Kahsruh Wolacna Nuhke Moul Suhkawihl

Kacl mwet pahluh Joseph Smith, Leum el ikacslah kuhtuh ma ke moul lasr met liki kuht isuslac nuh facluh. Ingoh, kuht moul oacna tuhlihk nguhn nuhtin God. Ke srihpen God el kena kahsruh tuhlihk nahtuhl in kapkapwack, El otwelah in oraclah sie facluh suc kuht ac kuh in eis sie mahno, lotwelah ke ma kuht puhlakihn, muhsahi ohiac wolacna, ac in ahkpwacye in liye lah kuht ac liacacng masap luhn God. Elos suc oraclah wo fah oasr “wolacna fihliyucki fin sifaclos nuh tok ma pahtpaht ac ma pahtpaht” (Abraham 3:26).

In muhsahi ohiyac se ke plwacn wolacna se inge, God el sulaclah Wen Kuloh Sefanna Nahtuhl in pa Mwet Lahngo lasr uh. Lucifer, suc nuhnkuh in ahollah fah kuhnahoslah sukohsohk in sulaclah luhn mwet, eklac Satan ac el “sisilac nuh ten.” Suhpweyucklac el nuh facluh ac itucklac suwohs lal liki moul in mahno, fihlfihlac Satan elan srihke “in kiacpwelah ac in lohsrwaclah muhtuhn mwet, ac in kohlohltahl ke luhngse lal, finne mwet puhs fah tiac porongo puhsrwen” [God] (Moses 4:4).

Enenuh se nuhke Plwacn wolacna luhn God nuhke kapkapwack luhn moul luhn tuhlihk Nahtuhl pa elos in puhlakihn “kihsruhngyacn ma nuhkwewa” (2 Nephi 2:11). Oacpacna ke kuhiyen muhsuhl ke mahno luhn sie mukul tiac kuh in kapwack kuh ahkwoyeyuck fin wacngihn lainyacn masap ke kracfihti, tuh kapkapwack luhn moul in mahno enene kuht in tuyak lain mwe sruhf lal Setuhn ac kuhtuh ma siena liki moul suhkawihl. Yohk srihpac luhn kapkapwack luhn ma kawihl pa enenuh se nuhke sulaclah inmahsrlon ma wo ac ma koluk. Elos suc sulaclah ma wo fah kapkapwack nuhke acn wolacna selos wacngihn sahflaahiyac. Elos suc sulaclah ma koluk—oacna ke elos nuhkwewa oruh ke kain in mwe sruhf luhn moul sukawihl—enenuh kahsruh nuhke molwelah, suc God luhngse se ahkolah in sang.

Ne ingena, kahsruh yohk se emet luhn God pa ke mwe sang Lal ke Mwet Lahngo se, Jisus Kraist, suc ac fah kweok in moli molo sac ac sang nuhnak muhnahs nuhke auliyak luhn ma koluk. Pahkotwen ac Iwaclah wolacna sac ahkuhtweyac lah efuh luhlahlfongi Leum Jisus Kraist pa ip yohk ke wosasuc. Iwaclah Lal “use moulyak luhn mwet misac” (Alma 42:23), ac El “iwaclah ma koluk luhn facluh” (Alma 34:8), elah nuhkwewa ma koluk ke auliyak lasr ac sang nuh sin Mwet Lahngo kuh in kahsrwe kuht ke muhnahs luhn moul suhkawihl lasr uh.

Nuhke iyucklac wolacna se ke ma koluk oreklac ac in nuhnak muhnahs kac, plwacn luhn sie Pahpah oaru Inkuhsrao sang mwe sang puhs sahyac in karihngihn kuht, weacng in karihngihnkuhtyang liki orekma koluk lasr ke pacl omet ah. Moul in mahno lasr uh kwacna muhtwacwacack yurin sie pahpah ac ninac. Woiyac uh, eltahl kwewa in oasr, wi kain in mwe sang in kol kuht nuhke kapkapwack lasr uh. Fin tiac, wacngihn lalos uh pa kuhtuh ma lainyacn ma kuht enenuh in kuhtanglah uh.

Plwacn luhn Pahpah Inkuhsrao kahsruh mwet sahyac in kol kuht ke fuhfahsryucr in moul suhkawihl lasr uh. Nga ac fah sramsramkihn ahkosr sin ma inge. Nuhnak muhnahs nimet oek yuc nuhke nacmpuh ahk ahkosr, mweyen kahsruh inge afihnyucki. In tahfwelah, oasr kuhtuh pac karihngihnyuck ke luhngse weacng ma inge.

Ma se met, Nga sramsram ke Kahlwem sac kuh Nguhn luhn Kraist. Ke luti wolacna lal ke Puk lal Moroni, Moroni el tahfuh luti luhn pahpah tuhmwacl ah lah “Nguhn luhn Kraist el ituckyang nuh sin mwet nuhkwewa, tuh elan kuh in etuh ma wo liki ma koluk” (Moroni 7:16). Kuht riti mwe luti sepacna inge ke fwackyuck in lwen lasr uh.

