglac liki ohiyac koluk se in nuhnkuh muh ma nuhkwewa in fas.

Engan ke Istuh, kuht on, “Misac uh kuhtangyucklac; mwet uh sukohsohk. Kraist El eis kuhtanglah.” Sifil moulyak luhn Kraist ahksukohsohkyekuhtlac liki misac, liki ma muhnahs luhn pacl uh ac ma suhfas uh. Iwaclah luhn Jisus Kraist fohlohkohnwack pac nguhnasr. Srah Kacl kahklah ke pat nuhkwewa ke mahnol, tuhng tuh srahsrah, in acse nuh sesr inkacnek in kahinglac liki ma koluk ac sifacna. El oruh kuht in sifilpac toeni, fohn ac muhtahl, yurun sie sin sie ac God. Ke ma wo nuhkwewa, Jisus Kraist El fohlohkohnwack yohk—tiac oacna met ah muhkwena tuhsruhk oacyacpac ma ma kuh in oreklac.

Moul ac kahlwem lal Jisus fahkwack ke luhngse luhn God nuh sin tuhlihk nuhkwewa Nahtuhl. Ke srihpen God Pahpah tuhmasr El luhngse nohfohn tuhlihk Nahtuhl ke fihlin yac ac acn nuhkwewa, kuht sokwack solsol Lal in tuhkuh sokwack mislac ac engan Yohrohl ke ohiyac ac facsin pucspucs. Oacna sie acn, oacna sie pacl, oacna sie mwet, kuht akacsruhi ke luhmah muhtahl oacna tuhlihk nuhtin Mwet Oraclah sacpacna. Ke nguhn sepacna ingacn, mwet wi alu Islam, Juda, ac Kristin uh akacsruhi ke mwe usru ke alu lal Pahpah Abraham ac wuhlweacng ma kapsreyac ma sikyak ke pacl mahtuh met Egypt ah.

Pahpah Abraham el tuhkuh nuh Egypt ac tuh ahkinsewowoyeyuck.

Joseph, suc kuhkackihnyucklac in mwet kohs se Egypt, el etuh mwemwe se lal Pharaoh ma ahksensenkackihn yac itkohsr ma ac puhkanten mongo, na tohkoh yac itkohsr ac sracl in mongo. Joseph el molwelah sucu lal ac mwet lal. Joseph el tuhng ke el liye plwacn yohk luhn God, ma ma nuhkwewa tuhkeni orekma nuh ke ohiyac wo nuh selos suc liyacacng wuhlweacng lalos.

Moses, suc mahtuhlah Egypt ke lohm sel Pharoah, el eis ac tok fohlohkohnwack ki nuh ke fahsreni luhn tuhlihk nuhtin God.

Ahkpwacyeiye pahluh, Joseph, Mary, ac ahwowo Kraist elos suk acn in wuklac fin acn Egypt. Fin acn Cairo, mwet wi alu Muslim oaru se el fahk: “Quran luti lah Joseph, Mary, ac ahwowo Jisus elos sokwack acn sef ac mislac ke acn sihk. Ke acn sihk, ke Jisus El tuhlihk srihsrihk ah El kang mongo nwacsr, muhtwacwacack fahsr, fahk kahs se emet Lal. Inge ke acn sihk, kuht luhlahlfongi muh sahk ah kuhrweni fototo in sang fukun sahk nuh Sel ac sucu Lal ah. El muhta ke acn sihk uh oruh mwet lasr ac acn sesr uh ahkinsewowoyeyuck.”

Plwacn luhn God ke moul se inge ac sukohsohk in sulwaclah lasr use kuht in lotelah ma kuht puhalkihn sun uh. Kuhtuh sin mwe luti yohk ke moul lasr uh tuhkuh ke ma kuht tiacna muh kuht e sulaclah. Ke luhngse, Jisus Kraist El oactui nuh ten ac sowack nuh lucng liki ma nuhkwewa. El kaksakihn kuhiyacsr ke utuftuf ac pwacr, kuhlwacng ac tiac finsrak in eis opi, luhlahlfongi ke auliyak ac nuhnakmuhnahs. Ac El ahsor tuhng ke yohk kweok, ahkmas, ac tena fair luhn mwet uh—kwacna sikyak ke sulaclah luhn mwet uh—oacna inkuhsrao ac God inkuhsrao weluhlos.

