“Oupwe Arap Ngeniei”

Pwi me fefinei mi achengicheng, iei ai pwapwa ai nom remi non ei mwichenap ren ewe Mwichefenin Jises Kraist ren Aramas mi Pin non Fansoun Soponon. Iei An Mwichefen. Sia chufengen non imwenipin me imwach non unusen ewe fonufan non Itan.

Sipwe mwarei Itan we nupwen sia tonong non Muun we ren pwon mi pin. I ewe Noun Kot mi manausefan me ning. Kich aramas, sia nom fan nemenien tipis me mano. Nge, non An tong fan iten emon me emon kich, ewe Chon Amanau a tingor sipwe feito arap ngeni I.

Iei An tingor ngeni kich: “Arap ngeni ei me Ngang upwe arap ngonuk; achocho ne kukutaei me kopwe kunaei; tungor o kopwe angei; fichifich, iwe epwe suk ngonuk.”

Mei wor fansoun sia mefi ach arap ngeni ewe Samon Jises Kraist. Iwe nge, fan ekkoch fansoun ach sossotun ei manau, sia mefi towaweno seni I me aneanei ew kapasen anukunuk pwe I a sinei met mi nom non netipach me a tongei emon me emon kich.

An ewe Chon Amanau tingor mi pachenong ewe anen ach sipwe mefi ena epinukunuk. Arap ngeni I ren ach chechemeni I fansoun meinisin. Achocho ne kutta I seni ach kaeo pukefel. Tingor ngeni Samach won Nang seni ennetin netip ach sipwe mefi arap ngeni Noun we Achengicheng.

Mi wor ew mecheresin anen ach sipwe ekieki ussun. Iei met oupwe fori ika oupwe keimufesen ren ew fansoun seni emon achengicheng chiechiemi. Oupwe kutta eu anen ami oupwe kapas ngenir, oupwe aucheani ese nifinifin porous oua angei senir, me oupwe fori met oua tongeni ne anisir.

Ren an napeno an fis, pwan ina tamenon an epwe fis, ewe onononunon ririn chiechioch epwe pochokunono, me oupwe mefi pwisin ami arap fengen. Ika a watte fansoun a fen no nge ese wor auchean kapas fengen me ewe tufichin aninis fengen, ewe chiechi epwe apwangapwangeno.

Jises Kraist a tongei emon me emon kich. I a awora ngeni kich ena tufichin arap ngeni I. Usun ren emon chiechiemi mi uren tong, oupwe fori non ena chok napanap, ren porous fengen non iotek ngeni Samach non Nang non iten Jises Kraist, ausening ren auchean emwen, me angang ngeni ekkoch fan Itan non pwapwa. Ekis ngeni oupwe mefi ena feiochun arap ngeni I.

Non ai ierin sarafo, Ua mefi ewe pwapwa ai arap ngeni ewe Chon Amanau—me An arap ngeniei— non mecheresin fofforun aneasochis ngeni kewe annuk. Nupwen ua chok onuon, ewe sakramen a inetiu fansoun ew mwichen nekunion. Ngang mi chok chiwen chemeni ew pwin, nap seni 75 ier a no, nupwen a kiroch me patapat nukun. Ua chemeni ew memefin saram me aro pwichikar nupwen ua esinna pwe ua aponueta ewe annuk ai upwe chufengen me ekkewe Souneng ne angei ewe sakramen, pwon ngeni Samach won Nang ai upwe chemeni Noun we fansoun meinisin me aponueta An kewe annuk.

Nesoponon ewe mwich non ena pwinin, am aua konu ewe kon “Abide with Me; ‘Tis Eventide,” fiti ekkewe kapas non, “O Chon Amanau, kopwe nonnom rei non ei pwinin.”

Ekkei kapas ra wato ew watten memefin ewe Ngun ngeniei, inamo ika ngang emon chok onuon at. Ua mefi an ewe Chon Amanau ewe tong me an arap ngeniei non ena kunionun seni ewe kinamwein ewe Ngun mi Fel.

