Me Mwen Mesach

Pwi me fefinei, Ua men kinisou ai nonom remi. Am oua tongekemi, aua men kinisou remi, me mefi feiochun ami kewe iotek.

Preseten Russell M. Nelson a apasa non ewe mwichenap ano: “Ami mi kuna met mi fis me mwen mesach? Uwa iotek pwe sisapw tumunungaw ngeni ei amwararen fansoun! Ewer ewe Samon a fen emwitirano An angang.”

Emwitirano An angang. “Emwitirano” iei ei kapas a auchea. A pesei an epwe mwitir ne mokut, mokutukai, ika fen atapwana. Non fefeitan ewe Mwichefen me ewe kokkot an Kraist, emwitirano a fis. Me kich meinisin ew kinikinin.

Non April 1834, non Kirtland, Ohio, ewe Soufos Joseph Smith a ochufengeni meinisin ekkewe ra komoch ewe pristut non eu kukkun imwen sukun, a ukukun 14 fit nonon (4.3 m) square. Sia tongeni okuchu engon me ruu ekkena imwen sukun non ei Nenien Mwichenap, epwe pwan chok wor nusun neni. Joseph Smith a apasa, “A chok chokukun ekkei Pristut oua kuna ikei nepwinei, nge ei Mwichefen epwe amasowa Merika seni Eer ngeni Enefen—epwe amasowa ewe fonufan.”

Ewe osini afen fis “me mwen mesach.” Ewe Mwichefenin Jises Kraist ren Aramas mi Pin non Fansoun Soponon a napono ren memper me famini, misin me misineri, ekkewe imwen chufengen me tempel, me non ekkewe chon fiti simineri, institutes, me universities non unusen fonufan.

Sia fokkun kinisou ne nom won ei fonufan nupwen ei Mwichefen a wesen napono chochon me mokutukutun, nge auchean non netipen me manauwen ekkewe memper. Sia sinneno pwe kich noun Jises Kraist chon kaeo. Sia atoura fengeni ach kapasen pwarata fan Itan, An Mwichefen, me An anen pon mi pin. Kich Noun aramas, me I ach we Chon Amanau.

Ua men ingeiti met Preseten Nelson a eita ngeni ewe “manamanen ei fansoun” me apasa an ennetin kinisou ngeni ewe Samon ren An angang. Upwe pesei kich sipwe sopweno ne pochokun usun Noun chon kaeo, chon pwarata ewe osini afen fis, me nom tori ikenai.

Mi wor chon esit repwe pupuchor ne apasa, ‘Neto, ikei!’ me … ‘Neno ikanan!’” ussun chok ra fori non ewe fansoun an ewe Soufos Joseph Smith. Nge nengeni, ir iei me repwe chok kukkunu pochokuner non ei angang mi murino. Chechemeni an Joseph Smith kewe kapas “Ese wor pau mi ngaw a tongeni akouono ewe angang seni an epwe fefeita; angangen u ngeni epwe napeno, …ewe ennetin angang an Kot epwe chok fokkun feinno non pochokun, sufon, me won winikapan tori an epwe tonong non meinisin fonu, churi meinisin sopw, nimetano meinisin muu, me mongungunong non sening meinisin, tori ekkewe popun an Kot repwe taweochuno me ewe Jehovah mi napanap epwe apasa ewe angang a wes.”

Non ai kewe asaimen non ei ier, ua fen pwisin kuna an ewe Samon Emwitirano An angang. Ewe Mwichefen a mwitir ne auweta ekkewe tempel ekis meinisin, ngeni ekkewe souneng ar tufichin pin ngeni non ewe imwen ewe Samon. Oruwan, angangen misineri a ochufengeni rekotun watten nampa ngeni ewe mwicheichen ewe Masen Sipw mi Murino, Jises Kraist. Me ounungatin, an Mwichefen pekin kaeo mi kawor non sokopaten napanap a watteno tufichin ngeni ekkewe ra “kukkuta ei Jises.”

Ikenai ewe Mwichefen a wor 367 tempel non sokkun napanap minne ra fori ngeni ika auweta. Iwe ren met popun? Ponuwan a pwa won eu me eu ekkewe tempel: “Pin ngeni ewe Samon.” Ewe tempel a suki ewe an ngeni ewe watten feioch Samach won Nang a awora faniten emon me emon kich. Pwi me fefinei, sia emwitiri ach pin nupwen sia manau nimenimoch non tempel, usun sia fen ngeni non imwen ewe Samon, me nupwen sia fori pwon mi pin ngeni Kot fanitach me fan iten ach kewe newo won epek ewe mangaku.

