Ewe Achasefan an Jises Kraist a Awora ewe Amuchunon Angangen Amanaua

Ewe Achasefan an Jises Kraist a awora ewe amuchunon angangen amanaua seni ekkewe sossot sia mesengeni non ei manau. Preseten Russell M. Nelson a fini ngeniei pwe upwe efeiochu ewe Casper Wyoming Tempel non ewe ier a no. A ew pochokunen, memefin netip, me amemefin ewe ngun. Ua wanong non manamanen ekiek ewe angang ekkewe tempel ra fori non angangen amanaua Noun Kot semirit meren ewe Achasefan an ewe Chon Amanau.

Ekkewe steik non ewe Casper Wyoming Tempel tischrik pachenong ew kinikinin ewe aan mine ekkewe akaewin Aramas mi Pin non Fansoun Soponon ra aea nefinen 1847 me 1868. Non amonetan efeiochun ewe tempel, ua anneasefani ekkoch ekkewe uruon ewe anen fetan fiti ewe Chonupupu Platte arap ngeni Casper me soposopono ngeni Salt Lake City. Ewe anen fetan a fen ew aan ngeni fite puku ngoroun ekkewe ra mokut seni notou. Ai ounamen auchean mettoch, ina ekkewe Aramas mi Pin non Fansoun Soponon mi nap seni 60,000 ekkewe ra fetan won ewe aan.

Napengeni nouch kewe pioneer chon ei Mwichefen ra feito won woken, nge arapakan 3,000 ra feito non engon kewe kuruma ra pusei won pour. Wanufoch me nein ekkei wa ra awesi ewe watten sai fiti amwarar me ekkoch ra mano. Ewe mwichen kuruma wan Willie me Martin ren 1856 rese pachenong.

Ua katon sefan uruon mwichen wan Willie me Martin kewe kuruma seni ewe fansoun ewe monumonungawen asapwan a poputa. Ua wesewesen weweiti ussun ekkewe osukosuk ra kuna atun ar fein seni epek ewe Chonupupu Sweetwater, Martin Cove, Rocky Ridge, me Rock Creek Hollow.

Between Storms, seni Albin Veselka

Usemo fen totonong non ewe Casper Tempel mwen ewe efeioch. Nupwen ua tonong non ewe aewin kinikinin ewe tempel, mesei a no ngeni ew wesetan chungan efoch kuruma itenapan Between Storms. Ewe chunga a fatafatoch pwe ese pwarano ewe riaffou napanap a fis. Nupwen ua newenewen ngeni, ua ekieki, “Ei chunga mi pung; napengeni akkaewin chon ei Mwichefen won kuruma rese weri feiengaw.” Use tongeni ukutiw ne mefi pwe iei ussun manau non unusenapan. Fan ekkoch sia nom nefinen monumon me fan ekkoch nefinen kuchu me saramen akkar.

Heaven’s Portal, seni Jim Wilcox

Nupwen ua kun ngeni ewe wesetan chunga pwan won ewe ew etip, itenapan Heaven’s Portal, ua esina pwe ei ningeochun chungan summer ren met a iteni “Devil’s Gate,” fiti ewe nuan me fateochun Chonupupu Sweetwater a puputiw non, a esisinata ningeochun forien Kot, esap chok ekkewe osukosuk ekkewe akkom chon ei Mwichefen ra mesengeni non ena aweiresin fansoun patapat.

Mwirin ua neneno mwan, nukusokurun ewe chepenin chek taropwen tonong non tempel, me uwa kuna ew ningochun chungan ewe Chon Amanau. Ei a mwitir efisi wachemuken memefin kinisou. Non ew fonufan nenien watten ningoch, mei pwan wor chommong weires. Nupwen sia kun ngeni Jises Kraist, ewe Chon Amanauen ewe fonufan, I a aniskich seni ekkewe monumonun manau ren An Achasefan anongonong won an ewe Sam kokkot.

