Me Sia Kapas usun Kraist

Nesoponon ew nakatamen assigment ngeni pwan ew fonu, punuwei we Lesa me ngang aua tonong non eu airport am oupwe amonneta ngeni eu nusun sai—eu nukenipwin—ne no neim. Nupwen aua uta ren pwan ekkoch ne eipweipw ekis me ekis non eu nain, aua tongeni mefi wattenon noninen an ekkewe chon sai ra aureki ar repwe tori war sepenin, awesi chekin passport me visa, me tou seni chekin security.

Omuchunon aua tori ew neni ikewe ewe chon chek potou usun ese mwo nge mefi ewe watten osukosuk me noninen non ewe rum. Usun nge ese apareni, ese nenengeniei, angenoi nei kewe toropwe, apungano sasingi we, suki eu me eu ren outun poun, me omuchunon impwangini nei we passport ren eu choun chopw.

Iwe mwirin a angenoi noun Lesa kewe toropwe. Ese wor memef, a chok porotiw chamwan me afota an ekiek won an angang, a katon eoch ne suki ekkewe peich ren, an atonaochu tichikin ekkewe toropwe me fan mesan. Aua ekis mairu nupwen a mwitir kouno, a faneta, me nenengeni Lesa non mese kirekiroch. Ren eu pweteten amenimen, a apwetetei ne impwangei noun Lesa we passport me eiti sefan ngeni noun kewe toropwe. Punuwei we a pwan emenimen ngeni, etiwa ekkewe toropwe, me ekkesiwin fengen kapongen keimufesen.

“Met a chok fis?” Ua eis non ai use nukunuk.

Mwirin Lesa a pwar ngeniei met ewe chon angang a fen kuna—echo kukkun kato sasingin ewe Chon Amanau. A chok fen mitiu seni an we pwes me tikinong non tukutukun noun we passport. Iei met ewe chon angangen chek a kuna. Iei met a siwini unusen napanapan.

Grace and Truth, seni Simon Dewey, mumuta me ren altusfineart.com, © 2025, aea seni mumuta

Ei kukkunun sasingin ewe Chon Amanau a ochufengeni netipen ruemon wasona. A siwini ewe chufengen ese wor memefin ngeni eu mi wor memefin, omuchu ewe ningoch, ewe manaman, me ewe ennetin Saramen Jises Kraist. Ren unusen ena ran me fan chommong mwirin, ua fen ekieki ena murinon ekis fansoun ren mwar me ua fen pwapwa non ewe ningen pochokunen ewe Saramen Kraist won noun Kot semirit.

Kich chon tapweno mwirin Jises Kraist, me sia kukkuta ne angei me aea fengen An saram. Mi pachenong non iten ewe Mwichefen ina ach nuku usun “Jises Kraist pwe pwisin i ewe foun nongonong.” Seni soufosun nom me ikenai, Samach won Nang a annuku kich pwe sipwe “ausening Ngeni” me “feito ren Kraist.” “Sia kapas usun Kraist, sia pwapwa non Kraist, sia afanafan usun Kaist, [me] sia osini usun Kraist.”

Sia afanafana pwe Jises Kraist i ewe Noun Kot, me fansoun an angangen afanafan, Jises a afanafana An kapas allim me forata An Mwichefen.

Sia pwarata pwe nesoponon Manauan, Jises a achasefani ach tipis nupwen I a riaffou non ewe Ataken Gethsemane, a irapengesino won ewe irapenges, me mwirin a manausefan.

Sia pwapwa pwe pokiten an ewe Chon Amanau we asoren achasefan, sia tongeni musono me nimoch seni ach kewe tipis nupwen sia aier. Ei a wato ngeni kich kinamwe me epinukunuk nupwen a otufichi kich ach sipwe niwin ngeni me mwen mesen Kot me angei unusen pwapwa.

Sia osini pwe pokiten an Jises Manausefan, mano esap ina nesoponon nge eu auchean tettenin mwach. “Sipwe manausefan mwirin sia mano. Ei wewen pwe ngunun emon me emon aramas me inisir repwe chufengen sefan me manau feinfeino.”

Soufos mi manau non ach fansoun—ra angei pwarata seni Kot ar repwe aiti me emweni kich—ra anapano ne tingorei kich sipwe feito ren Kraist. Ra anisi kich ne unusen anomu nukanapen netipach, seningach me mesach won I. Sia tongeni apasa sefani chommong awewe usun ekkesiwin me murino ra esinesin me ren ewe Aewin Presetensi minne ra fori pwe repwe anonga kich won Jises Kraist. Ekkoch ekkei mi pachenong:

• Ewe pungunon ekiek ne awesano ewe it “Mwichefen Mormon” me siwini ngeni ewe pungun it, Ewe Mwichefenin Jises Kraist ren Aramas mi Pin non Fansoun Soponon.

• Ewe kaworen tufichin minafon, chunga mi feito seni ourour itenapan Kraist minen katon non imwen mwich.