Ier mwirin, ua mochen upwe asofosefani ewe chok pwan memefin an ewe Chon Amanau tong me ewe arap fengen me ewe Samon ua fen mefi non ena atun mwichen sakramen non ai we onuon at. Iwe ua aneasochisi pwan ew annuk: iwe ua anneani ekkewe pukfel.

Non ewe puken Luke, ua aneani ussun ewe aunungatin ran mwirin An ewe Irapengesino me peiaseno, nupwen ekkewe chon angang mi nikitu ra war, ren ar tong ngeni ewe Chon Amanau, ar repwe epiti Inisin. Nupwen ra wareto, ra kuna ewe fau a mwokut seni ewe peias me kuna pwe Inisin ese nom ikewe.

Ruemon chon nang ra uta me eis pwata ra nuokus:

“Pwata oua kutta ewe emon mi manau nein ekkewe mi mano?

“Ese nom ikei pwe a fen manaueta: chechemeni minne a apasa ngenikemi nupwen a nom non Galilee,

“A apasa, Repwe afangema ewe Noun aramas ngeni ekkewe chon tipis, iwe repwe irapengesino, nge mwirin unungat ran epwe manausefan.”

Ena kunionun nupwen a rochono, ruemon chon kuno ra feinno seni Jerusalem won ewe aan ngeni Emmaus, me ewe Samon mi manausefan a pwato ngenir me a fitir ne fefetan.

Ewe puken Luke a mut ngenikich sipwe fitir ne fetan non ena kunionun:

“Nupwen ra poporous fengen, nge pwisin Jises a fetan ngenir o a fitir ne feffetan.

“Nge ra kuna i, nge rese sinei i.

“Me a apasa ngenir, Met oua porous fengen won, nupwen oua feffetan me netipengaw?

“Emon me neir, itan Cleopas, a ponueni ngeni i, “En chok emon wasona non Jerusalem, kose sinei ekkewe mettoch ra fis non ekkei ran?”

Ra ereni I usun ar netipechou pwe Jises a mano nupwen ra fen apinukunuku pwe I epwe Chon Angasanon Israel.

Eni ewe Samon mi manaueta a kapas non tong nupwen A kapas ngeni ekkei ruomon chon kaeo mi netipechou.

Nupwen ua sopweno ne anea, ekkei kapas ra pwato kapas minne ra ekinamwei netipei, ussun chok met uwa mefi nupwen ua chok emon kukkun at:

“Nupwen ra arap ngeni ewe sop, repwe feino ngeni, ita Jises epwene soposopono ne won ewe an.

“Nge ra aueno i, ra ereni, Kopwe nom rem: pun a pwinituk. Iwe a nomeno rer.”

Non ena pwinin ewe Chon Amanau a etiwa ewe tingor an epwe tonong non imwen Noun kewe chon kaeo. A motiw pwe epwe fitir ne mongo. A angei pinewa o a efeiochu, a kinifeseni, o a ngenir. Meser a suk me ra sineni I. Nge A mworeno me mwer.

Luke a rekotuni fan itach ekkewe memef an ekkana chon kaeo: “Me ra kapas fengen nefiner, met netipach ese mwokutukut usun chok ew ekkei mi ngetenget nupwen a kapas ngeni kich won ewe aan o a awewei ngenikich ewe pukepin?”

Ekkewe ruemon chon kaeo ra mwitir niwinsefanino Jerusalem ar repwe ureni ekkewe engon me emon Aposel met ewe a fis. Nupwen ra aporousa met ewe a fis, ewe Chon Amanau a pwan pwa sefan ngenir.

A uta me mwer o “apasa ngenir, Kinamwe epwe nonnom remi.” I a apasa sefanni ekkewe osini usun An misin pwe epwe achasefani tipisin Noun Seman kewe meinisin me mutti ekkewe senin mano.

