Angei An Niffang

Fangeno niffang ew orenien mwicheich mi chewno ngeni meinisin oreni, tettenin aramas, me uruo. Non unusen fansoun, aramas ra fen niffang fengen ar repwe apochokuna nefiner, pwarano tong me kinisou, me apwapwai auchean fansoun usun ren apupunu, uputiw, me ekkewe ran mi afatafat meren annuk me oruni pwe sipwe fona. Nge aramas esap chok ir me nein forien Kot ra niffang fengen! Me nien chommong ekkoch minen awewe sia tongeni nenengeni, penguins ra sinneno ren ar ngeni punuwer kewe foun fau mi cheriw, me bonobos (ir mi arap fengen me chimpanzee) ra fang foun ira ar repwe awatteno ar ewe kukumosun chiechi.

Met niffang ka fen fangeno? Ekieki ew fansoun nupwen ka kuna—ika fori—ewe unusochun niffang ngeni emon ka tongei. En mi chok sinei ewe niffang ina wesen met atongeom we a mochen me epwe aucheani. Met ewe niffang? Fan iten inom ewe? emon chienom? noum semirit? emon sense? semen somom ika inom? Met ka mefi nupwen ka kuna ei niffang? Ifa usun ka mefi nupwen ka ekieki ei aramas en mi tongei a suki ewe niffang? Usun chok, inet emon a fang ngonuk ewe niffang mi unusoch, me mi ifa usun om we angei?

Nupwen ai we fisu ier, ua nonnom ren semei me inei non Arabia, echo kachito noun semirit itan Chitty Chitty Bang Bang a katou. Ewe kachito a porousen efoch taraku mi machik mi tongeni pwisin sa, pias won konik, me pwan chang! Ngang ua sinei pwe me neim non England ra fori efoch kukkun nios taraku a chok usun Chitty Chitty Bang Bang, me ennet ua wesen mochen wani efoch! En mi tongeni weiti efoch mecha iwe poun ewe niosun taraku repwe itiu ika a chang! Semei we a sai ngeni England ren an angang me eis ika ua mochen i epwe uweisefanieto och mettoch, me ua ureni ifa ukukun ai mochen upwe wani efoch ekkena Chitty Chitty Bang Bang taraku.

A niwin sefan seni an sai, me ese wor taraku a pwa. Ua fokkun netipengaw me ekieki pwe meni a monnuki. Nge, 10 ran mwirin a tori uputiwei, me ew kukkun pwor, mi tukutukochuno, a awitiei. Fiti watten esukusuk, me use pwaracho ne epinukunuku, ua suki ewe niffang me kuna wai we taraku. Ua fokkun pwapwa iwe ua kechiw. Ua weiti ewe mecha me poun kewe ra itiu, usun chok ewe taraku non ewe kachito! Ifa me ai ua wesewesen kinisou ngeni semei we ren ei akkauchean niffang. Ua urumot ne wawa ena taraku non chommong ier me annomu ren pwan chommong ier. Ai nuku semei we a sani an fang ngeniei ena taraku usun chok ukukun ai sani ai angei.

Sia tongeni ekieki usun fangeno niffang pwe mi wor unungat kinikinin.

1. Ewe pekin fangeno ewe niffang, ikewe ewe chon fangeno a fini, fori, ika amonnata ewe niffang me awora ngeni atongean we. Ei mi pachenong ekiekochun mochen me achocho won pekin ewe chon fangeno an epwe fangeno och mettoch mi namot.

2. Ewe pekin etiwa me suki ewe niffang, nupwen ewe chon angei ewe niffang seni ewe chon fangeno napengeni fiti kapasen mairu, kinisou, me meseik me mwen an suki, fan ekkoch epichi me suki tukutukun we an epwe kuna met ewe niffang.

3. Iwe mwirin mi wor meni ewe akkauchean kinikinin ewe pekin angei ewe niffang. Ach angei ew niffang mi kawor non ennetin a nap seni chok ach etiwa me mwirin suki. A watte seni, pwan, nap seni ach esinna namoten ewe niffang me awora kinisou ngeni ewe chon fangeno. Ach ennetin angei ew niffang, sia aucheani fan itach pwisin, aeaochu non manauach, me mwirin chechemeni fiti kinisou ngeni ewe chon fangeno.

