Sufon ren Mettoch Mi Pin

Non ewe puken Exodus, sia sai fiti Moses ngeni ekkewe nemonun Chukun Horeb nupwen a sapeseni an angang iteiten ran—och mettoch sipwe chengen ne fori—ach sipwe kuna ewe ira mi ngetenget nge ese kareno. Nupwen a fetan ngeni, “Kot a kori i seni nukanapen ewe ira, me apasa, Moses, Moses. Me i a apasa, Ngang iei. Me Kot a apasa, … kopwe pwiniti noum kana sus, pun ka ukkuta won ena neeni mi pin.” Non watten sufon, tekison, me mwar, Moses a pwiniti noun kewe sus me amonnata inisin an epwe rong ewe kapasen ewe Samon me an epwe mefi me mwen Mesan mi pin.

An pwato won ena chuk mi pin a ew memef mi uren sufon, a ochufengeni Moses ngeni nonnomun manauan mi pin, me, ennetin, ew kiien nongonongun an siwin seni emon chon masen siip mi tekison ngeni emon soufos mi napanap, a emweni i an epwe fetanei ew minafon aanen manau. Usun chok, emon me emon kich sia tongeni siwini wisach chon kuno ngeni ew tekian tetten mi pin ren ach fori echipwerun sufon epwe ew kinikinin napanapen ngunuch.

Ewe kapas sufon mi tongeni wewe ngeni ewe kapasen foffor non Latin revereri, minne wewen “mwareiti och mettoch.” Non pekin kapas allim, ei wewen ewe kapas mi ochufengeni ew memef ika napanapen ennetin sufon, tong, me kinisou. Ei sufonun mettoch mi pin me ren ekkewe mi wor rer netip niamam me ennetin nikitu ngeni Kot me Jises Kraist a anapa watten pwapwa non ngunur.

Sufon ren mettoch mi pin ina ewe watten pwarata usun ew auchean murinon pekin ngun; ina ew pungunon ach riri ngeni met mi pin me pwarano ach tong me ach arap ngeni Samach non Nang me ach Chon Amanau, Jises Kraist. Ina pwan ew me nein ekkewe tekian memef ngeni ewe ngun. Ena sokkun echipwer a emweni ekiekich, netipach, me manauach ngeni Kot. Non ennetin, sufon esap chok ew pekin ngun; ina auchean—ewe nongonong won minne pekin ngun a kauta won, a fori ew ririfengen ngeni met mi pin, usun nouch semirit ra aiti kich nupwen ra konu: “Nupwen Ua sufon, ua sinei non netipei /Samach non Nang me Jises ra arapeto.”

Kich noun Jises Kraist chon kaeo sia kokoto ach sipwe amari ewe niffangen sufon non manauach ren ach sipwe ennet ne porous ngeni Kot me Noun we, Jises Kraist, epwe pwan chok apochokuna napanapen ngunuch. Mi wor ach watten memmef non netipach, esap wor tipemwaramwaren watten pwapwa me mwanek non manauach, me epwe kisikis nenien netipechou me netipengaw. Sipwe fokkun chechemeni pwe ach pwarano sufon ren mettoch mi pin a awora popun met sia fori iteiten ran me apochokuna ach memefin kinisou—a awora mwar, sufon, me tongen mettoch ra kon tekia me pin.

Ngawan chok, sia nom non ew fonufan ikewe ach pwarano sufon ren mettoch mi pin a napeno an ese fifis. Ennetin, ewe fonufan a apwapwai met mi namotongaw, usun ar kakaton mazagine, prokram won tv, ika met ewe internet a awora. An ese wor sufon ren met mi pin a awora napenon tanechepwak me tumunungawen foffor, minne mi tongeni mwitir ne siwini ew tappin aramas resap mefi chengen me efisi ewe pwan ew tappin aramas ngeni riaffou.

Osufonungaw a tongeni emwenikicheno seni ekkewe ririfengen minne pwon mi pin ren Kot a awora me a ekisano ach pungun memef me mwen Kot. Ren pungunon, sipwe feiengaw ne ekieki chok pwisin ach kinamwe; amenemenochu ach mochen ese kouk; me omuchunon tori ew kinikinin oput mettoch mi pin, pwan mwo Kot, me pwan fen napanapach mi pin usun noun Samach non Nang semirit. Osufonungawei mettoch mi pin a sopweno an ewe chon koum ekita an epwe aosukosuka aanen ach angei pwarata minne mi auchea ngeni manauen ngunuch non ach ei fansoun.

