Mwichenapen Mwichefen
Epinukunuk me Mwen Mesen Kot
April 2025 mwichenap
11:59

Epinukunuk me Mwen Mesen Kot

Seni Preseten Russell M. Nelson

Presetenin Ewe Mwichefenin Jises Kraist ren Aramas mi Pin non Fansoun Soponon

Nupwen sia achocho ne kutta an epwe wor rech tong ennet me nimenimoch repwe ourano manauach, ach nukunuk ne feino ren Kot epwe napeno.

Pwii me fefinei achengicheng, uwa unusen kinisou ai upwe kapas ngeni kemi ikenai non ei auchean mwichenap. Mesei ra soposopono ne ngaweno. Kinisou ren ami weweiti nupwen ua atoura ai porous.

Sia nom non ei fansoun watten mwokutukut non Ewe Mwichefenin Jises Kraist ren Aramas mi Pin non Fansoun Soponon. Ua uren pwapwa ren ai kuna fetanoch non chommong neni.

Ua akkaewin mwar ren nouch kewe serafo. Chommong ra angang ngeni ekkoch. Ra kutta ar neuo me fori ekkewe angangepin non ewe tempel. Nouch serafo anuon me fopun ra wanong nour toropwen angangen misineri non rekotun ukukun chommongur seni akkom. Ei maritan tappin aramas a marita usun chon tapweno mwirin Jises Kraist.

Preseten Nelson ren noun noun nengin.

Arapeto chok ua churi emon noun noun nei nengin minafo. Nupwen ua ekieki usun ekkewe sossot epwe fis non manauan, ua mefi ew watten mochen ai upwe anisi ne amari an nuku non Jises Kraist. An manaueni An kapas allim mi auchea ren pwapwan non fansoun mwan.

Ei nengin, a ussun emon me emon kich, sipwe kuna sossot. Kich meinisin sipwe mefi samau, netipechou, sossot, me riaffou. Ekkei sossot ra tongeni apwangapwanga ach pwisin nukunuk. Nge, kich chon kaeo noun Jises Kraist a wor rech tufich ngeni ew pwan sokkun epinukunuk.

Nupwen sia fori me aponueta ekkewe pwon ngeni Kot, a tongeni wor rech epinukunuk minne mi feito seni ewe Ngun. Ewe Samon a ureni ewe Soufos Joseph Smith pwe ach nukunuk a tongeni “pochokununo me mwen mesen Kot.” Aneanei ewe kinamwen an wor apinukunuk me mwen mesen Kot!

Nupwen ua kapas usun an wor ach nukunuk me mwen mesen Kot, Ua kapas usun ach epinukunuk ne feino ren Kot iei! Ua porous ussun iotek fiti nukunuk pwe Samach won Nang a rongorong ngeni kich, pwe I a weweiti ach osupwang nap seni kich. Ua porous ussun awora nukunuk pwe I a tongei kich nap seni ach sipwe weweiti, pwe I a tiniato kewe chon nang ar repwe nom rech me nom ren ekkana sia tonger. Ua kapas usun an wor ach nukunuk pwe I a mochen epwe anisi emon me emon kich sipwe tikeri unusen ach tufich.

Iei, Ifa usun sipwe angei ena sokkun nukunuk? Ewe Samon a ponuweni ei kapaseis fiti ekkei kapas: “Mut ngeni nenukemi repwe … uren tong ennet ngeni aramas meinisin, … me mut ngeni nimenimoch esap kouno ne enninga ami ekiek; iwe ami nukunuk epwe pochokun me mwen Kot.”

Ina ewe kii! Non an ewe Samon pwisin kapas, tong ennet me nimenimoch ra suki ewe anen epinukunuk me mwen Kot. Pwi me fefinei, kich mi tongeni fori ei! Ach epinukunuk mi ennetin tongeni pochokununo me mwen Kot , iei chok!

Sipwe ekieki ir me ru tong ennet me nimenimoch.

