“Fototome nuh Yuruk”

Tamuhlwel ac tahmtahel sacohk luhk, ac mwe engan se nuh sihk in wi kowos ke toeni luhlahp se inge ke Alu luhn Jisus Kraist luhn Mwet Luhlahlfongi ke Lwen-sahflah. Pa inge Alu Lal. Kuht tuhkweni nuh ke nien toeni ac lohm fin facluh nohfohn ke Inel.

Kuht eis Inel nuh facsr ke kuht ilyak nuh in tohkohsrahi Lal ke wuhlweacng. El pa Wen sifil moulyak ac wolacna nuhtin God. Kuht moul in mahno, oruh ma suhfal ac kuh in misac. Ne ingena, ke luhngse Lal nuh sesr kais sie, Mwet Lahngo El suli kuht in tuhkuh fototoyang nuh Yohrohl.

Pa inge kahs Lal uh: “El fahk lah kuht fin fototo nuh Yohrohl, Elac fototo nuh yohrohsr; kuht fin oaru in Sokol, kuht e Konaclack kuht fin siyuck, kuht ac fah eis; kuht fin tongol, e fah ikacklah nuh sesr.”

Oasr pacl kuht puhla fototo nuh sin Mwet Lahngo Jisus Kraist. Ne ohinge, kuhtuh pacl uh ke ma upac ke moul in mahno lasr uh, kuht ac kuh in puhla lwoesaclihk Luhkwel ac finsrak nuhke sie luhlahlfongi muh El etuh ma oan insiacsr ac luhngse kuht oacna sie mwet.

Solsol luhn Mwet Lahngo weacng inkacnek se in puhla luhlahlfongi sac. Fototoyang nuh Yohrohl pa in Esamuhl pacl e nuhkwewa. Oaru in Sokol ke lutlut ke ma suhmuhslah. Pruhe ac siyuhk ke inse pacye nusin Papah Inkuhsrao in fototoyang nusin Wen Kuloh Natuhl.

Oasr ohiyac fihsrwacsr se in nuhnkuh ke ma inge. Pa inge ma kom ac oruh ke kom lwoesaclihk liki kawuck sacohk se lom. Kom ac suk inkacnek kom in sramsram nuh seltahl, kom ac engankihn kahs nuhkwewa ma kom eis seltahl, ac kom ac oruh kuhiyom nohfohn in kahsreltahl.

Fin puhs pacl sikyak, loeslac, e fokokoi kuhpwahsr ke asruoki sacn, ac kom ac puhla sulpacna fototoyang nuh sin sie sin sie. Fin srihklac pacl kom sislah in sramsram kuhlwacng engan ac inkacnek in kahsruh sie sin sie, kuhpwahsr sac ac muhnahslah.

Jisus Kraist el luhngse kuht kais sie. El use nuh sesr pacl wowo in fototoyang nuh Yohrohl. Oacna sie kawuck wowo, kom fah oruh in yohk oacpacna inkacnek sac, in sramsram ke pruhe nuh sin Pahpah Inkuhsrao ke inen Jisus Kraist, porongo ke kolyuck engan, ac kahsruh mwet sahyac Kacl ke engan. Tiac paht kom ac puhla mwe insewowo se ke fototoyang nuh Yohrohl.

Ke nga fuhsr, nga puhlakihn engan ke tuhkuh fototoyang nuh yurin Mwet Lahngo— ac ke El tuhkuh fototo nuh yuruk— ke mukuikui srihsrihk ke ahkostwen nuh ke masap uh. Ke nga fuhsr ah, sackracmacn orek ke toeni in ekuh. Nga kuh in srakna esam sie ekuh ah, puhs liki yac 75 somlah, arulacna lohsr ac ohyohu lihkihnihm ah. Nga esam nga puhla kahlwem ac fucsrfucsr lun lohm alu ac ke nga akihlen lah nga karihngihn masap in fahsr tuhkweni wi Mwet Luhlahlfongi in ipeis ke kuhfa luhn Leum, olwelah nuh sin Pahpah Inkuhsrao tuh kuht in esam Wen Nahtuhl ac ahkos masap Lal.

Ke sahflahiyen miting sac, kuht yuck on in alu “Abide with Me; ’Tis Eventide,”ke kahs esamyuck kac ah “O Savior, stay this night with me.”