Ren ngang, ewe nenien tonong me non tempel a ew unusochun monneta rumen angangepin a mut ngenikich ach sipwe angei ekkewe angangepinin manau mi tekia, fori ekkewe pwonepin mi pin, me etiwa ochu me sinei ekkewe feiochun ewe Achasefan An ewe Chon Amanau An ewe Sam ewe kokkotun pwapwa a anongonong won An ewe Chon Amanau ewe manauen achasefan.

Met a fis ngeni ekkewe akkaewin chon ei Mwichefen a awora ngeni ekkewe Aramas mi Pin non Fansoun Soponon ew auchean uruon oruni me ew pochokunen aea fengenin mwirimwirin pekin ngun. Ren ekkoch, ewe mokut seni neni ngeni pwan ew neni a fokkun nakatam mwirin ar ra oumwesir ne tapwereu seni Missouri me Nauvoo. Ren ekkoch, a poputa mwirin Preseten Brigham Young a esinei ewe kokotun kuruma, ewe ita epwe anisi mokutun kewe aramas epwe kon mokukun. Ekkewe kuruma ra mokukun nap seni kewe woken me kou.

Emon misineri non England, Millen Atwood, a apasa nupwen a wor esinesinen ewe kokotun kuruma, “A chewno ussun ekei non kewe fetin mi pwas, me netipen ekkewe atongen Souneng ra meseik ren pwapwa me kinisou.” Chommong ra fen “iotek me echikipin ran me ran, pwin me pwin, pwe epwe wor ewe tufichin ar repwe chufengen ren pwir me fefiner kewe non [kewe] chuk”

Napengeni ekkewe Souneng mi fiti kuruma ra mefi weires nge amonungaw seni ngeini ekkewe watten efeiengaw. Nge ruu ekkewe mwichen kuruma, ewe mwich an William me ewe mwich an Martin, ra mefi echik, tonong non fansoun patekich, me chommong ra mano.

Napengeni ekkei chon sai ra sai seni Liverpool, England, non May non 1856 ra fiti ruofoch siip. Ra wareiti ewe nenien kuruma non Iowa City non June me July. Inamo ika a wor kapasen omonen osukosuk, ir me ruu ekkewe mwichen aramas ra pwan no ngeni ewe Salt Lake Valley non nesopun ewe fansoun.

Preseten Brigham Young a akkom sinei ussun efeiengawen nonomun ekkei mwichen aramas non October 4, 1856. Ewe ran mwirin i a uta me mwen kewe Souneng non Salt Lake City me apasa, “Chommong me nein ach kewe brothers me sisters ra nom won ekkewe masies fiti kewe kuruma, oupwe uweireto ikei; sipwe tinono aninis ngenir mwen ewe fansoun patapat epwe poputa,”

I a tingorei ekkewe pisop ar repwe awora 60 mwichen tongki, 12 ika nap seni woken, me 12 ton pinewa amas me afata esinesinan, “Feinno me uweireto ekkana aramas non ekkewe masies.”

Ewe ukukun souneng ra akkom choni ei Mwichefen non ekkewe mwichen kuruma an Willie me Martine a arapakan 1,100. Arap ngeni 200 me nein ekkei auchean Souneng ra mano me won ewe an. Ika rese waroch ekkei chon aninis, pwan chommong repwe fen pwan mano.

Ewe monumonun ewe fansoun patapat a poputa ru chok wik mwirin ekkewe akkomwen chon aninis ra no seni Salt Lake City. Ewe uruon chochon ewe mwichen Willie me Martin ra awewei ewe nichipungun riaffou mwirin an ewe monumon a poputa. Ekkei uruo ra pwan esisinata ewe watten pwapwa nupwen ekkewe chon awora aninis ra wareitir.

