Fen ngeni

Eu mettoch akan fis me auchea ren anapanapen fen ngeni ina ren chufengen non eu neni mi epinipin ne fori fofforun sufon. Ewe Samon a apasa, pwe mi namot sipwe atowawano inisich seni nimengawen ei fonufan, sipwe feino ngeni imwen iotek me angei ewe sakrament non ranin mi pin.” Iei, ennetin, popunapen ach fori imwen fan. Nge, ika mi tufich, eu neni-ese efeioch epwe fich ngeni ika sipwe tongeni awora och oukukun epinipin.

Akauchean met sia fori nupwen sia chufengen non ewe ranin ach Samon. Ewer mi pung, sia ufouf uuf mi murino ren ukukun tufichich—esap ren eingeing nge ren uuf epwe pwarata ach mennin me mosonoson ren Kot. Ach mwokutukut mi nonofengen ren mosonoson me mennin. Sia fen ngeni ren ach chufengen non iotek; sia fen ngeni ren ach konu ekkewe konupin (esap chok ach ausening ngeni nge konu ekkewe konupin); sia fen ngeni seni ach emweni me kaeo seni emon me emon. Jises a apasa, Chechemeni pwe non ei, ranin ewe Samon, oupwe asorata ami niffang [wewen, ami fangono … fansoun, tufich, ika auchea, non ami angang ngeni Kot me chon orumi’me ami sakarament ngeni ewe mi Unusen Tekia, omusano tipis ngeni pwimi kewe, me mwen ewe Samon. Sia chufengen sap ren ach sipwe apwapwai ika ren ach sipwe pwapwa—ren ew band, ren awewe—nge sipwe chechemeni I me sipwe “angei aurour murino” non An we kapas allim.

Non ewe mwichenap kukuto chok, Elter Patrick Kearon a achema ngeni kich “sise chok chufengen non ewe ranin Sabbath ach sipwe fiti mwichen sakrament me cheki itach won ewe tetenin it. Sia chufengen pwe sipwe fen ngeni. Mi wor watten sokofesen nefinen ekkewe ruu. Ach fiti wewen ach sipwe nom. Nge ach fen ngeni ina ach finata sipwe mwareiti me acheni ach Kot non napanap epwe siwini kich!”

Afona ach Sabbath ngeni ewe Samon me An popun achok eu angangen fen ngeni. Ekkoch ier ano, atun an ewe-Elter Russell M. Nelson a nengen fichi:“Ifa ussun ach epini ewe ranin Sabbath? Non ierin ai chok onuon, ua kaeo ussun ewe angang an ekkoch ekkewe ra ochufengeni tetenin kewe mettoch repwe fori me ekkewe mettoch resap fori won ewe Sabbath. Ese mo mang mwirin nge ua sinei seni ekkewe pukefen pwe napanapei me mokutukuti non ewe Sabbath a forata ew esisin nefinen ngang me semei Kot won Nang [nengeni Exodus 31:13; Ezekiel 20:12, 20]. Fiti ena wewe, use chiwen aea ekkewe tetenin upwe fori me usap fori. Nupwen ai uwa finata ew ekiek ika are esap ew mettoch epwe fis a tufich ngeni ewe Sabbath, uwa pusin eisiniei, ‘Met esisin ua mochen ai upwe ngeni Kot?’”

Fen ngeni non ranin ewe Samon a esisin seni eu auchean ekiek ren ewe watten asoren fangono an Jises Kraist. Sia fokkun me wesewesen apwapwai An we Manausefan non Easter, nge pwan iteiten wiik sia angei ewe sakrament a esisinata An we Achasefan, pachenong An Manausefan. Ren ewe netipengaw, angei ewe sakrament iei auchean fen ngeni non ranin Sabbath.

Chufengen ne fen ngeni usun “ewe inisin Kraist” a wor an manaman me tufich nupwen sia asukun, aninis, me tipeeu ngeni emon me emon. Ameseiken, eu minefon kaeo a pwa pwe ekkewe ra kuna ar manauen souneng pwe mi unusen monomon a pwa pwe mi kisikis ar repwe akomwa manauer non pekin ngun, ika a namot epwe wor ar nuku, ika a namot repwe anapano ar fansoun ngeni Kot. Usun eu mwichen Souneng, sia apochokuna emon me emon ne fen ngeni me non nuku.