Aewin, tong ennet. Ru ier a no, ua tingorei kich, usun chon tapweno mwirin Jises Kraist non pwon, pwe sipwe chon fori kinamwe. Ua anniwini met ua apasa akkom: “Song ese tongeni pesei. Koput ese apochokuna emon. Anini fengen ese tongeni emwen ngeni amemefin atawei osukosuk.”

Ennetin tong ennet ngeni aramas meinisin ina ewe esisinen chon fori kinamwe! Mi auchea epwe wor rech tong ennet non ach porous fengen, nein aramas ika non monomon. Ua kinisou ngeni ekkewe ra ausening ngeni ai we akkom ourour. Nge sia tongeni amurunonoi.

Ewe ngawenon kakapas fengen iei nein aramas me won social media a anoninen. Kapasen koput ir mi efeiengaw. Anini fengen a eppeti ewe Ngun mi Fel seni an epwe cheichiach fansoun meinisin.

Usun chon tapweno mwirin Jises Kraist, sipwe emweni ewe an usun chon fori kinamwe. Nupwen tong ennet a winiti pekin nonnomuch, sipwe aturano ewe mochenin angawano ekkoch. Sipwe kouno ne apungu ekkoch. Epwe wor rech tong ennet ren ekkewe ir mi feito seni sokopaten manau. Tong ennet ngeni aramas meinisin mi auchea ngeni fetanochuch. Tong ennet ina ewe nongonongen napanapen Kot.

Sipwe tingor ngeni Samach won Nang an epwe amasowa netipach ren watten tong ennet—akkaewin ren ekkana a weires ach sipwe tonger—pun tong ennet ew niffang seni Samach won Nang fan iten ennetin chon tapweno mwirin Jises Kraist. Ewe Chon Amanau i ewe Kingen Kinamwe. Sipwe Noun chon angangen kinamwe.

Iei, sipwene kapas usun nimenimoch. Ewe Samon a ureni kich pwe sisap kouno ne eninga ach ekiek ren nimenimoch. Ekieki ewe pochokun oupwe angei, ngeni och ekiek murino, nupwen oua anapano ren nimenimoch. Nimenimoch a fori mettoch meinisin epwe murinono me napeno pwapwan! Nge fen pwan ew, ekieki met epwe fis, nupwen oua apachata nimenimoch ngeni eu ekiek ese nimenimoch, eu ekiekingaw, ika ew ekiek mi anetipengaw. Nimenimoch epwe asueno ekkena ekiek. Nimenimoch epwe angasa kemi seni aurek, ekiek osukosuk.

Pwi me fefinei, nupwen ewe fonufan a marino ren ngaw, mi namot sipwe amari wattenon nimenimoch. Ach ekiek, kapas, me foffor mi namot resap ekkesiwin ninimenimochur, me ureno ren ewe ennetin tongen Kraist ngeni aramas meinisin. Ei watten tufich me mwach ina ach sipwe winiti ekkewe aramas Kot a mochen sipwe winiti.

Ach fen ngeni non imwen ewe Samon iteitan a anapano ach tufich ren tong ennet me nimenimoch. Iwe, ach fansoun non ewe tempel a anapano ach nukunuk me mwen ewe Samon. Napenon fansoun non ewe tempel epwe anisi kich ne monneta ngeni ewe Oruwen Wareto an ach Chon Amanau, Jises Kraist. Sise sinei ewe ran ika awan An wareto Nge ngang mi sinei pwe ewe Samon a peseiei pwe upwe apochokuna kich ne monneta ngeni ena ran mi ”auchea me anoninen.”

Nupwen sia achocho ne kutta an epwe wor rech tong ennet me nimenimoch repwe ourano manauach, ach nukunuk ne feino ren Kot epwe napeno. Ua tungor ngeni kemi oupwe mochen ekkoch foffor ne amari ami nukunuk me mwen ewe Samon. Mwirin, nupwen sia feino ngeni Samach non Nang ren wattenon epinukunuk, sipwe ureno ren watten pwapwa, me ach nuku non Jises Kraist epwe napeno. Sipwe poputa ne mefi manamanen ngun mi nap seni ach kewe watten apinukunuk.