Napanapen ewe fansoun wareto, Mary Hurren a apasa, “Chonun mas ra suputiw won sapen ekkewe mwan, me semirit ra poruk ren pwapwa. Mwitir chok nupwen ekkewe aramas ra tongeni aposano ar memef, ir meinisin ra fotopukutiw non ewe snow me ra kinisou ngeni Kot.”

Ruu ran mwirin, ewe mwich an Willie ra sai won kinikinin ewe an a kon aweires, ra feinno won ewe Rocky Ridge, non ew patekichin monumon. Ewe omuchunon me neir ese tori ewe neni tori kunok 5:00 nesosorun pwan ewe ew ran. Engon me unumon aramas ra mano me ra ireireno non ew peias.

Non November 7, ewe mwich an Willie ra arapakan ngeni ewe Salt Lake Valley, nge ena soran, mei pwan chok wor unumon ra mano. Ruu ran mwirin, ewe mwich an Willie ra karan tori Salt Lake, ikewe a wor apwapwan etiwetiw ngenir me ra ketiwenong non imwen ekkewe Souneng kewe.

Non chok pwan ena ran, an Martin ewe mwich ir mi chok 325 mwain won ewe an, ra soposopono ar riaffou seni patapat me nafangawen mongo. Fitu ran akkom, ra feinno epek ewe Chonupupu Sweetwater ar repwe tori met iei a iteni Martins Cove, ikewe ra epinukunuk pwe repwe kuna epet seni ewe patapat. Emon me nein kewe pioneer chon ei Mwichefen a apasa, “Feino epek ewe chonupupu a kon ngaw seni meinisin sai.” Ekkoch me nein ekkewe chon aninis—ussun semen semen semei David Patten Kimball, ewe a chok 17 ierin, fiti chienan kewe onuon, “George W. Grant, Allen Huntington, Stephen Taylor, me Ira Nebeker, ra nom non ewe konik fitu awa,” ra chok anisi ewe mwichen aramas repwe tikeno ngeni ewe epek.

Nupwen ra kon ngoneiti met ei a fis, ren ai kaeo pwan ussun ekkewe chon awora aninis, ua apareni pwe meinisin ir ra tapweno mwirin ewe soufos me fori met mi fokkun murino ne angasa ekkewe Souneng mi mwoch non ewe neni. Meinisin ekkewe chon awora aninis ir mi pwaracho, usun ekkewe pwan ekkewe chon mwotuk seni nenier.

Ai kaeo ussun porouser, ua afona ewe auchean chiechi nefiner me ewe nakatamen weweoch esemuch nein kewe chon mokut seni nenier. John me Maria Linford me nour kewe unumon at ir chon an Willie ewe mwich. John a mano fitu awa me mwen ewe aewin kumien chon awora aninis ra war. A fen ureni Maria pwe a pwapwa ar ewe fiti ewe sai. “Usap manaw ai upwe tori Salt Lake,“ me a apasa, “nge en me kewe at oupwe, me use nemenemeno ren mettoch meinisin a fisi ngenikich ika nouch kewe at repwe marita me forata ar famini non Zion.”

Preseten James E. Faust a awora ei murinon nesen sipwe chechemeni: “Non ewe aweiresin angang ren wan ekkewe pioneers kewe kuruma, sia kaeo eu wachemuken ennet. Meinisin sipwe weri an ewe emon chon enimenim we ekkei, me ewe aucheangaw me namotongaw non manauach a tongeni tenino ussun mettoch mi namotongaw me fori ach nuku epwe saram, unusoch me pochokun. Ussun mi wor watten metek, netipengaw, me napengeni netipechou ren meinisin, pachenong ekkana ra achocho ne kutta ar repwe fori mi pung me repwe nikitu. Nge iei kinikinin enimenim seni ekkei ren ach sipwe sisinei Kot.”

An Achasefanin me Manausefan ra anapanapa fansoun esemuch, ewe Chon Amanau a muti “ekkewe fofon mano, a angei ewe winen okkufu mano fan iten meinisin.” Ren ekkana rafen aier seni tipis, I a fen “wata pwisin won ar angangangaw me ar atai annuk, a fen angasereno, me a amenemenochu ekkewe mochenin pungoch.”

