Ussun emon Kukkun Semirit

Jises a poputani ewe omuchunon ierin An manau ren an anapano an Noun kewe soufos kaeo. Ika An porous me An Mwichefen repwe soposopono seni I, epwe chommong nongonong repwe opurenong netipen ekkewe 12 mwan ekkewe ra sinei I ren arapakan chok 24 maram.

Non ran Jises a kuna ew anini nefinen ekkewe Engon me Ruemon me mwirin a eis, “Metena oua anini fengen nefinemi won?” A fat pwe ra sau, ra omochu ar fos, ewe rekot a apasa. Nge ei mi napanap seni meinisin sense a esina ekiekin netiper me mefi ewe akkomwan nikinikin namanam tekia. Iwe I “kokkorato emon kukkun semirit ngeni, …

“Iwe a apasa, Upwe apasa ngeni kemi, Pwe ika ousap siwin, o ussun chok ekkewe semirit, iwe ousap tonong non ewe muun nang.

Iwe ion epwe etikisonatiw inisin ussun ei kukkun semirit, epwe pwan napanap non ewe muun nang.

Epwe makketiw pwe pwan mwo mwen an Kraist uputiw, an King Benjamin kapasen emwirimwir mi pachenong ei auchean kapas usun an emon semirit tipetekison. A apasa, “Ewe inisin aramas i ewe chon koum ngeni Kot, … me epwe chok fis, feinfeino me esemuch, tiwenon chok ika a … winiti emon souneng seni ewe achasefanin Kraist ewe Samon, me winiti usun emon semirit, … tipetekison, … uren tong, … pwan mwo usun emon semirit a [ponuweni] seman we.”

Nge, mi fat pwe mi wor ekkoch napanapen semirit sise pesei. Rue me nimu ier a no, noun nei we unungat ierin at e ku fefinanwe nimu ierin won poun. Punuwen nei ewe nengin, mi tumunu ekkewe semirit non ena pwinin, a mwiitir aiti noun we nengin meinisin ekkewe nesenin omusomus a tongeni ekiekieta, a asopwano pwe mongean we kukkun meni ese mo nge sinei ika ifa ussun memefin ewe kuk won pau. Ena ngawen-kokkoten kapas an sam a fis ren chok ukkukun ew minich, menin ew minich esop, tori eu newomongun kechiw a achechehi asamwacho a feito seni rumwen ekkewe semirit, ikewe noun nei we nengin a pwetete ne kokkou, “Iei a sinei.”

Iwe met ena sipwe kuna non manauochun manauen kumien semirit? Met ewe a efisata an Kraist won Inisin epwe kechiw non ewe pweteten mokutukut non unusen ewe Puken Mormon? Met ewe Jises a afanafana nupwen I a koratiw ekein nang me chon tumun seni nang ar repwe rokopwanieno ekkana semirit, me annuku ngeni ekkewe mi mukono ar repwe “tumunu [nour] kewe kukkun“?

Sise sinei met a efisata meinisin ekkena, nge ua ekieki meni a fis pokiten ar nimenimoch me murino, ar pukutan tipetekison, me met a tongeni wato non manauach ika sipwe annomu.

Pwata ach ranin riaffou ra eiteit me ren emon pwe “namotmwan seni meinisin mi namotmwan”? Ifa usun pwe “namotongwan ekiek me ewe namanam tekian ekkewe noun aramas” ir ekkewe kapas minne ra wewe ngeni ewe watten imw mi wamong, a fokkun mano non ngun non an Liai ewe nemesepwi? Me ekkewe Zoramites, ena mwich ra iotek non ar mokutukut me kapas ra akomwa pusin ar mochen? Ren ir Alma a apasa, “O Kot, ra [iotek] ngonuk fiti awer, nupwen ra sikasini nonomur … fiti ekkewe namotmwanin mettochun fonufan.”

Ren sokofesenin, mi wor och mettoch a auchea, a nap nimenimochun, ika nap tekisonun seni an emon semirit iotek? A usun ita nang mi nom non ewe rum. Kot me Kraist ir mi ennet ngenir, nge me ren ekkoch mwirin, ewe memef a tongeni winiti usun etitipan.

Usun Elter Richard L. Evans a apasa sefani nap seni ekkoch 60 ier a no: “Chommong me neich sia apasa pwe kich Souneng, nge … sise aneasochisi I … Sia sufonu I, nge sise tapweno mwirin I … Sia apasa An kapas, nge sise manauenir.” “Sia ingeiti I, nge sise fen ngeni I.”

Epwe ifa sokofesenin manau ika ewe fonufan a asamonu Jises nap seni ewe oukukun pekin kukun steak seni fansoun me fansoun.

Nge semirit ir mi ennetin tongei I, me ena tong mi tongeni tikeri nefiner me pwan ekkoch non ewe nenien urumot. Ren eu annuk, pwan mo non ar ier kukkun, semirit ra mecheres ar repwe tong, mecheres, ne omusano, me ra takir ren pwapwa minne mi tongeni apweteteno ewe ngasangas mi kirikiringaw me kum.

Iwe, ewe tetten mi chok soposopono me soposopono. Nimenimoch? Nukunuk? Pworacho? Nikinikin?