“Iwa a apasa ngenir, Iei usun a makketiw, pwe ewe Christ epwe riaffou o epwe manaueta seni mano murin unungat ran:

“Ewe poraus usun aier me omusomusen tipis repwe aronga fetanei, poputa seni non Jerusalem.

“Ami chon pwarata ekkei mettoch.”

Ussun chok Noun kewe auchean chon kaeo, emon me emon semirit noun Samach won Nang ewe a fen finata an epwe tonong non ewe titin papatais a nom non pwon mi pin an epwe emon chon pwarata usun ewe Chon Amanau me an epwe tumunu ekkana mi osupwang unusen manauach iei. Ei pwon a for fan itach seni ewe auchean soufosun ewe Puken Mormon Alma fansoun nom ren kewe Konikin Mormon:

“Ussun oua wesen mochen feito ngeni ewe mwicheichen Kot, me iteni noun aramas, me oua mochen mwarei fengeni an emon me emon chou, pwe repwe tongeni pan;

“Ewer, me oua mochen netipeta ren ekkewe ra netipeta; ewer, me aururu ekkewe ra mochen aurur, me oupwe chon pwarata usun Kot fansoun meinisin me non mettoch meinisin, me non neni meinisin … , pwan mwo tori mano, pwe oupwe tongeni ngaseno ren Kot, … pwe oupwe ani manau esemuch.”

Nupwen oua nikitu ngeni ekkei pwon, oupwe kuna pwe ewe Samon a aponueta An pwon an epwe nom remi non ami angang, epwe fori osemi repwe pan. Oupwe sinei ewe Chon Amanau, me non fansoun epwe feitto oupwe ussun I me “oupwe unusochuno non i.” Ren ami anisi ekkoch fan iten ewe Chon Amanau, oupwe kuna pwe oua arap ngeni I.

Chommong me neimi mi wor noumi mi achengicheng ra fen towaweno seni ewe aanen manau esemuch. Oua aureki ika met oupwe fori ne eniwinireto. Oua tongeni anongonong won ewe Samon an epwe arap ngenir nupwen oupwe angang ngeni I non nuku.

Oupwe chechemeni an ewe Samon pwon ngeni Joseph Smith me Sidney Rigdon nupwen ra no seni ar famini won An angang. “Chiechiei Sidney me Joseph, ami kewe famini ir mi pochokun; ir mi nom non Poun, me i epwe for ngenir met A ekieki pwe mi och; pun I mi unusen manaman.”

Nupwen oua fotano kinasen ekkana ra mochen aninis, an ewe Samon manaman epwe anisi kemi. Poun kewe epwe eitieu fiti poumi ar repwe anisi me efeiochu ekkewe semirit noun Samach won Nang.

Meinisin noun Jises Kraist chon angang chon ewe pwon mi pin repwe angei An emwen seni ewe Ngun nupwen ra efeiochu me angang ngeni ekkoch fan Itan. Mwirin repwe mefi An ewe Chon Amanau tong me kuna pwapwa non ar arap ngeni I.

Ngang emon chon pwarata usun Manausefanin ewe Samon usun ita ngang mi nom ren noun kewe ruomon chon kaeo non ewe imw won aanen Emmaus. Ua sinei pwe I mi manau.

Iei An ewe ennetin Mwichefen—ewe Mwichefenin Jises Kraist. Sipwe uta me mwen ewe Chon Amanau, sipwe nenefengen non ewe Ranin Kapung. Epwe ew fansoun watten pwapwa ren ekkana, non ei manau, ekkewe ra fen arap ngeni I non An angang me ra tongeni awitiwit non meseik ar repwe rongorong An ekkei kapas: “Oua fokkun angang weires, ami chon angang mi murinno me nikitu.”

Ua pwarata usun emon chon pwarata ussun ewe Chon Amanau mi manausefan me ach Chon Angasano, non iten Jises Kraist, amen.