Ika ese wor ewe Achasefan, sise tongeni pwisin amanaua kich seni tipis me mano. Nupwen tipis a tongeni awora ew auchean angang non sossotuch kewe, ekkewe osukosuken non manauach ra fisita seni ekkewe mwan, ngawen ach finata, fofor mi ngaw seni ekkoch, me chommong mettoch me nukun ach tufichin nemeni.

Preach My Gospel a aitikich: “Nupwen sia anongonong won Jises Kraist me An Achasefan, I a tongeni anisi kich ach sipwe nikitu ngeni ach kewe sossot, semwen, me metek. Sia tongeni urono ren pwapwa, kinamwe, me ouruur. Mettoch meinisin ese pungupungoch usun manau a tongeni pungoch ren ewe Achasefan an Jises Kraist.”

Non ei fansoun Paska, sia anonga ach ekiek won ewe Chon Amanau me An asoren achasefan. Ewe Achasefan a awora epinukunuk me saram ren och fansoun minne me ren ekkoch a rochopwak me tipitipingaw. Pereseten Gordon B. Hinckley a affata, “Nupwen meinisin ekkewe uruo repwe chek, … ese wor met a fokkun murinno, fokkun amwarar, fokkun eingeing usun ei angangen chen.”

Ua nounou ngeni kemi unungat ourour minne ua ekieki pwe ra wenengeni ach fansoun.

Ewin, ousap wewengaweiti ewe auchean fori met sia tongeni ach sipwe amanaua ekkoch seni sossotun non manauer me ngunur.

Oruan, kinisou ne etiwa An ewe Chon Amanau ewe Achasefan. Kich meinisin sipwe achocho ne pwari meseik me pwapwa ina mo ika sia mesengeni kewe sosotun manau. Ach kokkot pwe sipwe manaueni epinukunuk won ewe an mi saram. Ua fen kakaton chienei we auchea, Mary, a fori ei non unusen manauan. Ua fen osufonu an saramen, apwapwan mwokutukut pwan mwo nupwen oua fen mesengeni osukosuk non unusen ekkewe ier.

Ai ounungatin ourour sipwe isenono ach kokkot ngeni ach fansoun ach sipwe nikitu ne nenengeni An ewe Chon Amanau Achasefan. Mei chommong anen ach sipwe fori ei non ach pusin angangen namanam. Inamo, fiti mwichen sakramen me angei ewe sakramen a fokkun wesewesen auchea.

A chok nonno auchean ach feinno non ew tempel ikewe a tufich me ia. Ewe tempel a awora ew soposopun ach chechemeni ussun An ewe Chon Amanau Achasefan me met a okkufu. Me, akkauchean, ach feitto non tempel a mut ngeni kich ach sipwe awora angangen amanaua ngun fan iten atongeach kewe mi mano me ach kewe neuo.

Pereseten Russell M. Nelson, atun ach ewe mwichenap a no, a pesei ei nongonong me apachata, “ Ekkewe feiochun non [Tempel] … ra aninis ne amonata ew mwichen aramas ewe epwe anisi monetan ewe fonufan ren ewe Oruen Wareto an ewe Samon!”

Sisap fokkun nemenono ekkewe asor me minen apiru an ekkewe tapin aramas akkom, nge ach ingeno, kinisou, me fen ngeni epwe ionapei ewe Chon Angasanon ewe fonufan me An asoren achasefan. Ua pwarata pwe ewe ki ngeni an ewe Sam kokkoten pwapwa ina ewe Achasefan a for meren ach Samon, Jises Kraist. I mi manau me emweni An Mwichefen. Ewe Achasefan an Jises Kraist a awora ewe amuchunon angangen amanaua seni ekkewe sosot sia mesengeni non ei manau. Non iten Jises Kraist, amen.