Sifacna Ahkolah in Ohsun nuh sin Mwet Lahngo

Tamuhlel ac tahmtahel sacohk wiyuck, Ohktopa tari ah, Prestuhn Russell M. Nelson el luti, “ingena pa pacl lom ac nga in ahkolah nuh ke Tuhkuh Ahkluo luhn Leum ac Mwet Lahngo lasr, Jisus Kraist.” Ke Prestuhn Nelson el sramsramkihn Tuhkuh Ahkluo, el kwacna oruh ke engan yohk. Tuhsruhk, tuhlihk muhtwacn srihsrihk se ke U luhn Tuhlihk Srihsrihk el fahk nuh sihk lah el tuhfalwack ke pacl ma sruhmuhnyuck Tuhkuh Ahkluo uh. El fahk, “Nga sahngweng ke srihpen ma koluk ac sikyak met liki Jisus El ac sifilpac tuhkuh.”

Tiac tuhlihk srihsrihk muhkwena pa sahp puhlakihn ohinge uh. Kahs in kahsruh wo se emet nuh sel, nuh sum, ac nuh sihk uh pa in fahsr tukun mwe luti luhn Mwet Lahngo. Mwe luti Lal tiacna lukmac kuh upac. Ke kuht ukwe ma inge uh, kuht tiac enenuh in sahngweng kuh tuhfal.

Ke apkuhranyang nuh ke sahflahiyacn moul suhkawihl in luti Lal, tuh siyuckyuck sin Jisus Kraist lah Elac sifilpac tuhkuh ngac. In topuk, El luti puhpuhlyuck tolu, sihmlac ke Matthew 25, in ahkolah fuhkah in ohsun nuh Sel—lah ke Tuhkuh Ahkluo Lal kuh ke kuht som liki facl se inge. Mwe luti inge yohk srihpac mweyen sifacna ahkolah lasr in ohsun nuh Sel pa yohk emet ke srihpac luhn moul.

Mwet Lahngo El sruhmuhn met ke puhpuhlyuck se ke muhtwacn virgin singucul. Ke puhpuhlyuck se inge, muhtwacn virgin singucul tuh som nuh ke kuhfwen macruht se. Lihmekohsr selos lahlmwetmwet utuck oil in nwacklah lahm lalos, ac lihmekohsr selos lahlfon tiac utuck oil. Ke mwet pihsrlac el tuhkuh, muhtwacn lahlfon ah som moul oil. Ke elos fohlohk, tuh pahtlac; kauli sruhnguhl nuh ke kuhfwen macruht sac.

Jisus El ahkkahlwemye ip tolu ke puhpuhlyuck sac in kahsrwe kuht. El ahkuhtweyac lah:

“Ac ke lwen sac, ke Nga fah tuhkuh in wolacna Luhk, puhpuhlyuck sac fah ahkpwacyeiyucklac suc Nga sruhmuhn ke muhtwacn virgin singucul ac.

“Tuh elos lahlmwetmwet ac eis ma pwacye, ac eis Nguhn Muhtahl in kohlohlos—pwacye na Nga fahk nuh suwos, elos fah … muhtwacnglah lwen sac.”

Ke kahs sahyac, elos tiacna enenuh in sahngweng kuh fosrngah, ke srihpen elos ac kuhtwanglah. Elos fah kuhtwanglah.

Fin kuht lahlmwetmwet, kuht eis ma pwacye ke kuht eis wosasuc luhn Jisus Kraist ke akwuck ke pristut ac wuhlweacng. Ma se tok an, kuht srihke in nwacsnwacs in sruokyac na Nguhn Muhtahl pacl nuhkwewa. Kuh se inge enenuh in sifacna oreklac sin kais sie mwet, tul nuh ke tul. Mukuikuii in ahkfuhlwact pacl nuhkwewa, sum sifacna, ac in lukmac uh suli Nguhn Muhtahl in kol kuht.

Ma se ahktolu ma Jisus El ahkkahlwemye an pa in kahingkihn ma kikiacp. Mwet Lahngo El tuh sensenkackihn fahk:

“Liyekowosyang, tuh kowos in tia kiapweyukla sin kutena mwet.

