Aninis seni Nang ren Manau won Fonufan

Seni ewe Soufos Joseph Smith, ewe Samon a pwarano ekkoch mettoch usun manauach me mwen fonufan. Ikewe, kich sia fis pwe semirit ngun noun Kot. Pokiten Kot a mochen anisi Noun semirit repwe fefeita, A finata ne forata eu fonufan won minne sipwe tongeni angei ew inis, kaeo seni ach sinei, amari nikinik seni nang, me pwari ika sipwe apwonueta an Kot annuk. Ekkewe ir mi fich ngeni repwe “angei ning epwe kapacheta won mokurer feinfeino” (Abraham 3:26).

An epwe forata ekkewe nonnomun ei kokkot murino, Kot a fini Noun we Anamon pwe epwe ach Chon Amanau. Lucifer, ewe pwan an kokkot mi pesei epwe atano ewe pungun finata an aramas, a winiti Setan me a “katurutiw”.” Katuru ngeni ewe fonufan me amam seni ewe tufichin manau won fonufan, Setan a mumuta an epwe sossot “ne sotuni me ochunano aramas, me an epwe fotekireno fan an nemenem, ren ukukun ekkewe resap ausening ngeni mongungun [Kot]” (Moses 4:4).

Auchea ngeni an Kot kokkot napanap ren amaritan Noun semirit ina ar repwe sinei “apponu non mettoch meinisin” (2 Nifai 2:11). Usun chok futuken inisich rese tongeni pwisin watteno ika nonnom chok me nukun ar repwe pochokun ngeni ewe annukun gravity, iwe ach marita a pwan namot sipwe pochokun ngeni sossotun Setan me ekkoch sosotun ei fonufan. Akkauchean ren maritan ngun ina ewe namoten ach sipwe finata nefinen och me ngau. Ekkena ra fini och repwe fefeita ngeni fetanin manauer esemuch. Ekkena ra fini ngau—usun meinisin ra fori non sokopaten sossotun manauen fonufan—epwe namot ngenir aninisin ngaseno, minne emon Kot mi tong a fen ota an epwe awora.

Watten, pochokunen An Kot aninis non ei manau ina An awora emon Chon Amanau, Jises Kraist, ewe epwe riaffou ne moni niwinin me awora omusomusen tipis. Ena chenin me ningen Achasefan a awewei pwata nuku non ewe Samon Jises Kraist ina ewe aewin nongonongen ewe kapas allim. An Achasefan “epwe efisi ewe manausefanin ekkewe mi mano” (Alma 42:23), me a “achasefan[i] tipisin ewe fonufan” (Alma 34:8), a tonano meinisin ach tipis me ngeni ach Chon Amanau manaman ne anisi kich non ach apwangapwang.

Pekinon ena ningen totonunon tipis sia fori me ra musono, ewe kokkot an emon Sam won Nang mi tong a awora pwan chommong niffang ne eppeti kich, mi pachenong eppetich seni tipis seni nepoputan. Manauach iei a soun poputa ren emon sam me emon in. Ita wesen ochun, ir me ruemon repwe nom, fiti sokofesenin niffang ar repwe emweni ach marita. Ika esap ina, ar rese nom ina pekin ewe ungeni sipwe okkufu.

An Semach won Nang kokkot a awora pwan ekkoch aninis epwe emweni kich non ach sai won fonufan. Upwe kapas usun ekkei ruanu mettoch. Ouse mochen ousap omochu seni ei nei we nampa ruanu, pokiten ekkoch ekkei aninis ir mi fanger fesen. Kapachetan, mi pwan wor ekkoch umoumochun eppet mi pachengeni ekkei.

Aewin, Ua kapas usun ewe Saram ika Ngunun Kraist. Non ei auchean afanafan non ewe Puken Moronai, Moronai a makkei sefan met saman a apasa pwe “Ngunun Kraist a kawor ngeni emon me emon aramas, pwe i epwe sinei och seni ngau” (Moronai 7:16). Sia anneani ei pwan chok afanafan non ekkewe pwarata ikenai:

Me ewe Ngun a awora saram ngeni aramas mi feito ngeni fonufan; me ewe Ngun a asarama aramas meinisin non fonufan, ewe mi ausening ngeni mongungun ewe Ngun (Doctrine and Covenants 84:46).

