An Emon Amonneta epwe Churi ewe Chon Amanau

Pwi me fefinei achengicheng, non ewe October, Preseten Russell M. Nelson a aiti, “Iei ewe fansoun ami me ngang sipwe amonneta ngeni ewe Oruwen Wareto an ach Samon me Chon Amanau, Jises Kraist.” Nupwen Preseten Nelson a kapas usun ewe Oruan Wareto, a fori ren pwapwan epinukunuk. Nge inamo, emon nengin non Primary a keran ureniei pwe a noninen inet chok emon a kan kapas usun ewe Oruan Wareto. A apasa, “Ua nuokus pokiten mettoch mi ngaw repwe fis me mwen Jises epwe niwin sefan.”

Esap chok semirit ra mefi ei sokkun. Ewe murinon fon ngeni ewe nengin, ngeni kemi, me ngeniei pwe sipwe tapweno mwirin an ewe Chon Amanau afanafan. An kewe ourour rese monomon are fitikoko. Nupwen sipwe tapweno mwirir, ese namot sipwe nuokus ika noninen.

Arap ngeni omuchunon An angangen afanafan won fonufan, Jises Kraist a angei ew kapaseis inet I epwe niwin sefan. Ren ponuwan, A afanafana unungat kapas monomon, mi mak non Matthew 25, ren ifa usun sipwe amonneta ne churi I— ika epwe atun An Oruan Wareto are inet chok sia tou seni ei fonufan. Ekkei afanafan ir mi auchea pokiten an emon amonneta epwe churi Kot ina nukanapen popun manau.

Ewe Chon Amanau a aewin aporousa ewe kapas monomon usun ekkewe engon fopun. Non ei kapas monomon, engon fopun ra feino ngeni ew kametipen apupunu. Nimmon mi mirit ra uwei soposopun anonon nour kewe nam, me nimmon mi tiparoch rese. Nupwen kokkon wareton ewe chon apupunu a fis, ekkewe fopun tiparoch ra feino repwe kamo anonon nam. Nupwen ra niwin, ra mang; asamen ewe imwen kametip a kesip.

Jises a affata unungat kinikinin ewe kapas monomon an epwe anisi kich. A awewei:

Iwe non ena ran, nupwen upwe feito non ai ning, epwe kapas monomon epwe pwonueta minne ua kapas usun ekkewe engon fopun.

Pun ekkewe mi tipachem me ra fen etiwa ewe ennet, me ra anommu ewe Ngun mi Fel an epwe emwenir, me rese tupuno—ennetin uwa apasa ngeni kemi, repwe engino ngeni ewe ran.

Non ekkoch kapas, ese namot repwe nuokus ika noninen pokiten repwe manau me fetanoch. Repwe pochokun.

Ika sia mirit, sia angei ewe ennet ren ach etiwa ewe kapas allimen Jises Kraist seni angangepinen pristut me pwon mi pin. Mwirin, sia achocho ne soposopono sipwe fich ngeni ewe Ngun mi Fel epwe nom rech fansoun meinisin. Ei tufich emon me emon epwe pwisin angei, ekis me ekis. Ach pwisin soun foffori mwokutun nukuchar a etiwa ewe Ngun mi Fel epwe emweni kich.

Ewe aunungatin kinikinin Jises a affata ach sipwe apinengaw seni nikatuputup. Ewe Chon Amanau a fonou:

“Oupwe tumunu fichi pwe ousap tupuno ren emon.

Pun chommong repwe feito non itei, repwe apasa, Ngang Kraist; me repwe otupu chommong.

Ewe Chon Amanau mi sinei chon otuputup repwe sossot ne otupano ekkewe mi kefinita me chommong chon kuno repwe tupuno. Sisap nuku ekkewe ra chofona ne apasa pwe ra angei ar mumuta seni nang ika ra kukkuta ar mirit me emwen seni nikatuputup.

Ewe Puken Mormon a aiti kich ifa usun sia tongeni asokofeseni nefinen chon atupano seni chon kuno. Chon kuno ra pesei ach sipwe nuku non Kot, angang ngeni I, me fori mi och. Sisap tupuno nupwen sia kutta me angei ourour seni ekkoch mi wenechar ekkewe ir pwisin chon kuno mi nikitu noun ewe Chon Amanau.