“Mwet puspis ac mau tuku, su fahk mu elos kaskas inek, ac fahk, ‘Nga pa Messiah!’ Ac elos ac kiapwela mwet puspis.”

Mwet Lahngo El etuh lah mwet wosounkacs ac srihke in kiyacpwelah mwet suwohs uh ac lah mwet tuhma lutlut pucspucs ac kiyacpweyucklac. Kuht enenuh in tiac luhlahlfongelos suc kikiacp fahk muh elos srihsrngiyucki sin God, kuh som nuh ke mongo yucyuc puhpuhlyuckkihnyuck kuh rum lukmac ma in lutiyuck sin mwet luti kikiacp.

Puk luhn Mormon luti kuht in akihlen fuhkah mwet kikiacp liki mwet tuhma lutlut. Mwet tuhma lutlut uh ahkkweye in luhlahlfongi God, Kuhlwacnsuhpwacl, ac oruh ma wo pacl nuhkwewa. Kuht ac fah tiac srihfeyucklac ke kuht suk ac eis kahs in kahsruh sin mwet kuht luhlahlfongi suc elos sifacna mwet tuhma lutlut oaru luhn Mwet Lahngo.

Kuht kuh pac in kahingkihn ma kikiacp ke kuht som alu pacl nuhkwewa ke tempuhl. Ma se inge kahsrwe kuht in nuhnkuh na ke ma pahtpaht ac karihngihn kuht liki ma lusrohngtwen ma ahkfohsye kuh kolkuhtlac liki inkacnek luhn wuhlweacng.

Mwe luti yohk srihpac se ke puhpuhlyuck se ke muhtwacn virgin singucul ah pa kuht lahlmwetmwet ke kuht insese nuhke wosasuc, suk in oasr Nguhn Muhtahl yohrohsr, ac sensen in tiac kiacpweyucklac. Muhtwacn fuhsr lahlmwetmwet limekohsr ah tiac kuh in kahsrelos suc wacngihn oil la; wacngihn kuhtwena mwet kuh in aholkuhtlac in insese ke wosasuc, eis Nguhn Muhtahl in kol [kuht], ac kahingkihn kiyacpweyucklac. Kuht enenuh in oruh ma inge nuh sesr sifacna.

Na Mwet Lahngo El sruhmuhn puhpuhlyuck ke taluhn. Ke puhpuhlyuck se inge, mukul se sang kain in luhpah ke mani, pahngpahng taluhn, nuh sin mwet kuhlwacnsap tolu. Nuh sin sie mwet kuhlwacnsap ah el sang taluhn limekohsr, nuh sin siepac el sang luo, ac nuh sin ma se ahktolu ah el sang sie. Ke puhlan pacl se, mwet kuhlwacnsap luo met ah ahkluoiyac ma elos tuh eis ah. Tuhsruhk tuh mwet kuhlwacnsap se ahktolu ac tuh pihkihnyac na taluhn sefanna lal ah. Nuh sin kwewana mwet kuhlwacnsap suc ahkluoiyac taluhn lalos ah, mukul sac fahk, “Kom mwet kulansap wo ac oaru. Wona orekma lom. Kom oaru in liyaung ma pu, inge nga ac fah sot tuh kom in karingin ma pus. Fahsru ac wiyu engankin mwe insewowo luk.”

Na mukul sac ahksuwohsye mwet kuhlwacnsap se suc pihkihnyac taluhn se lal ah ke srihpen el “koluk ac alsrangesr.” Taluhn luhn mwet kuhlwacnsap se inge itucklac, ac el lihsyucklac. Tuh, fuhnuh mwet kuhlwacnsap se inge ahkluoiyac taluhn lal ah, luhkuhn el eis kahs in kaksak ac mwe sang oacna mwet kuhlwacnsap sahyac ah.