Angei ew niffang esap ren etiwa nge a fis ren ew auchean popun me fofforun wewen a fis pekinon suki ew pwor. Ach angei a wewen aucheani me chu ngeni ewe niffang me netipen ewe chon fangeno non ew napanap mi apochokuna ekkewe riri nefinen ewe chon fang me ewe chon angei. Ai ekieki usun ena niosun taraku a eniwinato chommongun achechem mi apwapwa me auchea, nupwen ua pwan mefi sefani an semei anonnonen tong me tumun ngeniei, a pwano ren ena niffang.

An Samach non Nang chommong niffang a monneta an epwe ninatiw won emon me emon kich, Noun auchean semirit. Ra puputo seni nouch Chon Fangeno mi Fangafangoch usun ew puwachen konik non ewe fonu pon seni Netipan mi kirekiroch. “Meinisi niffang mi murinno me meinisin niffang mi unusoch ra feito seni asan, me ra feitiw seni ewe Koten saram.” Non ach ririn pwon mi pin ngeni ewe Sam, I ewe Chon Fangeno fansoun meinisin me kich kewe chon angei mi tekison.

Nge sise tongeni angei och mettoch me nukun ewe mi nap seni meinisin an ewe Sam kewe niffang, Noun achengicheng Nam, Noun we Jises Kraist. Meinisin an Samach kewe niffang ra tufich seni me manau seni an ewe Chon Amanau mochen fangeno non Gethsemane me won ewe irapenges, me An amwararen Manausefan. Jises Kraist, ach Chon Angasano mi umoumoch, i ewe echipwerun niffang seni Samach mi uren saram. “Non niffangen Noun we Kot a amonnata [fan itach] ew aan mi kon echipwer.”

Ua mochen porous ussun emon meinisin-mi rokopwanino non niffangen ennet esemuch mi anisata ach tufichin angei meinisin met Samach a mochen epwe efeiochu ngeni kich—ew auchean niffangen weweiti minne, nupwen a unusen ketiw me angei non anononun ewe ngun, a aneniaochu ekkewe pwapwa me weires non manau, me ach kapaseis rese ponu: Ina kich ennetin noun Kot semirit. Ena ennet mi wesewesen amwarar! Ningoch! Me esap chok ew esisin.

Ekieki pwe ita e karan iei aewin om rongorong ei! Ami ennetin Noun fopun mi auchea. Ami weseween Noun at mi auchea. Me ewe aan ka nom won ina An kokkotun pwapwa. Fiti An tong meinisin, I a sinei ami wesewesen ion me mwen oupwe feitiw ngeni fonufen, me met ouwa fen sinei seni nom tori iei non ami ei manau iei, me I a fen akota non umoumoch ren ami fansoun mwach. Me ewer, ifa usun I a aneanei pwe non ew ran oupwe niwin ngeni I, ne angei ewe wesen popun an kewe murinon niffangen manau esemuch ren I.

Ewe kapas eis esap ika ei niffangen ennet mi wesewesan nge ika sipwe kuna me angei. Ewe niffang a fen kawor ngeni kich me ren ewe Sam. Ewe niwinin ewe ennetin popun ei niffang a fen kamotiw me ren ewe Chon Amanau. Nge ika oua fen kaeo ei, apasa ei, konu ei ennet ren chommong ier, meni ewe amararan a fen mworono me nom me ouse chiwen mefi manamanan me kinamwein.

Ika ei auchean niffangen weweiti—me mettoch meinisin mi och, kinamwe, me epinukunuk a feito seni—ese ketiw, ese suk, me sise angei, ra fokkun sonap! Met me enetipengawan ren ewe Chon Awora? “Epwe meta namotan ngeni emon aramas ika ew niffang a kawor ngeni, nge ese angei ewe niffang? Nengeni, i ese pwapwaiti metena a kawor ngeni, ese pwan pwapwaiti i ewe chon awora ewe niffang.”

Ua tingorei kemi oupwe angei, ika epwe aewin fansoun, are nap seni akkom, ewe amwararen sinei pwe ami ennetin noun Kot. Oupwe epichi sefani ewe fofon, kamweno ewe tukutukun toropwe, suki ewe pwor, me tiniken ne angeiren kinisoun tekison ew ennet, unusen weweiti ei nongonongen ennet. Ewe Ngun mi Fel a tongeni pwarata ngeni netipom pwe ewer en emon noun ewe Mi Tekia.