Ewe wewen me auchean sufon ren met mi pin mi aweweochutiw non unusen ekkewe pukefel. Ew awewe non ewe Doctrine and Covenants usun a affata pwe sufon ngeni Samach non Nang me Noun we Jises Kraist ew auchean napanap ren ekkewe ir repwe muuni ewe muun selestial.

Kich chon ewe mwichefen sia achocho ne anomu ewe Sam me ewe Nau non watten pin me sufon non meinisin kinikin, mi pachenong ifa usun ach anapanapa Napanaper. Ewe emwenin ewe Ngun mi Fel ew auchean kinikin non ach apungano ifa usun ekkei ununun repwe engunuwa wesewesen, napanapan me nikinikin ewe Sam me ewe Nau. Sia fokkun tumunoch ne emonungaw seni ach anapanapa mettoch mi tongeni aosukosuka kich seni ach ionapen anonga Samach non Nang me Noun we Jises Kraist me Ar afanafan, mi pachenong ifa usun sipwe aea pisek mi kawor seni technology, usun aean artificial intelligence (AI) ne for mettoch me sasing.

Ei pwan chok nongonong a nounou ngeni och popun porous mi kawor seni ewe ekkewe weswesen aanen porous seni ewe Mwichefen. Meinisin nesen, puk, me manual, me porous mi foroch me mumuta fan emwenien ewe Ngun an epwe forochu pwe sipwe annomu pinin, auchean, me nongonongen ewe kapas allimen Jises Kraist. Non ew porous a keran tou ngeni ekkewe serafo mi mwukono non ewe Mwichefen, Elter David A. Bednar a aitir, “Ach sipwe kasini ewe fitikokon ochufengenin pekin ngun me technology, Aramas mi Pin non Fansoun Soponon repwe tekison me iotek (1) ne esinna nongonongen kapas allim ewe epwe tongeni emweni ar aean artificial intelligence me (2) ennetin achocho ngeni ewe cheiechien ewe Ngun mi Fel me ewe niffangen pwarata ren pekin ngun.”

Pwi me fefinei achengicheng, inamo ren eingeingen technology ikenai, ese fokkun tongeni ussun ewe amwarar, ingeno, me memefin mairu a pwa non ewe sokkun sufon a fis me ren manamanen ewe Ngun mi Fel. Kich chon kaeo noun Jises Kraist, sipwe tumunoch ach sisap apwangapwangano ach riri ngeni Kot me Noun we ren ach aea mettoch mi ngaw ra pwa won media ese fich ar repwe pwa. Sipwe chechemeni pwe ach anongonong won technology ren “pochokunen aramas” ina ew ekkesiwin ese naf me ese sufon ren ewe ourour, osukun, me pwarata minne sia tongeni chok angei seni manamanen ewe Ngun mi Fel. Usun Nifai a apasa: “O Samon, ua fen apinukunuk non en, iwe upwe wanong ai apinukunuk non en tori feinfeino chok. Usap tongeni pungutiw ai we apinukunuk non poun futuk.”

Non pwan ew pwarata, ewe Soufos Joseph Smith a angei ourour pwe tempel ra kauta ngeni ewe Samon repwe ew nenien sufon ngeni I. Non unusen an angangen afanafan, nouch achengicheng soufos, Preseten Russell M. Nelson, a apochokuna ach fen non sufon non ewe tempel mi pin. Non ewe imwen ewe Samon, sia kaeo usun tonong non pinin fan mesen ewe Sam me ewe Nau. Ua kuna fansoun meinisin pwe mi ourouroch me pwan amwarar pwe ew me nein ekkewe akkomwen mettoch sia fori nupwen sia tonong non ewe tempel me amonakicheta ne fori ekkewe angangepin ina sia pwiniti nouch sus me siwininong non ufach mi pwech. Usun Moses, ika sia mochen, sia tongeni esinna pwe ach pwiniti nouch susen fonufan ina nepoputan ach ipweta won neni mi pin me sia siwininong non napanap mi tekia me pin.