• Itenapen Mwichen Fopun me Aaronik Pristut me koon ra anonga won Jises Kraist, usun ren “Noun Jises Kraist Chon Kaeo” me “Nenengeni Kraist.”

• Watten pesepes won ewe Achasefan me wesewesen Manausefan an Jises Kraist pwe ina ewe a nap ningan non uruo.

• Apwapwan Easter pwe eu fansoun me esap chok eu ranin asoso, ren ew apochokun won Jises Kraist.

• Ewe katoun ewe minen kuna a affatano ewe Mwichefenin Jises Kraist me esisinen napanapan.

Sipwe nenengeniochu pochokunan ekkoch ekkei. Aewin, ewe esisinen Mwichefen.

Non 2020, Preseten Russell M. Nelson a atou eu minafon minen kuna eisisinen ewe Mwichefen. Ei esisin a pwarano ewe ennet pwe Kraist i a nom nukanapen An Mwichefen me epwe nom nukanapen manauach. Iei sia kuna ei esisin mi sinneno won taropwen mumutan non tempel, won an Mwichefen website me magazine, pwe ewe esisinen ewe Gospel Library app, pwan mwo won military ID noun chommong chon ewe Mwichefen ir mi angang non mwichen sounfiu. Ewe esisin a pachenong iten ewe Mwichefen a nom non ewe foun nongonong, ew achechem pwe Jises Kraist i ewe foun nongonong, a pwa ikei non Cambodia me nounou non 145 kapasen fonu.

Nukanapen ewe esisin mi wor eu chungan an Bertel Thorvaldsen we achengicheng foun fau nisoun Kristus, minne a unusen sinneno pwe mi wewe ngeni ewe Mwichefen me mi pwa non an Mwichefen nenien wasona me won punun tempel non ewe fonufan. Fatochunon non ewe esisinen Mwichefen a pwarano pwe Kraist epwe nom nukanapen mettoch sia fori. Usun chok, poun ewe Chon Amanau mi itiu a pwarano An pwon pwe epwe etiwa meinisin ekkewe ir mi feito Ren. Ei esisin eu esisinen kuna usun ewe tongen ewe Chon Amanau Jises Kraist me eu achechem fansoun meinisin usun ewe Kraist mi manau.

Ren ai mochen sinei, ua eisini chommong famini me chiechiei usun eu auchean kinikinin ewe esisinen Mwichefen. Amairun, chommong rese apareni usun eu napanapan mi pin minne mi nom non. Jises Kraist a uta fan ewe wong. Ei a esisinata ewe Chon Amanau mi manausefan a tou seni ewe peias. Sia ennetin apwapwai ewe mi manausefan, Kraist mi manau, pwan mwo non aean ewe esisinen Mwichefen.

Iei sipwe ekieki auchean Paskta. Non an ewe Aewin Presetensi porous usun Paska a keran tou, sia pesepes ach sipwe “apwapwai ewe Manausefan an ach we Chon Amanau mi manau ren ach kaeo An afanafan me aninis ne forata orenien Paska non neniach, akkaewin non ach pwisin famini.” Non mwochan, sia pesepes pwe sipwe siwin ngeni ew apwapwan paska mi kon tekia me pin.

Ua sani soposoponon pwarata usun Paska me kinisou ren ami kewe chommongun achocho ne fori Paska epwe ew fansoun mi monomon me pin. Kapach ngeni ewe chok eu-awa mwichen sakrament non Raninifenin Paska, ekkoch awewe usun urumot mi fich ngeni mi pachenong mwichen wart me steik me urumot non ewe Palm Sunday pwan fansoun Wik mi Pin. Ekkei achechem mi pachenong urumot ren semirit me serafo me fan chommong a pachanong mwichen kon nefinen mwichen namanam. Ekkoch ra efisi mwich iter “Living Christ” ra suki imwen ekkewe memper me chiechier me pachenong non ekkoch mwokutun Paska an mwicheichen namanam.

Ekkei sokkun mwokutukut ra usun chok ekkewe mwichen aramas non ewe teninimwen Jerusalem ekkewe mongungur ra chufengen ne mwareiti ewe Chon Amanau fansoun An amwararen tonong. Nonopok eingeingan ekkoch repotun ami ponuweni an ewe Aewin Presetensi etiwetiw ne fen ngeni non imw usun famini ne asufonu ei akkauchean ranin asoso.

Ua nuku pwe an famini fen ngeni arap ngeni Paska a fen wesewesen napeno. Ru ier a no, ua kapas usun an am famini mochen a ochueno napanapen am asufonu Paska. Ennetin, am mi chiwen angang won. Aua kan soun pwapwaiti eu auchean mwongon Raninifenin Paska, pasikitin Paska me kuten sokun atun Paska, me am mi chiwen chok pwapwaiti. Nge, am apachata eu ennetin pekin ngun mi anonga Jises Kraist me An Achasefan ngeni am apwapwa a wato eu murinon ukukoch ngeni am asufonu ekkei mettoch mi kon pin seni meinisin.