Sia pwan tongeni emonungaw seni nikatuputup ren ach fen ngeni I non ewe tempel. Ei a anisi kich ach sipwe anommu ew ekiek esemuch me tumunu kich seni mwokutukut minne repwe aosukosuka me erika kicheno seni ewe aaen pwon mi pin.

Ewe auchean nesenin ei kapas monomon ren ekkewe engon fopun pwe sipwe mirit nupwen sia etiwa ewe kapas allim, kutta an ewe Ngun mi Fel epwe nom rech, me emonungaw seni nikatuputup. Ekkewe nimmon fopun mi mirit rese tongeni anisi ekkewe ese wor rer anonon nam; ese wor emon a tongeni etiwa ewe kapas allim, angei ewe Ngun mi Fel pwe ew emwen, me epinengaw seni nikatuputup fan itach. Sipwe fori ei fan asengesich pwisin.

Ewe Chon Amanau a aporousa ewe kapas monomon usun ekkewe foun moni. Non ei kapas monomon, emon mwan a ineti sokofesenin ukukun moni, mi wewe ngeni talents, ngeni unumon chon angang. Ngeni emon chon angang a ngeni nimu foun moni, ngeni pwan emon a ngeni ruofou, me ewe aunumonun a ngeni efou. Non ekkoch fansoun, ekkewe akkom ruemon chon angang ra anapano fan ru met ra fen angei. Nge ewe ounumonun chon angang a chok ireno noun we efou foun moni. Ngeni ir me ruemon ekkewe chon angang ekkewe ra anapano fan ru nour kewe foun moni, ewe mwan a apasa, “A murino, nei chon angang mi och me nukuchar: ka fen tupwen won ekkoch mettoch, upwe fori kopwe chon nemenem won chommong mettoch: tonong non pwapwan om Samon.”

Ewe mwan mwirin a esita ewe chon angang ewe a ireno noun ewe foun moni pokiten an “ngaw o chipwang.” Noun ei chon angang foun moni a angei seni, iwe a katuruu. Nge, ika ei chon angang e anapno fan ru nou ei foun moni, i epwe fen pwan angei ewe chok mwar me niwinoch usun ekkewe pwan ekkoch chon angang.

Ew porousan ei kapas monomon pwe Kot a esuku kich pwe sipwe anapano ekkewe tufich sia fen angei, nge I ese mochen sipwe anono fengeni ach tufich ngeni an ekkoch. Ekieki usun ei wewe a kawor me ren emon mi sinenap chon Jew non 18th-century itan Zusya seni Anipol. Zusya i emon sense mi itefouno ewe a poputa ne nuokus nupwen a arap ngeni mano. Noun chon kuno a eis, “Masta, pwata ka chechech? Ka fen manaueni eu manau mi och; ennetin Kot epwe ngonuk ew watten niwinin.”

Zusya a apasa: “Ika kot a apasa ngeniei, ‘Zusya, pwata kose pwan emon Moses?’ Upwe apasa, “Pokiten kose ngeniei ewe watten ngun ka fen ngeni Moses.’ Me ika ua uta me mwen Kot me A apasa, ‘Zusya, pwata kose pwan emon Solomon?’ Upwe apasa, ‘Pokiten kose ngeniei ewe miriten Solomon.’ Nge, ina, met upwe apasa ika ua uta me mwen nei Chon For me A apasa, ‘Zusya, pwata kose Zusya? Pwata kose ewe mwan ua ngonuk ewe tufich kopwe winiti?’ A, ina popun ua chechech.”

Ennetin, Kot epwe tipengaw ika sise anongonong won ekkewe tufich, chen, me ningen ewe Chon Amanau ne anapano ekkewe tufichin Kot sia fen angei. Ren An aninisin tong, I a esuku kich sipwe winiti napanapochuch. Ach sipwe poputa ren sokofesenin tufich ese auchea ngeni I. Me epwe ina usun me rech.

Omuchunon, ewe Chon Amanau a aporousa ewe kapas monomon usun ewe ekkewe siip me sike. Nupwen I a niwin non An ning, “me mwen i meinisin muu repwe chufengen: me i epwe aimu feseni noun siip seni ekkewe sike: me i epwe annomu ekkewe siip won peniemwanin, nge ekkewe sike won peniefefinan.”

Ekkewe won Peniemwanin ra winiti chon repwe muuni An muu, me ekkewe won Peniefefinan resap angei muur. Ewe sokofesenin napanapan esap ika ir ra amongoni I nupwen I a echik, ngeni I konik nupwen a kaka, etiwa I nupwen A emon wasona, aufoufa nupwen a seneno, me churi I nupwen a semwen ika kanapus.