Usun chok, sise tongeni monuki ewe angangen fen ngeni iteiten ran sia foffori won pusin ach me non imwach. Ewe Samon a achema ngeni kich, sipwe asorata ach kewe pwon non wenechar iteiten ran me fansoun meinisin. Emon sister a fokkun tipachem ne nengonochu, “Use tongeni ekieki eu anen fen ngeni Kot me nukun etiwanong Noun kewe kukun non manauach me tumunur me asukuner An we kokot fan iter.”

Alma me Amulek ra aiti ekkewe chon Zoram ekkewe ra annuk seni ar kewe sinakok ar resap chok fen ngeni Kot fan eu non eu wiik nge epwe iteitan me “non sokkun neni kopwe nom non.” Ra kapas usun iotek pwe eu angangen fen ngeni:

Ami mi auchea oupwe wau unusen ngunumi non ami kewe kapet, me non ami kewe neni mi monomon, me non ami kewe fonu pon.

Ewer, me nupwen ouse sio ngeni ewe Samon, mut ngeni netipemi repwe ureno, soposopono ne wau netipemi non iotek.”

Ra pwan kapas usun kukuta ekkewe pukefel, awora kapasen pwarata usun Kraist, fori foforun tong ennet me angang, angei ewe Ngun mi Fel, me manauen kinisou iteiten ran. Ekieki ena ekiek: “manauen kinisou iteiten ran.” A kapas ngeni ai we oruwen ekiek:

Memef me pwarano kinisou ngeni Kot ikana, ennetin, met a fori pin ngeni ren memefin asofosefanin pwapwa nap seni ach sipwe kuna nge epwe usun chok eu wis.

Ennetin fen ngeni wewen tongei Kot me fangeta ach mochen ngeni I—ewe auchean niffang sia tongeni asorano. Nupwen ra eisini ifan ewe annuk a nap me nein kewe annuk meinisin: Jises a ponueni, “Kopwe tongei ewe Samon om God ren unusen nenukom, ren unusen ngunum o ren nunusen om ekiek.” Apwan eita ngeni ei ewe aewin annuk.

Iei pusin an Jises we anen fen ngeni ewe Sam. Manawan me An asoren fangono ra pinino ngeni ningen ewe Sam. Ren memef sia chechemeni an Jises chourek ne tingor non nukanapen eu sokkun metek me riafou sise tongeni weweiti: “O semei, ika mi tufich, om kopwe, angei seniei ei kapen riaffou,” nge A fang “esap ai mochen, pwe om mochen.”

Fen ngeni a pesei ach sipwe tapwei ei unusochun nenien apiru. Sisap angei unusoch non ei angang non chok eu pwin, nge ika iteiten ran sia “asorata ew asor ngeni [I] eu netipechou me niamamen ngun,” Epwe pwan papataisini kicheno ren Ngunun me ourakicheno ren An we chen.

Non ewe aewin kinikin non ewe Doctrine and Covenant, ewe Samon a pwarano ei tipengaw non ei fonufan:

“Ra suseni ai kewe angangepin, me ra atai ai kewe pwon ese much;

Rese kukuta ewe Samon ne forata an we wenechar, nge emon me emon a pwisin fetan won anan, me mwirin ununun pwisin noun kot, minne ununun a usun ewe fonufan.”

A eoch ngeni kich ach sipwe chechemeni ewe nenien apiru an ekkewe unumon re Jews Hananiah, Mishael, Me Azariah, ekkewe ra kanupus non Babylon ese tam mwirin Lehi me an famini ra tou seni Jerusalem. Emon officer seni Babylon a eita sefanir ngeni Shadrach, Meshach, me Abed-nego. Mwirin, nupwen ekkei unumon mwan rese mochen repwe pin ngeni ewe nios a foruta me ren Nebuchadnezzar, a annuku pwe repwe koturunong non eu ekei mi fokkun ngetenget, me a apasa ngenir, “Iwe meni ena Kot epwe epichikemino me non pei?”

Oupwe chechemeni ar ponuweni a men wesen pochokun:

“Am we Kot minne aua angang ngeni a tongeni epwe epichikemino seni ewe ekei me epwe pwan epichikemino seni non poum, O king.

Nge ika esap, epwe fat ngonuk … pwe am ausap angang ngeni om kana kot, ika pin ngeni ewe nios minne ka forata.”