Preseten Nelson a apasa: “Ewe chon ungeni a fokkun napono fetanin, ren pochokunan me non sokkun meinisin. Namoten ach sipwe nom non ewe tempel fan chommong a fen watte namotan. Upwe tingor ngeni kemi opwe ennetin iotek me nengenochu met a nap ami fori.” Non Imwan sia tongeni mefi an ewe Samon nimenimoch me manamanen kinamwe.

Non ewe ier ano, ua tufichin nemeni ewe efeioch ren ewe tempel Mendoza non Argentina. Non ai we porous, ua kapas usun an Elter Melvin J. Ballard we osini non 1926 pwe an ewe Samon we angang epwe marino ekis me ekis non South America, “usun chok fetanin efoch oak seni efou acorn. Ese tongeni epwe pukuta non eu ran,” nge ngorou repwe fiti ewe Mwichefen, me ekkewe muun South America epwe winiti “pochokun non ewe Mwichefen.” Ua kuna ena osini pwe a fis me mwen mesei.

Mendoza, akom a kukkun usun acorn, a winiti eu pochokunen oak. Ena marino a chew fetan non ekkewe fonu watte me fonu neset.

Sia kuna ewe Samon a emwitirano An angang non misin. Non 2024, 80,000 misineri ra angang non 450 misin. Inik me onu me neir minefo misin. Non ewe ier ano angangen misineri a uweiato nap seni 308,000 minefo memper ngeni ewe Mwichefen. Nap seni nampa, ewe ngunun ochufengeni a uweiato aramas ngeni Jises Kraist me An kapas allim.

Ua ekieki usun ewe Aposel Brigham Young me Heber C. Kimball, ekkewe ra no misineri non kewe fonuen British non 1839. Ir mi semwen; ra suseni ar famini nge ir mi semwen me osupwang. Inamo ren ena, ekkewe ruemon ra tota won efoch wakon, me unukur ar kewe famini, Heber a apasa, “Sipwe uta me mweirer.” Ekkewe ruemon ra achocho ne uta me puchor, “Hurrah, hurrah ren Israel.”

Ua kuna pwan ena sokkun amwararen angang an ewe Samon non Lima, Peru, nupwen ua churi ekkewe misineri seni ewe nenien kaeo ngeni misineri me misin non Lima. Met mi amwarar! Ua kuna ewe mwitirinon me mwen mesei. Iei a fisu misin non ewe chok sopw Lima.

Nesoponon am we mwich, mi wor an ekkewe misineri amwairu ngeni ei. Ra uta me mweir, “Hurrah ren Israel.” Use tongeni monukano ewe fansoun; ua anean amwo ami meinisin mi nom ikewe. Me mwen mesei ekkewe misineri minne ra nikitano “ekkewe mettochun ei fonufan” ar repwe angang ngeni ewe Samon me anisi ne emwitiri An niwinsefan.

Sia kuna an ewe Samon emwitiri tufichin kaeo ngeni memper me pwan ngeni ekkewe esap ir memper non unusen fonufan. Eu me nein ekkei mettoch minne sia sokofesen usun ewe Mwichefen ina ach weweiti usun pekin kaeo non sukun. Ewe Samon a annuku me nom non ewe fansoun Niwinsefanito sipwe “kakaeo, seni kaeo me pwan seni nuku.” Ena a fis ikenai me mi namot ach sipwe apasa sefani “Hurrah.”

Iei a nap seni 800,000 chon sukun non unusen fonufan ra fiti siminary me institute, ewe waten chon fiti non uruwon ei Mwichefen. Nouch kewe sarafo ra chufengen non sokopaten napanap, seni nesosorusich, neanowas, me klasin nekunion ngeni online, me kaeo non imw. Ra men pochokun me wenechar sounfiu, ra angei ar pochokun seni emon me emon nupwen ra kaeo usun Jises Kraist, tapweno, me pwarata usun I pwe i ewe Noun Kot.