Pwi me fefinei, ese namot sipwe toki unungen ew chuk, usun moses a fori, ach sipwe kuna sufon ren mettoch mi pin me siwini wisach chon kuno non ew anonnonen kinikinin pekin ngun me nikitu. Kich mi tongeni kuna, ren awewe, nupwen sia achocho ne tumunu nonnomun imwach seni mwokutun fonufan. Ei a tongeni pwonuta ren ennetin me tinikenin iotek me mwen Samach non Nang non iten Jises Kraist me kutta ach sipwe sineochu ach Chon Amanau non ach achocho ne kaeo ewe kapas an Kot mi pwa me non ekkewe pukefel me non an ekkewe soufos afanafan. Kapachetan, ena sokkun ekkesiwinin ngun a tongeni fis nupwen sia achocho ne asamonu ach kewe pwon mi pin sia fori ren ewe Samon ren ach manau non aneasochis ngeni ekkewe annuk. Ekkei achocho mi tongeni wato ew mosonoson me och sokkun kinamwe ngeni netipach. Ach anonga ach ekiek won ekkena sokkun foffor a ennetin tongeni siwini imwach kewe ngeni sufonun nenien eppetin ngun—ach pwisin imwenipin ren nuku ikewe ewe Ngun a nonnom ie, usun chok met a fis ngeni Moses won ewe chuk.

Sia pwan tongeni mefi ena sokkun ekkesiwinin ngun nupwen sia nikitu ne fiti fenin Mwichefen, mi pachenong ach akunnu netipach ngeni ewe Samon non ach ennetin konu kon mi fel. Kunnuno—usun Moses—seni osukosuken fonufan, akkaewin nouch cell phone ika och mettoch ese tipefengen ngeni ei fansoun mi pin, a otufichi kich ne akunnu ach ekiek ne angei ewe sakrament, fiti ach ekiek me netipach mi fot won ewe Chon Amanau me An asoren achasefan fiti ach pwon mi pin. Ach ekiek won sakrament epwe pesei ew asufonun fansoun nupwen sia asofosani ach achufengen me ewe Chon Amanau me epwe efisi ewe Sabbath epwe ew apwapwa me siwini manauach.

Omuchunon, sia tongeni mefi ei ekkesiwinin ngun non wisach chon kuno nupwen sia soun fen ngeni won chukun imwen ewe Samon—ach kewe tempel mi pin—me achocho ne manau ren apinukunukun pwon mi pin, akkaewin nupwen sia mesengeni ekkewe sossotun manau.

Punuwei we me ngang aua pwisin weri ekkoch fansoun mi pin a fis non ewe tempel non sufon nupwen aua achocho ne aea ekkei nongonong non manau, minne a efisi ew auchean siwin non wisem chon kuno. Ua chechemeni usun ita nanew ai fetan non ewe nenien peias me mwen am peiasenono noum we aruemonun semirit, ewe a uputiw nge esemo tori maramen an epwe uputiw me ese manau, nupwen punuwei we mi chok nomwetiw an epwe pwak me non ewe pioing. Ua chemeni ai iotek ngeni Kot fiti watten memefin sufon, ai tingor aninis ai upwe engino ngeni ena aweiresin sossot. Non ena chok fansoun, ua angei ew fatochun me pochokunen apinukunukun ngun non netipei: Mettoch meinisin epwe murino non manauem ika ngang me punuwei we aua engino, kamwochunuk won ewe pwapwa minne a fis ren am manaueni ewe kapas allimen Jises Kraist. Met usun ita ew watten, me uren netipechou non ewe fansoun a siwin ngeni ew mettoch mi pin, me sufon, ew mettoch mi auchea a fen apochokuna am nuku me ngenikem epinukunuk non ekkewe pwon mi pin am aua fen fori ren ewe Samon me non An kewe pwon ngeniei me ai famini.

Pwi me fefinei, sufon ren met mi pin a amari ennetin kinisou, awatteno ennetin pwapwa, emweni ach ekiek ngeni pwarata, me wato watten pwapwa non manauach. A enenia pechech won pwun mi pin me seikata netipach ngeni Kot.

Uwa pwarata ngeni kemi pwe nupwen sia achocho ne apachanong ei sokkun echipwer non manauach iteiten ran, sipwe tongeni anapano ach tekison, awatteno ach weweiti an Kot mochen fan itach, me apochokuna ach apinukunuk non ekkewe pwonen pwon mi pin sia fori ren ewe Samon. Uwa pwarata pwe ika sia etiwa ei niffangen sufon ren mettoch mi pin—ika pwe epwe won chukun imwen ewe Samon, non ew imwen fan, ika non pwisin imwach kewe—sipwe ureno ren amwarar me ingeno nupwen sia chu ngeni ewe unusochun tongen Samach non Nang me Jises Kraist. Uwa sufon ne pwarata ekkei ennet non ewe it mi pin iten ach ewe Chon Amanau me Chon Angasano, Jises Kraist, amen.