Pwan sefan: Pun Nguni a titino non ewe fonufan pwe epwe asarama ewe mi tekison me nieman, me ngeni ewe kapungun ewe mi tipisinap (Doctrine and Covenants 136:33).

Preseten Joseph Fielding Smith a awewei ekkei uwokisin: “Ewe Samon esamo nikitano aramas (nupwen ra uputiw non ei fonufan) ar repwe nipakingaw, ar repwe kutta ewe saram me ennet, nge iteiten aramas … a uputiw fiti ewe pung ne angei emwen, ewe ourour, ewe fon seni ewe Ngunun Kraist, ika Saramen Ennet.”

Ewe oruwan me nein watten aninis a kawor me ren ewe Samon an epwe anisi kich ne fini met mi pung ina ekkoch ourour seni nang ir mi fis fengen non ekkewe pukefel pwe ir kinikinin ewe kokkotun amanau (kokkotun pwapwa). Ekkei ourour ir annuk, angangepin, me pwon mi pin.

Annuk ra forata ewe aan Samach won Nang a esisinano ren ach sipwe fefeita ngeni manau esemuch. Ekkewe aramas ra ekieki ekkewe annuk pwe ina ewe an Kot a finata ion epwe eriaffou rese weweiti ei popun an Kot kokkoten pwapwa. Won ena an, sia tongeni awesi ekis me ekis ewe namoten chiechi fengen me ach Chon Amanau me fich ngeni wattenon An manaman ne anisi kich won anach we ngeni ikewe ia I a mochen kich meinisin sipwe no ia. Samach won Nang a mochen meinisin Noun semirit repwe niwin ngeni ewe muun Selestial, ikewe Kot me ach Chon Amanau ra nonnom ie, me ach sipwe aani ewe sokkun manau an ekkena ra nom non ena ningen selestial.

Angangepin me pwon mi pin ir kinikinin ewe annuk a efisata ewe aan ngeni manau esemuch. Angangepin, me ekkewe pwon mi pin sia fori ren Kot non ir, ir tetten mi namot me eppet mi auchea won ena an. Ua sani ai ekieki pwe wisen pwon mi pin mi pwano pwe anongonong won an Kot kokkot, An kewe tekian feioch ra kawor ngeni ekkewe ra pwonei me mwan pwe repwe aneasochisi tichikin annuk me ekkewe ra apwonueta ekkena annuk.

Ekkoch pwan aninis Kot a ngeni kich ar repwe anisi kich ne fini mi pung ir ekkewe manamanen ewe Ngun mi Fel. Ewe Ngun mi Fel I ewe eunumenun kewe Unumon non Kot. An angang, mi awewetiw non pukefel, pwe epwe pwarata usun ewe Sam me ewe Nau, an epwe aiti kich, epwe achema ngeni kich mettoch meinisin, me emweni kich ngeni ennet meinisin. Ekkewe pukefel mi apachanong chommong awewe usun ekkewe “manamanen” ewe Ngun mi Fel, usun eu pwaratan ngun ren ponuwen ew kapaseis usun ennetin ewe Puken Mormon. Ew manaman esap rukengeni ewe niffangen ewe Ngun mi Fel, minne a kawor mwirin papatais.

Ewe Ngun mi Fel ina eu me nein ekkewe aninis mi nap an Kot fan iten Noun semirit mi nikitu. Ewe auchean ei niffang mi pwano non ewe ennet pwe a kan kawor mwirin aier me papatais ren konik, “iwe mwirin epwe feito ew omusomusen ami kewe tipis seni ekkei me seni ewe Ngun mi Fel” (2 Nifai 31:17). Aramas mi angei ei omusomusen tipis—iwe mwirin akasefosefani ar nimenimoch ren aier iteitan me manau anongonong won ekkewe pwon mi pin ra fori non ewe angangepinen ewe sakrament—me fich ngeni ewe pwon pwe ewe Ngun mi Fel, ewe Ngunun ewe Samon, epwe nonnom rer fansoun meinisin (Doctrine and Covenants 20:77).