Kahs inge use puhla fokoko luhn Nguhn nuh sihk, finne nga mwet fuhsr se. Nga puhla luhngse ac fototo nuh sin Mwet Lahngo ke ekuh sac tuhkuh ke mihs luhn Nguhn Muhtahl.

Yac puhs tok nga ke ahksasucye puhla sac pacna ke luhngse luhn Mwet Lahngo ac fototo luhk nuh Sel ke sackracmacn miting se ke nga fuhsr ah. Oruh nga liacacng sie pac masap: nga suk ke ma suhmuhslah.

Ke puk lal Luke, nga riti ke lwen ahktolu tukun srihpsrihpyak ac puckpucki Lal, ke mwet kuhlwacnsap pwacye elos tuhkuh, ke luhngse lalos nuh sin Mwet Lahngo, in akmuhsraelah Mahnol. Ke elos tuhkuh, elos liyacack lah yot sac ipiplac liki luhf in kuclyuck sac ac liyacack lah Mahnol wacngihnlac we.

Lipufacn luo tulac siskac ah ac siyuck lah efuh elos sahngweng:

“Efuh kowos kuh suk El suc moul inmahsrlon mwet misac?

“El tiac oasr inge, El ahkmoulyeyuckyak tari. Esam ma El tuh fahk nuh suwos ke El muhta Galilee ac,

“Fahk muh, Wen nuhtin mwet El fah ituckyang nuh in poun mwet koluk, ac El ac fah acnwucki fin sahkseng soko, na tukun lwen tolu El ac fah sifil moulyak.”

Ekuh sacn ke faht ah tili, mwet tuhma lutlut luo fahsr liki Jerusalem ke inkacnek nuh Emmaus, ac Leum sifil moulyak sikyang nuh selos ac weluhlos fahsr.

Puk lal Luke lwelah nuh sesr in weluhlos fahsr ke ekuh sac:

“Ke eltal kaskas ac siyuki ke ma inge, Jesus sifacna el kalukyang nu yoroltal ac welultal fahsr.

“Eltal liyal, tusruktu eltal tiana akilenul.

“Jesus el fahk nu seltal, Mea komtl fahsr srumun an Eltal tukeni tui, ac ngetnet in asor?

“Sie seltal su pangpang Cleopas, el siyuck sel Meac, kom mukena pa mwet mutwata se nu Jerusalem, ma tia etu ke ma orek we ke len ekasr somlah me?”

Elos fahk nuh Sel ke ahsor lalos lah Jisus el misac ke elos luhlahlfongi muh El pa Mwet in Molwelah luhn Israel.

Ac kuh in oasr luhngse ke puhsrwen Leum ahkmoulyeyuckyak sac ke El sramsram nuh sin mwet tuhma lutlut ahsor ac welac luo inge.

Ke nga sikalweni in rit, kahs inge tuhkuh ac ahkkweye insiyuck, oacna nga puhla ke nga mukul fuhsr:

“Ke eltal apkuran in sun siti srisrik se eltahl fahsr nu we ah, Jesus el oru acnu muh el ac fahla na.

“Tuh eltal ikolilya ac fahk, “Tari muhta yorosr, mweyen fongeni pa inge.” Oinge El uytak ac monglac yoroltal.”

Mwet Lahngo El inseselac ke fong sac ke solsol in utyak nuh in lohm sin mwet tuhma lutlut Lal. El muta in welultal mongo. El eis bread ac pre lac kac, na el kunsalik ac sang nu seltal. Na ikakla mutaltal ac eltal akilenulak. Ac in pacl sacna el wanginlac liki ye mutaltal.

Luke el suhmuhslah nuh sesr puhla luhn mwet tuhma lutlut ahkinsewowoyeyuck ah: “Na eltal fahk nuh sin sie sin sie, Yac insiacsr tiac fusrfucryak ke engan, oacna sie e tayak in kut, ke El sramsram nuh sesr inkanek uh ac aketeya nu sesr ke Ma Simusla?”

Mwet tuhma lutlut luo ah silahklahk fohlohk nuh Jerusalem in fahk nuh sin Mwet Sap singucul luo ah ma sikyak ah. Ke elos ahkuhtweyac ma elos tuh liye, Mwet Lahngo El sifil pac sikyang.

El tu inmahsrlolos ac “fahk nuh selos, Misla nuh suwos.” Na El sulpac sruhmuhn palye ke misin Lal in iwe nuh ke ma koluk luhn tuhlihk nuh kewa nuhtin Pahpah Tuhmwacl ac in tuhlahlah kapihr luhn misac.