Ei ier epwene aunungatin am achocho ne fori Paska pwe Kraist epwe nom nukanapan. Usun porousen uputiwen Kraist non Kirisimas, an am famini Ranin Paska mi pachenong ufoufen sipai, aneani pukefel seni ewe Testamen Sofo me Puken Mormon, kon, sasingin Paska, painu— me ekis akurang, ika upwe wesen wenechar. Semirit me noun nei kewe ra annea me osomong ne apasa sefani “Mwareiti Kot … Kot epwe efeiochu ewe emon a feitto faniten ewe Samon; Mwareiti Kot non nenian mi fokkun tekia” me “Iei I Jises … seni Galilee” ussun mi chok nonno ngeni “Kinimawe won fonufan, ngeni ekkewe mi apwawai i” atun Kirisimas.

Iei aua sani eu nofitin enning. Met akkom mi kan chok wor rapich me sokun atun Paska iei a ukukoch ren ewe Kristus me sasingin ewe peias mi pon, ewe Chon Amanau mi manausefan a pwato non ewe Atake nukun ewe peias, me an ewe Chon Amanau pwato ngeni ekkewe Chon Nifai. Aua pwan nikitu ne fori Paska epwe eu tamen fansoun nap seni chok eu ran. Sia achocho ach sipwe kon mirit, ekiekoch, me pwapwaiti Palm Sunday me Good Friday me ekkewe fansoun mi pin minne ra fis fansoun ewe Wik mi PIn.

Paska a mut ngeni kich sipwe osufonu me ru ewe asoren achasefan an Jises Kraist me ewe wesewesen me pwapwan Manausefan an I. Netipach ra chou nupwen sia ekieki an ewe Chon Amanau riaffou non ewe Atake me won Calvary, nge netipach ra pwapwa nupwen sia anapanapa ewe peias mi pon me ewe esinesin seni nang, “I mi manausefan!”

An ewe Aewin Presetensi keran pesepes ne “esuku Paska me ewe Manausefanin Jises Kraist—ewe porous ngeni aramas mi nap amwararan seni meinisin” a pwarano auchean ei fansoun. Nupwen a pwano pwe ew wattenon mwokutukut nein ekkoch Namanam ne nenengeni ewe Manausefan pwe eu esisin me pwonen kapas, sia apungano ach nongonong pwe “ewe Manausefan wewen pwe meinisin mi fen manau repwe manausefan, ewe Manausefan mi wesewesan pung.” “Ussun non Adam aramas meinisin repwe mano, nge non Kraist meinisin repwe kuna manau.” Jises Kraist a muti ewe ririn mano fan iten emon me emon aramas mi manau.

Sia ennetin ingeiti ukkukkun ewe chen Jises a awora ngeni kich. Sia etiwa An kewe kapas pwe “watten tong ese wor an emon aramas nap seni ei, pwe emon aramas epwe watiw manauan faniten chienan.”

C.S. Lewis a apasa pwe “ach sipwe afanafana Namanam wewen [ngeni ekkewe Aposel] akkaewin ne afanafana ewe Manausefan. … Ewe Manausefan ewe ionapen itenap non meinisin afanafanen Namanam mi makketiw non puken Foffor. Ewe Manausefan, me pungunon kewe, ir ewe kapas allim ika porousoch minne ekkewe Souneng ra wato.”

Ua affata pwe “mi wor ew Manausefan, …ewe peias ese wor an win, iwe ewe tipisin mano a kuf pokiten Kraist.”

Nesoponon, ua pwarata pwe meinisin ir mi etiwa ewe tingor seni nouch soufos mi manau me noun kewe chon aninis ren ach sipwe kon asufonu ekkewe mwokutukut mi pin minne Paska a tupuni repwe kuna pwe nefiner me Jises Kraist epwe pochokununo.

Fitu ran chok a no, ua sinei usun emon in chinnap ewe a aporousa sefani ewe tutunapen Paska ngeni noun noun at ruanu ier ren an nounou niosun ewe peias, ewe fau a pwonuono ewe peias, Jises, Mary, ekkewe chon kaeo, me ewe chon nang. Ewe kukkun at a katon me auseningoch nupwen inan chinnap a aporousa ewe peiaseno, apungu me suki ewe peias, me ewe unukun ewe ataken ewe Manausefan. Iwe mwirin ewe at a tumunoch ne anniwini ewe tutunap non amwararen tichikin nupwen a pwisin amwokutu ekkewe nios. Mwirin ei murinon fansoun, a eisini ewe at ika i mi sinei pwata a wor Paska. Ewe at a faneta me ren tufichin emon semirit a ponuweni, “Pwe I a Manau.”

Ua apachata ai kapasen pwarata ngeni an—me ngeni ami, me ngeni an chon nang me soufos, pwe I mi manausefan me I mi manau, ren ei ua pwarata, non iten Jises Kraist, amen.