Ewe ekei amen wesen pichikar me ion a koturunong non a mano, nge Shadrach, Meshach, me Abed-nego rese feiengaw. Iwe Nebuchadnezzar a kapas, me apasa, Feioch ngeni ewe Kot noun Shadrach, Meshach, me Abed-nego, ewe a … angasa noun kewe chon angang minne ra epinukunuk non i, … me tumunu inisir, pwe resap pin ngeni emon kot, me nukun chok nour we Kot. Ra nukunuku Jehovah an epwe epichireno, “nge ika esap,” are, ina mwo ika Kot non An mirit ese eppeti ar mano, nge iei repwe chok fokkun ennet ngeni I.

Met chok a akkom me mwen ach fen ngeni ewe Sam me ewe Nau a winiti niosun anu muan. Ekkewe ra etiwengawa Kot pwe ewe popun mi ennet, are amam sokkun foffor ngeni I, usun wewen nge ra siwini pwisin ir pwe nour Kot. Emon a wanong an wenechar non ew mwicheich ika och popun me mwen ourouren nang a fen ngeni emon kot chofona. Pwan ekkewe ra pomeni pwe ir mi fen ngeni Kot nge rese aponueta an kewe annuk ra pusin fori ar mochen: “Ra arapakan ngeni ei ren tunawer, nge netiper mi towaw seni ei.” Ewe popun ach fen ngeni mi kouk “ewe chok Kot mi pin, me Jises Kraist, ewe [A] tinato.”

Omuchunon, ifa usun ach nonom epwe ina murinon, auchean sokkun anen ach fen ngeni. Pwarano ach nikitu wewen sia appiru ewe Sam me ewe Nau—pwarano Ar mokutukut me manauwer non manauach. Ika, usun met rakan apasa, pwomweni ina ewe ennetin napanapen esika, iwe sipwe tongeni apasa ren menin ngeni ewe Sam, appiru ina ennetin napanapen sufon. Ei a pesei eu foffor, a sopweno ach achocho ne kukkuta me mi pin. Nge manauen winiti usun manauen Kraist eu pusin anen ach fofforun fen ngeni. Usun an Kearon kapas a katou ekiseno we usun fen ngeni, “non eu napanap a siwini kich,” amen amwarar. Ennetin fen ngeni mi fokkun ekesiwin.

Iei ningochun ewe anen pwon—ewe anen fen ngeni, tong, me wenechar ngeni Kot. Sia tonong non ena an seni paptais, pwon ach sipwe mwareiti iten Kraist me aponueta An kewe annuk. Sia angei ewe niffangen Ngun mi Fel, ewe chon pwarata usun ewe an ewe Chon Amanau we chen minne a angasano me nimeti kich seni tipis nupwen sia aier. Sia tongeni pwan apasa pwe non aier sia fen ngeni I.

Ikewe pachenong ekkewe angangepinen pristut me pwon mi pin sia fori non ewe imwen ewe Samon minne a epininkicheno. Ekkewe mwichepin me angangepin non ewe tempel pwan eu napanapen fen ngeni mi tekia.

Preseten Russell M. Nelson a pesei pwe “meinisin mwan me meinisin fefin mi fiti angangepin ren pristut me ekkewe ir mi fori me apwonueta pwon mi pin ren Kot a wor rer ewe wenecharen mumuta ngeni ewe manamanen Kot.” Esap chok ewe manaman sia angei ne angang me efeioch ekkoch. Pwe pwan ewe manaman minne epwe siwini kich me epinikicheno. Nupwen sia fetan won ewe anen pwon, ewe epinipin “manamanen kot epwe pwano” non kich.

Amwo sipwe, usun ekkewe Chon Nifai me Chon Leiman me nom, “ra chappetiw ren pechen Jises, me fen ngeni i.” Amwo sipwe, usun kich mi annuk me ren Jises, “chappetiw me fen ngeni ewe Sam non [ewe] iten [ewe Nau].” Amwo sipwe angei ewe Ngun mi Fel me fangono netipach ngeni Kot, esap wor pwan emon ach kot me Nukun, me sipwe noun Jises Kraist chon kuno, me manaueni usun manauan. Ua pwarata pwe nupwen sia fori, sipwe mefi ewe pwapwa non ach fen ngeni. Non iten Jises Kraist, amen.