Oacna Tuhlihk Srihsrihk se

Jisus El ahkfahsrye yac sahflah ke moul suhkawihl Lal in ahkkeye ahkpah luhn Mwet Sap Lal. Fin pweng Lal ac Alu Lal uh tuh kuh in molwellah, ac yohk kuhtuh ma enenuh in ituckyang nuh insiacn mukul singucul luo suc etwacl ke lusen mahlwem longoul ahkosr iyacna ah.

Sie lwen ah Jisus el tuh lohng ke sie akuhkuhin inmahsrlon mwet tuhma lutlut ac siyuck, “Meac kowos asiyucki inmahsrlomtacl kac uh?” Ke mwekin lahlos, eltacl “kena mihslac,”oacna ma sihmihsyucklac fahk. Tuhsruhk mwet luti wo emet se inge etuh nuhnak luhn inisiaclos ac akihlen ngwetngwet se met ke insefuhlwact luhn mwet. Na El “pahngonma tuhlihk srihsrihk se nuh yohrohl, …

“Ac fahk, Pwayena nga fahk nuh suwos, Ne kena kowos eklac oacna sie tuhlihk srihsrihk, kowos ac koflahna ilyak nuh in tohkohsrahi luhn kuhsrao.

“El suc fah ahkpuhsisacl yacl in oacna tuhlihk srihsrihk se inge, el oacyacpac pa fuhlwact emet ke tohkohsrahi inkuhsrao.”

Enenuh in etweyuck lah finne met liki isuslac luhn Kraist, Tohkohsrah Benjamin el oruh luti in wihlkacs lal wi pohloh kahs lahlmwetmwet inge ke puhsisacl luhn sie tuhlihk. Fwack muh, “Mwet oruh ma koluk el mwet lokoalok luhn God, … ac fwah, ne tohk ma pahtpaht, nekena el … eklac sie mwet luhn God ke iwaclah luhn Kraist suh Leum, ac eklac oacna tuhlihk srihsrihk se, ahkoshtwen … puhsisacl, …sesseslah ke luhngse, … in oacna ke sie tuhlihk [tohpuk] pahpah tuhmwacl.”

Inge, ma kahlwem se lah oasr kuhtuh elah luhn tuhlihk ma kuht tiac ahkkweye. Yac longoul-limekohsr somlah, yac tolu se nuhtin nuhtihk ngalisyac poun tuhlihk muhtwacn yac limekohsr se wiacl. Mukul tuhmwacn muhtwacn se nuhtihk ac, karihngihn tuhlih ac ke ekuh sac, suhlwahklwahk in luti tuhlihk muhtwacn se nahtuhl ah ke lesin nuhkwewa ke nuhnak muhnahs ma el kuh in esamwack, ahksahfyelah lah tuhlihk mukul srihsrihk se wiacl ah sahp tiac pacna etuh lah fuhkah puhla ke ngalngucl ke paho uh. Pihsrpihsr in nuhnkweack luhn pahpah sac orekma ke sahp minit se tahfuh, ne ke na tuhng isrisr se tuhkuh ke infuckihl luhn tuhlihk ac, ke tuhlihk muhtwacn se nuhtin nuhtihk ac wowoyak, “El etwaclah ingena.”

Na meac se kuht liye ke ma wo ke moul in sritacl luhn tuhlihk srihsrihk uh? Meac se oruh Kraist Sifacna El tuhng ke ma sikyak em tuhng ke Puk luhn Mormon nohfohn? Meac Jisus El luti ke El suhpwaclah e in tuhkuh inkuhsrao me nuh ten ac lipufacn karihngihn in raunwelah tuhlihk ingoh, sapkihn nuh sin mwet mahtuh ah in “liye tuhlihk srihsrihk [nahtuhlos] ah”?

Kuht tena etuh lah meac sramtweack nohfohn, tuh nga nuhnkuh muh ma ke nwacsnwacs ac suwohs lalos, nwacsnwacs luhn insiaclos, ac ma ac kuh in use nuhke moul lasr.