“Ac Nguhn sac sang kahlwem nuh sin mwet nuhkwewa ma tuhkuh nuh facluh; ac Nguhn sac lotwelos nuhkwewa fin facluh, ma porongo ke puhsra luhn Nguhn” (Doctrine and Covenants 84:46).

Sifilpac, “tuh Nguhn luhk suhpweyucklac nuh facluh in luti mwet puhsisacl ac muhsahllah, ac in nuhnuhnkuh elos suc orekma koluk” (Doctrine and Covenants 136:33).

Prestuhn Joseph Fielding Smith el ahkuhtweyac lah: “Leum el tiacna ngwetlah liki mwet uh (ke eltahl isuslac nuh fin facluh se inge) muhnahslah, suk in konwacack kahlwem ac ma pwacye, tuhsruhk mwet nuhkwewa … el isuslac ke suwohs lal in eis kolyuck, mwe luti, ke kahsruh ke Nguhn luhn Kraist kuh Kahlwem luhn Ma Pwacye.”

Mwe kahsruh yohk ahkluo se inge utuckuh sin Leum in kahsrwe kuht sulaclah ma pwacye pa mwe kol wolacna se ke ma suhmuhslah oacna ip se ke plwacn luhn molwelah (plwacn luhn engan). Inkacnek inge eltahl masap, akwuck ac wuhlweacng.

Masap el ahkuhtweyac inkacnek Pahpah Inkuhsrao el mahkiyac nuh sesr kuht in fahsr nuh met nuhke moul ma pahtpaht. Mwet ma motko muh masap pa ohiyac se God el sulaclah lah suc ac nuhnuhkweyuck tiac na kahlwem ke srihpac se ke luhngse luhn God ke plwacn luhn engan. Ke inkacnek soko ah, kuht kuh in kahkahsrihk ahksahfyelah ma enenuh nuhke kuhpwahsr lasr yurin Mwet Lahngo ac fal in epeis kap ke kuh Lal in kahsrwe kuht ke inkacnek lasr nuhke acn El kena nuh sesr nuhkwewa. Pahpah tuhmwasr Inkuhsrao el kena tuhlihk nuhkwewa Nahtuhl in fohlohk nuhke tohkohsrahi luhn celestial, suc Pahpah ac Mwet Lahngo lasr muhta we, ac in muhta ke kain moul se lalos ma muhta ke wolacna luhn celestial.

Akwuck ac wuhlweacng eltahl ip ke masap ma ahkuhtweyac inkacnek nuhke moul ma pahtpaht. Akwuck, ac wuhlweacng muhtahl kuht oruh nuh sin God kaclos, enenuh step nuhke step ac enenuh kalkal sisken inkacnek uh. Nga luhngse nuhnak ke ip luhn wuhlweacng oacna ahkkahlwemyeyuck lah ye plwacn luhn God, mwe insewowo yohk emet ituckyang nuh selos suc olwelah na met in liacacng kuhtuh sin masap ac suc sruokyac olwelah ingoh.

Kuhtuh kahsruh ma God-El sang oraclah sulalah wowo pa ke akuhtweyac luhn Nguhn Muhtahl. Nguhn Mutahl el mwet in kahsruh ahktolu ke Sifac ke God. Orekma lal, ahkuhtweyucki ke ma suhmuhslah, in fwackack Pahpah ac ke Wen, in luti kuht, in use ma nuhkwewa nuhke mwe esam lasr, ac in kol kuht nuhke ma pwacye. Ma suhmuhslah weacng ahkuhtweyac pucspucs ke mwe ahkpwacye luhn Nguhn Muhtahl, oacna sie mwet loh ke ma kawihl in topuk ke sie ma sukok ke ma pwacye ke Puk luhn Mormon. Sie ahkuhtweyac el tiac ma in ahkfohsyeack mwe sang luhn Nguhn Muhtahl suc pa ituckyang tukun pacptaislac.

Sie sin ma yohk srihpac emet ke kahsruh luhn God nuh sin tuhlihk pwacye Nahtuhl pa mwe sang luhn Nguhn Muhtahl. Yohk srihpac luhn mwe sang se inge el kahlwem na pwacye lah el ituckyang tukun auliyak ac pacptaislac ke kof, “na tohkoh [ma suhmuhslah el ahkuhtweyac] tuhkuh iyucklac luhn ma koluk lowos ke e ac ke Nguhn Muhtahl” (2 Nephi 31:17). Mwet ma oasr yohroh iyucklac luhn ma koluk—ac ahksasucye ahknwasnwacs lalos lwen nuhkwewa ke auliyak lwen nuhkwewa ac moul fal nuhke wuhlweacng eltahl oraclah ke akwuck luhn sackruhmacn—kuh in eis olwelah ma Nguhn Muhtahl, Nguhn luhn Leum, “fah weluhlos … pacl nuhkwewa” (Doctrine and Covenants 20:77).