Fan ewe September ua afanafan non eu mwicheich a ur ren ekkewe simineri me institut me iner me semer kewe non ewe University Utah. Ar fiti ewe mwich a pwarata usun ar mochen repwe sinei me tapweno mwirin Jises Kraist. Ai kapas ngeni ekkena chon sukun a fokkun fatoch: Ngeni ewe Samon nonopokun fansoun. Ua peser pwe repwe anonnopoku ar kaeo fiti ennetin anapano ar kaeo, pwan mo ew kaeo ussun “Noun ewe Kot mi manau.”

A chok nonno met uwa tingor ngeni meinisin ikenai: Mettoch meinisin won ami tettenin met oupwe fori, anonopoku fansoun, esap fansoun ese wor met opwe fori, ngeni ewe Samon non ami kaeo ekkewe pukefel, an famini kaeo usun Feito, Tapweto Mwiri, iotek, wis non Mwichefen, iamwir, angei ewe sakrament, fen non tempel, me ekieki ekkewe mettochun Kot. Ach Samon me Chon Amanau a apasa, “Kaeo usui … me opwe kuna ngasonon ngunumi.” Nuku An kapas. Me ngeni I nonnopokun ami fansoun.

President Nelson a apasa: “Ua sio ngeni kemi oupwe mut ngeni Kot epwe nemenem non manuemi. Ngeni I ekis nafochun ami fansoun. Nupwen oupwe fori, nengenochu met a fis ngeni ami amwokutun pekin ngun mi och.”

Sia kuna ena mwokutukut a foruta non simineri, institut, me university an Mwichefen. Non ekkei neni, ewe Samon epwe akkom. Nge Epwe nonom non manauen emon me emon kich.

Pwan eu neni a pwano ewe marita non pekin kaeo non ewe Mwichefen ewe BYU–Pathway Worldwide. Unusen fonufan, chon fiti a fen tori arapakan 75,000 me soposopono mwitirin ne marino. Napengeni ir memper, me nap seni eu-na unungat ra nom Africa. Pathway eu anen tufichin pekin kaeo. Awesano ewe kinikinin kaeo wewen tufichin angang, me tufichin angang wewen eu manau murino ngeni famini me ekkoch tufichin angang ngeni ewe Samon.

Nupwen ua churi ekkewe nouwisin steik non Uganda, ua sinei pwe ewe unusen steik presetensi ra fiti ewe BYU–Pathway. Nupwen sipwe fokkun moneta non aion me ngun, sipwe pwan tongeni pochokun ngeni ewe chon ungeni kich. Chechemeni an Peter kapas: “Ewe tefin, a usun puchorun emon naion, a fefetan, kukkuta ion epwe oromano.”

Ua esina pwe nukanapen ewe murinon porous ren ewe kapas allim, mi wor ekkewe ra riaffou, ekkewe ra weires non nuku, tipemwaramwar, me kapas eis mine esap wor ponuwan. Pwi me fefinei, Jises Kraist i ewe ponuwan. Poputa ren I. Kukkuta Poun non manauemi. Ausening ngeni I. “Ousap tipemwaramwar,” A apasa non An we saingonon fansoun ngeni Noun kewe chon kaeo me mwen Gethsemane, me mwen epwe mwarei An we irapenges won ewe an ngeni Jerusalem, me mwen Golgotha, ikewe A awesano An we asorun achasefan— met I chok, ewe Anamon Noun Kot, a tongeni.

Sinei pwe I mi weweiti. A wata won Inisin unusen ach tipis, mwanino, riaffou, me ekkewe ran mi fokkun ngaw pwe sipwe tongeni pwan nonnom ren Samach won Nang non fansoun ese much. A apasa, “Nenengeniei non ekiek meinisin; ousap tipemwaramwar, ousap nuokus.” Nuku non Jises Kraist a tongeni chunakemita me echikara ngunumi mi tatakis. Epinukunuku I me oupwe emwitirano ami fansoun niwinsefan ngeni “poun An tong.”

Upwe eniwinsefani ewe kapas an nouch we soufos mi manau: “Ami mi kuna met a fis me mwen mesach? Uwa iotek pwe sisapw tumunungaw ngeni ei amwararen fansoun! Ewer ewe Samon a fen emwitirano An angang.” Amo kich noun chon kaeo non ach ei fansoun sipwe puchor, “Hurrah ren Israel” nupwen sia amonata ren ewe niwinsefaniton ach ewe Samon me Chon Amanau. Non iten Jises Kraist, amen.