Efuh kuh pacl upac nuh sesr uh akihlenyucki sin sie oacna “ma lusrohngtwen luhn facluh”? Fuhkah tuh “kikiacp in nuhnak ac nuhnak fuhlwact luhn tuhlihk nuhtin mwet” pa kahs ma ahkuhtweyac ke yohk ac fuhlwactiyen sie lohm, ma kuhnausyucklac ke aruhruhma lahl Lehi ac? Ac mwet Zoram, u se ma arulacna pruhe kaclos-sifacna ah? Alma el fahk kaclos, “O God, elos [pruhe] nuh Sum ke inwacluhlos, ke elos fuhlwactwack … ke ma wacngihn srihpac luhn facluh.”

Fin te ohinge, yac oasr ma wo liki, nwacsnwacs liki, ac puhsisacl liki sie tuhlihk srihsrihk ke el pruhe? Oacna kuhsrao in oasr lun infuckihl sac. God ac Kraist eltahl pwacye na pwacye, tuhsruhk nuh sin kuhtuh ke pacl tok uh, ma elos puhla kuh in eklac ma tiac pwacye.

Oacna Elder Richard L. Evans el fwahk ke kuhtuh onfoko yac somlah: “Puhs sesr fwakwack lah kuht mwet Kristin, tuh kuht … tiac sang insiacsr na pwacye Nuhsel. … Kuht Ahkfuhlwactyacl, tuh kuht tiacna fahsr Tohkohl. … Kuht fwahk kahs Lahl, tuh kuht tiacna moulkihn.” “Kuht luhngse El, tuh kuht tiacna alu nuh Sel.”

Ac fuhkah eklac luhn moul uh fin fwacluh ahkfwuhlwactyacl Jisus yohk liki fuhlwahk fohkfohk orek pacl nuh ke pacl.

Tuhsruhk tuhlihk srihsrihk uh luhngse na pwaye El, ac luhngse lalos kuh in pwacnuhltahl nuhke kuhtuh pac kuhpwahsr lalos sahyac ke nien sritacl luhn moul. Oacna sie ma sap, finne ke yac fuhsr lalos, tuhlihk uh fihsracsr in luhngse, fihsrasr in nuhnak muhnahs, eltahl isracsr arulacna pwacr oruh finne mwet ahluhkwelah emet, upac insiac kuh in fihsracsrlah.

Inge, tahk uh som sokolacna. Nwacsnwacs? Luhlahlfongi? Puhlaik? Ohiyacn mwet?

Fahsruh wiyuc liye ke mongfihsrwacsr ye muhtuhn God ahkuhtweyucki sin kawuck na fuhsr, sacohklacna se luhk.

Ke Jacnweri 5, 2025—lwen 91 somlah ah—Easton Darrin Jolley el eis Aaronic Pristut nuh facl ac tuh akmuhsralah sie tikin ke Alu luhn Jisus Kraist luhn Mwet Luhlahlfongi ke Lwen-sahflah.

Easton el nuh kena wi pahsi kuhfa luhn Leum e ngi me na ke esam lal uh. Tuhsruhk pacl wo muhtahl se inge tuhkuh ac el fosrngah sahngweng muh elac tahfonglac, lah elac ikori, lah elac isrucnyuck kuh ahkmwekihnyacl sifacna ac sucu lal ah.

Kom liye, Easton el mas, mas sesahlah ac kuhnahostwen se, pahngpahng Ullrich congenital muscular dystrophy [mas ke muscle ke sri ma orekmakihnyuck in mukwikwi]. Mas se inge kais kuhtuh na fohnohslah moul fuhsr se lal ke ma upac ac kuhnahoslah finsrak ac ma el kena oruh ke pacl fahsruh uh. Elac kuhracnna orekmakihn wheelchair ne tok. Sucu lal ah tiacna sramsramkihn ma ac sikyak nuh sel tohkoh.

Sacnri se tukun el akmuhsralah ah, Easton elac pahsi kuhfa luhn Leum pacl se emet. Ac ma moklwel ah pa elan kuh in sifacna wi ac sang ma muhtahl inge nuh sin pahpah tuhmwacl, suc pa pisap ke ward sac. In tuhpan kunohkohn sacn, el kwacfe ac siyuck, ac tuhng ac kwacfe, ac eis kuh lah wacngihn sie ac kahsrel, wacngihn sie, ac srihke in kahsrel. Ke srihpac puhs, ma nuh sel sifacna, el enenuh in muhkwena oruh ma se inge ac in wacngihn kahsruh.