“Ac fahk nuh selos, Pa inge ma simlac uh: Christ el ac fah keok, ac el ac fah moulyak liki misa ke len se aktolu:

“Ac ke inel, pweng ke auliyak ac nunak munas ke ma koluk enenu in luityuk in facl nukewa, mutawauk Jerusalem.

“Kowos mwet loh ke ma inge.”

Oacna mwet tuhma lutlut, kais sie tuhlihk nuhtin Pahpah Inkuhsrao suc sulaclah in fahsr nuh ke sruhnguhl luhn pacptais olwelah in tu oacna mwet loh luhn Mwet Lahngo ac in karihngihn mwet suc enenuh ke moul suhkawihl lasr. Olwelah se inge ahkkahlwemye nuh sesr yurin mwet pahluh Alma ke Puk luhn Mormon yac puhs somlah ke Kof luhn Mormon:

“Oacna kowos kena tuhkuh nuh ke u luhn God, in pahngpahng mwet Lal, ac kena akacsruhi ke ma toasr luhn kais sie, tuh ma inge in muhlahlahlahi.”

“Ahok, ac kuht kena ahsor yohrohlos suc ahsor; ahok, ac ahkwoyaclos suc enenuh in ahkwoyeyuck, ac tu oacna mwet loh luhn God ke pacl nuhkwewa ac ke ma nuhkwewa, ac ke acn nuhkwewa … , finne ne ke misac, tuh kowos in fah moliyucklac sin God ac … tuh kowos in eis moul ma pahtpaht.”

Ke kom karihngihn olwelah inge, kom ac konwacack lah Leum El liacacng olwelah Lal in ma sefanna yurum ke kuhlwacnsap lom, oruh tuh ma toasr lom in muhlahlahlac. Ac fah yohkwelihk etuh lom Kacl, ac ke sie pacl kom ac eklac oacna El ac “ahksuwohsyeyucklac Sel.” In kahsruh mwet sahyac, kom ac konwacack tuh kom ac fahsr fototo nuh Sel.

Puhs suwos oasr mwet kowos luhngse ma kuhflah liki inkacnek nuh ke moul ma pahtpaht. Kowos motko muh meac pac kowos kuh in oruh in fohlohkuhnuhlosme. Kowos kuh in luhlahlfongi ke Leum in fototoyang nuh yohrohlos ke kowos Kuhlwacnsapwacl ke luhlahlfongi.

Kowos esam olwelah luhn Leum nuh sel Joseph Smith ac Sidney Rigdon ke elos som liki sucu lalos ke sap Lal uh. Leum El fahk nuh sel Sidney ac Joseph, lah sucu lalos uh fokoko; elos oasr Inpacol, ac El ac oruh kaclos ma El sulaclah muh wo uh; tuh El kuhlacna.

Ke kowos sang mwe kahsruh kuh kahsrwelos suc enenuh, kuh luhn Leum fah ahkkweye kowos. Pahol orekwelihk wi pouwos in ahkinsewowoye tuhlihk nuhtin Pahpah tuhmasr Inkuhsrao.

Mwet kuhlwacnsap ke wuhlweacng nuhkwewa luhn Jisus Kraist fah eis kolyuck Lal ke elos ahkinsewowoye ac kuhlwacnsuhpuh mwet sahyac Kacl. Na elos ac puhla luhngse Lal ac sokwack engan ke elos fototoyang nuh Yohrohl.

Nga sie mwet lohoh ke Moulyak luhn Leum oacna nga in oasr we ke ekuh sacn wi mwet tuhma lutlut luo lun lohm se ke inkacnek Emmaus ah. Nga etuh lah El moul.

Pa inge Alu—pwacye luhn Jisus Kraist uh. Kuht ac fah, ke Lwen in Nuhnuhnkuh, tulac ye muhtuhn Mwet Lahngo, angetacni. Ac fah sie pacl in engan yohk nuh selos, ke moul se inge, suc fototo nuh Yohrohl ke kuhlwacnsap Lal ac kuh in tuhpan in lohng kahs inge: “Orekma lom wo, kom mwet kuhlwacnsap wo ac oaru.”

Nga fahkwack na pwacye oacna sie mwet lohoh luhn Mwet Lahngo ahkmoulyeyuckyak sac ac Mwet in Molwelah lasr ke inen Jisus Kraist, amen.