Sia kinisou ngeni ewe Samon ren ewe mwitirinon kautan tempel non ekkei ier. Fan An emwen, ikenai, sia esinesin ussun kewe kokkot ne aueta eu tempel non ew me ew ekkei neni:

  • Reynosa, Mexico

  • Chorrillos, Peru

  • Rivera, Uruguay

  • Campo Grande, Brazil

  • Porto, Portugal

  • Uyo, Nigeria

  • San Jose del Monte, Philippines

  • Nouméa, New Caledonia

  • Liverpool, Australia

  • Caldwell, Idaho

  • Flagstaff, Arizona

  • Rapid City, South Dakota

  • Greenville, South Carolina

  • Norfolk, Virginia

  • Spanish Fork, Utah

Ua pwarata pwe Jises Kraist, ewe Chon Angasano Israel, a emweni ei, An Mwichefen. I a amonnata an epwe niwin sefan. Amwo sipwe pwan usun ne monneta ne etiwa I. Ren ei ua iotek non iten Jises Kraist, amen.

Esinesin

  1. Ewe kukkun foun fau minne ewe soufos Daniel a kuna non an tan usun ewe fansoun soponon a mwokutuno ne pwonuono ewe fonufan (nengeni Daniel 2:31–45; Doctrine and Covenants 65:2).

  2. Doctrine and Covenants 121:45.

  3. “ Upwe feino mwen mesemi. Ngang upwe nom won peniemwanum me peniefefinom, me Nguni epwe nom non netipemi, me nei kewe chon nang repwe rokopwanikemi, ne apochokunakemita (Doctrine and Covenants 84:88).

  4. Doctrine and Covenants 121:45auchean mi kapacheta; nengeni pwan okisin 46

  5. Russell M. Nelson, “Peacemakers Needed,” Liahona, May 2023, 98.

  6. Fini ne anini ngeni ekkoch oua fini ne manau me nukun ewe emwenin ewe Ngun mi Fel.

  7. Epwe wor rech tong ennet “ngeni aramas meinisin, me ngeni ewe imwen nuku (Doctrine and Covenants 121:45).

  8. Ei wewen iotek “ren unusen pochokunen netip” (Moronai 7:48).

  9. Nengeni Moronai 7:48.

  10. Nengeni Isaiah 9:6.

  11. Usun Joseph Smith a aiti kich, “Ika [sia] aneanei sipwe feino ikewe Kot a nom ie, [sipwe] usun Kot, ika anomu ekkewe nongonong minne a wor ren Kot” (Teachings of Presidents of the Church: Joseph Smith [2007], 72). Usun chok, ewe Aposel Paul a ngeni kich ewe kapasen fon pwe sipwe “pwaracho ne feinno ngeni ewe nenien mottun chen, pwe sipwe angei umoumoch o kuna chen pwe repwe anisi kich non fansoun osupwang” (Hebrews 4:16).

  12. Nengeni Matthew 24:36–37.

  13. Malachi 4:5; nengeni pwan Zephaniah 1:14–18.

  14. Ewe Samon a ureni kich pwe sipwe chechemeni nuku, nimenimoch, mirit, netipoch, tipepos, kirekiroch, usun Kot, tong ennet,tekison, [me] achocho (Doctrine and Covenants 4:6). Nupwen sia fori, ach nukunuk epwe napeno, iwe mwirin, non An pwisin kapas, nupwen sia tingor, sipwe angei. Me nupwen sia fichifich, epwe suk ngeni kich. (Nengeni Doctrine and Covenants 4:7.)

  15. Meni sipwe mefi met noun King Benjamin kewe aramas ra mefi: “Ra ureno ren pwapwa, ra angei omusomusen ar kewe tipis, me angei kinamwen memef, pokiten watten ar nuku minne a nom non Jises Kraist” (Mosaia 4:3).