Ohinge, Prestuhn Joseph F. Smith el luti lah Nguhn Muhtahl el fah “ahklahlmwetmwetye insifen mwet ke ngwetngwet nuhke ma luhn God, in eyense nuh selos ke pacl in eklac lalos in oruh ma luhngse luhn Pahpah , ac in oan yohrohlos sie luhlahlfongi kuh pwacye oacna sie asruoki nuhke sahflahiyen moul, mukuikui oacna sie kolyuck pwacye ac wo nuhke ma pwacye nuhkwewa ac nwackuhloslac lwen na lwen ke engan ac kaksak, ke sikalweni in oruh wo nuh sin mwet nuhkwewa, kweok ke ma koluk likina in oruh ma koluk, in kuhlwacng ac nuhnak muhnahs, muhtweng ac pahkomuhta. Elos nuhkwewa ma oasr yohroh mwe sang yohklacna se inge, mwe sang sacohklacna se inge, tiac tui maluh lalos ke ma suwohswohs. Fin wacngihn kahsruh luhn Nguhn Muhtahl, ” Prestuhn Smith el ahksahfye in fahk, “wacngihn moul in mahno kuh in fahsr ke inkacnek suwohs ac ohsrihksrihk soko ah.”

Ke kahsruh fokoko puhs in kol kuht nuhke fuhfahsryucsr ke moul suhkawihl lasr uh, arulacna ahksuhpwacr lah puhs selos srwackna tiac ahkolah nuhke pacl in ohsun lalos yurin Mwet Lahngo ac Mwet in Molwelah, Jisus Kraist. Puhpuhlyuck soko Lal ke virgin singucul ac, fusus sruhmuhnyac ke toeni se inge, motkwoeyuck muh elos ma suliyuck in ohsun nuh Sel uh, tahfuh na selos ac fah ahkolah.

Kuht nuhkwewa etuh mwe srihkasrak ke tiac ahkolah uh: misineri fohlohkuh ma foskackuhnlah kap luhn ma kawihl lalos ke lusen pacl tiac active, mwet fuhsr fuhlwelosi nuhke mwe sensen nuhke kap luhn ma kawihl lalos ke elos lwoesaclihk liki luti ke Alu ac mukuikui, mukul ma fosyekuhnlah akwuck nuhke Melchizedek Pristut, mukul ac muhtwacn—kuhtuh pacl uh fihl sasuc se nuhtin pioneer suwohswohs kuh ninac pahpah wowo—ma tuh som liki inkacnek luhn wuhlweacng fotolac in oraclah ac liacacng wuhlweacng ke tempuhl muhtahl.

Puhs kain fahsrwelihk se inge sikyak ke mempucr tiac uke plwacn ke pwelucng luhn ma kawihl in sifacna pruhe, rit ma suhmuhslah lwen nuhkwewa, ac sikaleni na in auliyak. Oacpacna, nuh selos suc pihlwesruh in ahksasucye wuhlweacng lalos ke wik nuhkewa in epeis ke kuhfa luhn Leum. Kuhtuh fahk muh Alu uh tiacna ohsun nuhke enenuh lalos uh; ma inge ahollah ma elos liye nuhke enenuh lalos pacl fahsruh uh met likina ma Leum el sang kahsruh ke luti pucspucs Lal ac pacl wo nuhke kahsruh lasr ma enenweyuck sin mwet sahyac.

Mongfihsrwacsr ac luhlahlfongi ke Leum pa ono nuhke kain fahsrwelihk se. Oacna ke Puk luhn Mormon luti, Leum “El ahkinsewowoye ac ahkkweye elos suc fihliyac luhlahlfongi lalos in El” (Helaman 12:1). Luhlahlfongi in Leum el enenuh se sriyucklac nuh selos nuhkwewa ma tahfonglac in srihkeyac masap luhn God ac luti luhn mwet pahluh Lal in lain ma konweyuckyak sasuc ac lahlmwetmwet luhn mwet.

Nga sramsramkihn tari ke kahsruh puhs luhn moul suhkawihl ma Pahpah oaru tuhmasr Inkuhsrao use in kahsruh tuhlihk Nahtuhl in fohlohk nuh Yohrohl. Ip kunwacsr ke plwacn wolacna se inge pa in luhlahlfongi ke God ac suk ac orekmakihn kahsruh wolacna inge, yohk liki nuhkwewa ke Iwaclah luhn Wen Kuloh Nahtuhl, Mwet Lahngo ac Molwelah lasr, Jisus Kraist. Nga pruhe tuh kuht in luti ac moulkihn ip yohk inge, ke inen Jisus Kraist, amen.