Sie pweng ke puhpuhlyuck se inge pa God El tuhpan kuht in ahkyohkye kuh ma utuckuh nuh sesr, tuhsruhk El tiac ke kuht in kapsruh kuhiyacsr nuhke ma luhn mwet sahyac. Motko nuhnak se inge ma utuckuh sin mwet pihsrlac se ke alu Hasidic Jew suc inel pa Zusya fin acn Anipol. Zusya el mwet luti pwengpweng se suc muhtwacwacack in sahngweng ke el apkuhran nuhke misac. Mwet lutlut lal ah siyuck, “Mwet luti, efuh kom rarrar? Kom moulkihn moul wowo; pwacyena lah God Elac usot nuh sum mwe sang yohk.”

Zusya el fahk: “Fin God El fahk nuh sihk, ‘Zusya, efuh kom tiac siepacna Moses?’ Nga fah fahk, ‘Mweyen kom tiacna use nuh sihk nguhna se ma yohk emet ma kom tuh sang nuh sel Moses ah.’ Ac nga fin tu ye muhtuhn God ac El fahk, ‘Zusya, efuh kuh kom tiac siepac Solomon?’ Nga fah fahk, ‘Mweyen kom tiacna use nuh sihk lahlmwetmwet se lal Solomon ah.’ Tuhsruhk, meac nga fah fahk ke nga tu ye muhtuhn Mwet Oreyuclac ac El fahk, ‘Zusya, efuh kom kuh tiac Zusya? Efuh kom tiacna oacna mukul se ma Nga tuh usot kuhiyom in oacna ah?’ Ah, pa oruh nga rarrar uh.”

Pwacyena, God Elac suhpwacrlac fin kuht tiac orekmakihn ohiyac wo, pahkotwen, ac luhngkuhlwacng luhn Mwet Lahngo in ahkyohkye kuh ma utuckuh nuh sesr sin God. Ke kahsruh wolacna Lal, El tuhpan kuht in eklac oacna ohiyac se ma wo emet lasr uh. Lah kuht kuh in muhtwacwacack ke kain in taluhn puhs fahsr sahyacn akwuck Lal. Ac enenuh in ohinge nuh sesr.

Sahflahiyac, Mwet Lahngo El sruhmuhn puhpuhlyuck ke sip ac kot. Ke Elac fohlohkoh in wolacna Lal, “ac mwet in mutunfacl nukewa fah tukeni nu ye mutal. Na el ac fah sraclik mwet uh nu ke u luo, oana ke mwet liyaung sheep uh ac srela sheep liki goat uh.El ac fah filiya mwet suwoswos uh lac paol layot, ac mwet ngia layen lasa.”

Elos suc muhta ke lacyacn lacyot Lal elos usrui tohkohsrahi Lal, ac elos suc muhta ke lacyacn lacsac tiacna eis usru. Ohiyac ma sracloselihk uh lah elos kihtacl ke El masrwinsrwacl, sang kof nimacl ke El maluh, usaclwack nuh in lohm ke El mwet mas, nokomuhlwacng ke El kohflifohl, ac muhtwacta Yohrohl ke El mas kuh muhta in presin.

Mwet nuhkwewa fohsack, kwewana elos ke lacpo lacyot ac elos ke lacpo lacsac. Elos siyuck lah ngac elos oruh, kuh tiac oruh, sang nuh Sel mongo, mwe nihm, ac nuknuk kuh kahsrel ke El muhta in ongaiyac. In topuk, Mwet Lahngo El fahk, “Pwayena nga fahk nu suwos, ke kowos oru ma inge nu sin sie su srik liki nukewa sin mwet lik, kowos oru nu sik.”