Fitiei ne katon osufon me mwen Kot emon chienei fokkun achengicheng sarafo a pwomweni.

Non January 5, 2025—91 ran a no—Easton Darrin Jolley a angei ewe Aaronik Pristut me a seikita ngeni emon tiken non Ewe Mwichefenin Jises Kraist ren Aramas mi Pin non Fansoun Soponon.

Easton a mochen epwe pasini ewe sakramen ren an ewe Samon Faf ren fansoun nakatam ussun i mi chok chemeni. Nge ei tufich mi pin a echiechi ngeni ewe anoninenin nuokusun ika epwe turuno, epwe wor chon amangawa ika asawa me an famini.

Pwe nengeni, Easton a wor an choun semwen mi fokkun afeiengaw me sokkono, itan Ullrich congenital muscular dystrophy (apwangapwangen futuk). A fen sopweno ne amasowa manauen ren osukosuk me weires nupwen a angawano an epinukunuk me mochenin ren fansoun mwan. Ekis ngeni epwene mochitiw ne wawa wheelchair. An ewe famini rese kapas ussun met epwe ewitiwit ngeni mwirin ena.

Ewe Raninifen mwirin an ewe sikita, Easton epwene aewin pasini ewe sakrament. Me an monomonen epochokun ina ren an epwe tongeni pwarano inisin me ekkei mettoch mi pin ngeni saman we, ewe i pisop non ewe wart. Non an awitiwiti ena angang, i a fokkun tingor me sio me kechiw me pwan tingor sefan, me wau mefian pwe eseor pwan ion, ese wor emonepwe sotuni ne anisi. Ren chommong popun, ir mi monomonono me ren, a mochen epwe fori ei won pusin an me esap wor chon anisi.

Mwirin an ekkewe prist ra kinikisietiw ewe pinewa me efeiochu—ew esisinen inisin Kraist ewe mi tatakis—Easton, fiti inisin mi tatakis, a fetan rukuruk pwe epwe angei an ewe sepi. Iwe nge, mi wor unungat nonnochun eipweip seni ewe simenin ewe imwen mwich ngeni ewe nenien rong mi tekiata. Iwe, mwirin an angei an ewe sepi, a anangeta ne etekiata ukukun an tongeni me iseta an we sepien sakarament won ewe neni asen ewe nenien komoch ne fetan. Mwirin, a motiw won ew kewe nenien ipweta mi tekiata, fiti poun me ruofoch a weitata pechen ewe peniemwan ngeni ewe aewin ipweta. Mwirin a weitata peniefefinen pechen won ewe pwan chok nenien ipweta, tori an tota, non ew napanap mi weires, i a okkufu ren met tekian an weires usun ew epeip won chukun eipweipen Mount Everest.

Mwirin a omokutochu inisin an epwe wenechareta ren an epwe tongeni tota ngeni an epwe uta. I a pwan niwin sefan ngeni ewe sepi. Pwan ekkoch eipweip iwe a uta me mwen mesen ewe pisop, seman we, ewe, fiti chonun mesan a suputiw seni won mesan, a fori ukukun an tongeni seni an esap turufano noun ei unusochun porachon me nikitun at. Me Easton, fiti ngaseno me ew emenimen a ounusano won mesan, me meni epwe fen apasa, “Ua fen eningano [semei me] ua fen awesano ewe angang [a ngeniei] ai upwe fori.”

Nuku, nikitu, nimenimoch, nukunuk, afona, me, tori nesoponon, tong fan iten ena sam i a mochen epwe apwapwai. Ekkei me pwan ekkoch auchean mettoch a fori kich ach sipwe pwan apasa, “Ion epwe … etikesona inisin ussun ei kukkun semrit, pwan ussun chok auchean me non ewe muun nang.”

Fefinei me pwi me chiechiei, asetan ewe tettenin kewe sasing ra kon ningoch ua sinei pwe kewe monukon me semirit me sarafo mi tumunoch me ese or koukun momor ussun ekkena a wor rech ikenai. Ua pwarata pwe ir sasingin ewe muun Kot ra murinono won fonufan non meinisin an pochokun me ningoch.

Non ena chok pwan kapsen pwarata, Ua pwarata pwe non an serafo, Joseph Smith a kuna met a apasa pwe a kuna me a kapas fengen ngeni ir ekkewe a apasa pwe a kapas ngenir. Ua pwarata pwe emon tekison me nimenimoch Russell M. Nelson i noun Kot soufos-emon a angei wisan mwirin emon me chon osini. Feito seni eu unusen manauen anea, Ua pwarata pwe ewe Puken Mormon ina ewe puk ua anneani a ngenikich menemenoch ren met sia angei seni me foun nongonongun ai kukkun nonnom non eu muun chommong watten imw. Ua pwarata pwe pristut me iotek ra forsefani manauei—An Kraist pristut me ami iotek. Ua sinei meinisin ei mi ennet me apasa ai kapasen pwaratan non iten ewe mi kon nikitu me tekison me nein noun Kot at—Alpha me Omega, ewe Great I Am, ewe a irapengesino, ewe mi nikitu chon pwarata—pwan mo ewe Samon Jises Kraist, amen.