Meinisin ra osukosuk, ir me ru ekkewe won peniemwanin poun me ekkewe won peniefefinan poun. Ra eis inet ra, ika inet rese, ngeni I mwongo, konik, me uf ika anisi I nupwen I a apwangapwang. Ren ponuwan, ewe Chon Amanau a apasa, “Ennetin uwa apasa ngeni kemi, pwe fansoun meinisin ouwa fori ei napanap ngeni emon pwi kei mi kisifochofoch, ouwa pwan fori ngeniei.”

Ewe porousen ewe kapas monomon mi fatoch: nupwen sia angang ngeni ekkoch, sia angang ngeni Kot; nupwen sise, sia enetipengaw. I a esuku kich pwe sipwe aea ach niffang, sine, me tufich ne efeiochu manauen noun Semach won Nang kewe meinisin. Ewe mochenin angang ngeni ekkoch a anapanapetiw non ew poem mi makketiw non ewe 19th century seni ewe chon mak chon Finland itan Johan Ludvig Runeberg. Am me pwi kewe aua soun rong ewe poem “Farmer Paavo” nekukunum we. Non ewe poem, Paavo i emon chon atake mi woungaw ewe a nom ren punuwan we me nour semirit non ewe kinikin konik nukanapen Finland. Ekkoch ier mi tetenino, napengeni an we atake a tano, ika epwe seni ewe pupun konik seni tenin snow, monumonun summer, ika ew mwitirin patekich. Iteiten fansoun a tori kinikin uwa, punuwen ewe chon atake wa a siongaw, “Paavo, Paavo, en mwan serengaw, Kot a fen nikitokono.” Paavo, non ponuwan, mese wenewen a apasa, “Nofiti sinin popun ira ngeni ewe pinewa amas om kopwe for pinewa pwe ekkewe semirit resap achik. Upwe angang weires ne okusano ewe pwakak non ewe atake. Kot a chok sotuni kich, nge I epwe awora.”

Iteiten ekkewe ira ra tano, Paavo a ouroura punuwan we epwe anapano ewe ukukun sinin popun ira ewe a nofiti ngeni ewe pinewa mi amas an epwe ekisano ar achik. A pwan sopweno ne angang weires, tu pwang ne okusano ewe pwakak me ekisano ewe feiengawen kusun konikin spring me ewe fansoun patekich.

Mwirin ierin angang weires, Paavo a keran kini uwanochun an atake. Punuwan we a pwapwa, “Paavo, Paavo, ekkei fansoun pwapwa! Iei fansoun sipwene oturano ewe sinin popun ira, me kuk pinewa seni chok rye.” Nge Paavo a ennetin angei poun punuwan we me apasa, “Nofiti esop ewe pinewa mi amas ngeni ewe sinin popun ira, pun an chon oruch we atake a founo ren patekich.” Paavo a fangeno an me an we famini uwaoch ne anisi chon orun mi nichupung me osupwang.

Ewe nesenin an ewe Chon Amanau we kapas monomon usun ekkewe siip me sike pwe sipwe aea ach niffang a kawor ngeni kich—fansoun, sine, me feioch—ne angang ngeni noun Samach non Nang, akkaewin ekkewe mi apwangapwang me woungaw.

Ai tingor ngeni ewe semiriten Primary mi noninen ua kapas usun akkom, me ngeni emon me emon ami, pwe oupwe tapweno mwirin Jises Kraist me nuku ewe Ngun mi Fel usun oupwe nuku emon achengicheng chiechiemi. Anongonong won ir ekkewe ra tongei kemi me tongei ewe Chon Amanau. Kutta an Kot emwen ne amari ami tufich mi sokono, me anisi ekkoch, pwan nupwen ese mecheres. Oupwe mwonneta ne churi ewe Chon Amanau, me oua tongeni fiti Preseten Nelson non pwapawn epinukunuk. Ren ami fori, oua anisi ewe fonufan epwe monneta ngeni ewe Oruan Wareto an Jises Kraist, me oupwe feioch ren epinukunuk ne tonong fan mesen me pwapwan ewe Samon, iei me non fansoun mwach.

Nupwen sia konu ew me nein nouch kewe minafon kon mi fel:

Non iten Jises Kraist, amen.