Nupwen ka etiwa ei amwararen ennet ngeni non ngunum me mefi ir me ruu ewe kinamwein me ewe amwararan ekesiwin non unusen nonomun emon aramas. Ka tongeni mefi An tong, rongorong Neuwan, me esinna Poun, ina mo ika met a fis ika ese fis, non manauom. Ka tongeni siwini ifa usun ka pwisin kunok me ekkoch. Om pwonen fofo ngeni om Chon Amanau a pochokunono, me seni ei ioien me kefinin murinon niffang, a awora ngeni manau ew ningochun, murinon, me epinukunuk.

Ouse mochen, oupwe iotek pwe oupwe weweiti ika oua ennetin angei ei ekkesiwinin mirit non anonnonen ngunumi? Ouse mochen etiwa ewe niffang? Oupwe fori non ennetin, non kisasew, non chommong nap seni oua fen fori me akkom—me ren ami fori oupwe feioch ren meinisin ekkena pwan ekkoch niffang ra feito seni?

Meni kopwe ekieki, “Met upwe fori ai upwe angei ei niffang seni Kot?” Iwe, ennetin, ese wor. A ew niffang seni ewe Chon Awora. A ew mecheresin ennet. Mutanong. En emon Noun semirit. En mi auchea meren I. Ousap aosukosuka. Ousap eppeti ne angei ei niffang ren ami ekiek pwe ouse fich ngeni. Ewe ennetin pwe, ese wor neich “mi fich”—ngeni meinisin an ewe Sam kewe niffang ra ketiw chok seni ewe nimochun foffor, umoumoch, me chenin ewe Messiah mi Fel, nge i a mochen emon me emon kich Noun semirit sipwe angeir. Iwe, nupwen ami kewe minefon ika asofosefanin wewe oua poputa ne karan unusen weweiti, watten pwapwa non kinisou ngeni ewe Chon Awora ei niffang.

Seni ewe fansoun ua kuna ai nuku non an uwa nukapanen 20 ier, Ua pwata seni ai mour me uwa esina pwe ngang ennetin emon noun Kot at. Ew me napenon ai etiwa ei niffang, pwan ina napenon pochokunen ai sinei angang ion me ifa me unusochun tongei. Ekkoch mettoch ra anisiei ne marita non wewe ikana ekkewe kapasen pukefen, ai kewe efeiochun petriark, angangen fen ngeni non tempel, anisi ekkoch, me iotek mi pin ngeni Semei we. Ua ingeno ren ifa usun akkomwen netipechou, metek, me riaffou non manau repwe fen siwin, me kinamweino, me napenon ai ua sinei ei ningochun ennet.

Moronai a pesei kich pwe sisap “amam ekkewe niffangen Kot,” nge sipwe “feito ren Kraist, me kamwochuno niffang mi och meinisin.” Oua tongeni feito ren Kraist fiti nukunuk non An kirekirochun tong me angei meinisin An niffangen pwapwa, kinamwe, epinukunuk, saram, ennet, pwarata, sinenap, me mirit—fiti mokuremi mi sacheta, poumi mi itiu, me kumuchumi mi sukuno ne monneta ne angei. Me oua tongeni angei ekkei niffang pokiten oua tumun me nukuchar non ewe mirit pwe ami achengicheng fopun noun Kot, ami auchen anuon noun Kot, me a fen niffang ngeni kemi Noun we unusochun Aat mi pin ne angasa kemi, apungu kemi, me epinkemino.

En emon semirit noun Kot. Ei esap chok echo koon sia konu. Kose mochen kopwe etiwa, suki, me angei ei niffangen sinenapei me weweiti seni I? En mi tongeni komochunuk pwe ewe pisek auchea? Angei sefani ei niffang, ika ennetin angei ren ewe aewin fansoun me mut ngeni epwe ekesiwini meinisin mettochun manauom. Iei ewe echipwerun an Kot a fen amonnata fan itemi seni ewe niffangen Noun we. Ami wesewewen kewe epwe wor ami pwapwa! Non iten Jises Kraist, amen.