Tukun prist sac kuhnsaclihk puhret ac ahkinsewowoye—sie mwe acsmakihn ma luhmweyuck nuh ke mahno muhsahllah luhn Kraist—Easton, ke mahno muhsahllah se lal ah, osaksakyak in eis tray se lal ah. Tuhsruhk, oasr step tolu liki acn ten nuh ke acn fuhlwact met ah. Na, tukun el eis tray se lal ah, el kohllah nuh lucng ac fihliyac fin acn tuhpahsrpahsr se lucng liki acn in fanyak sac. Na, muhta fin sie step lucng ah, ke kwewana pahol el olwack lacyacn lacyot ke niacl nuh ke step e emet ah. Na el olwack lacyacn lacsac ke niacl nuh ke step sacpacna, ac anangacn, ne ke na, el oasr lac e ke step se lucng ke step-tolu ma oacna in pa Finohl Everest.

Na el sifacna kihluckyang nuhke sru soko ma oruh elan kuh in fanyak oraclah aten tuyak se. El fahsr fohlohk in eis tray sac. Step ekahsr na luhlah, el tulac ye muhtahl pisap, pahpah tuhmwacl, suc, sronin muhtahl luhluhyak ac kahklah nuhke muhtahl, srihke in kutongilyac sifacna elan tiac asruhilac nuh sin tuhlihk mukul puhlaik ac oaru se nahtuhl inge. Ac Easton, el mongi oruh isrwacsr na yohk se sikyak ke muhtahl, kuh pac na elan fahk, “Nga fahkwack tari wolacna [luhn pahpah tuhmuhk ac] aksahfyelah orekma ma [el acse] nuh sihk in oruh.”

Luhlahlfongi, inse pwacye, nwacsnwacs, ahkfuhlwactye, ac ke sahflah, luhngse nuh sin pahpah se suc el arulacna kena ahkenganye. Ma wo inge ac kuhtuh pac sahyac oruh kuht fahk pac, “El suc … fuhlwact oemeet in Tohkohsrahi luhn kuhsrao uh pa el suc ahkphusisaclyacl in oacna tuhlihk se inge.”

Tahmtahel ac tamuhlwel ac mwet kawuck, oan e lucng ke lis se ke petsac kahto emet nga etuh pa tuhlihk fuhsr ac tuhlihk srihsrihk ac mwet fuhsr oacna ma wo ac sacohk oacna elos ma kuht sramsramkihn misenge uh. Nga fahkwack lah ma inge petsac lwemlwem ke tohkohsrahi luhn God fin facluh ke kuhiyac ac kahtoiyac nuhkwewa.

Ke pacna nguhn luhn fahkwack luhlahlfongi, Nga luhngse fwahk lah ke pacl in fuhsr lal, Joseph Smith el liye ma el fwahk muh el tuh liye ac sramsramkihn, nuh selos ma el fahk muh el fwahk ah. Nga fahkwack lah sie mwet puhsisacl ac nwacsnwacs se Russell M. Nelson el akmuhsralah sin God ac eis mwe sang luhn mwet pahluh ac mwet liyactwen. Tuhkuh ke lusen pacl loeloes ke rit, nga mwet loh lah Puk Luhn Mormon pa suwohs emet ke puk nga riti uh ac pwelucng nuhke nien muhta srihsrihk se luhk ke sie tohkohsrahi oasr nien muhta pucspucs we. Nga mwet loh lah pristut ac pruhe el kahsruh moul luhk—priesthood luhn Kraist ac pruhe lohm. Nga etuh ma inge nuhkwewa pwacye ac nga mwet loh ke ma inge ke inen El suc suwohs ac puhsisacl sin wen nuhtin God nuhkwewa—Alpha ac Omega, Nga Kuhlacna, suc srihpsrihpyak, mwet loh oaru—finne Leum Jisus Kraist, amen.