Iei, Preseten Joseph F. Smith a aiti kich pwe ewe Ngun mi Fel epwe “asarama ekiekin aramas ren mettochun Kot, epwe peser atun ewe fansoun ar siwin ren ar fori mochenin ewe Sam, me epwe nom rer ne pwarata me fitir non unusen manauer, epwe fis pwe ewe ennetin me tumunun emwen non meinisin ennet me ourareno ran me ran ren pwapwa me mwanek, ren ew mochenin fori mi och ngeni aramas meinisin, ne engino seni muan nap seni fori mi muan, an epwe kirekiroch me umoumouch, tipepos me uren tong. Meinisin mi wor rer ei niffang ese kouk, ei foun pwei mi watte niwinin, ra soposopono ne kukkuta wenechar. Me nukun ewe aninisin ewe Ngun mi Fel,” Preseten Smith a osopwano, pwe “ese wor emon aramas a tongeni fetan non ewe aan mi wenechar me aukukun.”

Ren chommongun pochokunen aninis repwe emweni kich non ach sai won fonufan, mi enetipengaw pwe chommong rese monneta ngeni ar fansoun chu ngeni ach Chon Amanau me Chon Angasano, Jises Kraist. An kapas monomon usun ekkewe engon fopun, chommong ra kapas usun non ei mwichenap, a pesei pwe me nein ekkewe mi ketiw repwe churi I, ekkoch chok me neir resap monneta.

Kich meinisin mi sinei usun awewen ekkewe rese monneta: misineri mi niwin ekkewe ra akounoi ar maritan ngun ren fansoun patapateno, serafo ekkewe ra efeiengawa ar maritan ngun ren ar pwisin eimureno seni afanafanen me mwokutukutun Mwichefen, mwan ekkewe ra amangano ar seikita ngeni ewe Melkisetek Pristut, mwan me fefin—fan ekkoch mwirimwirin pioneer ika murinon sam me in—ekkewe ra fen no seni ewe aanen pwon me mwen ar repwe fori me apwonueta pwon mi pin non ewe tempel.

Chommong ekkena keangan ra fis nupwen memper rese tapweno mwirin nongonongen kokkotun pusin an emon iotek, kaeo pukefel iteitan, me aier iteitan fansoun meinisin. Sokofesenin, ekkoch ra tunano asofo sefanin pwon mi pin iteiten wik ren ar rese angei ewe sakrament. Ekkoch ra apasa pwe ewe Mwichefen ese awora ngenir met ra esuku; ra ekkesiwini met ra ekieki pwe mi namot ngeni fansoun mwer nap seni met ewe Samon a awora non An chommong afanafan me tufich ren ach angang ngeni ekkoch.

Tipetekison me nuku non ewe Samon ir ekkewe safean ekkena tokono seni. Usun ewe Puken Mormon a aiti kich, ewe Samon “a efeiochu me episekisekano ekkewe ra wanong ar nukunuk non i” (Ilaman 12:1). Nuku non ewe Samon ew mettoch mi namot ngeni ekkewe mi muanino ne anonofengeni ekkewe annukun Kot me afanafanen Noun soufos ngeni kunaen me sinenapen aramas.

Ua fen kapas usun ekkewe chommong aninis won fonufan Samach non Nang a awora ar repwe anisi Noun semirit ar repwe niwin ngeni I. Wisach me non ei pinin kokkot pwe sipwe nuku non Kot me kutta ach sipwe aea ekkei aninisin nang, akkaewin ewe Achasefan an Noun we Achenicheng, ach Chon Amanau me Chon Angasano, Jises Kraist. Uwa iotek pwe sipwe afanafana me manaueni ekkei nongonong, non iten Jises Kraist, amen.