Pweng se ke puhpuhlyuck sacn kahlwem: ke kuht kuhlwacnsapuh mwet sahyac, kuht kuhlwacnsapuh God; ke kuht tiac, kuht ahksuhpwacryacl. El kena kuht in orekmakihn mwe sang lasr, taluhn, ac ma kuht kuh kac in ahkinsewowoye moul luhn tuhlihk nuhtin Pahpah Lucng. Kena muhtahl in kuhlwacnsapuh mwet sahyac uh ahkkahlwemyeyuck ke sie poem loeloes sihmlac sin mwet sihm poem se Finland ke inmahsrlon yac sie alfoko kuhtuh ah suc pahngpahng Jonah Ludvig Runeberg. Nga tuhlihk wiyuck ah kwacna lohng poem se pahngpahng “Farmer Paavo” ke kuht srihkyak ah. Ke poem sac, Paavo el mwet imac se suc wi muhtwacn kiyacl ac tuhlihk 10 muhta ke in pohlohn acn se sisken luhluh se infulwen acn Finland. Yac ekahsr tahklac, inkaiyacn ma el ukwi ah kuhnanuclac, ke sronot ma tuhkuh ke pacl se snow ah muhlesrlac, ke hail ke summer, kuh ke mihsrihsr ne ice-lac ke muhtwacwackiyacn puhlan pacl in mihsrihsr uh. Kais sie pacl e kosracni tuh puh, muhtwacn kiyacn mwet imac sac tuhng fahk, “Paavo, Paavo, kom mukul mahtohoh kuluk ohiac se, God El siskuhtlac.” Paavo, el tohpohklah, fahk ke fihsrwacsr, “Kuhlamihseack kulun sahk nuh ke fuhlao ac oraclah puhret tuhlihk nge in tiac masrinsrwacl. Ngac kampare orekma in sackuhnlah kof ah in sohrohrlah liki acn luhluhyak ke kof. God El srihke kuht, tuhsruhk Elac karihngihn [kuht].”

Kais sie pacl ma kuhnausyucklac imac uh, Paavo el sap muhtwacn se kiyacl ah in double-iyac kulun sahk ma el kuhlamihsyac nuh ke fuhlao ah elos in tiac masrinsracllah. El oacyacpac orekma upac liki met ah, sekihn puhk luhf kof ah in sohrohrlah liki fohk uh in ahkolah ahkfihsrwacsrye ke pacl in sronot ac pacl in mihsrihsr ne ice-lac uh.

Tukun yac puhs ke mwe ongaiyac, Paavo el tuhfahna kosrwacni ke fahko yohk se. Muhtwacn kiyacl ah engan fahk, “Paavo, Paavo, pacl pwacr pa nge! Pacl in tolyucklac kulun sahk ah, ac manman puhret orekmakihn fuhlao muhkwena.” Tuhsruhk Paavo el sruokyac poun muhtwacn se kiyacl ah ac fahk, “Kuhlamihsyac tahfuh fuhlao ke kulun sahk ah, tuh imac luhn mwet tuhlan lasr ngi ice-lac.” Paavo el macnsiskuhnlah kosrwacni yohk se luhn sucu lal ah in kahsruh mwet tuhlan lal ma sun ongaiyac ac upac nuh selos.

Mwe luti se ke puhpuhlyuck se lal Mwet Lahngo ke sip ac nacni pa kuht in orekmakihn mwe sang ma utuckuh nuh sesr—pacl, taluhn, ac mwe insewowo—in kuhlwacnsapuh tuhlihk nuhtin Pahpah Lucng, yohkna elos suc muhnahs ac suhkahsruhp.

Solsol luhk nuh sin tuhlihk ke U luhn Tuhlihk Srihsrihk ma nga sruhmuhn piacngah na, ac nuh suwos kais sie, pa in fahsr tukun Jisus Kraist ac in luhlahlfongi Nguhn Muhtahl oacna ke kom luhlahlfongi kawuck sacohk se. Lwelah kahsruh selos suc luhngse kom ac elos suc luhngse Mwet Lahngo. Suk kolyuck luhn God in muhsaheack kuh lom sifacna, ac kahsruh mwet sahyac, finne tiac fihsracsr. Kom ac fah ahkolah in ohsun nuh sin Mwet Lahngo, ac kom kuh in weluhl Prestuhn Nelson in engan yohk. Ke kom kahsruh in ahkolah nuh ke Tuhkuh Ahkluo luhn Jisus Kraist, kom fah ahkinsewowoyeyuck ke finsrak fal in ilyak nuh ke nien monglac luhn Leum, ke pacl se inge ac ke pacl fahsruh uh.

Ke kuht onkihn soko on in alu sasuc:

Ke inen Jisus Kraist, amen.