Kais sie ke pacl Istuh fahkwack in tahkuhnlah ac ahkfahsrye ma luhn nguhn suc kewana ipin pactuhn muhtahl luhn iwaclah, sifil moulyak, ac fohlohkyak ke Jisus Kraist. Ma ahkfahsryeyuck muhtahl ac lwemlwem se inge tuhkuh tiac ke accident kuh ma na sikyak. Sacnri se met liki Istuh, Wik Muhtahl, ac Istuh uh ahkfuhlwactye Iwaclah ac Silfil Moulyak luhn Kraist. Oacna misenge, Eprel 6 nuhkwewa kuht ahkfuhlwactye muhtwacwacackiyac ac akwucki luhn Alu luhn Jisus Kraist luhn Mwet Luhlahlfongi ke Lwen-sahflah. Fohlohkyak se inge pa sie srihpac ma kuht toeni ke Sacnri se emet ke kais sie Eprel ke toeni luhlahp.

Fohlohkyak oacpacna tuhkuh luhn sifilpac moulyak lal Jisus Kraist, Moses, Elias, ac Elijah suc fohlohkohnwack ki ac wal luhn pristut ke pacl se ma akmuhsraiyucklac Tempuhl sasuc se Kirtland ke Sacnri in Istuh, Eprel 3, 1836. Ke luhmah sacn ke lwen sac nuh ke Alu fohlohkyak luhn Jisus Kraist, kuh ac mwe insewowo luhn God tuhkuh in oracni tuhlihk Nahtuhl, in ahkoo tuhlihk Nahtuhl in fohlohk nuh Yohrohl, ac in oracni nuh sie sucu uh ne tok ma pahtpaht. Fohlohkyak ke lwen sac ahkpwacyeyelah kahs in pahluh ma sikyak kewana ke Istuh ac ke Kuhfwen Ahluhkwelah.

Weacng Tempuhl Kirtland, nga tuhfahna pac muhtwacta nuhke acn muhtahl ekahsr fin acn Ohio acn ma Mwet Pahluh Joseph ac kuhtuh sahyac tuh liye God Pahpah tuhmasr ac Wen Nahtuhl, Jisus Kraist ke sie aruhruhma. Mwet Pahluh Joseph el liyacack lah inkuhsrao oacna meac. Inkuhsrao, Pahpah Lucng, kacl Jisus Kraist, “El molelah orekma nuhkewa ke pahol” ke tohkohsrahi wolacna. Ma sefanna ma tiac lwelah an pa elos suc sruhnga Wen tukun Pahpah El ahkkahlwemyacl.

Ke orekma in luti ke moul suhkwawihl Lal muhtwacwacack, Jisus El fahkwack ke orekma Lal in ahkinsewowoye kais sie sesr ke ma nuhkwewa ma kuht insese in eis—ke pacl nuhkwewa, acn nuhkwewa, ohiyac nuhkwewa. Tukun lalo ke lusen lwen 40 ac srihfeyuck ke acn mwesis, Jisus El ilyak nuh ke lohm alu ac rit, “Ngun lun Leum God oan fuk, mweyen El mosrweyula in fahkak pweng wo nu sin mwet sukasrup. El supweyume in sulkakin lah mwet sruoh ac fah sukosokla, ac mwet kun ac fah sifil eis liyaten; in aksukosokye mwet su muta in keok.”

Mwet suhkahsruhp, mwet inse muhsahl, mwet sruhoh, mwet muhta in kweok—kuht kais sie pa ingacn.

Puk lal Isaiah tahfwelah ke olwelah luhn Messiah ke finsrak, moliyucklac, ahkkweyeyuck: “Ac in oru tuh elos su mwemelil in Zion, … in engan ac insewowo, ac tia asor, tuh elos in onkakin soko on in kaksak ac tia on in asor.”

Ohinge, kuht wowoyak, “Jerusalem el arulana engankin ma LEUM GOD El oru. God El nokmulang ke molela ac kutangla, Ac ma inge oana mwe naweyuk lun mutan se ac mukul se suc akola in marut.”

Kais sie pacl in Istuh kuht ahkfuhlwactye, oacna akucl ke fohnlah la, mwe sang yohk wacngihn sahflahiyac tuhkuh kacl Jisus Kraist: Iwaclah Lal; (ac olwelah luhn) Sifil Moulyak Lal, Fohlohkyak luhn Alu Lal ke lwen-sahflah wi ki ac kuh luhn pristut in ahkinsewowoye tuhlihk nuhkwewa nuhtin God. Kuht kaksak ke karmacn luhn molwelah ac nuknuk luhn suwohswohs. Kuht wowoyak, “Osanna nuh sin God ac Lahm!”

“Tuh God El lungse faclu ouinge: El ase Wen sefanna natul, tuh elos nukewa su lulalfongi in el fah tia misa, a elos fah eis moul ma pahtpat.”

Lwelah kuht in sokwack ke iwaclah, sifil moulyak, ac fohlohkyak luhn Jisus Kraist—mislac, eklac oacna, ac in wi—ma suc pwacye ac kaksak, engan ac ne tok ma pahtpaht, nga pruhe ke ine muhtahl Lal, Jisus Kraist, amen.